خروج39
1بضلیؔ ایلن، اہلیابنؔ تہٕ باقی ہُنر منٛد کٲرؠ گرو بنوو ہارونؔس لٲگنہِ خٲطرٕ خوبصورت مقدس پوشاک ییٚلہِ تمؠ یہُوواہسؔ پاک جایہِ پؠٹھ اکِس کاہن سٕنٛدؠ پٲٹھؠ خدمت کٔر۔ تِمو بنوو سُہ نیٖلس، بنفشی تہٕ ووزلہِ ییرٕ کِس کٔپرس بلکل تِتھے پٲٹھؠ یتھٕ پٲٹھؠ یہُوواہنؔ موسیٰؔ ہس حکم دِیتمُت اوس۔2تِمو بنوو اصل پٲٹھؠ زٲویٛل کتنہٕ آمتہِ نیٖلہ، بنفشی تہٕ ووزلہِ رنگہٕ پنو سٟتؠ کٔپرِ یتھ خٲلص سۅنہٕ تار سٟتؠ ٲس، مقدس افُودٕ۔3تِمو گرِ سۅنہٕ سنٛزِ زٲوجہِ فردٕ پتہٕ تِمن ژٹہٕ کپٹ کٔرِتھ بناوکھؠ زٲوجہِ پٔترِ تہِ تِم چھاوِکھ سٕژنہِ سٟتؠ زٲویٛلس کٔپرس پؠٹھ نیٖلس، بنفشی تہٕ ووزلِس رنگس منٛز۔4تِمو بنٲوِ افُودٕ کؠن دوشوٕے طرفہٕ اکوٹہٕ جوڑنہٕ خٲطرٕ پھیکؠ پٹہٕ۔5تِمو بنوٚو ہوشہِ سان اکھ وونمُت کمر بند یُس مقدس افُودس سٟتؠ رلان اوس یُس تِمو تمی کٔپرِ سٟتؠ بنوو یمہِ کٔپرُک افُودٕ اوس۔ تتھ کپرس پؠٹھ ٲس ہُنر مندی سان سٕژنہٕ سٟتؠ نیوٗل، بنفشی، ووزل پن تہِ سۅنہٕ پن چھاونہٕ آمُت، پتہٕ اوسُک تتھ افُودٕ بلکل تمی طریقہٕ سوٕمُت یمہِ طریقہٕ یہُوواہنؔ موسیٰؔ ہس حکم دِیتمُت اوس۔6تِمو ژٹؠ زٕ سلیمٲنی کنہِ تہٕ تِمن پؠٹھٕ کھولُکھ خۅش نما سۅن۔ تِمو کھنؠ تِمن کننؠ پؠٹھ یعقوبؔننؠ باہن نیٚچوٮ۪ن ہنٛدؠ ناو یتھٕ پٲٹھؠ کانٛہہ اکھ اکِس مُہرِ باپتھ واجہ پؠٹھ کھنن چُھ۔7تِمو دبٲیہِ تِم کنہِ مقدس افُودکؠن پھیکؠ پٹن پؠٹھ یُتھ زن اسرائیلٕکؠ باہ قبیلہٕ یاد روزن بلکل تِتھے پٲٹھؠ یتھٕ پٲٹھؠ یہُوواہنؔ موسیٰؔ ہس حکم دِیتمُت اوس۔8تمؠ بنٲو مقدس سینہٕ بند تمی سامانُک یمیُک مقدس افُودٕ ہُنر مندی سان سٕژنہِ سٟتؠ زٲویٛل کتنہٕ آمتہِ کپرس پؠٹھ تِتھے پٲٹھؠ سۅن نیٖلہ، بنفشی تہٕ ووزلہ پننہٕ سٟتؠ لاگنہٕ آمُت اوس۔9سینہٕ بند بناونہٕ خٲطرٕ کوٚر سُہ کپرِ تِمو دوگنؠ یُتھ اتھ اکھ چورس ترووُہ سینٹی میٹر زیوٹھ تہٕ ترووُہ سینٹی میٹر خجرٕ سینہٕ بند تیار سپد۔10تِمو دبٲیہٕ تتھ سینہٕ بندس پؠٹھ قٟمتی کنؠن ہنٛزٕ ژور لٲنہٕ۔ گوٚڈنچہِ لٲنہِ منٛز ٲسؠ اکھ ووزل لعل، گوہر، اکھ زرد یاقوت تہٕ اکھ ووزل زمرد۔11دوٚیمہِ لٲنہِ منٛز ٲسؠ اکھ نیوٗل زمرُد، اکھ شبِ چراغ نیٖلم، تہٕ اکھ سفید ہیٖرٕ۔12ترٛیمہِ لٲنہِ منٛز ٲسؠ اکھ سُرخ گوہر، اکھ سفید سنگِ سلیمٲنی تہٕ اکھ بنفشی یاقوت۔13ژورمہِ لٲنہِ منٛز ٲسؠ اکھ زرد گوہر، اکھ سنگِ سلیمٲنی تہٕ اکھ سبز برجد۔ تِمو لٲگؠ پریتھ کنہِ سۅنہٕ سٕنٛدؠ لۅکٕٹؠ فریم انٛدؠ انٛدؠ۔14تِمو کھنؠ تِمن کنؠن پؠٹھ یعقوبنٕنؠؔ باہن نیٚچوٮ۪ن ہنٛدؠ ناو زن تہٕ ٲسؠ تِم مہرِ ہنٛدِ خٲطرٕ واجہ بناوان۔ یِمن کنؠن ہنٛدؠ ناو ٲسؠ اسرائیل کٮ۪ن باہن قبیلن ہنٛز نمایندگی کران۔15مقدس سینہٕ بندس سٟتؠ جوڑنہٕ خٲطرٕ بنٲوِ تِمن خٲلص سونچہِ زٕ رزٕ یِم زن ور دار آسہ۔16تِمو بنٲوِ زٕ سجٲونؠ سۅن سنٛز ترتیبہِ تہٕ زٕ سۅنہٕ سنٛز واجہ تہٕ تِم جوٗڑکؠ مقدس سینہٕ بندس ہیرمین کونن سٟتؠ۔17تِمو گنڈؠ سۅنہٕ سنٛز رز اکہِ اندٕ اکِس واجہ سٟتؠ سینہٕ بندٕ کِس ہیرِمس کونس پؠٹھ۔18تِمو دبٲیہِ پریتھ رزِ ہُنٛد دوٚیِم اند تِمن سجاونہٕ آمتیٚن ترتیبن سٟتؠ یِمن منٛز کنہِ بند آسہ پتہٕ لٲجکھ مقدس افُودس برونٛہہ کِنؠ پھیکؠن ہنٛزن پترن سٟتؠ۔19پتہٕ بنٲوؠ تِمو بیٚیہِ زٕ سۅنہٕ سٕنٛدؠ کٔرؠ تہٕ تِم وٲٹِکھ مقدس سینہٕ بنٛدس اندرمہِ انٛدٕ مقدس افُودس پتہ۔20تِمو بنٲوؠ بیٚیہِ سۅنہٕ سٕنٛدؠ زٕ کٔرؠ تہٕ تِم وٲٹِکھ پترن سٟتؠ برونٛٹھمہِ اندِ بُنہٕ کنہِ یتین پھیٚکؠن ہنٛزٕ پترٕ مقدس افُودس سٟتؠ کمر بندس ہیرؠ کِنؠ رلان چھےٚ۔21تِمو گنڈؠ سینہٕ بندکؠ کٔرؠ افُودٕ کؠن کرین کُن اکہِ نیٖلہ فیتہٕ سٟتؠ، یُتھ زن سینہٕ بند روزِ کمربنٛدس ہیٚور کُن تہٕ سُہ ڈلہِ نہٕ افُودس نِشہ۔ تِمو کٔرؠ یِم سٲری چیز بلکل تِتھے پٲٹھؠ یتھٕ پٲٹھؠ یہُوواہنؔ موسیٰؔ ہس ہدایت دِیتمُت اوس۔22بضلیؔ ایلن اوٚن اکھ وووُر یمؠ صرف نیٖلہ پنہٕ سٟتؠ سُہ لباس تیار کوٚر یُس ہارونؔ مقدس افُودس انٛدؠ کِنؠ نٲلؠ تراوِہے۔23اتھ اوس باقی پلوو ہنٛدؠ پٲٹھؠ سہِ منٛزس نال یُس تِمو أنٛدؠ أنٛدؠ پجرٲوؠ یُتھ سُہ پھٹنہٕ نِشہ بچہ۔24لباسکس دامنس لٲجؠ تِمو سۅ سجاوٹھ یوٚسہِ دٲن میٚوس سٟتؠ رٔلان ٲس یِس تِمو نیٖلہ، بنفشی تہٕ ووزلہِ ییرٕ پنو سٟتؠ وونِمٕژ ٲس۔25تِمو بنٲوِ خٲلص سونچہِ گنٹیہِ تہٕ لٲجکھ چوغہِ کس سٲرسےٕ دامنس أنٛدؠ أنٛدؠ ہر کُنہِ سجاونہٕ آمتِس دٲنس منٛزس۔26لہٰذا ترتیب روٗزؠ گھنٹی، دٲن، گھنٹی، دٲن تہِ یتھۓ پٲٹھؠ روٗدؠ سٲرسےٕ چوغہٕ کس دامنس أنٛدؠ أنٛدؠ۔ سُہ چوغہٕ اوس ہارونسؔ تمہِ وِزِ لاگُن ییٚلہِ سُہ کٲننٕؠ سنٛز کٲم کرِ، بلکل تِتھے پٲٹھؠ یتھٕ پٲٹھؠ یہُوواہنؔ موسیٰؔ ہس حکم دِیتمُت اوس۔