اِستِثنا12
1موسیٰؔ رود ہیٚتھےٕ اسرائیل ین یہِ ونان زِ "وۅنؠ ونہٕ بہٕ توٚہہ تِم اصول تہٕ احکام یمن ہنٛز توٚہہ تتھ ملکس منٛز روزِتھ وفادٲری سان پٲروی کرٕنؠ پزِ، یمہ یہُوواہؔ سون خدا یمسنٛز عبادت سٲنؠ جدٕاجداد کران ٲسؠ، توٚہہ قبضہٕ کرنہٕ باپتھ دِوان چُھو۔ یۅتام توٚہؠ زنٛدٕ چُھو تۅتام پزن توٚہہ یمہ قانون اپناوٕنؠ۔2ییٚلہ توٚہؠ لوٗکن ہنٛزٕ تِم جمٲژ تتہِ کٔڈؠ ووکھ یہنٛز زمین توٚہؠ رٹیٚو تہٕ توٚہہ پزن تِم سارے جایہ تباہ کرنہِ یتہِ تِم پننٮ۪ن دیوتاہن ہنٛز پرستِش کران ٲسؠ، پہاڑٕ تینٛتالن پٮ۪ٹھ، بالن منٛز تہٕ بڈین بڈین کُلین نِش۔3توٚہؠ لُوہرنٲے زیوکھ تہنٛزٕ قربان گاہ تہٕ تِمن ہنٛدؠ سِتون ژٔھنؠ زیوکھ پُھٹرٲوِتھ۔ تِہنٛز دیوی اشیرہ ہنٛز مورتی ژٔھنؠ زیون زٲلِتھ تہٕ تہنٛزٕ بناوِمژٕ موٗرژٕ ژٔھنؠ زیوکھ پُھٹرٲوِتھ تاکہِ تِمن جاین کرِنہٕ کانٛہہ تہِ تِہنٛز پوٗزا۔4یہُوواہؔ سنٛز عبادت مہٕ کٔریٚو تِتھ پٲٹھؠ یتھٕ پٲٹھؠ کنعانٕکؠ لوٗکھ پننٮ۪ن معبودن ہنٛز کران چھِ۔5امہِ بجایہ پزِ توٚہہِ تتھ جایہ گژُھن یۅسہ یہُوواہؔ منتخب کرِ۔ یہ آسہ تتھ علاقس منٛز یتہِ تُہنٛدِ قبیلہٕ منٛزٕ کانٛہہ روازان آسہ۔ یہ آسہ سۅ جاے یوٚت توٚہہ یہُوواہؔ سنٛزِ حضوری منٛز اژُن آسہ تہٕ تتہِ تمؠ سنٛز عبادت کرنؠ پزِ۔6یہ آسہ سۅ جاے یوٚت توٚہہ پننہ قربٲنیہ ننہِ آسن یمہٕ کاہن قربان گاہس پٮ۪ٹھ پورٕ پٲٹھؠ بُزن تہٕ تُہنٛزٕ باقی قربٲنیہ یمہٕ توٚہؠ پانہٕ مےٚ پیش کران چُھو، تُہنٛزن باقی قربٲنین ہُنٛد دٔہم حصہ یُس توٚہؠ مےٚ دٕنُک وعدہ کران چُھو، یعنی گۅڈٕ نِکؠ ژَھو، تُہنٛزن گٲون تہٕ تیٖرن ہنٛدؠ، یا بیٚیہِ کُنہِ قسمٕچ قربٲنی۔7تتہِ، سٲنِس خدا یہُوواہسؔ برُونٛہہ کنہِ کھیٚیو توٚہؠ تِم اصل چیز یِم پٲدٕ کرنہٕ باپتھ توٚہہِ محنت کٔرو، تہٕ توٚہؠ سپدیٚو خوش، تکیازِ تٔمؠ کٔرنو توٚہہ واریاہ برکت عطا۔8ییٚلہ توٚہؠ اتھ ملکس منٛز ٲسیٚو تہٕ توٚہہ پزِن نہٕ تِم کینٛہہ چیز کرٕنؠ یمہٕ أسؠ کران آمٕتؠ چھِ۔ ونیُک تام ٲسیو توٚہؠ تتھٕ پٲٹھؠ یہُوواہؔ سنٛز عبادت کران یتھٕ پٲٹھؠ توٚہؠ یژھان ٲسیو،9تکیازِ توٚہؠ وٲتیٚو نہٕ وُنہِ تتھ ملکس منٛز یتھ پٮ۪ٹھ سُہ توٚہہ مکمل پٲٹھؠ قبضہٕ کرنُک اجازت دییہِ، یتہِ توٚہؠ سکونہٕ سان روزِتھ ہکیٚو۔10مگر ییٚلہ توٚہؠ یردن دریاوٕ اپور تٔریٚو تہٕ ملکس منٛز روزنہِ لگیٚو یُس سون خدا یہُوواہنؔ توٚہہ دِوان چُھو۔ سُہ تھایو توٚہہ تہٕ تُہنٛدیٚو تمام دشمنو نشہٕ محفوظ یمہ توٚہہ ولنہٕ ین، توٚہؠ روزیٚو امنہٕ سان۔11یہُوواہؔ ژارِ اکھ جایا یتہِ سُہ یژھان آسہ زِ توٚہؠ گٔژھیٚو تس سنٛز عبادت کرٕنؠ۔ یہ آسہ سۅ جاے یوٚت توٚہہ تِم تمام قربٲنیہ اننہِ آسنو یمہٕ اننُک بہٕ توٚہہ حکم کران چُھس: تمہ قربٲنیہ یمہ کاہن قربان گاہس پٮ۪ٹھ پوٗرٕ پٲٹھؠ بُزن، تُہنٛزٕ باقی قربٲنیہ، باقی قربٲنیہ یمہ توٚہؠ پانہٕ پیش کرنُک فٲصلہٕ کران چُھو، تُہنٛزن باقی قربٲنین ہُنٛد دٔہم حصہ، خاص نذرانہٕ یِم توٚہؠ یہُوواہسؔ پیش کرنٕکؠ پۅختہٕ وعدہ کٔریٚو۔12تتہِ یہُوواہسؔ برُونٛہہ کنہِ پنٕنؠ بچہٕ، خٲدِم تہٕ لاوین ہنٛدؠ اولاد ہیٚتھ یِم تُہنٛدِس شہرس منٛز روزان چھِ منٲیو خوشی۔ یہ مٔشرٲوؠ زیٚو نہ زِ لاوی سنٛدین اولادن آسہ نہٕ تُہنٛدؠ پٲٹھؠ پنٕنؠ زمین۔13یمہِ کتھِ ہُنٛد تھٲوؠ زیٚو خیال زِ یتِتھ تہِ توٚہؠ یژھِو تہٕ تتِتھ کٔرؠ زیوکھ نہٕ بُزنہٕ آمٕتؠ قربٲنی ہنٛدؠ جانور پیش۔14توٚہؠ کٔرؠ زیوکھ تِم صرف تٔتھؠ جایہ پیش یۅسہ یہُوواہؔ تمہِ باپتھ مقرر کرِ، تتھ علاقس منٛز یۅسہ تُہنٛدِ قبیلہٕ منٛزٕ کٲنٛسہِ أکؠ سنٛز آسہ۔ صرف آسہ یہےَ جاے یتہِ سُہ یژھِ زِ توٚہؠ گٔژھیٚو قۅرنانیہ پیش کرنہِ یِمن کاہن قربان گاہس پٮ۪ٹھ پورٕ پٲٹھؠ زالن تہٕ باقی چیز تہِ کرن یمن ہُنٛد بہٕ توٚہہ حکم دِوان چُھس ییٚلہ توٚہؠ تمؠ سنٛز عبات کٔریٚو۔15تاہم دییہ توٚہہ خدا پنٕنؠ جانور مارنٕکؠ تہٕ تِہُنٛد ماز کھیٚنُک اجازت تتھ جایہ یتہ توٚہؠ روزان ٲسیٚو۔ ییژِ لٹہِ توٚہؠ یژھِو توٚہؠ ہکیٚو تِمن جانورن ہُنٛد ماز کھیٚتھ یمہ سون خدا یہُوواہؔ توٚہہ برکت دِتھ عطا کرِ۔ یمہ لوٗکھ تمہ وزِ پاک یا ناپاک آسن تمہٕ سٲری ہیٚکن سُہ ماز کھیٚتھ۔ یتھ پٲٹھؠ توٚہؠ روٗسؠ کچہِ یا ہانٛگلہ سُنٛد ماز کھیٚوان چُھو۔16مگر توٚہہ پزِ نہٕ کٲنٛسہِ جانور سُنٛد خوٗن کھیٚون۔ ماز رننہٕ برُونٛہہ گژھِ گۅڈٕ پوٗرٕ پٲٹھؠ خوٗنس زمیٖنس پٮ۪ٹھ پیٚنہٕ دیُن۔ 17یتہِ توٚہؠ روزان ٲسیٚو تتہِ پزن نہٕ توٚہہ تِم چیز کھیٚنؠ یمہ توٚہؠ یہُوواہسؔ پیش کران چُھو۔ توٚہؠ کھیٚؠ زیٚو نہٕ پننہِ اناجُک، مےَ یُک، زیتون تیٖلُک یا پننٮ۪ن وژھیٚن ہُنٛد دٔہم حصہٕ۔ گٲون یا تیٖرن ژھاولٮ۪ن ہُنٛد سُہ نذرانہٕ یُس توٚہؠ پانہٕ یہُوواہسؔ پیش کرنُک فٲصلہ کران چُھو، یا بیٚیہِ کانٛہہ قربٲنی۔18امہِ بجایہ کھیٚیو توٚہؠ، تُہنٛدؠ بچہٕ، تُہنٛدؠ غلام، تُہنٛزٕ زنہٕ تہٕ لاوین ہنٛدؠ اولاد یِم تُہنٛدین شہرن منٛز روزان چھِ یم چیز یہُوواہسؔ برُونٛہہ کنہِ تتھ جایہ یۅسہ سُہ مقرر کرِ۔ تہٕ توٚہہ پزِ پرٮ۪تھ تتھ کامہِ پٮ۪ٹھ خوش روزُن یۅسہ توٚہؠ انجام دِیو۔19یۅتام توٚہؠ پننِس ملکس منٛز روزان چُھو تۅتام تھاوؠ زیٚو لاوین ہنٛدین اولادن ہُنٛد خیال۔20ییٚلہ سون خدا یہُوواہؔ توٚہہِ پرانہِ کھۅتہٕ زیادٕ زمین فراہم کرِ تہٕ تٔمؠ چُھ امیُک وعدہ کوٚرمُت، تہٕ ییٚلہ سُہ ونہِ، "بہٕ چُھس ماز کھیٚون پسنٛد کران" تہٕ توٚہہِ چُھ اجازت ییٚلہ یژھِو تیٚلہ کھیٚیو ماز۔21اگر سون خدا یہُوواہؔ تُہنٛد عبادتہٕ باپتھ سۅ جاے ژارِ یۅسہ تُہنٛزِ بسن جایہ نِش واریاہ دوٗر آسہ تہٕ توٚہہ چُھ اجازت زِ توٚہؠ مٲرؠ ووکھ کینٛہہ چاروٲے یا تیٖر یمہ یہُوواہنؔ توٚہہ دِتمٕتؠ چھِ تہٕ ہکیٚو تتھ شہرس منٛز سُہ ماز کھیٚتھ یتہِ توٚہؠ روزان ٲسیٚو، تِتھے کنؠ یتھٕ کنؠ مےٚ توٚہہ کرُن ووٚن۔ 22یمہٕ تٔمہِ وقتہٕ پاک یا ناپاک آسن ہیٚکن سُہ ماز کھیٚتھ یتھ پٲٹھؠ توٚہؠ ہانٛگلہ یا روٗسؠ کچہِ ہُنٛد ماز کھیٚوان چُھو۔23مگر حیٚس کٔرؠ زیٚو ینہٕ کٲنٛسہِ جانور سُنٛد خوٗن کھیٚیو، تکیازِ یوہے خوٗن چُھ جاندارن ہُنٛد زوو قٲیم تھاوان۔ توٚہہ پزِ نہٕ مازس سٟتؠ زوو تہِ کھیٚون۔24خوٗن مہٕ کھیٚیو۔ سُہ دِیو زمینس پٮ۪ٹھ پتھر پیٚنہٕ۔