اِستِثنا17
1موسیٰؔ ہن ووٚن اسرائیل ین مزید، "سٲنِس خدا یہُوواہؔ سنٛدِ باپتھ مہٕ کٔرؠ وون کانٛہہ تیٚوتھ گُپن، تیوٗر یا ژھاوُل قربان یمِس کانٛہہ نۅقُس آسہ تکیازِ یہُوواہؔ چُھ یتھؠ تحفہٕ ناپسنٛد کران۔2ییٚلہِ توٚہؠ تمہِ زمیٖنہِ ہنٛدِس کُنہِ تہِ شہرس منٛز روزان ٲسیٚو یۅسہ سون خدا یہُوواہؔ توٚہہِ دِوان چُھ، فرض کرو کانٛہہ مرد یا زٔنؠ کرِ تمہ عہدٕچ نافرمٲنی کٔرِتھ گناہ یُس یہُوواہنؔ توٚہہِ سٟتؠ کوٚرمُت چُھ۔3فرض کرو تٔمؠ شخصن کوٚر بیٚین دیوتاہن، افتابس، زوٗنہِ یا سِتارن عبادت تہٕ سجدٕ۔4اگر توٚہہ کانٛہہ ونہِ زِ کانٛہہ شخص چُھ یہ کران تہٕ توٚہؠ کٔرؠ زیٚو اصل پٲٹھؠ تس پرژھٕ گٲر زِ آیا یہ بُرٕ کٲم چھا اسرائیلس منٛز سپٕزمٕژ۔5اگر یہ سپُدمُت چُھ تہٕ توٚہہ پزِ سُہ شہرٕ منٛزٕ نیٚبر کڈُن یمؠ مردن یا زنہِ یہ کوٚرمُت آسہ۔ پتہٕ پزِ توٚہہ سُہ شخص سنگسار کٔرِتھ مارُن۔ 6مگر توٚہہ چُھ صرف یتھ صوٗرتس منٛز یِتھؠ نفرن قتل کرنُک اجازت اگر زن کم از کم زٕ نفر گواہی دِن زِ تِمو وُچھ تِم یتھ کنؠ کران۔ اگر زن صرف اکھ گواہ آسہ تیٚلہ ہیٚکو نہٕ تِمن پھٲسؠ دِتھ۔ 7گواہ گژھن مجرمن کنہِ لاینؠ۔ ادٕ لاینکھ باقی لوٗکھ کنہِ یۅتام تمہٕ مرن۔ یتھٕ پٲٹھؠ کٔریٚو توٚہؠ پانس منٛز امہِ بُرٕ عملہِ ہُنٛد خٲتمہٕ۔8بعضے چُھ منصفن باپتھ یہ فٲصلہٕ کرُن سٮ۪ٹھاہ مشکِل بنان زِ اصل حقیقت کیاہ چھےٚ۔ بنان چُھ زِ سُہ آسہ یہ فٲصلہٕ کرنٕچ کوشش کران زِ ییٚلہ کٲنٛسہِ شخصن کانٛہہ مورمُت یا زخمی کوٚرمُت آسہ، تہٕ تٔمؠ شخصن چھا یہ زٲنِتھ مٲنِتھ مورمُت کِنہٕ وشفن۔ یا سُہ آسہ یہ فٲصلہٕ کرنٕچ کوشش کران زِ آیا کانٛہہ شخص ما چُھ ہنٛگہٕ منٛگے کانٛسہِ عدالت وانن لاگان۔ اگر تہنٛدِس شہرس منٛز یہ زانُن واریاہ دشوار آسہ زِ اصل حقیقت کیاہ چھےٚ تہٕ اگر منصف فٲصلہٕ کٔرِتھ ہیٚوک نہٕ تہٕ توٚہہِ پزِ تتھ جایہ گژھُن یۅسہ سٲنؠ خدا یہُوواہنؔ تُہنٛدِ باپتھ تمؠ سنٛز عبادت کرنہٕ خٲطرٕ ژٲرمٕژ چھےٚ۔ 9تتہِ پزِ توٚہہ لاوی ہنٛدین اولادن یِم کاہن چھِ تہٕ قٲضی یس برُونٛہہ کنہِ مقدِمہ پیش کرُن یُس تمہِ وقتہٕ خدمت انجام دِوان آسہ، سُہ دییہِ فٲصلہٕ زِ کیاہ پزِ کرُن۔10ییٚلہ سُہ پنُن فٲصلہٕ دییہِ تہٕ توٚہہ پزِ تی کرُن یہ سُہ کرُن ونہِ۔11یُس تٔمؠ فٲصلہٕ دیُت سُہ کٔریٚو قبول، تہٕ یہ سُہ ونہِ تتھ پٮ۪ٹھ کٔریٚو عمل۔ تہِ گژھِ نہٕ کُنہ تہِ صوٗرتس منٛز بدلاونہٕ یُن یہ لاوی کاہن تہٕ مُصنف فٲصلہٕ نِن۔12سُہ گژھِ قتل یُن کرنہٕ یُس کانٛہہ تہِ قٲضؠ یا کاہن سنٛز نافرمٲنی کرِ، یُس یہُوواہؔ حٲظر ناظر رٹِتھ فٲصلہٕ دِوان چُھ زِ کیاہ چُھ کرُن۔ یہ کرنہٕ سٟتؠ روزیٚو توٚہؠ تمہِ خراب عملہِ نِشہ دور یۅسہ توٚہہِ منٛز آسہ۔13سُہ شخصس قتل کرنہٕ پتہٕ بوزن تمام لوٗکھ یہ خبر تہٕ تِمن گژھِ خوف تہٕ پتہٕ کرِنہٕ کانٛہہ تہِ دوبارٕ یژھ حرکت۔14بہٕ چُھس زانان زِ تتھ ملکس پٮ۪ٹھ یُس سون خدا یہُوواہؔ توٚہہِ دِوان چُھ قبضہٕ کرنہٕ تہٕ تتہِ روزنہٕ پتہٕ ؤنیٚو توٚہؠ زِ اسہِ گژھِ اکھ بادشاہ آسُن یُس اسہِ پٮ۪ٹھ حکومت کرِ، تِمن بادشاہن ہنٛدؠ پٲٹھؠ یمہٕ اسہِ انٛدؠ پٔکؠ ملکن منٛز چھِ۔15سون خدا یہُوواہؔ دییہِ توٚہہ بادشاہ بناونُک اجازت، مگر پژھ کٔرؠ زیٚو توٚہؠ کٔرؠ وون سُہ اکھ شخص مقرر یُس تٔمؠ ژورمُت آسہ۔ سُہ شخص گژھِ اسرائیلی سٲتھیو منٛزٕ آسُن۔ توٚہؠ کٔرؠ زیٚون نہٕ کانٛہہ غٲر ملکی پنُن بادشاہ مقرر۔16بادشاہ بننہٕ پتہٕ پزن نہٕ تس پننہِ باپتھ زیادٕ تعدادس منٛز گُرؠ ہیٚنؠ۔ تمِس پزن نہٕ پننہِ خٲطرٕ گُرؠ مٔلؠ ہیٚنہٕ باپتھ لوٗکھ مِصر سوزٕنؠ، تکیازِ یہُوواہنؔ چُھنے ژےٚ ونمُت، زِ زانٛہہ تہِ گٔژھؠ زیٚنہٕ کُنہِ چیزٕ باپتھ مِصر واپس! 17تہٕ تمِس گژھن نہٕ واریاہ خاندارنہِ آسنہِ تکیازِ اگر تٔمؠ تہِ کوٚر تہٕ تمہٕ رکاون تمِس یہُوواہؔ سنٛز عبادت کرنہٕ نشہٕ۔ تہٕ تمِس چُھنہٕ زیادٕ سۅن تہٕ رۅف حٲصِل کرن۔18ییٚلہِ سُہ تُہنٛد بادشاہ بنہِ تہٕ تمِس پزِ یمہٕ قانون نقل کرنہٕ باپتھ کانٛہہ نفر مقرر کرُن۔ تمِس پزن تمہٕ تِمو طُمارو پٮ۪ٹھٕ نقل کرٕنؠ یمہٕ لاوی نسلہٕ کٮ۪ن کاہنن اتھِ چھِ۔ 19سُہ تھاوِ تمہٕ نٔوؠ طُمار پانس اتھِ تہٕ پننہِ زندگی دوران آسہ تِم پرٮ۪تھ دوٚہہ پران تاکہِ سُہ ہیٚچھِ یہُوواہسؔ بہتر پٲٹھؠ احترام کرُن تہٕ تِمن تمام اصولن تہٕ ضٲبطن وفادٲری سان مانُن یمہٕ تِمن قانونن منٛز لیٚکھِتھ چھِ۔20اگر بادشاہ تہِ کران آسہ تہٕ تمِس گژھِ نہٕ یہ گمانہٕ زِ سُہ چُھ پننٮ۪ن اسرائیلی سٲتھین ہنٛدِ کھۅتہٕ زیادٕ اہم تہٕ سُہ کرِ پوٗرٕ پٲٹھؠ یہُوواہؔ سنٛدین حکمن ہنٛز تعمیل۔ نتیجہٕ نیرِ یہ زِ سُہ تہٕ تمسنٛدؠ اولاد روزن اسرائیلس منٛز واریہس وقتس بادشاہ سنٛدِ حثیتہٕ حکومت کران۔"
Bridge Connectivity Solutions Pvt. Ltd.