خروج38
1بضلیؔ ایلن بنوو ککر لکٕرِ سٟتؠ قۅربٲنہِ بزنہٕ باپتھ قربان گاہ یُس مربع اوس، یمیٛک زیچھر پریتھ طرفہٕ ڈھایہِ میٹر تہٕ تٔھزر ڈوٚڈ میٹر اوس۔2تمؠ بنٲوؠ امِکؠن ژوٚشوٕنی کوٗنن پؠٹھ ہینگ ہیوؠ یِم تمؠ اَمی لکٕرِ ٹکرِ منٛز کڈؠ یمیٛک قربان گاہ بناونہٕ آمُت اوس۔ تمؠ ؤج تتھ سارسے قربان گاہس سرتل۔3تمؠ بنٲوؠ قربان گاہ خٲطرٕ سٲری سامان: کڑاییہِ، چونچہ، بانہٕ، ماز رننہٕ خٲطرٕ چمٹہٕ، گرم ژنہِ پکناونہٕ باپتھ بالٹیہِ، یِم سٲری سامان ٲسؠ سرتلہِ ہنٛدؠ۔4تمؠ بنٲوؠ سرتلہِ ہنٛز اکھ جٲلؠ یتھ منٛز تیٚونٛگل تہٕ لکٕر روزِ تہٕ سۅ جٲلؠ تراوِن قربان گاہس أنٛدؠ أنٛدؠ گیرِس تل یۅسہٕ زن اندرٕ نٮ۪صفس تام بوٚن ٲس۔5تمؠ بنٲوؠ سرتلہِ ہنٛدؠ ژور کٔرؠ یِمن منٛز جالہِ ہنٛدِ باپتھ ڈنڈٕ تراونہٕ یِہن تہٕ تِم دبٲین تمکؠن ژورن کوٚنن سٟتؠ۔6تمؠ بنٲوؠ تِم ڈنڈٕ ککر لکٕرِ ہنٛدؠ تہٕ تِمن ؤجِن سرتل۔7تمؠ تراوؠ تِم کٔرؠ قربان گاہس پریتھ طرفہٕ تہٕ تِمن منٛز تراوِن ڈنڈٕ تُلنہٕ خٲطرٕ۔ تمؠ بنوو قربان گاہ تختو سٟتؠ یُس منٛزس کھوٚکھُر اوس۔8تمؠ بنٲوؠ حوض تہٕ تمیچؠ چوٖکؠ سرتلہِ ہنٛز۔ سۅ ٲس أنہٕ سرتل یۅسہ تِمن زنانن ہنٛدِ خٲطرٕ ٲس یمہٕ خٟمہ کِس دروازس پؠٹھ آسہ خدمت کران۔9تمؠ بنوو مقدس خٟمس أنٛدؠ أنٛدؠ اکھ آنٛگُن یتھ تمؠ جنوب کہ طرفہِ پنژاہ میٹر زیوٹھ اکھ زٲویٛل پردٕ اَویزان تراو10اتھ ٲسؠ وُہ سرتلہِ ہنٛدؠ تھمب یِمن سرتلہِ ہنٛدؠ کھوٗرؠ تہٕ کُنڈٕ ٲسؠ بیٚیہِ چٲندِ ہنٛدؠ گنڈ۔11تمؠ تراوؠ شمالہ طرفہٕ آنٛگنس پنژاہ میٹر پردٕ وُہن تھمبن پؠٹھ اویزان یِمن سرتلہِ ہنٛدؠ کھوٗرؠ، تہٕ کُنڈٕ ٲسؠ بیٚیہِ ٲسِکھ چٲندِ ہنٛدؠ گنڈ۔12مغرب طرفہٕ تراو تمؠ آنٛگنس دہن تھمبن پؠٹھ پنژٕ میٹر پردٕ اویزان یِمن کھوٗرؠ، کُنڈٕ تہٕ چٲندِ ہنٛدؠ گنڈ ٲسؠ۔13مشرقہٕ طرفہٕ تہِ اوس تتھ 25 میٹر خجرٕ پردٕ۔14تمؠ بنوو دروازس اکہِ طرفہٕ خٲطرٕ ساڑِ ستتھ میٹر زیوٹھ پردٕ یتھ ترےٚ تھمب تہٕ کھوٗرؠ ٲسؠ۔15تمؠ بنوو آنٛگنس دروازکہِ مُخٲلف طرفہٕ ساڑٕ ستتھ میٹر زیوٹھ اکھ پردٕ یتھ ترےٚ تھمب تہٕ کھوٗرؠ ٲسؠ۔16تتہِ ٲسؠ آنٛگنس انٛدؠ أنٛدؠ سٲرؠ پردٕ زٲولؠ کتنہٕ آمتہِ کٔپرکؠ۔17تمام تھمبن ٲسؠ سرتلہِ ہنٛدؠ کھوٗرؠ یِمن چٲندِ ہنٛدؠ کٔلہٕ ٲسؠ۔ تھمب، کُنڈٕ تہٕ ولتؠ ٲسؠ چٲندِ ہنٛدؠ۔ آنٛگنہٕ کیٚن تھمبن ٲسؠ اکھ گوٚل چٲندِ ہنٛدؠ روغن کھٲلتھ۔18آنٛگنٕکؠ دروازِ خٲطرٕ بنٲوؠ تِمو اصل پٲٹھؠ دوٗگناونہٕ آمتہِ پنُک زٲویٛل اکھ پردٕ یتھ پؠٹھ أکؠ مٲہر وونن وٲلؠ سٕژنہِ سٟتؠ نیٖلہ، بنفشی تہٕ سُرخ پنَہٕ سٟتؠ کٲم کٔر۔ یہِ پردٕ اوس دٔہ میٹر زیوٹھ تہٕ ڈھایہِ میٹر تھوٗد، یتھٕ پٲٹھؠ آنٛگنٕکؠ باقی پردٕ ٲسؠ۔19اتھ ٲسؠ ژور تھمب یِمن سارنے ٲسؠ سرتلہِ ہنٛدؠ کھوٗرؠ۔ تِمو لٲگؠ تِمن تھمبن ہنٛدین کٔلن چٲندِ ہنٛدؠ کُنڈٕ بیٚیہِ، ٲسؠ تِمن چٲندِ ہنٛدؠ ولتؠ۔20مقدس خٟمہٕ تہٕ آنٛگنٕکؠ پردٕ گنڈنہٕ خٲطرٕ بنایہِ تِمو سرتلہِ ہنٛزٕ سارے میخہٕ۔21یہِ چُھ تمہِ سامانُک سورے اکھ فہرست یُس کٲرؠ گرو مقدس خٟمہ بناونہٕ خٲطرٕ استعمال کوٚر یمہِ باپتھ دہہ حکم ٲسؠ۔ موسیٰؔ ہن اوس لاوی قبیلہٕ کؠن کینٛژن نفرن اکھ فہرست لیکھنُک ہدایت دِیتمُت۔ ہارونؔ کاہن سٕنٛدؠ نیٚچوؠ اِتمرؔن ٲس تِمن نفرن پؠٹھ نظر تھٲومٕژ یِمو یہِ لیوکھ۔22یہُوداؔ قبیلکؠ اوریؔ بن حورؔ سٕنٛدؠ نیٚچوؠ بضلی ایلؔن ٲسؠ تِم سٲری سامان تیار کٔرؠ مٕتؠ یِم تیار کرنُک حکم یہُوواہنؔ موسیٰؔ ہس دِیتمُت اوس۔23دانؔ قبیلکؠ اخیسمُکؔ سٕنٛدؠ نیٚچوؠ اہلیابنؔ کٔر بضلیؔ ایلس سٟتؠ کٲم یُس کُندٕ کٲری منٛز اکھ مٲہر کٲرؠ گر اوس یمؠ فنکارانہٕ چیز تیار کٔرؠ۔ تمؠ بنٲوؠ سٕژنہِ سٟتؠ نیٖلؠ، بنفشی، تہٕ سُرخ ییٚرٕ پن لٲگتھ کپرس پؠٹھ نقشہ۔24سُہ سورےٕ سۅن اوس نو شتھ تہٕ پنٛژہٲٹھ 965 کلو گرام وزنہٕ یُس تِمو مقدس خٟمہ تیار کرنس منٛز استعمال کوٚر۔ تِمو کوٚر تتھ سوٚنس سرکٲری پیمانہٕ سٟتؠ وزن یُس لوٗکو یہُوواہسؔ نیازکِس صورتس منٛز پیش کوٚرمُت اوس۔25مردم شمٲری وِزِ یوس چٲندؠ سرکٲری اہلہ کارو لوٗکن نِشہ ہدیہِ روٚٹ تٔمیک وزن اوس سرکٲری پیمانہٕ لٲگتھ ترےٚ ساس ژور ہتھ تہٕ وُوہہ کلو گرام۔26تِمو ٲسؠ تقریبن وُہ وری وٲنسہِ ہنٛدؠ سٲری مرد گنٛزرٲومِتؠ تہِ پرٛتھ أکؠ مردن ٲسؠ سرکٲری پیمانہٕ مطٲبق پانٛژھ گرام وزنچؠ چٲندؠ دِژمٕژ۔ مردن ہُنٛد سورےٕ تعداد اوس شیہٚ لچھ ترےٚ ساس پانٛژھ ہتھ تہٕ پنٛژاہ۔27امہِ منٛز لگؠ ترےٚ ساس ژور ہتھ کلو گرام چٲندؠ تھمبن تلہِ کھوٗرؠ بناونس یِمو سٟتؠ مقدس خٟمکؠ پردٕ کھڑا گییہِ۔ تِمو کٔرؠ ہتھ کھوٗرؠ بناونس پؠٹھ ژویہِ ترہ 34 کلو استعمال۔28باقی وُہ کلو چٲندِ سٟتؠ بنٲوؠ تِمو تھمبن ہنٛدِ خٲطرٕ کُنڈٕ یِمو سٟتؠ تھمبن ہنٛدؠ کٔلہٕ بند کرنہٕ آیہِ تہٕ گول کُن سپدؠ تیار۔29لوٗکو ٲس ہدیہ رنگؠ زٕ ساس ژور ہتھ کلو گرام سرتل پیش کٔر مٕژ۔30سرتلہِ سٟتؠ بنٲوؠ تمؠ مقدس خٟمہ کِس دروازس پؠٹھ تھمبن ہنٛدؠ کھوٗرؠ، قربان بزنہٕ خٲطرٕ قربان گاہ امِچ جٲلؠ تہٕ امِکؠ سامان،31پردن کھڑا کرنہٕ خٲطرٕ تھمبن ہنٛدؠ کھوٗرؠ یِمن آنٛگنس أنٛدؠ أنٛدؠ ٲسؠ، آنٛگنہٕ کِس دروازکؠ کھوٗرؠ، مقدس خٟمہ خٲطرٕ تہٕ آنٛگنس أنٛدؠ أنٛدؠ پردن خٲطرٕ میخہٕ۔
Bridge Connectivity Solutions Pvt. Ltd.