خروج22
1ہرگاہ کانٛہہ نفر اکھ دانٛد یا اکھ تیوٗر ژُوٗرِ نیہ پتہٕ مارِس یا کنٕس، سُہ دِیہ مٲلکس کُن ژُوٗرِ نمتِس أکِس دانٛدس بدلہٕ پانٛژھ دانٛد یا گاوٕ تہٕ أکِس تیرِس بدلہٕ ژوٗر تیٖرؠ۔2ہرگاہ کانٛہہ راتھ کیُت پننِس گرس منٛز اکھ ژُوٗر سن دِوان وُچھ تہٕ دبَ لٲیتھ مرِ سُہ، تمِس چُھنہٕ قتل مُٹہِ کھسان۔3ہرگاہ یتھ واقہٕ دوٚہس منٛز پیش آو، سُہ نفر یُس ژوٗرس مارِ سُہ چُھ قٲتِل۔ ژُوٗرس چُھ تہِ دِین یہِ تٔمؠ ژُوٗرِ نیٚو۔ ہرگاہ سُہ ہیٚکہ نہٕ تہِ ادا کٔرِتھ تیلہِ چُھ سُہ منصفس غلام بننہٕ باپتھ کُننُ سُہ پونٛسہٕ گژھِ تس سنٛزِ ژُوٗرِ بدلہٕ ادا یُن کرنہٕ۔4ہرگاہ ژُرِ ہُنٛد مال أکِس ژُوٗرس نِشہ رَٹنہٕ آو سُہ اکھ دانٛد یا خر یا اکھ تیوٗر ٲسؠ تنَ یس ونہِ تہِ زندٕ آسہ، تمِس ژُوٗرس چُھ اکھ سُہ ژُرِ نِمُت جانور بیٚیہِ تمی قسمُک بیٛاکھ اکھ ہٮ۪تھ واپس کرُن۔5ہرگاہ کانٛہہ اکھا پننٕؠ چاروٲے پننِس کھہَس یا دچھِ باغس منٛز گھاسہٕ کھینہِ ترٛاوِ، پتہٕ کھیٚن تِم بِییٚس نفرٕ سنٛدِس کھہَس منٛز تٔمؠ سٕنٛدؠ کٔلؠ، چاروٲین ہنٛدس مٲلکس چُھ تمِس کھہہ کِس مٲلکس پننہِ کھہُک یا دچھِ باغس کھٔسِتھ کھۅتہٕ کھٔسِتھ فصلہٕ منٛزٕ دِین تسَ ماوضہٕ۔6ہرگاہ کانٛہہ زالہِ نار تہِ سُہ پھٔہلہِ گھاسہٕ دزان دزان بییٚس کٲنسہِ ہنٛدِس کھہَس منٛز تہٕ تمیٛک فصل دَزِ یا جمع کرنہٕ آمُت فصل دوٗد، تمِس نفرس چُھ تمہِ فصُلک ماوضہٕ برُن یمؠ نار زولمُت اوس یمہِ سٟتؠ فصل تباہ سپد۔7ہرگاہ کانٛہہ نفر بِییٚس نفرٕ سنٛدِس گرس منٛز کینٛژس وقتس تام تھاونہٕ باپتھ پننُ نقد پونٛسہٕ یا باقی سامانہٕ حوالہِ کرِ پتہٕ تسنٛدِ مکانہٕ منٛز گژھِ اتھ ژوٗر، ہرگاہ سُہ ژوٗر اتھِ لوٚگ سُہ دِیہ امُیک دۅگنہٕ۔8پوٚز ہرگاہ ژوٗر آو نہٕ رٹنہٕ أتی گژھِ تمہِ گرُک مٲلکھ خدایس نِشہ ننہٕ یُن یتھ زن سُہ قَسم کرِ زِ تٔمؠ دبوٚو نہٕ پننِس ہمسایہِ سُنٛد مال۔9خیانتُک ہر کانٛہہ معاملہٕ چاہے سُہ أکِس دانٛدس، خرس، تیرس متعلق آسہ یا پلون یا بیٚیہِ یِس کانٛہہ چیٖز تِمن رٲوؠ مٕتؠ آسن، تِم دوشوے گژھن خدایس نِشہ اننہٕ یِن، یمِس أکِس خدا مجرم قرار دِیہ تمِس چُھ تمیک دۅگنہٕ دِین یوٚت تاہ تٔمؠ نِمُت آسہ۔10ہرگاہ کانٛہہ پننِس ہمسایس خر یا دانٛد یا تیوٗر یا بیٚیہِ کانٛہہ چاروٲے حؠفاظتہٕ باپتھ حوالہٕ کرِ تہٕ سُہ مرِ یا تَس لگہ زخم یا کٲنٛسہِ ہنٛزِ نظرِ ورٲے ییہِ ژُوٗرِ ننہٕ۔11پتہٕ چُھ سُہ حفاظت کرن وول نفر قسم کرناؤن یہُوواہؔ چُھ گواہ زِ تٔمؠ تھو نہٕ سُہ ژُوٗرِ، مٲلکس چُھ ضۅروٗر مانُن زِ سُہ نفر چُھ پوٚز ونان، پتہٕ چُھنہٕ تسَ مٲلکس کُن کِہنؠ تہِ واپس دِین۔12ہرگاہ سُہ جانور ییہِ حؠفاظت کرن وٲلِس نِشہ ژُوٗرِ ننہٕ تمِس چُھ حیوانہٕ سنٛدِس مٲلکس کُن ماوضہٕ ادا کرُن۔