اِستِثنا21
1موسیٰؔ ہن ووٚن اسرائیل ین مزید، "فرض کرو کانٛہہ آسیٚکھ کُنہ کھہَس منٛز تتھ ملکس انٛدر قتل کوٚرمُت یُس سون خدا یہُوواہؔ توٚہہِ دِوان چُھ تہٕ توٚہہ آسیٚو نہٕ پتاہ زِ یہ شخص کٔمؠ چُھ مورمُت۔2اگر یہ سپدِ تہٕ تُہنٛدین زِٹھیٚن تہٕ قاضؠ یٚن پزِ تتھ جایہِ گژھُن یتھ جایہ یہ لاش لبنہٕ آمٕژ ٲس تہٕ تتہِ پٮ۪ٹھ مینن پرٮ۪تھ کُنہِ نزدیکی شہرُک دوٗریر۔3پتہٕ چُھ نزدیکی شہرٕ کیٚن بُزرگن أکِس ہوکھرِ ہُنٛد انتخاب کرُن یۅسہ نہٕ زانٛہہ کُنہٕ کامہِ لاگنہٕ آمٕژ آسہ4تمہٕ نِن تس تِژھِ کۅلہِ نزدیک تتھ جایہ ییٚتہِ نہٕ زمین وٲیمٕژ یا تتھ کینٛہہ وومُت آسیٚکھ۔ تتِتھ پُھٹراون تس گردن۔5کاہنن تہِ پزِ توٚت گژُھن تکیازِ سٲنؠ خدا یہُوواہنؔ چھِ تِم لاوی قبیلہٕ منٛزٕ ژٲرمٕتؠ تاکہِ تِم کرن تس سنٛز خدمت تہٕ روزن تسنٛدؠ نمایندٕ بنِتھ لوٗکن دُعا کرن۔ تہٕ بیٚیہِ ژٲرِنؠ تِم امہِ موٚکھٕ تہِ زِ تِم انٛزراون تمہٕ تنازٕ تہِ یِمن منٛز کانٛہہ زخمی گوٚمُت آسہ۔6نزدیک شہرٕ کٮ۪ن بُزرگن پزن تمِس ہوکھرِ پٮ۪ٹھ اتھٕ پٔٹھراوٕنؠ یمسنٛز گردن تتہِ تتھ وادی منٛز پُھٹرٲوِتھ آسہ،7تہٕ تِم ونن، "اسہِ کوٚر نہٕ یہ شخص قتل، تہٕ نہ وُچھ کٔمؠ کوٚر۔8پتہٕ منٛگن زِٹھؠ دعا، اے یہُوواہؔ، اسہِ کر معاف، پننٮ۪ن اسرائیلی لوٗکن یمہٕ ژےٚ مِصرٕ منٛزٕ بچٲوتھکھ۔ اسہِ مہٕ زان مجرم۔ امہِ بجایہ کر اسہِ معاف"9یہ کٔرتھ چُھو توٚہؠ سۅ کام کران یمہِ سٟتؠ یہُوواہؔ توٚہہ ٹھیک زانہِ، تہٕ توٚہہِ ٹھہراوِ نہٕ تمِس شخصہٕ سنٛدِ قتلٕکؠ قصوروار۔10موسیٰؔ ہن ووٚن اسرائیل ین، "ییٚلہ توٚہؠ یمہ سِپاہ آسن پننٮ۪ن دشمنن سٟتؠ جنگ کرنہِ گٔژھان چُھو تہٕ سون خدا یہُوواہؔ چُھ توٚہہ تِمن شِکس دِنس قٲبل بناوان تہٕ تِم چھِ تُہنٛدؠ قٲدؠ بنان،11توٚہہ منٛزٕ اگر کٲنٛسہِ تِمن منٛز کانٛہہ خوبصورت زٔنؠ نظرِ گژھِ یۅسہ تس پسنٛد ییہِ تہٕ سُہ یژھِ تس سٟتؠ خاندر کرُن۔12سُہ أنِن تس پنُن گھرٕ، تہٕ تتہِ کٲسِن سۅ پننِس کلس سورےٕ مس تہٕ اونٛگجن تُلِنؠ نم تاکہِ یہِ سپدِ ظٲہر زِ تٔمس چُھنہٕ ؤنؠ پننِس تتھ قبیلس سٟتؠ کانٛہہ تہِ تعلق بلکہِ بنییہِ وۅنؠ سۅ اسرائیلی۔13تس پزن تِم سٲری پلو کٔڈِتھ ژھنٕنؠ یمہٕ تس رٹنہٕ وزِ نٲلؠ ٲسؠ تہٕ لاگہِ وۅنؠ اسرائیلی پۅشاک۔ تس چُھ ضروری تس مردٕ سنٛدِس گھرس منز روزُن تہٕ أکِس ریٚتس مٲلِس ماجہِ نِش ژھنہٕ گژھنُک دۅکھ رٹُن۔ تمہِ پتہٕ چُھ تس تمِس سٟتؠ خانٛدر کرنُک اجازت۔14پتہٕ اگر نہٕ سُہ تس سٟتؠ خوش رود تہٕ تس ییہِ اجازت دنہٕ زِ سُہ ہیٚکہِ تس ترٲوِتھ۔ تکیازِ سۅ ٲس شرمنٛدٕ کرنہٕ آمتِس تہٕ تمِس سٟتؠ شونٛگنہٕ خٲطرٕ مجبور، لہٰذا ییہِ نہٕ تس یہ اجازت دنہٕ زِ سُہ کرِ تس سٟتؠ غلام سُنٛد ہیٚوٗ ویوٕہار تہٕ تس کٕنہِ بیٚیہِ کٲنٛسہِ۔15فرض کرو زِ کٲنٛسہِ شخصس آسن زٕ خاندارنہِ تہٕ تمو منٛزٕ آسہ سُہ أکِس پسنٛد کران تہٕ بیٚیِس ناپسنٛد۔ مثال مانو زِ دوٚنوٕنی زاے لڑکہٕ تہٕ زیُٹھ ہیٚو لڑکہٕ آسہ تسُنٛد یۅسہ نہٕ تمِس پسنٛد چھےٚ۔16یمہِ دوٚہہ سُہ شخص فٲصلہٕ کرِ زِ میانہِ مرنہٕ پتہٕ میانہِ جادادٕ منٛزٕ کُس حصہٕ کٔمِس ترِ، سُہ ہیٚکہِ نہٕ یہ کٔرِتھ زِ تمِس نیٚچوِس دییہ بوٚڈ حصہٕ یُس تس خاندارنہِ ہُنٛد چُھ یۅسہ ٹٲٹھ چھیٚس بلکہِ واتہِ یہ تٔسؠ یُس گۅڈٕ زامُت چُھ۔17تمِس پزن پننہِ جادادٕکؠ زٕ حصہٕ زِٹھِس نیٚچوِس دِنؠ، تمِس خاندارنہِ ہنٛدِس نیٚچوِس یس نہٕ سُہ پسنٛد کران چُھ۔ سُہ چُھ تمسُنٛد زیُٹھ نیٚچو تہٕ تمِس پزِ تس ساروےٕ کھۅتہٕ زیادٕ حصہٕ دیُن۔18فرض کرو زِ اکھ لڑکہٕ چُھ یُس سٮ۪ٹھاہ شرارتی چُھ تہٕ پننِس مٲلِس ماجہ خلاف ہمیشہٕ بغاوت کران آسہ تہٕ یُس نہٕ تِہنٛدِس وننَس کن تھاوان چُھ۔ تہٕ مثال کرو زِ تِم آسن تس لایان مگر سُہ آسہ نہٕ توتہِ تہندِس وننس کُن توجہ دِوان۔19اگر یہ سپدِ تہٕ تمسُنٛد مول موج گژھِ تمِس شہرٕ کِس دروازس پٮ۪ٹھ نیٚون یتہِ تِم روزان چھِ تہٕ پتہٕ شہرٕ کٮ۪ن بُزرگن برونٛٹھ کنہِ کھڑا کرُن۔ 20پتہٕ پزِ تِہنٛدِس مٲلس ماجہ تمہِ شہرٕ کٮ۪ن بزرگن ونُن، "سون یہ لڑکہٕ چُھ شرارتی تہٕ یہ چُھ ہمیشہٕ اسہِ خلاف بغاوت کران۔ سُہ چُھنہٕ سٲنؠ کتھےٕ مانان۔ سُہ چُھ واریاہ کھیٚوان تہٕ شراب تہِ چیٚوان۔"21پتہٕ پزِ تمہ شہرٕکٮ۪ن بزرگن سُہ سنگسار کٔرِتھ قتل کرُن۔ یہ کرنہٕ سٟتؠ لٔبیٚو توٚہؠ امہِ بُرٕ عملہِ سٟتؠ پننِس سماجس منٛز نجات۔ تہٕ اسرائیلس منٛز بوزن اتھ متعلق سٲری لوٗکھ یہ تٔمؠ کوٚرمُت آسہ تہٕ تہِ کرنس کھۅژُن تِم۔22اگر کٲنٛسہِ کُنہِ تِتھِ جُرمہٕ کِنؠ پھٲسؠ ییہِ دِنہٕ یمہِ کِنؠ سُہ مرنُک مستحق آسہ تہٕ توٚہؠ تھٲیو تمؠ سنٛز لاش کُنہِ تھمبس الانٛژ،23تہٕ توٚہہ چھنہٕ سۅ لاش تتِتھ پوٗرٕ راتس تھاونُک اجازت دیُن۔ یمہ دوٚہہ سُہ مرِ تمی دوٚہہ گژھِ تمؠ سنٛز لاش دفناونہٕ یِنؠ تکیازِ اگر توٚہہ سۅ لاش کُنہ تھمبس پٮ۪ٹھ تھٲوون تہٕ خدا کرِ تتھ زمینس لعنت۔ توٚہہ پزِ تمی دوٚہہ سۅ لاش دفناوٕنؠ تاکہِ توٚہؠ کٔرؠ وون نہٕ سۅ زمین ناپاک یۅسہ سون خدا یہُوواہؔ توٚہہ تتھ ملکس منٛز دِوان چُھ۔
Bridge Connectivity Solutions Pvt. Ltd.