خروج34
1یہُوواہؔ رود موسیٰؔ ہس سٟتؠ کتھٕ کران، "تِمن دوٚن کنؠن ہنٛدین تختن ہیوؠ بنوٚو زٕ تختہٕ یمؠ ژےٚ پھٹرٲویتھ۔ پتہٕ لؠکھٕ بہٕ تِمن پؠٹھ تیٖ یہِ مےٚ گۅڈنکؠن تختن پؠٹھ لؠوکھمُت اوس۔2پگاہ صبحس خٲطرٕ سپد تیار تہٕ مےٚ نِشہ کھس کوہِ سینا کِس تینتٲلِس پؠٹھ تہٕ روز کھڑا مےٚ برونٛہہ کنہِ۔3کٲنسہِ مہَ دِ پانس سٟتؠ ہیٚور کھسنُک اجازت۔ بہٕ چُھس نہٕ یژھان بیٚیہِ کانٛہہ گژھِ بالس پؠٹھ کُنہِ تہِ جایہِ آسُن۔ بالس نکھٕ گژھن نہٕ تیرؠ یا چارووے گھسہٕ کھینہٕ ینؠ۔"4لہٰذا موسیٰؔ ہن گرؠ گوٚڈنِکؠن تختن ہیوٗؠ زٕ کنیو تختہٕ۔ سُہ ووٚتھ صبحس سُلے تُلین تِم کنیو تختہٕ پننؠن اتھن منٛز تہٕ کھوٚت کوہِ سینا کِس تینتٲلس پؠٹھ یتھٕ پٲٹھؠ تمس یہُوواہنؔ ووٚنمُت اوس۔5پتہٕ ووٚتھ یہُوواہؔ زیچھہِ اوٚبرٕ لانگہِ منٛز تہٕ سپد موسیٰؔ ہس سٟتؠ استادٕ۔ پتہٕ کوٚر یہُوواہنؔ پننہِ ناوکھ اعلان، "یہُوواہؔ۔"6یہُوواہؔ دراو تمس برونٛہہ کِنؠ تہٕ دِژن کریکھ، "بہٕ چُھس یہُوواہؔ خدا۔ بہٕ چُھس ہمیشہ لوٗکن سٟتؠ رحم دلی تہٕ مہربٲنی سان پیش یوان تہٕ مےٚ چُھنہٕ ؤلؠ ؤلؠ شرارت کھسان۔ بہٕ چُھس پننیٚن لوٗکن سٟتؠ بے حد محبت کران بیٚیہِ تِمن سٟتؠ کرِمٕتِس وعدس وفٲیی کران۔7بہٕ چُھس ساسہٕ بدین لوٗکن ہنٛدین نسلن وژھِ وٲنجہِ لول برن وول۔ بہٕ چُھس لوٗکن ہنٛدؠ خطا، بدی تہٕ گناہ معاف کرن وول۔ پوٚز بہٕ دِمہٕ مجرمس یقیٖنن سزا۔ ہرگاہ لوٗکھ غلط کامہِ کرِن، تہٕ بہٕ دِمہٕ تہنٛدین نسلن تریمہِ تہٕ ژورمہِ پیڑِ تام سزا۔"8موسیٰؔ تراو ؤلؠ ؤلؠ زمیٖنہِ پؠٹھ سجدٕ تہٕ کرِن یہُوواہسؔ عبادت۔9تمؠ ووٚن، "میانہِ خداوندٕ، ہرگاہ بہٕ ژےٚ خوش یوان چُھسے، بہٕ چُھسے ژےٚ ونان زِ ژےٚ پکھ اسہِ سٟتؠ۔ یِم لوٗکھ چھِ سؠٹھاہ ضدی، مگر سٲنؠ گناہ کر معاف، تہٕ اسہِ لوٗکن بناو پننٕؠ ابدی وراثت۔"