13ہرگاہ تمِس کٲنٛسہِ وحشی جانورن تٔژھٕ کرِ، تمِس چُھ تہِ نیال ہٲوتھ ثٲبتھ کرُن زِ تہِ چُھ پوٚز۔ ہرگاہ تٔمؠ تہِ کوٚر، تمِس چُھنہٕ تٔژھٕ کٔرؠ مٕتؠ سٕنٛدِس حیوانہٕ سُنٛد کُنہِ قسمک ماوضہٕ دیُن۔14ہرگاہ کانٛہہ اکھ پننِس ہمسایس نِشہ اکھ جانور ووٚزم ہیوان چُھ تہٕ تس چھِ زخم لگان یا مرن تمِس مٲلکہٕ سنٛزِ غیٖر موجودگی منٛز، تمِس ووٚزم ننہٕ وٲلِس چُھ مٲلکس تمیک ماوضہٕ دیُن۔15پوٚز ہرگاہ مٲلک سٟتؠ اوس أتی ییہِ نہٕ ماوضہٕ دِنہٕ۔ ہرگاہ سُہ کرایہِ پؠٹھ آمُت اوس، مٲلک نیہ تمِس مرِ مٕتس جانور سنٛز کِرایی یٲژ یوٚت۔16ہرگاہ اکھ نفر کٲنٛسہِ انہرشہِ لڑکیہِ ورغہٕ لٲوِتھ تس سٟتؠ جنسی تعالق قٲیم کرِ یہِ نہٕ تسنٛدس مٲلس خبر آسہ، تمِس چُھ مہرٕ ادا کٔرِتھ تس سٟتؠ خاندر کرُن۔17ہرگاہ تسنٛد مول تمِس خاندر کرنس اجازت دِیہ نہٕ، تمِس نفرس چُھ لڑکی ہنٛدس مٲلس تیوٚت پونٛسہٕ دیُن یوٗتاہ أکِس انہرشہِ لڑکیہِ باقی مرد دِوان آسن۔18کٲنٛسہِ تہِ جٲدؠ گٔرؠ مٕہ دِیو زندٕ روزنہٕ۔19جانورن سٟتؠ فعلِ بد کرن وول فرد گژھِ ضرور قتل کرنہٕ یُن۔20یُس اکھاہ یہُوواہسؔ ورٲے بیہِ کٲنٛسہِ معبودس اکھ قۅربٲنی پیش کرِ سُہ گژھِ قتل کرنہٕ یُن۔21ۅپر لوٗکھ نہٕ گژھِ دَباؤن نہٕ گژھِ تِمن بدرد ونُن، تکیازِ توٚہؠ تہِ ٲسِو مِصرس منٛز ۅپر۔22کٲنسہِ تہِ موٚنڈِ یا یتیمس سٟتؠ گژھِ نہٕ بد سلوکی سان پیش یُن۔23ہرگاہ توٚہؠ تِمن سٟتؠ بدسلوکی کریو پتہٕ کرن تِم مےٚ فریاد، بہٕ کرٕ تِمن مدد۔24تکیازِ مےٚ آسہ تہنٛز شرارت، بہٕ مارناوٕہو توٚہؠ جنگس منٛز یُتھ زن تُہنٛزٕ آشنہِ موٗنڈٕ گژھن تہٕ تُہنٛدؠ شُرؠ گژھن یتیم۔25ہرگاہ توٚہؠ میانیو لوٗکو منٛزٕ کٲنٛسہِ غریبس پونٛسہٕ قرضہٕ رنگؠ دِیو، تمِس سٟتؠ مٕہ یِیو أکِس سوٗد خارٕ سٕنٛدؠ پٲٹھؠ پیش یُس سوٗد رَٹان چُھ۔26ہرگاہ توٚہؠ پننِس ہمسایہِ سٕنٛدؠ پلو پونٛسہٕ وصول کرنہٕ باپتھ بنٛد رٔٹھیو، تمِس دِیو تِم افتاب لوسنہٕ برٛونٹھے واپس۔27تکیازِ تمِس نِشہ چُھ یوہے اکھ چیز یہِ سُہ شونٛگنہٕ وِزِ ولان چُھ۔ ییٚلہِ سُہ مےٚ فرِیاد کرِ مےٚ چُھ عار یوان تہٕ بہٕ کرٕ تمِس مدد۔ تکیازِ، بہٕ چُھس مہربان۔28خدایس مٕہ کریو بےیزتی تہٕ خدایس مٕہ منٛگیٚو پننِس کٲنٛسہِ حٲکمس باپتھ لعنت۔29پننہِ لوٗنمِتہِ فصلکہِ کثیر پیداوارٕ منٛزٕ مےٚ کُن نذرانہٕ دِنس مٕہ لاگیو ژیر تمہِ منٛزٕ تہِ دِیو نذرانہٕ یُس زیتون تیٖل یا دچھِ رس تیار کرن چُھو۔ پننؠن یونہٕ نیٚچوؠ دِیو مےٚ۔30یِتھۓ پٲٹھؠ چھِ گاون تہٕ تیرن ہنٛدؠ گوٗڈنکؠ بچہ میٲنؠ۔ تھنہٕ پنہٕ پتہٕ سٔتن دوٚہُن روٗزن تِم پننؠن ماجن سٟتؠ ٲٹھمہِ دوٚہہ دِیو تِم مےٚ۔31توٚہؠ چُھو میٲنؠ پاک لوٗکھ، لہٰذا تمِس حیوانہٕ سُنٛد ماز مٕہ کھییٚو یُس وحشی جانورن مورمُت آسہ بلکہ، سُہ گژھِ ہوٗنؠن کھینہٕ باپتھ ترٛاؤن۔
Bridge Connectivity Solutions Pvt. Ltd.