اِستِثنا11
1موسیٰؔ ہن ووٚن ہٮ۪تھےٕ اسرائیل ین "چونکہ یہ کینٛژھا تُہنٛدؠ خدا یہُوواہنؔ تُہنٛدِ باپتھ کوٚر، توٚہہ پزِ تِمن سارنی اصولن، فرمانن تہٕ حکمن ہُنٛد محبت تھاوُن تہٕ تِمن ہنٛز تعمیل کرٕنؠ۔2یِم ٲسیٚو توٚہؠ تہٕ تُہنٛدؠ جدٕاجداد نکہِ تُہنٛدؠ اولاد، یِمن تٔمؠ سزا دیُت تکیازِ توٚہہ کٔرو تِہنٛز نافرمٲنی، سبق دِنہ تہٕ ہیٚچھِ ناونہ باپتھ پیٚو توٚہہ واریاہ مشکلات تُلٕنؠ۔ لہٰذا کرو از شُروعات، یتھ پٮ۪ٹھ سونٛچو زِ تمسُنٛد سزا، تمسنٛز عظمت تہٕ تمسُنٛد قدرتہٕ وول طاقت یُس سُہ توٚہہ سٟتؠ ورتاوان چُھ، کیاہ چُھ کرِتھ ہیٚکان۔3تِم بے شمار بیٚون بیٚون معجزات کٔریٚو یاد یِم تمؠ مِصرس منٛز ہٲوؠ، تِم معجزٕ ظٲہر کران چُھ زِ سُہ کوتاہ طاقتور تہٕ عظمتہٕ وول چُھ۔ سونٛچو زِ تٔمؠ کیاہ کوٚر مِصرٕ کِس بادشاہ تہٕ تتھ سٲرسےٕ ملکس سٟتؠ یتھ پٮ۪ٹھ سُہ حکومت کران اوس۔4کیاہ تُہنٛدیٚو بچو وُچھنا مِصرُک فوج یا تہنٛدؠ گُرؠ تہٕ رتھ یہُوواہؔ سنٛدِ قدرتہٕ سٟتؠ تباہ سپدان۔ تُہنٛدیو بچو وُچھنا یہ زِ کِتھٕ پٲٹھؠ اوٚن یہُوواہنؔ بحرِ قُلزمسؔ سٲلاب تہٕ مِصرُک فوج کوٚرن تِتھٕ منٛز غرق ییٚلہ تِم تُہنٛدین جدماجدادن پتہٕ لاران ٲسؠ۔ تُہنٛدیو بچو سمٕجھ نا یہ زِ یہُوواہؔ رود ازتام مِصرٕ کِس فوجس کمزور بناوان۔5تُہنٛدؠ بچہٕ چِھنا یہ زانان زِ یہُوواہنؔ کِتھٕ پٲٹھؠ کٔر تُہنٛدین جدٕاجدادن یتھ جایہ واتنہٕ برُونٛہہ بیابانن منٛز رٲچھ۔ 6سونٛچو زِ تٔمؠ کیاہ سلوٗک کوٚر روبن قبیلہٕ کِس اِلیاب سنٛدین دوٚن نیٚچوٮ۪ن داتنؔ تہٕ ابیرامسؔ سٟتؠ۔ ییٚلہ تُہنٛدؠ جدٕاجداد سٲری وچھان ٲسؠ تہٕ زمیٖن گییہ چاک تہٕ تِم گےَ پنٕنؠ گھرٕ وٲلؠ، خٟمہ، نوکر تہٕ چو چاروٲے ہیٚتھ تتھ منٛز تہٕ سپٕدؠ غٲب۔ 7توٚہہ تہٕ تُہنٛدیٚو جدٕاجدادو وُچھ یِم سٲری معجزٕ یِم یہُوواہنؔ ہٲوؠ۔8لہٰذا کٔریٚو تِمن تمام احکامن ہنٛز پٲروی یِم بہٕ توٚہہِ دِوان چُھس تاکہ توٚہؠ دِیو ہمتہٕ سان دریاوس تار تہٕ کٔریٚو تتھ ملکس پٮ۪ٹھ قبضہٕ یتھ منٛز توٚہؠ اژن وٲلؠ چُھو،9تہٕ یتھ کنؠ روزیٚو توٚہؠ تتھ ملکس منٛز واریہس وقتس زنٛدٕ، یہ چھےٚ سۅ زمین یمیُک یہُوواہنؔ تُہنٛدین جدٕ اجدادن وعدہ کوٚرمُت چُھ زِ سُہ دییہِ یہ تُہنٛدین اولادن۔ اکھ تِژھ زمین یۅسہ سیٹھاہ ذرخیز چھےٚ۔ 