خروج6
1پتہٕ ووٚن خداوندن موسیٰؔ ہس، "وۅنؠ وُچھ ژےٕ بہٕ کیاہ کرے بادشاہس تہٕ تسنٛدین لوٗکن۔ بہٕ تراوناون سُہ پننؠن لوٗکھ یلہِ۔ پننہِ طاقتہٕ سٟتؠ کرٕ بہٕ تسَ دٔباو یُتھ زنہٕ سُہ تِمن پننہِ ملکہٕ منٛزٕ لار کرِ!"2خداین تہِ ووٚن موسیٰؔ ہس، "بہٕ چُھس یہُوواہؔ خداوند۔3بہٕ چُھس سُہ یُس ابرہامسؔ، اسحاقؔس بیٚیہِ یعقوبسؔ نِشہ ظٲہر سُپد تہٕ تِمن ووٚنم بہٕ اوسس حق تعالیٰ، مگر تِمو توٚر نہٕ اصل پٲٹھؠ میون ناو یہُوواہؔ فِکرِ۔4مٮ۪تہِ کٔر تِمن برکت دِنس پٮ۪ٹھ رضامندی ظٲہر۔ مےٚ کوٚر تِمن سٟتؠ ملکہ کنعان دِنُک وعدٕ پیمانہٕ۔ تتھ مَلکس منٛز ٲسؠ تِم چوٗنٛکِہ غٲرم مَلکی ہِوؠ روزان۔5تمہِ علاوٕ، مےٚ چھےٚ اسرائیل کٮ۪ن لوٗکن ہنٛز کامہ ہنٛزِ سٕختی سٟتؠ تہنٛزٕ اِہنٛراۓ بوزمٕژ ییٚلہِ مِصرِیو تِم پننؠٕ غلام ٲسؠ تھٲوؠ متِؠ۔ پنُن دیُتمُت وعدہ چُھ مےٚ ہمیشہٕ یاد روزان۔6لہٰذا اسرائیل کٮ۪ن لوٗکن ون زِ یہِ ووٚن مےٚ: بہٕ چُھس یہُوواہؔ۔ بہٕ موٚکلاوناووٚ توٚہؠ مِصرین ہنٛزِ گۅبہِ کامہ ہنٛدِ بورٕ تلہٕ یتھ منٛز تِمو توٚہؠ پابند کرِمٕتؠ چُھو۔ تہنٛزِ غلامی نِشہ کرہو بہٕ توٚہؠ آزاد۔ بہٕ دِمہٕ تِمن پننہِ عظمتہٕ سٟتؠ تِمن سخت سزا، بہٕ دِمہٕ توٚہہِ نجات۔7بہٕ بناوو توٚہؠ پنٕنؠ قوم تہٕ بہٕ آسہ تُہنٛد خدایہِ، یمِس توٚہؠ عبادت چُھو کران۔ توٚہؠ زانو پزِ پٲٹھؠ زِ بہٕ چُھس خداوند خدا، یُس توٚیہِ مِصرین ہنٛدِ سٕخت غلامی ہنٛدِ بورٕ تلہٕ آزاد کڈن وول چُھ۔8بہٕ ترٛاووٚ توٚہؠ تتھ مُلکس منٛز یمیک وادٕ مےٚ ابرہامسؔ، اضحاقسؔ تہٕ یعقوبسؔ دِیتمُت اوس۔ توٚہؠ روزیٚو تتہِ ہمیشہِ خٲطرٕ۔ بہٕ، خداوند، چُھس یہِ وادٕ کران۔"9موسیٰؔ ووٚن تہِ اسرائیل کٮ۪ن لوٗکن، پوٚز تِمو کوٚر نہٕ تسَ پؠٹھٕ یقین۔ تِم ٲسؠ سیٹھاہ مایوس تکیازِ تِمن أسؠ غلٲم بنتھ سخ کٲم کرناوان۔10پتہٕ ووٚن خداوندن موسیٰؔ ہس،11"گژھِ تہٕ مِصرٕ کِس بادشاہس ووٚن دُبارٕ زِ سُہ دِین اسرائیل کٮ۪ن لوٗکن پننہِ ملکہٕ منٛزٕ نیٚبر گژھنکُ اِجازتھ!"12مگر موسیٰؔ ہن ووٚن یہُوواہؔ خداوندس، "یقیٖنن، ہرگاہ اسرائیل کؠو لوٗکو اسہِ نہٕ تتھ کنُ توجہ دِیتُمُت یہِ مےٚ تِمن ووٚن، بادشاہ دِییہ نہٕ تتھ کُن توجہ یہِ بہٕ تس وننہٕ ییٚلہِ زن میانہِ زبٲنؠ منٛز چُھ کٔجر چُھ۔"13پوٚز یہُوواہنؔ ووٚن ہارونؔس تہٕ موسیٰؔ ہس بیٚیہِ دیُت نکھ حکم زِ اسرائیلی لوٗکن تہٕ مِصرٕ کِس بادشاہس گژھو یُتھ زن اسرائیلی لوٗکھ مِصرچہِ غلامی نِشہ آزاد سپدن۔"