10یہُوواہنؔ دیُت جواب، "وُچھ! بہٕ پاوے ژےٚ یاد زِ مےٚ کیاہ چُھ اسرائیل کٮ۪ن لوٗکن سٟتؠ عہد کوٚرمُت۔ یوٚت تام زن میون تٲلق چُھ بہٕ ہاوٕ بٔڈؠ معجزٕ یِم نہٕ دنیاہس منٛز کُنہِ تہِ قومکیٚو لوٗکو ہٲومٕتؠ آسن۔ یِم معجزٕ بہٕ، یہُوواہؔ ہاوٕ تِمن وچُھن تِمن انٛدؠ پکھؠ پریتھ کانٛہہ قوم۔ بہٕ کرٕ چانہِ خٲطرٕ تِمہٕ سارے کامہِ یمو سٟتؠ مےٚ پریتھ اکھ تعظیٖم کرِ۔11تتھ حکمس پٹؠھ کر أزؠ عمل یُس ژےٚ بہٕ دِنہٕ وول چُھسے۔ بہٕ کٔڈکھ اموریؔ، کنعٲنؠ، حِتی، فرزیؔ، حوی تہٕ یبوسی لوٗکھ تمہِ ملکہٕ منٛزٕ چانہِ باپتھ نیٚبر۔12خبردار یتھ ملکس منٛز ژےٚ گژھان چُھکھ تِمن لوٗکن سٟتؠ کٔرؠ زِ نہٕ کانٛہہ تہٕ معاہدٕ زِ ژےٚ بسکھ تِمن سٟتؠ امنہٕ سان۔ ہرگاہ تہِ ژےٚ کۅرتھ ژےٚ کرکھ تِمے کامہِ یمہٕ تِم کران چھِ۔ یہِ آسہ چانہِ باپتھ اکھ ژھل یتھ منٛز ژےٚ بند گژھکھ۔13بلکہ ژےٚ چھی تہنٛدؠ قربان گاہ نہناونؠ، تہنٛدؠ پۅتلؠ تباہ کرنؠ تہٕ تِمن تھمبن ٹکرٕ کرنؠ یِم تِم یسراہسؔ عبادت کرنہٕ باپتھ استعمال کران چھِ۔14تہِ کر، تکیازِ ژےٚ چھۓ نہٕ بیٚیہِ کٲنسہ معبودس عبادت کرنؠ تکیازِ بہٕ یہُوواہؔ چُھس تِمن لوٗکن ہنٛد خیرخاہ یِم مےٚ اکھ پوٚز خدا مانن چھِ یتھٕ پٲٹھؠ اکھ روٗن پننہِ زنانہِ ہنٛد خیرخاہ چُھ آسان۔15دُبارٕ بوز، تِمن لوٗکن سٟتؠ مہَ کر کانٛہہ امنہٕ سان روزنُک وعدہ یِم تتھ ملکس منٛز روزان چھِ تکیازِ تِم ییٚلہِ پننؠن معبودن ہنٛز عبادت کرن بیٚیہِ کرن تِمن قۅربٲنی پیش تہٕ تِم دِنی تتھ منٛز شٲمل سپدنچؠ دعوت۔ پتہٕ کھیکھ ژےٚ تمہِ منٛز یمہٕ تِمو پننؠن معبودن قۅربٲنہِ پیش کرِ تہٕ ژےٚ مشراوکھ مےٚ۔16ژےٚ کرکھ گناہ ییٚلہِ ژےٚ تہنٛزٕ کورِ پننؠن نیٚچوٮ۪ن ہنٛزٕ آشنہِ بناوکھ۔ یمہٕ پننؠن معبودن ہنٛز عبادت کرن۔ تِمہٕ ڈالؠن چٲنؠن نیٚچوٮ۪ن ییٚلہِ تِم تِمن معبودن ہنٛز عبادت کرن۔17ژےٚ مہَ بناو فولاد گٲلتھ پننہِ باپتھ پۅتلؠ۔