10یتھ ملکس منٛز گٔژھِتھ توٚہؠ قبضہٕ کرن وٲلؠ چُھو سُہ چھنہٕ مِصر ملکٕکؠ پٲٹھؠ یتہٕ تُہنٛدؠ جدٕاجداد روزان ٲسؠ۔ مِصرس منٛز اوس بیول وَونہٕ پتہٕ تِم کُلؠ ینہٕ خٲطرٕ تمہِ باپتھ ضروری، تتھ سخت محنت کٔرِتھ آب واتناوُن۔11مگر یتھ سرِ زمینہ منٛز توٚہؠ اژن وٲلؠ چُھو سۅ چھےٚ تِژھ سرِزمین یتہِ واریاہ پہاڑ تہٕ مٲدان چھِ، یتہِ واریاہ بٲرش پیٚوان چھےٚ۔12یہُوواہؔ چُھ تمہِ ملکٕچ رٲچھ راوٕٹ کران۔ سُہ چُھ پرٮ۪تھ ؤرؠ یکہِ ابتدا پٮ۪ٹھٕ پرٮ۪تھ ؤرؠ یِکِس انٛدس تام تمہِ ملکٕچ نگرٲنی کران۔13از چُھسو بہٕ توٚہہ حکم کران زِ سٲنِس خدا یہُوواہسؔ سٟتؠ کٔریٚو محبت تہٕ پننہِ دِلہ کٔریٚو تمؠ سنٛز خدمت۔ اگر توٚہؠ تہِ کٔریٚو، 14تہٕ سُہ تراوِ پرٮ۪تھ وریہ تُہنٛدس زمینس وقتس پٮ۪ٹھ رحمتِ باران۔ نتیجہٕ نیرِ یہ زِ توٚہہ بنہِ اناج تہٕ دچھ شراب بناونہٕ خٲطرٕ تہٕ زیتون تیٖل بناونہٕ باپتھ زیتون۔ 15تہٕ سُہ ۅپداوِ تُہنٛدیٚو چاروایو باپتھ زمینس منٛز گاسہٕ۔ توٚہہِ میلہ سُہ سورےٕ کھیٚن یُس توٚہؠ یژھان چُھو۔16مگر بہٕ چُھسو توٚہؠ خبردار کران زِ سٲنِس خدا یہُوواہؔ سنٛز عبادت ترٲوؠ زیٚو نہٕ۔ دوٚیمٮ۪ن معبودن ہنٛز عبادت کٔرؠ زیٚو نہٕ،17وۅنؠ اگر توٚہؠ تہِ کٔریٚو تہٕ یہُوواہؔ گژھِ توٚہہِ سٮ۪ٹھا ناراض۔ سُہ دییہِ نہٕ روٗدس پیٚنہٕ۔ نتیجہ نیرِ یہ زِ پھسٕل ۅپدینہٕ، تہٕ توٚہؠ مٔریٚو جلدےٕ اتھ اصلِس زمینس منٛز بۅچھِ دادِ یۅسہ یہُوواہؔ توٚہہِ دنہٕ وول چُھ۔18لہٰذا یہ کینٛژھا توٚہہِ یہُوواہنؔ حکم کوٚر تتھ پٮ۪ٹھ سونٛچو۔ تِم لفظ لیکھیٚو لۅکٹٮ۪ن لۅکٹٮ۪ن مارکن پٮ۪ٹھ تہٕ تِم تھٲیو پننٮ۪ن نرٮ۪ن پٮ۪ٹھ گنٛڈِتھ، تہٕ تِم لیکھیٚو تِمن دجہِ پچن پٮ۪ٹھ یمہ توٚہؠ پننٮ۪ن ڈٮ۪کن پٮ۪ٹھ گنڈان چُھو تاکہِ تمہ سٟتؠ روزن توٚہہِ تِم یاد۔19پنٕنؠ بچہٕ ہیٚچھِ نٲووکھ تہِ بار بار۔ یمن متعلق کٔریٚو پرٮ۪تھ وزِ کتھ: ییٚلہ توٚہؠ گھرس منٛز ٲسیٚو، ییٚلہ توٚہؠ گھرٕ نیٚبر پکان ٲسیٚو، شونٛگِتھ ٲسیٚو یا کٲم کران ٲسیٚو یِمن متعلق روزؠ زیٚو کتھ کران۔20یمہٕ تھٲوؠ زیوکھ پننٮ۪ن دروازٕ چۅکاٹھن پٮ۪ٹھ تہٕ شہرٕ کٮ۪ن دیوارن پٮ۪ٹھ لیکھِتھ۔21یی کٔرؠ زیٚو تاکہِ توٚہؠ تہٕ تُہنٛدؠ اولاد روزن اتھ ملکس منٛز واریہس وقتس زنٛدٕ یمیُک وعدہ یہُوواہنؔ سانٮ۪ن جدٕاجدادن دِنُک کوٚرمُت چُھ۔ سۅ زمین بنہِ تُہنٛز تہٕ تُہنٛدین اولادن ہنٛز یۅتام زن زمینس پٮ۪ٹھ آسمان چُھ۔