ایستر2
1کینٛژِ کٲلؠ ییٚلہِ بادشاہ اخسویرسؔ شرارت ووٚتھ، تمِس پییہِ وشتیؔ یاد۔ مگر تمہِ ٲس بادشاہ سنٛدِس حکمس نافرمٲنی کرمژ تہٕ بادشاہن اوس فرمان جٲری کۅرمُت زِ سۅ گژھِ نہٕ أمِس نِشہ دُبارٕ زانٛہہ یِنؠ۔2لہٰذا کینٛژو نوجوان خدمتگارو ووٚن بادشاہس، "تُہنٛز شان ٲسِنؠ بُلنٛد، توٚہہ پزِ وُنؠ نُوو نیتھٕر کرُن، توٚہؠ ہیکیو پننؠن خدمت گارن ؤنِتھ تِم ژھانٛڈن کانٛہہ انہرِش مٲرؠ مٔنٛز نوجوان کور۔3"ییہِ ہیکیو توٚہؠ پننہِ سلطنت کین ریاستن ہنٛدین افسرن یہِ ذمہ داری تہِ تھٲوِتھ زِ تٔم انُن خوبصورت انہرؠ شن کورین سوسن شہرچہِ رازدانہِ منٛز۔ یتہِ تمہٕ کورین ہنٛدس حرم خانہٕ کِس شٲہی نگران ہیجاییؔ یس حوالہٕ روزن، یُس تتہِ موجود نوجوان مستوراتن ہنٛز رٲچھ کران چُھ۔ سُہ کرِ تِمن ۂنٛدِ پٲراونُک تہِ انتظام۔4"پتہٕ نِیو توٚہؠ پانے فٲصلہٕ زِ کۅسہٕ ہِش زٔنؠ آیہِ توٚہہ پسنٛد، سۅ کٔروون توٚہؠ وشتیؔ ھنٛدِ بدلہٕ ملکٲنؠ تسلیم۔ "بادشاہس آیہِ تِہنٛز یہِ تجویز پسنٛد، تہٕ تٔمؠ کوٚر تی۔5تِمن دوٚہُن اوس شہرِ سوسن چہِ رازدانہِ منٛز اکھ یہُودؠ روزان یمِس مردکیؔ ناو اوس۔ سُہ اوس بنیمِینؔ قبیلس سٟتؠ تعلق تھاوان۔ تہنٛدِس مٲلس اوس یاییرؔ ناو، تمہِ سٕنٛدِس بڈِببس اوس سمعیؔ ناو، تہٕ تہنٛدس بڈٕ بڈِ ببس اوس قیس ناو۔6واریاہ ورؠ برونٛٹھ اوس بابلٕکؠ بادشاہ نبوکدنضرن قیسؔ یروشلمہٕؔ منٛزٕ جلاۓ وطن کۅرمُت تہٕ اوسُن کینٛژن قٲدین سٟتؠ بابلؔ اُنمُت۔ نبوُکدنفرؔن اوس سُہ تمہِ وقتہٕ یروشلمہٕؔ جلاۓ وطن کۅرمُت ییٚلہِ تٔمؠ یہودایہ ہُکھ بادشاہ جیکونیؔ یروشلمہٕؔ منٛز نیٚبر کوٚڈ تہٕ انُن سُہ بابلؔ۔7وُنؠ اوس مردکیؔ پنٕنؠ پِتٕر بیٚنہِ رچھان، یۅسہ یتیم ٲس۔ تسُنٛد عِبرٲنؠ ناو اوس ہدؔسّاہ تہٕ فارسی ٲسِس آستیرؔ ونان۔ ییٚلہِ تسنٛد مول تہٕ موج مودؠ، مردکائینؔ رٹ سۅ کورِ گرینٛز پانس سٟتؠ۔ آستیرؔ ٲس وُنؠ اکھ نوجوان زنانہ، تہٕ سۅ ٲس حدٕ کھۅتہٕ زیادٕ لوٗبہٕ وُنؠ۔8تہٕ پتہٕ سَپد یتھٕ پٲٹھؠ زِ: قٲصد گے سارسٕے سلطنتس کُن روانہٕ تہٕ کوٚرکھ تمہِ نَویہ فرمانکُ اعلان یُس بادشاہن ووٚنُمت اوس۔ اتھ دوران انہِ تِمو افسرو یمہٕ بادشاہن پریتھ صوبہٕ باپتھ مقرر کٔرمٕتؠ ٲسؠ حسین تہٕ جمیل نوجوان زنانہٕ سوسن شہرچہِ رازدانہِ منٛز تہٕ تھاویکھ ہیجاییؔ سنٛزِ نگرٲنی تل۔ سُہ اوس سُہ نفر یُس نوجوان زنانن ھنٛز نگرٲنی پٮ۪ٹھ مقرر اوس۔ یمہٕ انہرشہِ زنانہٕ حرم خٲنس منٛز روزان آسہ۔ تکیازِ آستیرؔ ٲس حدٕ کھۅتہٕ زیادٕ حسین افسرو أنؠ سۅتہِ بادشاہ سنٛدِس محلس منٛز تہٕ تھٲوکھ ہیجاییؔ سنٛزِ نگرٲنی تل۔