ایستر5
1ترییہِ دوٚہؠ پتہٕ کٔر آستیرؔ تہٕ تمؠ سنٛزو نوکرانیو اکھ بٔڈ ضیافت تیار۔ پتہٕ لوگ تمہِ شٲہی لباس، تہٕ سپٕز شٲہی محلہٕ کس انٛدرمِس آنٛگنس منٛز دربارؠ تختس برونٛہہ کنہِ اِستادٕ۔ بادشاہ اوس شٲہی محلس خانہٕ کِس دروازس سیدِ سیٚود پننِس شٲہی تختس پؠٹھ بہتھ۔2یُتھےٕ بادشاہن ملکٲنؠ آستیرؔ آنٛگنس منٛز وۅدنؠ وُچھ، سُہ گوٚو سیٹھاہ خوش۔ أتی نیٚو تٔمؠ پنُن عاصہٕ تس کنُ، یہِ ہاونہٕ خٲطرٕ زِ سۅ ہیٚکہِ اصل پٲٹھؠ تمِس نِش یتھ۔ لہٰذا گییہِ آستیرؔ تختس نِشہ تہٕ عاصہٕ کِس کلس لوگُن اتھٕ۔3پتہٕ پرُوژھ بادشاہن تس، "ملکٲنؠ آستیرؔ ژٕ کیازِ آیکھ یور؟ ژٕ کیا چھیٚکھ ونُن یژھان؟ مےٚ ون، یہِ ژٕ منٛگکھ تہِ یی ژےٚ دِنہٕ، یوٚدوے سُہ کوتاہ تہِ بوٗڈ آسہ۔"4آستیرؔ فرموو یورٕ، "اے بادشاہ، ہرگاہ توٚہہ خوش گژھِ تیلہِ یی تو مہربٲنی کٔرتھ ہامانؔ ہیٚتھ تتھ دعوتس پٮ۪ٹھ یمیُک مےٚ تُہنٛدِ باپتھ سنٛز چُھ کۅرمُت۔"5بادشاہن ووٚن پننؠن خدمت گارن، "گٔژھیو أنوون ہامانؔ فورن یُتھ زن أسؠ آستیرؔ ہُنٛد ونن بجا ہیٚکو اوٚنتھ! "لہٰذا گےَ بادشاہ تہٕ ہامانؔ تتھ دعوتس پٮ۪ٹھ یمیُک انتظار آستیرؔ تہٕ تہنٛزو نوکرانیو تِہنٛدِ خٲطرٕ کوٚرمُت اوس۔6شراب چیٚنہٕ وزِ ووٚن بادشاہن آستیرِؔ، "وُنؠ ونتہٕ مہربٲنی کٔرِتھ ژٕ کیاہ چھیٚکھ اصلی یژھان۔ بہٕ چُھس تہِ دنہٕ خٲطرٕ تیار، یہِ کینٛژھا ژٕ منٛگکھ، سُہ کوتاہ تہِ بوٚڈ ٲسؠ تن۔ بہٕ چُھسے یہِ سۅدلہٕ ونان۔"7آستیرؔ دِتُس یورٕ جواب، "یہِ بہٕ بنیٲدی یژھان چھیٚس تہِ چُھ یتھ کِنؠ زِ:8ہرگاہ توٚہؠ مےٚ خوش چُھو، تہٕ مےٚ چُھو پزی یژھان، اے بادشاہ! تیٚلہِ دی تو مےٚ تہِ یہِ بہٕ یژھان چھیٚس، مہربٲنی کٔرتھ یی تو ہامانؔ ہیٚتھ پگاہ میٲنس دعوتس پؠٹھ بیٚیہِ یۅسہ بہٕ تُہنٛدِ باپتھ تیار کرٕ۔ پتہٕ دِمہٕ بہٕ تُہنٛدین سوالن جواب۔"9ہامانؔ اوس خوشی محسوس کران ییٚلہِ سُہ تمہِ دوٚہہ دعوتہٕ پتہٕ درٛاو۔ مگر اتہِ وچُھن مردکیؔ بادشاہ سنٛدِس دروازس پٮ۪ٹھ بہتھ۔ مردکیؔ ووٚتھ نہٕ تمِس یزتھ کرنہٕ باپتھ تھوٚد یا سُہ وُچِھتھ ژایس نہٕ خوفہٕ سٟتؠ تھرٕ۔ امہ سٟتؠ کٔھژ ہامانسؔ مردکیؔ سنٛز سخ شرارت۔10یوٚدوے ہامانَسؔ ژکھ سٮ۪ٹھاہ ژکھ کٔھژ مگر تٔمؠ ژٲپ یہِ ژکھ انٛدری۔ یہِ باس دنہٕ بجایہ گو سُہ گرٕ تہٕ تتہِ سونٛبرِن پنٕنؠ دوس تہٕ گرٕ واجِنؠ زرِشؔ،11پتہٕ لوگ ہاماننؔ تِمن پنُن بجر تھیٚکُن تہٕ پننؠن اولادن ہُنٛد تہِ۔ اکھتُے تھیٚکنکھ یتہِ زِ بادشاہن کِتھ کٔنؠ دِژ مےٚ وزِ وزِ ترقی تہٕ تٔمؠ کِتھ کٔنؠ تھووُس بہٕ سارنی حٲکمن تہٕ عہدٕدارن سرس۔12تمہِ علاوٕ ووٚن ہامانن، "یتُے یوت نہٕ، بہٕ چُھس سُہ واحد شخص یُس ملکایہ آستیرؔ بادشاہس سٟتؠ تتھ دعوتس پٮ۪ٹھ بُلوو یۅسہ تمہِ از سانہِ باپتھ دِژ، تہٕ سٟتی کٔرن صرف مےٚ أکِس دعوت پگاہ بیٚیہِ بادشاہس سٟتؠ سالس ینٕچ۔"13پتہٕ ووٚن ہاماؔنن، "پوٚز تۅتام میلہٕ نہٕ مےٚ خوشی یوٚتام بہٕ سُہ یہُودؠ مردکیؔ بادشاہ سٕنٛدِس دروازس پؠٹھ بہِتھ وُچَھن یُس مےٚ احترام کرنَس اِنکار کران چُھ۔"14پتہٕ کٔر ہامانؔ نہِ خاندارنہِ زرِشؔ تہٕ تمِسنٛدیو دوستو یہِ تجویز پیش زِ، "گۅڈٕ کرناو پننؠن خدمت گارن اتھِ پنٛژٕہہ میٹر تھوٚد اکھ کوٗٹ کھڑا۔ پتہٕ گژھِ صبحس بادشاہس نِشہ تہٕ ونُس زِ بہٕ چُھس یژھان مردکیؔ اتھ پؠٹھ پھٲسہِ کھالُن تہٕ مردکی قتل کرنہٕ پتہٕ ہکیٚو توٚہؠ پتہٕ اصل پٲٹھؠ بادشاہس سٟتؠ سالس گٔژھتھ۔ "ہامانؔن سونچ زِ یہِ چُھ اکھ رُت منصوبہ، لہٰذا ووٚن تٔمؠ پننٮ۪ن خدمت گارن پھَہہ کوٗٹ کھڑا کرنہٕ باپتھ۔
Bridge Connectivity Solutions Pvt. Ltd.