خروج21
1یِم چھِ تِم قانون یِم ژےٚ پزنے اسرائیلی قومہٕ خٲطرٕ تشکیٖل دِنؠ:2ہرگاہ ژٕ اکھ عِبرٲنؠ غلام مٔلؠ ہییٚہن تمِس چھِ صرف شیٚن ورؠین چٲنؠ خدمت کرٕنؠ۔ سٔتمہِ ورؠیہِ پزِی ژےٚ سُہ مفتس منٛز ییٚلہِ تراؤن۔3ہرگاہ سُہ کُنے زوٚن تُہنٛد غلام بنتھ آسہ آمُت سُہ گژھِ کُنے زوٚن آزاد۔ ہرگاہ تمِس اکھ زنان آسہ ہِے، ژےٚ پزِن تِم دوشوے بٲژ ییٚلہِ تراونؠ۔4ہرگاہ تٔمؠ سٕنٛدؠ مٲلکن تمِس غۅلامہٕ سُنٛد خاندر کٲنٛسہِ زنانہِ سٟتؠ کوٚرمُت آسہ تہٕ یِس نِشہ تمِس نیٚچوؠ یا کورِ زایہِ سُہ نفر چُھ کُنے زوٚن آزاد کَرُن۔ تٔمؠ سنٛز زنان بیٚیہِ شُرؠ روٗزن تٔمؠ سنٛدِس مٲلکہٕ سٕنٛدؠ غلام بدستوٗر۔5ہرگاہ سُہ غلام آزاد سپدن وِزِ ٹاکٲرٕ پٲٹھؠ وَنہِ: بہِ چُھس پننِس مٲلکس، پننہِ زنانہِ بیٚیہِ پننؠن شُرین لول بران تہٕ بہٕ چُھس نہٕ نیرُن یژھان،6پتہٕ نیہ تٔمؠ سُنٛد مٲلکھ تمِس تتھ جایہِ ییٚتہِ تِم خدایس عبادت کران چھِ۔ تمِس پزِ غلام دروازس یا دروازٕکِس داسس نِشہ کھڑا کٔرِتھ غۅلامس کنَ ژوٚمبوٗن پتہٕ روزِ سُہ غلام تمِس عمرِ خدمت کران۔7ہرگاہ کانٛہہ مرد پننہِ کورِ لونڈی بناونہٕ خٲطرٕ کٕنہِ، سۅ سپدِ نہٕ غۅلامن ہنٛدؠ پٲٹھؠ آزاد۔8ہرگاہ تٔمؠ نفرن یمؠ سۅ دویمہِ زنانہِ ہنٛدؠ رٔنگؠ مٔلؠ ہیژ، سُہ روٗد نہٕ تس خوش، تمِس چھِ سۅ پننِس مٲلِس واپس کٕننؠ۔ سُہ چھِنہٕ ۅپرس کٕننؠ تکیازِ تہِ چُھنہٕ کورِ ہنٛدس مٲلس سٟتؠ مُحادٕ اوسمُتے۔9ہرگاہ تٔمؠ نفرن سۅ پننِس نیٚچوؠ سٕنٛدِ نیتھرٕ باپتھ مٔلؠ ہیژ، تمِس پزِ سۅ پننٕؠ کور تصور کرٕنؠ۔10ہرگاہ مٲلکن بیٛاکھ نیتھٕر کوٚر، تمِس چُھ گۅڈنچہِ زنانہِ برابر کھؠن چؠن، پلو پوشاک بیٚیہِ تمام حقوق ادا تِتھے پٲٹھؠ پوٗرٕ کرٕنؠ یتھٕ پٲٹھؠ سُہ تمِس برونٛہہ کران اوس۔11ہرگاہ تٔمؠ یِم ترٛےٚ چیٖز تسنٛدِ خٲطرٕ کٔر نہٕ، سۅ پزِ تمِس مفتس منٛز غلامی نِشہ آزاد کرٕنؠ، تہٕ تسَ چُھنہٕ آزاد سپدن باپتھ کانٛہہ تہِ رقم ادا کرٕنؠ۔12ہرگاہ اکھ نفر کٲنٛسہِ دبَ لایہِ یتھ زن سُہ مارٕ سپدِ، پتہٕ چُھ سُہ قٲتِل ضوٚروٗر قتل کرُن؛13ہرگاہ تسَ قتل کرنُک یرادٕ آسہ ہے نہٕ۔ ہرگاہ تمِس اتھٕ شر گوٚو۔ سُہ نفر ہیٚکہ أکِس تتھ جایہِ ژٔلتھ ییٚتہِ بہٕ تمِس سنٛز حفاظت کرٕ۔14ہرگاہ کٲنٛسہِ نفرن بیٛاکھ نفر شرارتس منٛز یتھ زٲنتھ مٲنتھ قتل کوٚر، سُہ نفر چُھ قتل کرُن ہرگاہ سُہ قٲتِل خدایہِ سنٛدِس قربان گاہس کُن تہِ ژلہِ تٔتی گژھِ یُن قتل کرنہٕ۔15یُس اکھاہ پننِس مٲلس یا ماجہِ لایہِ سُہ گژھِ یُن ضوٚروٗر قتل کرنہٕ۔16ہرگاہ کانٛہہ نفر بییٚس نفرس اغوا کرِ اگرچہ تٔمؠ سُہ کُنمُت آسہ یا تمسے نِشہ ییہِ لبنہِ سُہ اغوا کرن وول گژھِ ضوٚروٗر قتل کرُن۔17سُہ نفر چُھ ضوٚروٗر قتل کرُن یُس پننِس مٲلس یا ماجہِ وُہو یا بے یزتی کرِ۔18مثالہِ پٲٹھؠ، اگر زٕ نفر پانہٕ وٲنؠ لڑٲے کران آسن تہٕ اکھ أکِس لایِن کَنہِ یا مُشتہٕ۔ اکھ نفر لایِس دبَ یمہِ سٟتؠ بییٚس زخم لٔگؠ مگر مارٕ سپد نہٕ کینٛہہ پتہٕ روٗد سُہ زخمی نفر بسترس منٛز کینٛژھس کٲلس،19تمہِ پتہٕ گوٚو سُہ لوٗر تلتھ پکنس لایق۔ تمِس لایِن وٲلِس نفرس چُھنہٕ کانٛہہ سزا دیُن صرف چُھ تمِس زخمی نفرس کُن جرمانہٕ پونٛسہٕ کس صورتس منٛز ادا کرُن تکیازِ تٔمؠ ہیوٗک نہٕ بلَنس دوران پونٛسہٕ کمٲیتھ بیٚیہِ لوٚگ تس علاج کرنس خرچہِ۔20ہرگاہ کانٛہہ اکھ پننِس غۅلامس یا پننہِ لونڈی لوٗرِ سٟتؠ دبَ لایہِ تہٕ سُہ سپدِ تمہِ ٹاسہٕ سٟتؠ مارٕ تیلہِ چُھ غلام مارٕ سپدنُک بدلہٕ ضوٚروٗر ہوٗن۔21پوٚز ہرگاہ سُہ غلام کینٛژن دوٚہُن منٛز ٹھیک سپد، تمِس چُھنہٕ سزا دیُن یمؠ تمِس غۅلامس ٹاس ترووٚ تکیازِ سُہ غلام اوس تٔمؠ سُنٛدےٕ مال۔22ہرگاہ کینٛہہ لوٗکھ آسن لڑٲۓ کران تہٕ أکِس گۅبہِ کھورِ زنانہِ آو ٹاس تہٕ سۅ سپٕز وقتہٕ برونٹھے بغٲرِ کُنہِ نقصان خلٲس، ٹاس لاین وٲلِس چُھ تیوٗت حرجانہٕ برُن یوٗتاہ زن تسُنٛد روٗن منٛگہ تہٕ یوٗتاہ اکھ جج منٲسب زانہِ۔23پوٚز ہرگاہ تسَ کانٛہہ نقصان ووت تمِس چُھ سزا تمی قسمُک دیُن۔ ہرگاہ تٔمؠ کانٛہہ قتل کوٚر، سُہ چُھ قتل کرُن۔24تٔمی طریقہٕ یمہِ طریقہٕ تٔمؠ زرؠر واتنوومُت آسہ أچھ بدلہٕ أچھ، دنٛدٕ بدلہٕ دنٛد، اتھٕ بدلہٕ اتھٕ یا کھوٚرٕ بدلہٕ کھوٚر،25یا زٔٲلنہٕ بدلہٕ زالُن، چوٹہٕ بدلہٕ چوٹ، یا زخمہٕ بدلہٕ زخم۔