9ہیجاییؔ گوٚو آستیرؔ نہِ سٟتؠ سیٹھاہ مُتٲثر تہٕ تٔمؠ کوٚر تس سٟتؠ موٲفق سلوک۔ تٔمؠ کوٚر جل آستیرؔ نہِ باپتھ زیورن تہٕ کھیٚن چیٚنُک انتظام۔ بیٚیہِ ژارِ تٔمؠ شٲہی محلچہِ ستتھ دآیہِ تہٕ تِمہ تہٕ تھاوین تس سٕنٛدِس خدمتس۔ بیٚیہِ نِین آستیرؔ تہٕ تمؠ سنٛزٕ دایہِ انہرؠ شن کورین ہنٛدس ساروٕے کھۅتہٕ رٕتِس حرم خانَس منٛز۔10مردکیؔ ین ٲس آستیرؔ خبردار کٔرمژ زِ تمِس پزِ نہِ کانٛسہِ ونُن سۅ کٔمہِ خاندانٕچ چھےٚ۔ لہٰذا ووٚن نہٕ مردکیؔ کانٛسہِ زِ سۅ چھےٚاکھ یہُودؠ یا تمہِ سُنٛد رشتہٕ دار کُس چُھ۔11مردکیؔ اوس یژھان زاننُ آستیرؔ کیاہ ٲس کران تہٕ تمِس سٟتؠ کیاہ اوس سَپدان۔ اوے اوس سُہ پرٮ۪تھ دوٚہہ انہرؠ شن زنانن ہنٛدس حرم خانہِ کس آنٛگنس برونٛہہ کنہِ اورٕ یور پھیران آسان۔ یتہِ کِنؠ اوس سُہ حرم خانس منٛز انٛدر نیٚبر نیرن والین نِشہ معلوم کران زِ سۅ کیاہ چھےٚکران۔12حرم خانہٕ پؠٹھٕ ٲس پرٛیتھ وقتہٕ اکھ اکھ انہرِش زنانہ بادشاہ اخسویرسؔ نِشہ بحثیت لونٛڈی جِنسی تعلق بناونہٕ باپتھ گژھان۔ وٲرؠ واتنہٕ برونٛٹھ ٲس پرٛتھ اکھ زنانہ برابر أکِس ورؠ یس پولوسؔنہٕ تہٕ پٲراونہٕ یوان تِمو طریقو سٟتؠ یِم یمن خٲطرٕ فارسس منٛز بناونہٕ آمٕتؠ ٲسؠ۔ یہِ پٲراو اوس یتھٕ پٲٹھؠ مکمل سپدان: گوڈٕ نکین شین ریتن آسہ دایہ أکِس زنانہ بدنس پرٛتھ دوٚہہ زیتون تیٖلہِ تہٕ مشکہٕ دار گوندٕ سٟتؠ مٲلش کران۔ دوٚیمن شین ریتن دوران آسہ تمہِ سنٛزٕ دایہِ تسنٛدس بدنس پرٛیتھ دوٚہہ عطر ملان تہٕ مہلامہ کران۔13امی طریقہٕ آسہ تِمہ أکِس انہرؠ شہ کورِ بادشاہ سٕنٛدِ باپتھ پٲراون تہٕ یتھ کِنؠ ٲس تمؠ سنٛز اکھ لونڈی تیار سپدان۔ یہِ کینٛژھا پوشاک تہٕ زیورات یُس حرم خانس منٛز انہرؠ شن باپتھ آسان اوس سۅ پسنٛد کرِہے تہِ اوس تس دِنہ یوان۔ تہٕ سُہ لٲگِتھ ٲس سۅ بادشاہ سنٛدِس محلہٕ خانس منٛز نِنہٕ یوان۔14بادشاہ سنٛدؠ خدمت گار ٲسؠ تمِس بادشاہ سنٛدِس ذٲتی کمرن منٛز شامس نِوان تہٕ صبحس ٲسِس تتھ حرم خانس منٛز انان یُس لونڈیو باپتھ مخصوص اوس۔ شعشجزؔ ناوٕ کِس أکِس نفرس یُس لونڈین ہُنٛد شٲہی رٲچھ در تہٕ نگران اوس حوالہٕ کرنہٕ یوان۔ امہِ پتہٕ ٲس سۅ نوجوان کورِہن تٔتی پنمنؠ باقی زندگی بسر کران۔ سۅ ٲس نہٕ تۅتام بادشاہس نِشہ گژھان یۅتام نہٕ سُہ تس پانس نِشہ بُلاوِہے۔ تکیازِ تٔمؠ اوس آسان تٔمؠ سُنٛد مَزٕ تلمُت۔15ٲخٕر ییٚلہِ سُہ شام ووت ییٚلہِ آستیرؔ بادشاہس نِشہ گژھنٕچ وٲرؠ ٲس یۅسہ مردکیؔ ین منٛگتہ نِتھ پنٕنؠ کور ٲس بنٲومژ۔ تہنٛدس مٲلس اوس ابیخیلؔ ناو، یُس مردکیؔ سُنٛد پِتٕر اوس۔ ییٚلہِ سۅ بادشاہس نِشہ گثھنہٕ باپتھ تیار گییہ تمہِ موٚنگ تی یہِ ہیجایَن تس مشورٕ دیُت یُس شٲہی محلہٕ خانس منٛز انہرشہِ مستوراتن ہُنٛد نگران اوس۔ یمؠ تہِ آستیرؔ وُچھ سُہ گو متٲثر، سۅ ٲس سیٹھاہ شوٗبہ وٕنؠ تہٕ لوٗبہٕ وٕنؠ۔16بادشاہ سنٛدیو خدمت گارو واتنٲو آستیرؔ بادشاہ اخسویرسؔ سنٛدِس محلہٕ خانس منٛز۔ یہِ اوس ؤرؠ یُک دہِم ریٚتھ یعنی طیبت، فارس کِس بادشاہ سٕنٛدِ حثیتہٕ تمؠ سنٛزِ حکومتُک سٔتم ؤری17بادشاہن ورتوو آستیرِؔ سٟتؠ ساروٕے زنانو کھۅتہٕ زیادٕ لول۔ تٔمؠ کوٚر تسَ سٟتؠ باقی ساروٕے انہرؠ شو کھۅتہٕ زیادٕ رُت تہٕ موٲفق سلوک۔ یمہٕ اۅتام تس سنٛزٕ لونڈی بنیمژٕ آسہ۔ لہٰذا تھوو بادشاہ اخسویرسنؔ شٲہی تاج تہنٛدسےٕ کلس پٮ۪ٹھ۔ تہٕ تٔمؠ بنٲو سۅ وشتیؔ سنٛزِ جایہِ ملٔکٲنؠ۔18پتہٕ کوٚر بادشاہن اکہ بڈِ ضیافتُک سنٛز تہٕ دِژن پننؠن سارنےٕ ملٲزمن تہٕ خدمت گارن دعوت۔ یہِ سال دِتُن آستیرؔ ہنٛدس مِلکٲنؠ بننَس پؠٹھ۔ تٔمؠ کوٚر اعلان زِ یہِ مناون تسَنٛدِس سلطنتس منٛز تمام صوبن ہنٛدؠ لوٗکھ، یِمہٕ ساعتہ نہٕ تِمن محصول تہِ دیٚون پیٚیہِ، تہٕ تٔمؠ دِتؠ لوٗکن وژھِ وٲنجہِ مختلف تحفہٕ۔19امہِ پتہٕ ووٚن اخسویرسنؔ پننٮ۪ن ملٲزمن بیٚیہِ تہِ سوسن انہرشہِ کورِ اننہٕ باپتھ تہٕ تتھ دوران اوس مردکیؔ بادشاہ سنٛدِ خٲطرٕ تمِسنٛدس دروازس پؠٹھ روزِتھ کٲم کران۔20آستیرِؔ اوس نہٕ وُنتہِ کانٛسی پننہِ خاندانکُ پے پتاہ ووٚنمت، تکیازِ تس اوس مردکیؔ ین کٲنسہِ نِش امیٚک اظہار کرنہٕ نشہٕ منع کوٚرمُت۔ سۅ روز مکمل پٲٹھؠ مردکیؔ سنٛدین ہدایتن پؠٹھ عمل کران، تِتھے کِنؠ یتھٕ کٔنؠ سۅ پننِس گرس منٛز پرٛتھنس دوران کران ٲس۔21تٔتھؠ وقتس دوران ییٚلہِ مردکیؔ بادشاہ سنٛدِس دروازس پؠٹھ پنٕنؠ کٲم کران اوس، بادشاہ سٕنٛدؠ بیٚیہِ زٕ رٲچھ در یِم دروازس رٲچھ ٲسؠ آسان گییہ بادشاہ سنٛز کہتام ناراضگی۔ تِمو بنوو بادشاہ اخسویرسؔ قتل کرنُک منصوبہ۔ تِمن ہُنٛد ناو اوس بگتانؔ تہٕ ترشؔ۔22مگر مردکیؔ ین کوٚر تِہنٛدس تتھ منصوبس متعلق پے پتاہ۔ تٔمؠ ووٚن اتھ متعلق ملکانہِ آستیرِؔ، تہٕ تمہِ ووٚن بادشاہس۔ تمہِ کوٚر انکِشاف زِ مردکیؔ ین دِژ تمِس یہِ خبر۔23بادشاہ سنٛدیو ملٲزمو کوٚر مردکیؔ سنٛزِ شیٚچھِ تحقیقات تہٕ دریافت کٔرتھ دراو یہِ پوٚز۔ لہٰذا دیُت بادشاہن تِمن دوٚشونے پھٲسؠ دِنک حکم۔ یہِ کتھ آیہ بادشاہس برونٛہہ کنہِ شٲہی تٲریخ نامس منٛز درج کرنہٕ۔
Bridge Connectivity Solutions Pvt. Ltd.