خروج40
1پتہٕ ووٚن یہُوواہنؔ موسیٰؔ ہس،2"مقدس خٟمہ کر تتھ جایہِ پؠٹھ کھڑا یتٮ۪ن ژےٚ مےٚ ورؠکہِ گوٚڈنکہِ رٔتہٕ کہ گوٚڈنکہِ دوٚہہ سمکھیکھ۔3وعدٕکِس صندوقس منٛز برَ کنؠن ہنٛدؠ تختہٕ یِمن پؠٹھ دٔہ حکم چھِ۔ تتھ برونٛہہ کنہِ تراو کٔھٹِتھ روزنہٕ باپتھ پردٕ آویزان۔4میز تھو مقدس خٟمس منٛز تہٕ تتھ پؠٹھ تھو امیُک سورےٕ سامان اصل پٲٹھؠ شیرتھ۔ پتہٕ انَ شمع دان تہٕ تتھ پؠٹھ تھو شمع۔5وُدٕ زالنہٕ خٲطرٕ سۅنہٕ سُنٛد قربان گاہ تھو وعدہ کس صندوقس برونٛہہ کنہِ تہٕ مقدس خٟمہ کِس دروازس پؠٹھ تراو پردٕ۔6قۅربٲنیہِ بزنہٕ خٲطرٕ قربان گاہ تھو مقدس خٟمہ کس دروازس برونٛہہ کنہِ یتٮ۪ن ژےٚ مےٚ سمکھیکھ۔7مقدس خٟمس تہٕ قربان گاہس منٛزس تھو حوض تہٕ تتھ منٛز بر آب۔8آنٛگُن بناونہٕ خٲطرٕ تراو نیٚبرؠ کِنؠ أنٛدؠ أنٛدؠ پردٕ آویزان تہٕ آنٛگنہٕ کس دروازس تہِ تراو پردٕ آویزان۔9پتہٕ تُل مٲلشہِ تیٖل تہٕ سُہ تراو مقدس خٟمس بیٚیہِ پریتھ کُنہِ چیزس یُس اتھ منٛز چُھ یتھ زن تِم سٲری شوٗژ سپدن پتہٕ کروکھ مےٚ کُن مخصوص۔10بیٚیہِ تراو کینٛہہ تیٖل قربان گاہس یتھ پؠٹھ کاہن قربان بٔزن تہٕ تِمن سارنےٕ چیزن پؠٹھ یِم تِم قربان گاہس پؠٹھ استعمال کرن۔ امہِ سٟتؠ سپدِ قربان گاہ میانہِ خٲطرٕ شوٗژ۔ مےٚ کُن مخصوص کٔرِتھ بنہِ یہِ مقدس۔11ہوضس تہٕ تمیچہ چوٚکہِ پؠٹھ تراو کینٛہہ تیٖل یُتھ تِم میانہِ باپتھ شوٗژ سپدن۔12پتہٕ أننُ ہارونؔ بیٚیہِ تمؠ سٕنٛدؠ نیٚچوؠ مقدس خٟمہ کس دروازس پؠٹھ تہٕ تِمن دِ سران۔13پتہٕ کرُن ہارونؔ اکھ کاہن سٕنٛدِ حثیتِ الگ میٲنؠ خدمت کرنہٕ خٲطرٕ تمس لٲگ تمؠ سُنٛد مقدس پوشاک بیٚیہِ مالُس تیٖل۔14بیٚیہِ انُکھ ہارونؔ سٕنٛدؠ نیٚچوؠ تہٕ تِمن لٲگ تِمن ہنٛدؠ خاص کُرتہٕ،15پتہٕ تراو تِمن پؠٹھ تہٕ تیل یتھٕ پٲٹھؠ ژےٚ تِہنٛدِس مٲلس تراوِتھ۔ امہِ سٟتؠ سپدن تِم میٲنؠ خدمت کرنہٕ خٲطرٕ شوٗژؠ۔ ژےٚ بناوہکھ تِم تہٕ تہنٛدؠ ینہٕ وٲلؠ نسٕل ہمیشہ کاہن تِمن پؠٹھ تیل تراونہٕ سٟتؠ۔"16موسیٰؔ ہن کرِ تِم سارے کامہِ بلکل تمی طریقہٕ یتھٕ پٲٹھؠ تمس یہُوواہنؔ کرنُک حکم دِیتمُت اوس۔17اسرائیل کہ دوٚیمہِ ورؠ یکہٕ گوٚڈنکہِ رٔتہٕ کہِ گوٚڈنکہِ دوٚہہ کوٚر لوٗکو مقدس خٟمہ کھڑا۔18موسیٰؔ ہن کوٚر مقدس خٟمہ کھڑا، تمیکؠ کھوٗرؠ، فریم، کرِ تہٕ تھمب۔19تمؠ تراوِ مقدس خٟمس پؠٹھٕ دوٚن تہَن ہنٛز غلافہٕ بلکل تِتھے پٲٹھؠ یتھٕ پٲٹھؠ یہُوواہنؔ موسیٰؔ ہس حکم دِیتُمُت اوس۔20پتہٕ تُلؠ موسیٰؔ ہن کنؠن ہنٛدؠ تِم زٕ تختہٕ یِمن پؠٹھ یہُوواہنؔ پنٕنؠ دٔہ حکم لیکھمٕتؠ ٲسؠ تہٕ ترٲوِن وعدہ کِس صندوقس منٛز۔ تمؠ ترٲوؠ تھوٗد تُلنہٕ خٲطرٕ ڈنڈٕ وعدہ کِس صندوق کؠن کٔرین منٛز بیٚیہِ تھوٚن تتھ پؠٹھٕ کنہِ سرپوش۔