26ہرگاہ کانٛہہ مٲلکھ پننِس غلامس یا لونڈی ٹاس لایہِ یمہِ سٟتؠ تٔمؠ سنٛز أچھ أنؠ سپدِ پتہٕ چُھ سُہ غلام تمِس أچھ خراب سپدنہٕ بدلہٕ ییٚلہِ ترٛاؤن۔27ہرگاہ کانٛہہ پننِس غلامس دنٛد پُھٹرایہ، تمِس چُھ سُہ غلام دنٛد پُھٹراونس بدلہٕ آزاد کرُن۔28ہرگاہ اکھ دانٛد کٲنٛسہِ مردس یا زنانہِ ٹھوٚل دِیہ یمہِ سٟتؠ سُہ مارٕ سپد، سُہ دانٛد گژھِ سنگ سار یُن کرنہٕ بیٚیہِ گژھِ نہٕ تٔمؠ سُنٛد ماز کھؠنہٕ یُن۔ دانٛد سنٛدِس مٲلکس چُھنہٕ کانٛہہ قصور۔29پوٚز ہرگاہ تٔمؠ دانٛدن آسن برونٹھ واریاہہِ لٹہِ لوٗکن ٹھوٚلہٕ لایِمٕژٕ پتہٕ ٲس تٔمؠ سنٛدِس مٲلکس شیچھ واتناونہٕ آمٕژ تمہِ پتہٕ تہِ تھووٚ نہٕ سُہ گنڈِتھ تہٕ تٔمؠ موٗر کانٛہہ مرد یا زنان ٹھوٚلہِ سٟتؠ پتہٕ چُھ سُہ دانٛد کنہِ کنہِ کرُن تہٕ تسنٛد مٲلکھ تہِ چُھ مارُن۔30بہرحال، ہرگاہ تمسنٛدؠ عیال تمِس زندگی بچاونہٕ بدلہٕ تسَ خوٗن بہا منٛگن تمِس چھِ سۅ سورےٕ رقم ادا کرٕنؠ یہِ تِم منٛگن۔31ہرگاہ دانٛدٕ سنٛزِ ٹھوٚلہِ سٟتؠ کٲنسہِ ہُنٛد نیٚچو یا کور سپد ہلاک امی حکمہٕ مطٲبق گژھِ دانٛدٕ سٕنٛدِس مٲلکس سٟتؠ پیش یُن۔32ہرگاہ اکؠ دانٛدن کٲنسہِ غۅلامس یا لونڈی ٹھوٚل لاۓ، تسنٛدس مٲلکس چھِ غۅلامس چٲندِ ہنٛدؠ ترٛہ 30 ٹُکرٕ دِنؠ تہٕ دانٛد گژھِ کنہِ کنہِ کرنہٕ یُن۔33ہرگاہ کانٛہہ نفر آب ذخیرٕ کرنُک دوٚب ٹھانڈٕ بغٲر تھو یا دوٚب کھنہِ پتہٕ آسہ ٹھانڈٕ ورٲے، تتھ منٛز گژھِ کٲنسہِ ہُنٛد دانٛد یا خرَ تہٕ مود،34دوٗبُک مٲلکھ دِین حیوانہٕ سٕنٛدِس مٲلکس تیوٗت پونٛسہٕ یوٗتاہ تسَ مۅل اوس، پتہٕ آسہ سُہ ممُت جانور تسنٛد۔35ہرگاہ کٲنٛسہِ ہُنٛد دانٛد بییٚس نفرٕ سنٛدِس دانٛدس ٹھوٚل لایہِ تہٕ سُہ مرِ، سُہ دانٛد گژھِ زندے کٕننہٕ یُن تہٕ تٔمؠ سُنٛد مۅل گژھن دوشوے مٲلکھ پانہٕ وٲنؠ بٲگرٕنؠ۔ بیٚیہِ گژھن تِم مودمتِس دانٛدٕ سنٛدِس مازس تہِ حصہٕ کرٕنؠ۔36ہرگاہ مٲلکس پتاہ آسہ زِ سُہ اوس باقی جانورن ٹھوٚلہٕ لایان پتہٕ تھو نہٕ تٔمؠ گنڈتھ تیلہِ دِیہ سُہ دانٛدس بدلہٕ دانٛد مودمُت دانٛد گژھِ تمسے دِنہٕ یُن۔
Bridge Connectivity Solutions Pvt. Ltd.