27أکؠ ہُنر منٛد وووُرؠ کٔرؠ اصل زٲویلہِ کپرکؠ زیٹھؠ نرؠ دار کُرتہٕ ہارونؔ تہٕ تمؠ سنٛدین نیٚچوٮ۪ن ہنٛدِ خٲطرٕ تیار،28زٲویلِس کٔپرس بنایکھ دستار تہٕ ٹوٚپہِ تہٕ پاجامہٕ بنٲوِکھ موٚٹِس کپرس،29تہٕ کمربند بنووکھ زٲولہِ کپرُک یتھ نیوٗل، بنفشی تہٕ ووزل ییرٕ سٕژنہِ سٟتؠ سجاونہٕ آمُت اوس، یتھٕ پٲٹھؠ یہُوواہنؔ موسیٰؔ ہس حکم دِیتمُت اوس۔30تِمو بنٲوؠ صاف کرنہٕ آمتہِ سۅنہٕ سٟتؠ اکھ مقدس سجاومُت زیور تہٕ تتھ پؠٹھ کھنووُکھ یِم لفظ، "یہُوواہسؔ مخصوص، "یتھٕ پٲٹھؠ اکِس مُہرِ باپتھ واجہ پؠٹھ کھنن چھِ۔31تِمو گُنڈ تتھ اکھ نیوٗل فیتہِ یُتھ زن دستارس پؠٹھٕ روزِ، یتھٕ پٲٹھؠ یہُوواہنؔ موسیٰؔ ہس حکم دِیتمُت اوس۔32امہِ پتہٕ واتنٲوؠ تِمو تمہِ مقدس خٟمچؠ سٲرۓ کٲم اند یتٮ۪ن تِم یہُوواہسؔ سمکھن۔ اسرائیل کیٚو لوٗکو ٲس پریتھ کانٛہہ کٲم بلکل تِتھے پٲٹھؠ انجام دِژمٕژ یتھٕ پٲٹھؠ یہُوواہنؔ موسیٰؔ ہس سۅ کرنُک حکم دِیتمُت اوس۔33کٲرؠ گرو ہوو موسیٰؔ ہس مقدس خٟمکؠ ڈانچہِ: خٟمہ تہٕ تمیٛک سورے سامان، تہنٛدؠ گُنڈ، فریم، کرِ، تھمب، کھوٗرؠ،34سُرخ کٹن ہنٛزٕ رنگنہٕ آمژن بستن ہنٛز غلاف تہٕ چھرٕ بستن ہنٛز غلاف تہٕ پردٕ،35وعدُک صندوق، ڈنڈٕ، سرپوش،36میز تہٕ تمکؠ بانہٕ، مقدس ژوٚٹ خدایس برونٛہہ کنہِ پیش کرنہٕ باپتھ،37خٲلص سونُک شمع دان تمکؠ سٲری ژٲنگؠ اکِس لٲنہِ منٛز ہٮ۪تھ، تمکؠ بانہٕ تہٕ تمیک زالنہٕ باپتھ تیٖل،38وُدٕ زالنہٕ خٲطرٕ سۅنہٕ سُنٛد قربان گاہ، مٲلش کرنہٕ خٲطرٕ تیٖل، مشکہٕ دار وُدٕ، مقدس خٟمکہِ دروزُک پردٕ،39سرتلہِ ہُنٛد قربان گاہ تہٕ تمچؠ سرتلہِ ہنٛز جٲلؠ، ڈنڈٕ تمکؠ سامان، حوض تہٕ تمچؠ چوٗکؠ،40آنٛگنس أنٛدؠ أنٛدؠ پردٕ، تھمب تہٕ کھوٗرؠ، آنٛگنس منٛز دٲخل سپدنہٕ خٲطرٕ دروازُک پردٕ، رزٕ تہٕ میخہٕ تہٕ تِم سٲری چیز یِم مقدس خٟمس منٛز خدمت کرنس منٛز بکار لگہ ہن یتٮ۪ن تِم یہُوواہسؔ سمکھن۔41ہارونسؔ تہٕ تمؠ سنٛدین نیٚچوٮ۪ن ہنٛدِ خٲطرٕ خوبصورت لباس یُس تِم پاک جایہِ منٛز خدمت کرنس دوران لاگن۔42اسرائیل کیٚو لوٗکو ٲس سٲرےٕ کٲم تِتھے پٲٹھؠ کٔر مٕژ یتھٕ پٲٹھؠ یہُوواہنؔ موسیٰؔ ہس یہِ کٲم کرناونُک حکم دِیتمُت اوس۔43پتہٕ کوٚر موسیٰؔ ہن تتھ سٲرسےٕ ملاحظ یہِ تِمو بنوومُت اوس۔ تِمو اوس پٔزؠ پٲٹھؠ پریتھ کانٛہہ چیز تمی طریقہٕ بنوومُت یمہِ طریقہٕ یہُوواہنؔ تِمن حکم دِیتمُت اوس۔ پتہٕ دِژ موسیٰؔ ہن تِمن کٲم کرن والین برکت۔
Bridge Connectivity Solutions Pvt. Ltd.