14یِم چھِ قبیلن ہنٛدؠ اصلی سردار: یعقوبؔ سنٛدِس بٔڈِس نیٚچو روبنؔ سٕنٛدؠ اولاد ٲسؠ: حنوکؔ، فلُوؔ، حصرونؔ، تہٕ کرمیؔ۔ تِم ٲسؠ تِمن قبیلن ہنٛدؠ جد یِمن تِم ہیوؠ ناو ٲسؠ۔15شمعونؔ سٕنٛدؠ اولاد ٲسؠ: یموایلؔ، یمینؔ، اُہدؔ، یکینؔ، صحرؔ، بیٚیہِ ساولؔ۔ ساولؔ سنٛز موج ٲس ملکہ کنعانچؠ۔ تِم تہِ ٲسؠ قبیلن ہنٛدؠ جدِ یِمن ہیوؠ ناو ٲسؠ۔16لاوی سٕنٛدؠ اولادن ہُنٛدؠ ناو ٲسؠ: جیرسونؔ، قہاتؔ تہٕ مراریؔ۔ لاوی سنٛز عمٕر ٲس اکھ ہتھ تہٕ ستتِرہؠہ ؤرؠ ییٚلہِ سُہ مود۔17جیرسونؔ سٕنٛدؠ اولاد ٲسؠ لبنیؔ بیٚیہِ سمعیؔ۔ تِم ٲسؠ تِمن قبیلن ہُنٛدؠ جد یِمن تِم ناو ٲسؠ۔18قہاتؔ سٕنٛدؠ نیٚچوؠ ٲسؠ: عمرامؔ، اضہارؔ، حبرونؔ بیہِ عزییلؔ۔ قہاتؔ مود اکھ ہتھ تہٕ تیترِہ ؤرؠ عمرِ منٛز۔19مراریؔ سٕنٛدؠ اولاد ٲسؠ محلیؔ تہٕ موشیؔ۔ یِمن سارنےٕ قبیلن ہنٛدؠ جد ٲسؠ لاوی سنٛزِ ذُرؠ یٲژ منٛزٕ۔20عمرامؔ من کوٚر پننِس مٲلؠ سنٛزِ بنینہِ یوکبدؔس سٟتؠ خانٛدر۔ تمِس زایہِ ہارونؔ تہٕ موسیٰؔ۔ عمرامؔ سنٛز وانٛس ٲسؠ اکھ ہتھ تہٕ ستترہہہ ؤرؠ۔21اضہارؔ سٕنٛدؠ نیٚچوؠ ٲسؠ قورحؔ، نفجؔ تہٕ زِکریؔ۔22عزییلؔ سٕنٛدؠ نیٚچوؠ ٲسؠ میسائیلؔ، الصفنؔ تہٕ ستریؔ۔23ہارونؔن کوٚر الیشِبعؔ سٟتؠ خانٛدر۔ سۅ ٲس عِمیندآبؔ سنٛز کور تہٕ نحسونؔ سنٛز بیٚنہِ۔ الیشِبعؔ ہس زایہِ ژوٗر نیٚچوؠ، ندبؔ، ابیہوؔ، الِیعزرؔ تہٕ اِتمرؔ۔24قورحؔ سٕنٛدؠ نیٚچوؠ ٲسؠ اسیرؔ، القنہؔ تہٕ ابیاسفؔ۔ تِم ٲسؠ قورحویؔ لوٗکن ہنٛدؠ جد۔25ہارونؔ سنٛدؠ نیٚچوؠ الِیعزرؔن کوٚر فوطییٔلؔ سنٛزو کوریٚو منٛزٕ أکِس سٟتؠ خانٛدر، تہٕ تمِس زاو فینحاسؔ۔ یِم ٲسؠ قبیلٕکؠ زِٹھؠ، یِم پرٮ۪تھ نسلہٕ منٛز لاوی ذریٲژ منٛزٕ ٲسؠ۔26ہارونؔ تہٕ موسیٰؔ ٲسؠ تِم یِمن خداوندن ووٚن، "اسرائیل کؠن لوٗکن ہُنٛدؠ تمام قبیلہٕ کڈہُکھ مِصرٕ منٛزٕ نیٚبر۔"27یِم ٲسؠ تِم یمو مِصرٕ کِس بادشاہس سٟتؠ اسرائیلی لوٗکھ مِصرٕ منٛزٕ نیٚبر کرنس متعلق کتھ کٔر۔28یمہِ دوٚہہ خداوندن موسیٰؔ ہس سٟتؠ مِصرس منٛز کتھ کرِ۔29تٔمؠ ووٚن، "بہٕ چُھس خداوند۔ توٚہہِ پزِ مِصرٕ کِس بادشاہس تہِ سورےٕ ونُن یہِ بہٕ توٚہؠ ونہٕ۔"30مگر موسیٰؔ ہن ووٚن خداوندس، "مہربٲنی کٔرتھ میٚون بوز۔ بہٕ چُھس نہٕ اکھ رُت بولن وول۔ ادٕ کٔتھٕ پٲٹھؠ بوزِ بادشاہ میٚون یہِ بہٕ تمِس ونہٕ؟"
Bridge Connectivity Solutions Pvt. Ltd.