18خمیٖرِ روس ژوچن ہنٛز عیٖد مناو میانہِ حکمہٕ مطٲبق: ابیب ریتس منٛز کھیہ سٔتن دوٚہُن خمیٖرِ روس ژوٚٹ تکیازِ امی ریتہٕ چُھو توٚہؠ مِصرٕ منٛزٕ درٲمِت۔19تُہنٛدؠ سٲری یونہٕ نیٚچوؠ چھِ میٲنؠ۔ تُہنٛدؠ گریلو چاروٲے گاوٕ، تیٖر تہٕ ژھاولؠن ہنٛدؠ یونہٕ نر چھِ میٲنؠ۔20خرٕ سٕنٛدِس گۅڈنِکس بچہٕ چُھ توٚہہِ اکِس چھرٕ بچس بدلہٕ مٔلؠ ہیوٗن۔ ہرگاہ توٚہؠ مٔلؠ ہیکیو نہٕ ہٮ۪تھ تیلہِ چُھ سُہ خر گردن پھٹرٲویتھ مارُن۔ توٚہؠ چُھ پننُ پریتھ کانٛہہ یونہٕ نیٚچو واپس مٔلؠ ہیوٗن۔ نیاز پیش کرنہٕ بغٲر گژھنہٕ مےٚ نِشہ عبادت کرنہِ یُن۔21اکِس ہفتس منٛز کریو شیٚن دوٚہُن کٲم تہٕ سٔتمہِ دوٚہہ چُھ توٚہؠ آرام کرُن۔ ہتاکہِ توٚہؠ چُھ تتھ وقتس پؠٹھ تہِ سٔتمہِ دوٚہہ آرام کرُن ییٚلہِ توٚہؠ کھہَن منٛز دانٛد ٲسیٚو وایان یاہ فصل ٲسیٚو لونان۔22بہارس منٛز گژھِ ہفتس کٕنکہٕ لایہِ شروع سپدنہٕ وِزِ اکھ عیٖد مناونؠ تہٕ دوٚیِم عیٖد گژھِ ورؠ یِکِس ٲخرس پؠٹھ فصل لونہٕ پتہٕ مناونؠ۔23ورؠ یس منٛز گژھن سٲری مرد ترییہِ لٹہِ جمع سپدیتھ مےٚ یہُوواہسؔ، اسرائیل کٮ۪ن لوٗکن ہنٛدِس خدایس عبادت کرنؠ۔24بہٕ کڈکھ تِم لوٗکھ تمہِ ملکہٕ منٛزٕ نیٚبر یتھ منٛز توٚہہِ گژھن چُھ تہٕ بہٕ بڑاوٕ تُہنٛدؠ سرحد تمہِ کھوٚتہٕ زیادٕ۔ تُہنٛدِس ملکس کرنہٕ کانٛہہ تہِ فتح ییٚلہِ سٲری مرد یہُوواہؔ، تُہنٛدِس خدایہِ سنٛز عبادت کرن تہٕ یِم ترٛے جشن پریتھ ورؠیہِ مناون۔25خمیٖرِ دار ژوٚٹ گژھِ نہٕ نیاز کرنؠ یتھ اکِس قربان جانور سُنٛد خوٗن لٲگتھ آسہ۔ عیٖدِ فسح مناونہٕ وِزِ گژھِ نہٕ صبحس تام قربان کرمِتِس جانور سُنٛد کانٛہہ تہِ تان موجود روزن۔26پریتھ ورؠیہِ ییٚلہِ توٚہؠ پننُ فصل لونیو، گوٚڈٕ تُلیو تمہِ منٛز ساروے کھۅتہٕ اصل حصہٕ تہٕ گژھِیو تتھ جایہِ پؠٹھ یتہِ توٚہؠ مےٚ عبادت کران چُھو تہٕ دِیو مےٚ یہُوواہسؔ، یُس تُہنٛد خدا چُھ۔ ییٚلہِ توٚہؠ اکھ ژھاولؠ بچہٕ مٲوؠ وُن، سُہ گژھِ نہٕ تمؠ سنٛزِ ماجہِ ہنٛدِس دوٚدس منٛز رٔننُ۔"27یہُوواہنؔ ووٚن موسیٰؔ ہس، "تِم کتھٕ لؠکھ یمہٕ مےٚ ژےٚ ونے۔ ژےٚ یِم حکم دِنہٕ سٟتؠ کوٚر مےٚ ژےٚ تہٕ اسرائیل کٮ۪ن لوٗکن سٟتؠ اکھ عہد۔"28موسیٰؔ روٗد یہُوواہسؔ سٟتؠ پہاڑٕ کِس تینتٲلِس پؠٹھ ژتجہن دوٚہُن تہٕ ژتجہن رٲژن۔ تتھ وقتس دوران روٗد سُہ فاقے۔ تمؠ لؠکھؠ تِمن کنؠن ہنٛدین تختن پؠٹھ تِم داہ حکم یِم یہُوواہسؔ سٟتؠ عہدس منٛز شٲمل ٲسؠ۔29ییٚلہِ موسیٰؔ کوہِ سینا پؠٹھٕ واپس تمہٕ کنہِ ہنٛدؠ زٕ تختہٕ ہؠتھ ؤسان اوس یِمن پؠٹھ تمؠ داہ حکم ٲسؠ لؠکھمٕتؠ، تمؠ سُنٛد بُتھ اوس یہُوواہسؔ سٟتؠ کتھٕ کران برزلان مگر سُہ اوس تمہِ نِشہ بے خبر۔30ییٚلہِ ہاروننؔ تہٕ اسرائیل کیٚو لوٗکو موسیٰؔ وُچھ تِم سپد ہٲران زِ تمؠ سُنٛد بُتھ اوس برزلان تہٕ تِم کھوژؠ تس برونٛہہ کُن گژھنس۔31پوٚز موسیٰؔ کوٚر تِمن آلو ادٕ آو ہارونؔ بیٚیہِ آیہِ اسرائیلٕکؠ سردار تمس کُن واپس تہٕ کرکھ تمس سٟتؠ کتھٕ۔32تمہِ پتہٕ آیہِ سٲری اسرائیلٕکؠ لوٗکھ تمس نکھٕ تہٕ موسیٰؔ ہن بوزنٲوؠ تِم سٲری حکم یِم تمس یہُوواہنؔ کوہِ سیناہس دِیتمٕتؠ ٲسؠ۔33ییٚلہِ موسیٰؔ ہن لوٗکن سٟتؠ کتھٕ کرنہِ سپدٲیہِ، تمؠ ترٚوو پننِس بُتھِس پؠٹھ اکھ زٲویٛل پردٕ۔34یمہِ وِزِ موسیٰؔ سمن بلَ کِس خٟمس منٛز یہُوواہسؔ سٟتؠ کتھٕ کرنہِ اژان اوس سُہ اوس تتھ پردس تھوٗد تُلان۔ ییٚلہِ سُہ واپس نیران اوس پتہٕ اوس تِمہٕ سارے کتھٕ اسرائیل کٮ۪ن لوٗکن ونان یمہٕ سُہ یہُوواہسؔ سٟتؠ کران اوس۔35اسرائیلٕکؠ لوٗکھ ٲسؠ موسیٰؔ سُنٛد بُتھ ونہِ تہِ برزلان وُچھان۔ پتہٕ اوس سُہ پننِس بُتھِس پؠٹھ دُبارٕ پردٕ تراوان یوٚت تام سُہ دوٚیمہِ لٹہِ یہُوواہسؔ سٟتؠ کتھٕ کرنہِ گژھے۔
Bridge Connectivity Solutions Pvt. Ltd.