خروج33
1پتہٕ ووٚن یہُوواہنؔ موسیٰؔ ہس، "ووٚتھ تہٕ گژھِ تِمن لوٗکن سٟتؠ یِم ژےٚ مِصرٕ منٛز کڈتھ أنِتھ، تتھ ملکس منٛز یمیٛک وعدہ مےٚ ابرہامسؔ، اضحاقسؔ تہٕ یعقوبسؔ دِیتمُت چُھ زِ بہٕ دِمن سُہ تہنٛزن ذرؠ یٲژن۔2بہٕ سوزن پننُ اکھ فرشتہٕ ژےٚ برونٛہہ برونٛہہ تہٕ بہٕ کڈکھ تمہِ ملکہٕ منٛزٕ کنعٲنؠ، اموریؔ، حِتی، فِرزی، حوی تہٕ یبوسی نیٚبر۔3ژےٚ گژھکھ تتھ ملکس منٛز یُس چارووۓ رٔچنہٕ خٲطرٕ تہٕ فصٕل وۅپداونہٕ خٲطرٕ سؠٹھاہ رُت چُھ۔ پوٚز بہٕ گژھنہٕ توٚہہِ سٟتؠ تکیازِ بہٕ ما کرہو توٚہؠ سفرس دورانے فناہ، تکیازِ توٚہؠ چُھو سؠٹھاہ ضدی لوٗکھ۔"4یہُوواہنؔ ووٚن موسیٰؔ ہس اسرائیل کٮ۪ن لوٗکن وننہٕ باپتھ، "توٚہؠ چُھو سؠٹھاہ ہڑدرٕم۔ ہرگاہ بہٕ توٚہہِ سٟتؠ اکِس ژیُہس تہِ آسہٕ، بہٕ کرہو توٚہؠ قتل۔ وۅنؠ کڈیو پننٕؠ زیور پننؠن گناہن پؠٹھ پشتاونہٕ باپتھ نیٚبر۔ پتہٕ کرٕ بہٕ فٲصلہٕ ہرگاہ بہٕ دِما توٚہہِ سزا۔ "ییٚلہِ لوٗکو بوز زِ یہُوواہنؔ کوٚر تیزر، تِمن سُپد افسوس تہٕ کٲنسہِ أکؠ تہِ لٲگؠ نہٕ زیور۔6أتی کڈؠ اسرائیل کیٚو لوٗکو کوہِ حوربس پؠٹھ پننٕؠ زیورن ہنٛدؠ وس نیٚبر۔7یوٚت تام تِمو مقدس خٟمہٕ بنوٚو، موسیٰؔ دِیت تھکہٕ پنیٚنجہِ نیٚبر واریاہ دوٗر اکھ خٟمہٕ تتھ تھووُن ناو "سمن بل خٟمہ" یُس اکھ یہُوواہؔ سُنٛد طلبگار اوس آسان تمس اوس تھکہٕ پنیٚجہِ منٛز نیٚبر نیرُن تہٕ تتھ سمن بل کس خٟمس کُن گژھن۔8ییٚلہِ تہِ زانٛہہ موسیٰؔ سمن بل کہ خٟمہ منٛز نیٚبر نیران اوس تہٕ سٲری لوٗکھ ٲسؠ پننؠن خٟمکؠن دروازن پؠٹھ استادٕ روٗزان یوٚت تام سُہ سمن بل کِس خٟمس منٛز واپس اژہیے۔9ییٚلہِ تہِ زانٛہہ موسیٰؔ سمن بل کِس خٟمس منٛز دٲخل سپدِہے، اکھ زیٹھؠ اوٚبرٕ لانگ ٲس وسان تہٕ خٟمہٕ کِس دروازس پؠٹھ ٲس ٹھہران، ادٕ اوس یہُوواہؔ موسیٰؔ ہس سٟتؠ ملاقات کران۔10لوٗکھ ییٚلہِ اوٚبرٕ لانگ سمن بل کِس دروازس پؠٹھ وچھان ٲسؠ، تِم سٲری ٲسؠ پننؠن خٟمہٕ کؠن دروازن پؠٹھ استادٕ سپدان تہٕ یہُوواہسؔ ٲسؠ سجدٕ کران۔11یہُوواہؔ اوس موسیٰؔ ہس سٟتؠ اکِس دوستہٕ سٕنٛدؠ پٲٹھؠ ہمکلام سپدان۔ پتہٕ اوس موسیٰؔ تھکہٕ پنیجہِ کُن واپس یوان۔ پوٚز تمؠ سُنٛد لۅکُٹ خدمتگار، یسوعؔ؛ نونؔہٕ سُنٛد نیٚچو، اوس سمن بل کِس خٟمس منٛزے بہان۔12موسیٰؔ ہن ووٚن یہُوواہسؔ، "مہربٲنی کرِتھ میون بوز یہِ چُھ پوٚز زِ ژےٚ ووٚنتھ مےٚ اسرائیلٕکؠ لوٗکھ تتھ ملکس کُن پکناونؠ یُس ژےٚ مےٚ ہاوکھ۔ مگر ژےٚ ووٚنتھ نہٕ ژےٚ کُس سوزہن مےٚ مدد کرنہٕ باپتھ! ژےٚ ووٚنتھ مےٚ بیٚیہِ یہِ تہِ زِ ژےٚ زانتھ بہٕ اصل پٲٹھؠ یُتھ مےٚ پؠٹھ کرکھ رحم۔13لہٰذا وۅنؠ، ہرگاہ ژےٚ مےٚ پؠٹھ پزؠ پٲٹھؠ مہربان چُھکھ تیلہِ ون تہٕ مےٚ تِم چیز یِم بہٕ کرٕ تہٕ بہٕ روزٕ چانہِ باپتھ رٔژٕ کامہِ کران یمو سٟتؠ ژےٚ خوش سپدکھ۔ مہربٲنی کرِتھ تھو خیال زِ اسرائیلٕکؠ لوٗکھ چھِ چٲنؠ ووُمتھ۔"14یہُوواہنؔ دِیتُ جواب، "بہٕ گژھٕ ژےٚ سٟتؠ تہٕ ژےٚ ییہِ آرام۔"15موسیٰؔ ہن دِیُت یہُوواہسؔ جواب، "ہرگاہ ژےٚ مےٚ سٟتؠ گژھکھ نہٕ تیلہِ مہَ کر اسہِ یمہِ جایہِ پؠٹھ نیٚبر۔16بسَ اکھ وتھ چھِ یمہِ سٟتؠ باقی لوٗکن زانن زِ ژےٚ چُھکھ اسہِ پؠٹھ مہربان ییٚلہِ زن ژےٚ اسہِ سٟتؠ پککھ! ہرگاہ ژےٚ اسہِ سٟتؠ پککھ، یہِ سپدِ ثٲبت زِ أسؠ چھِ زمیٖنہِ پؠٹھ باقی قومو کھۅتہٕ اکھ الگ قوم۔"17یہُوواہنؔ دِیُت موسیٰؔ ہس جواب، "بہٕ کرٕ تیٖ یمِچ ژےٚ ذکر کرِتھ، تکیازِ مےٚ چھِ پوٗرٕ پٲٹھؠ پتاہ زِ بہٕ چُھسے ژےٚ خوش۔18پتہٕ ووٚن موسیٰؔ ہن، "مہربٲنی کرِتھ ہاو تہٕ مےٚ پننُ جلال۔"19یہُوواہنؔ دِیُت جواب، "بہٕ ہاوۓ ژےٚ پننہِ سٲرے نیکیہ تہٕ بہٕ ونے ژےٚ میانہِ یہُوواہؔ ناوک مطلب کیاہ چُھ۔ بہٕ کرٕ تمس پؠٹھ مہربٲنی یُس مےٚ ژورمُت آسہ تہٕ تمس پؠٹھ کرٕ بہٕ رحم۔20پوٚز ژےٚ ہیککھ نہٕ میون روے وچھتھ، تکیازِ یُس اکھ میون روے وچھِ سُہ روزِ نہٕ زندٕ۔21تہٕ خداوندن وون، "وُچھ! مےٚ نکھٕ چھِ اکھ جای یتٮ۪ن ژےٚ اکِس بجہِ شیلہِ پؠٹھ ہیککھ استادٕ روزتھ۔22ییٚلہِ میانہِ جلالُکھ گاش ژےٚ کِنؠ نیرِ، بہٕ تھوتھ ژےٚ شیلہِ ہنٛدِس اکِس بٔڈِس ٲلِس منٛز کٔھٹِتھ تہٕ بہٕ رٔٹے ژےٚ پننُ اتھٕ پؠٹھٕ یوٚت تام بہٕ آسہٕ ژےٚ کِنؠ درامُت۔23پتہٕ تُلہٕ بہٕ پننُ اتھٕ تھوٗد تہٕ ژےٚ وُچھکھ میانہِ شانہٕ مگر ژےٚ وُچھکھ نہٕ میٚون بُتھ۔"
Bridge Connectivity Solutions Pvt. Ltd.