21پتہٕ ژون موسیٰؔ ہن وعدُک صندوق مقدس خٟمس اندر پاک جایہِ منٛز۔ تمؠ تروو کٔھٹِتھ روزنہٕ باپتھ وعدہ کِس صندوقس موٚٹ پردٕ آویزان یتھٕ پٲٹھؠ یہُوواہنؔ تمس حکم دِیتُمُت اوس۔22تمؠ تھو میز مقدس خٟمس اندر شمالکہِ طرفہٕ تتھ پردس نیٚبرؠ کِنؠ یمہِ سٟتؠ وعدُک صندوق کٔھٹِتھ اوس۔23تمؠ تھوؠ صاف پٲٹھؠ تتھ میزس پؠٹھ ژوٚٹ یہُوواہسؔ برونٛہہ کنہِ سجٲوتھ یتھٕ پٲٹھؠ یہُوواہنؔ موسیٰؔ ہس کرنُک حکم دِیتُمُت اوس۔24تمؠ تھو شمع دان مقدس خٟمس اندر جنوبکہٕ طرفہٕ میزس بُتھِ۔25پتہٕ تھوؠ تمؠ شمع دانس پؠٹھ ژٲنگؠ یہُوواہسؔ برونٛہہ کنہِ یتھٕ پٲٹھؠ یہُوواہنؔ موسیٰؔ ہس حکم دِیتُمُت اوس۔26تمؠ لوٚگ وُدٕ زالنہٕ باپتھ سۅنہٕ سُنٛد قربان گاہ مقدس خٟمس اندرٕ کنہِ تتھ پردس برونٛہہ کنہِ یمہِ سٟتؠ سؠٹھاہ زیادٕ پاک جاۓ کٔھٹِتھ ٲس۔27تمؠ زاجہِ تتھ پؠٹھ کینٛہہ مشکہٕ تُجہ تتھٕ پٲٹھؠ یہُوواہنؔ موسیٰؔ ہس حکم دِیتُمُت اوس۔28تمؠ تروو مقدس خٟمہ کس دروازس پردٕ آویزان۔29مقدس خٟمہ کس دروازس پؠٹھ تھو تمؠ قربان بٔزنُک قربان گاہ یتٮ۪ن سُہ یہُوواہسؔ سمکھان آسہ۔ پتہٕ کوٚر تمؠ ماز تہٕ اوٚٹ زٲلتھ تتھ پؠٹھ نیاز، یتھٕ پٲٹھؠ یہُوواہنؔ موسیٰؔ ہس حکم دِیتُمُت اوس۔30تمؠ تھو حوض مقدس خٟمس تہٕ سرتلیو قربان گاہس منٛزس تہٕ تتھ بُرُن آب۔31موسیٰؔ، ہارونؔ بیٚیہِ تمؠ سٕنٛدؠ نیٚچوؠ چٔھلؠ پننٕؠ اتھٕ تہٕ کھوٚر تتھ حوضس منٛز۔32ییٚلہِ تہِ تِم مقدس خٟمس منٛز گژھان ٲسؠ تہٕ ییٚلہِ تِم قربان گاہس نزدیک یوان ٲسؠ، تِم ٲسؠ تِتھے پٲٹھؠ پانس چھلان یتھٕ پٲٹھؠ یہُوواہنؔ موسیٰؔ ہس حکم دِیتُمُت اوس۔33تمؠ ترٲوؠ مقدس خٟمس، قربان گاہس تہٕ آنٛگنس أنٛدؠ أنٛدؠ پردٕ آویزان۔ پتہٕ واتنٲوؠ موسیٰؔ ہن مقدس خٟمہ تیار کرنچؠ کٲم انٛد۔34پتہٕ آو اوٚبر مقدس خؔمس ؤلنہٕ تہٕ مقدس خٟمہ او یہُوواہؔ سٕنٛدِ جلالہٕ سٟتؠ برنہٕ۔35تکیازِ سُہ اوٚبر یِس تتھ ولنہٕ آو تہٕ یہُوواہؔ سُنٛد جلال اوس سؠٹھاہ پرٮ۪زلان یمہِ کِنؠ موسیٰؔ ہیوٗک نہٕ مقدس خٟمس منٛز دٲخل سپدِتھ۔36تمہِ دوٚہہ پؠٹھٕ ییٚلہِ تہِ زانٛہہ یہُوواہؔ سُنٛد اوٚبر مقدس خٟمہ پؠٹھؠ کِنؠ وُڑان اوس تہٕ اسرائیلٕکؠ لوٗکھ ٲسؠ پننُ ڈیرِ وٹان تہٕ سفر ٲسؠ شروع کران۔37ہرگاہ سُہ اوٚبر روزہے تٔتی تہٕ تِم ٲسؠ تٔتی ٹھہران پتہٕ ٲسؠ اکِس دوٚہس انتظار کران یتھ زن اوٚبر اورٕ یورٕ ڈلہِ ہیے۔38سفرس دوران اوس دوٚہس منٛز یہُوواہؔ سُنٛد اوٚبر اسرائیل کٮ۪ن لوٗکن ہنٛدِس مقدس خٟمس ہؠرؠ کِنؠ آسان تہٕ راژ منٛز اوس تمؠ سُنٛد نار دزان۔ اسرائیلٕکؠ لوٗکھ ٲسؠ وچھتھ ہیکان زِ یہُوواہؔ اوس تِمن سٟتؠ۔
Bridge Connectivity Solutions Pvt. Ltd.