25اگر توٚہؠ یہ حکم پٲلیٚو تہٕ تہِ کٔریٚو یہ یہُوواہؔ ونان چُھ تُہنٛدِ خٲطرٕ چُھ بہتر، توٚہہِ تہٕ تُہنٛدین اولادن باپتھ روزِ یہ اصل۔26مگر سُہ نذرانہٕ یُس یہُوواہنؔ توٚہہ ووٚن زِ سُہ تھٲیو تمسنٛدِ باپتھ الگ تہٕ باقی نذرانہٕ تہِ یمہٕ پیش کرنُک توٚہہ فٲصلہٕ کوٚرو نیٖزیٚو توٚہؠ تتھ جایہ یۅسہ سُہ مقرر کرِ۔27تتہِ بُزِ کاہن تِمہ قربٲنیہ یہُوواہؔ سنٛدِس قربان گاہس پٮ۪ٹھ۔ سُہ مارِ تِمن جانورن، خوٗن کڈیٚکھ نیٚبر، تہِ تمہِ منٛزٕ تراوِ سُہ اوٚڈ قربان گاہس انٛدؠ پٔکؠ۔ تہٕ توٚہؠ ہکیٚو تمہ مازٕ منٛزٕ کینٛہہ کھیٚتھ۔28یِمن کتھن پٮ۪ٹھ کٔرؠ زیٚو توٚہؠ وفادٲری سان عمل یمیُک مےٚ توٚہہ حکم کوٚر۔ اگر توٚہؠ یتھ کنؠ کٔریٚو تہٕ تُہنٛد تہٕ تُہنٛدین اولادن ہنٛدِ باپتھ روزِ یہ ہمیشہٕ خٲطرٕ بہتر، تکیازِ توٚہؠ کٔریٚو تی یہ سون خدا یہُوواہؔ ونان چُھ زِ یہ چُھ تُہنٛدِ باپتھ بہتر تہٕ یہ تس خوش چُھ۔29ییٚلہ توٚہؠ تتھ ملکس منٛز أژیو یتھ توٚہؠ قبضہٕ کٔریٚو تہٕ برُونٛہہ پٔکیٚو تہٕ سون خدا یہُوواہؔ کرِ تتہِ روزن والٮ۪ن لوٗکن تباہ۔30یہ کرنہٕ پتہٕ، بناوِ سُہ یہ کتھ یقینی زِ توٚہؠ کٔریٚو نہٕ تِمن دیوتاہن ہنٛز عبادت یِمن ہنٛز تمہٕ پرستِش کران رودؠ، اگر توٚہؠ تہِ کٔریٚو تہٕ یہ بنہِ تُہنٛدِ باپتھ تیٚوتھ زال یتھ منٛز توٚہؠ ہیٚنہٕ یِیو۔ تِمن معبودن متعلق مہ پرِژھیٚو کٲنٛسہِ، مےٚ ؤنیٚو زِ تِم کتھٕ پٲٹھؠ ٲسؠ پننٮ۪ن معبودن ہنٛز پوٗزا کران تاکہِ أسؠ تہِ کرو تِتھے پٲٹھؠ یہُوواہؔ سنٛز عبادت۔"31تِتھٕ کِنؠ مہٕ کٔریٚو پننِس خدا یہُوواہؔ سنٛز عبادت کرنٕچ کوشش یتھٕ کِنؠ تِم پننٮ۪ن معبودن ہنٛز پرستِش کران چھِ، تکیازِ، تِم چھِ تِہنٛز پرستِش کرنہٕ وزِ مکروہ کامہِ کران یِمن سٟتؠ یہُوواہؔ نفرت کران چُھ۔ ساروےٕ کھۅتہٕ بُرٕ کام یۅسہ تِم کران چھِ چھےٚ یہ زِ تِم چھِ پننٮ۪ن بچن قربان کٔرِتھ پننٮ۪ن قربان گاہن پٮ۪ٹھ زالان۔ 32پرٮ۪تھ سۅ اکھ کام کٔریٚو یۅسہ مےٚ توٚہہِ کرٕنؠ ؤنؠ۔ یمن احکامن نہ ہُررٲوؠ زیٚو کینٛہہ تہٕ نہ کٔرؠ زیوس کینٛہہ کم۔
Bridge Connectivity Solutions Pvt. Ltd.