22یہ کینٛژھا کرنُک حکم بہٕ توٚہہ دِوان چُھس اتھ پٮ۪ٹھ روزیٚو ایماندٲری سان عمل کران مطلب یہُوواہسؔ سٟتؠ کٔریٚو محبت تہٕ پنٕنؠ زندگی پکنٲیو تِتھٕ پٲٹھؠ یتھٕ پٲٹھؠ سُہ یژھان چُھ تہٕ تمِس سٟتؠ روزیٚو وفادار۔23اگر توٚہؠ تہِ کٔریٚو تہٕ یہُوواہؔ کڈِ تمہِ ملکہٕ منٛزٕ لوٗکن ہنٛزن جمٲژن یُتھ توٚہؠ برُونٛہہ پٔکیٚو، لوٗکن ہنٛزٕ تمہٕ جمٲژ آسن تعدادٕ کِنؠ واریاہ تہٕ سٮ۪ٹھاہ طاقتور۔24تمہِ دھرتی ہنٛز سٲرےٕ زمین یتھ پٮ۪ٹھ توٚہؠ پکان ٲسیٚو آسہ تُہنٛز۔ تُہنٛد علاقہٕ آسہ جنوبی صحراوٕ پٮ۪ٹھٕ شمالس کُن لبنان کٮ۪ن پہاڑن تام تہٕ مشرقہٕ کِنؠ فرات دریاوٕ پٮ۪ٹھٕ مغرب کِس بحیرہ رومسؔ تام پھٲلِتھ۔25سون خدا یہُوواہؔ کرِ تمہِ ملکہٕ کٮ۪ن تمام لوٗکن تُہنٛدِ سٟتؠ سٮ۪ٹھاہ خوفزدٕ، یمیُک تٔمؠ وعدہ کوٚرمُت چُھ، یمہِ کِنؠ توٚہہ کانٛہہ تہِ جماتھ رکٲوِتھ ہیٚکہِ نہٕ۔26وارٕ بوزیٚو: از چُھسو بہٕ توٚہہ ونان زِ یا تہٕ کرِ یہُوواہؔ توٚہہ برکت عطا نتہٕ کریٚو لعنت نٲزِل۔27اگر توٚہؠ سانِس خدا یہُوواہؔ سنٛدین حکمن پٮ۪ٹھ عمل کٔریٚو یمہٕ بہٕ از توٚہہِ دِوان چُھسو تیٚلہِ کریٚو سُہ برکت عطا۔28وۅنؠ اگر توٚہہ تِہنٛز کتھ مٲنیٚو نہٕ تہٕ تمؠ سنٛز عبادت کرنہٕ بجایہ دویمٮ۪ن معبودن ہنٛز عبادت کرنہِ لگیٚو یہنٛدؠ نہٕ توٚہؠ زانٛہہ تہِ وفادار ٲسیو، تہٕ سُہ کرِ تیٚلہِ توٚہہ پٮ۪ٹھ لعنت نٲزِل۔29تہٕ ییٚلہ یہُوواہؔ توٚہہِ تتھ ملکس منٛزٕ واتناوِ یتھ منٛز توٚہؠ دٲخل سپدِتھ قبضہٕ کرن وٲلؠ چُھو تہٕ توٚہہ منٛزٕ کرن کینٛہہ گرزِیمؔ بالہٕ تینتٲلِس پٮ۪ٹھ کھسِتھ اعلان زِ یہُوواہؔ کیاہ کۅسہٕ برکت دییہِ توٚہہ تہٕ باقین پزِ عیبال کوٚہہ تالہِ پٮ۪ٹھ کھسُن اعلان کرُن زِ یہُوواہؔ کرِ توٚہہِ پٮ۪ٹھ لعنت۔30تِم دوٚنوے پہاڑ چھِ یردن دریاوس مغرب پاسہٕ، یردن بٹھِ کِس مٲدانس مغربس منٛز تتھ ملکس منٛز یتہِ کنعانٕکؠ لوٗکھ روزان چھِ۔ تِم چھِ جِلجالس نکھٕ مقدس کُلین نِش روزان۔31"توٚہؠ کٔریٚو جلدےٕ یردن دریاوس تار دِتھ تتھ ملکس قبضہٕ یُس سون خدا یہُوواہؔ توٚہہِ دِوان چُھ۔ ییٚلہ توٚہؠ تتھ ملکس منٛز أژتھ تتہِ روزُن شروع کٔریٚو،32یاد تھٲوؠ زیٚو تِمن تمام اصولن تہٕ احکامن ہنٛز کٔرؠ زیٚو تعمیل یمہ بہٕ از توٚہہِ دِوان چُھس۔
Bridge Connectivity Solutions Pvt. Ltd.