اِستِثنا10
1موسیٰؔ ہن ووٚن ہٮ۪تھےٕ اسرائیل ین زِ "ییٚلہِ ژتجی دوٚہہ تہٕ ژتجی رٲژ انٛد واژٕ، تمہ ساعتہٕ ووٚن مےٚ یہُوواہنؔ، کنیٚو زٕ لوحہ ژٹھ بیٚیہِ پرٲنؠ پٲٹھؠ۔ تہٕ تِمو باپتھ بناو اکھ صندوق۔ پتہٕ ان تمہٕ لوحہ مےٚ نِش یتھؠ پہاڑس پٮ۪ٹھ۔ 2بہٕ لیٚکھٕ تِمن لوحن پٮ۪ٹھ تِمے الفاظ یِم مےٚ گۅڈٕ لوحن پٮ۪ٹھ لیٚکھمٕتؠ ٲسؠ، یمہٕ ژےٚ پُھٹرٲوِتھ۔ پتہٕ ہکیٚو توٚہؠ تِمہ تتھ صندوقس منٛز تھٲوِتھ۔"3یتھٕ کنؠ بنوو مےٚ اکھ صندوق۔ مےٚ کٔر سُہ بناونہٕ باپتھ کِکر کُلِچ لکٕر استعمال۔ پتہٕ ژچہِ مےٚ تِژھے کنیٚو زٕ تختیہٕ تہٕ کھۅتُس تمہٕ ہیٚتھ پہاڑس پٮ۪ٹھ۔4تتہِ لیکھؠ یہُوواہنؔ تِمن کنِوین لوحن پٮ۪ٹھ تِمے داہ احکام یِم تٔمؠ گۅڈنِچن لوحن پٮ۪ٹھ لیکھمٕتؠ ٲسؠ۔ یِم چھِ تِم احکام یمہ تٔمؠ تُہنٛدین جدٕاجدادن پہاڑس پٮ۪ٹھ نارٕ منٛزؠ ؤنمٕتؠ ٲسؠ ییٚلہ تِم پہاڑٕ دامنس تل جمع گمٕتؠ ٲسؠ۔ پتہٕ کرِ یہُوواہنؔ تمہٕ لوحہ مےٚ حوالہٕ۔5لوحہ رٔٹتھ دراس بہٕ واپس تہٕ وتُھس پہاڑٕ پٮ۪ٹھٕ بوٚن۔ پتہٕ، یتھ کنؠ تٔمؠ حکم کوٚرمُت اوس، تھاوِ مےٚ تمہٕ صندوقس منٛز یُس مےٚ بنوومُت اوس۔ تہٕ تمہ چھےٚ وُنہِ تہِ تتہِ موجود۔"6پتہٕ گےَ اسرائیلی لوکھ یعقانؔ لوٗکو ہنٛدیٚو کریریٚو پٮ۪ٹھٕ موسیرہؔ کُن روانہٕ، تتہِ سپُد ہارونؔ سُنٛد وفات تہٕ سُہ دفن کرنہٕ پتہٕ بنیاو تمسُنٛد نیٚچو الِیعزرؔ تمؠ سنٛزِ جایہِ سردار کاہن۔ 7تتہِ پٮ۪ٹھٕ گےَ اسرائیلی جُدجُودہ تہٕ جُدجُودہ پٮ۪ٹھ یُوطباؔتہ۔ تتھ ملکس منٛز آسہٕ واریاہ آبہٕ کۅلہٕ۔8تمہِ وقتہٕ ژٲرؠ یہُوواہنؔ لاوی قبیلٕکؠ سُہ صندوق تُلنہٕ باپتھ یتھ منٛز تمہٕ لوحہ آسہٕ یِمن پٮ۪ٹھ داہ احکام لیٚکھِتھ ٲسؠ تہٕ سپدؠ یہُوواہؔ سنٛزِ موجودگی منٛز مقدس خٟمس منٛز کھڑا، قربٲنیہ پیش کرنہٕ تہٕ دُعا منٛگنہٕ باپتھ تاکہ یہُوواہؔ کرِ لوٗکن برکت۔ تِم ٲسؠ امہِ وزِ تہِ یہےَ کٲم کران۔ 9یوٚہے وجہ چُھ زِ لاوی قبیلہٕ کٮ۪ن میج نہٕ دویمٮ۪ن قبیلن ہنٛدؠ پٲٹھؠ زمیٖن۔ تِمن اوس یہُوواہؔ سنٛدؠ کاہن بننُک اعزاز حٲصل، یہ تٔمؠ ونمُت اوس زِ تِمن پزِ کرُن۔10موسیٰؔ ہن تھٲو کتھ جٲری: " بہٕ رودُس پہاڑس پٮ۪ٹھ ژتجہن دوٚہُن تہٕ ژتجہن رٲژن، یتھٕ کِنؠ بہٕ گۅڈٕ رودمُت اوسُس۔ مےٚ مونٛگ یہُوواہسؔ دُعا تہٕ تٔمؠ کوٚر دُبارٕ میٚون دُعا قبول تہٕ ونُن زِ بہٕ کرکھ نہٕ وۅنؠ چٲنؠ جدٕاجداد ہلاک۔11پتہٕ ووٚن یہُوواہنؔ مےٚ، "ژٕ تھاو پنُن سفر جٲری تہٕ لوٗکن برُونٛہہ کُن گٔژھتھ کٔریٚو تتھ ملکس پٮ۪ٹھ قبضہ یمیُک وعدہ مےٚ تُہنٛدین جدٕاجدان سٟتؠ کوٚرمُت اوس زِ بہٕ دمہٕ سُہ توٚہہِ۔12اے اسرائیلی لوٗکو بہٕ ونہٕ توٚہہ زِ سون خدا یہُوواہؔ کیاہ چُھ اسہِ کرُن ونان۔ سُہ چُھ یژھان زِ توٚہؠ کٔریٚو تس تعظیم، پنٕنؠ زندگی گزاریٚو تِتھے پٲٹھؠ یتھٕ پٲٹھؠ ونیٚو، تمِس سٟتؠ تھٲیو محبت، تہٕ تمؠ سنٛز کریٚو خدمت یتھ پٲٹھؠ تہِ توٚہؠ یژھیٚو تہٕ محسوس کٔریٚو، 13تہٕ تمسنٛدین سارنی احکامن پٮ۪ٹھ کٔریٚو عمل یمہ بہٕ توٚہہ ونہٕ، یمو سٟتؠ توٚہہِ مدد واتہ۔14یہ مٔشراوؠ زیٚو نہٕ زِ سون خدا یہُوواہؔ چُھ آسمانُک تہٕ تتھ منٛز موجود پرٮ۪تھ چیزُک مٲلک۔ سُہ چُھ زمینُک تہٕ تتھ منٛز موجود پرٮ۪تھ چیزُک تہِ مٲلک۔15یوٚدوے سُہ یمن سارنی چیزن ہُنٛد مٲلک چُھ، مگر یہُوواہنؔ کوٚر تُہنٛدین جدٕاجدادن سٟتؠ تہِ محبت؛ تٔمؠ ژٲرؠ دنیا کیٚو تمام لُکہ جمٲژو منٛزٕ أسؠ تِہنٛدؠ اولاد، أسؠ چھِ وُنہ تہِ تمسنٛدی لوٗکھ۔ 16لہٰذا پزِ توٚہہِ پنُن اُندرون بدلاوُن تہٕ ضِدی بننس روٚٹ کرُن۔ 17سون خدا یہُوواہؔ چُھ ساروےٕ معبودو کھۅتہٕ تھوٚد تہٕ تمام حٲکمو کھۅتہٕ بوٚڈ۔ سُہ چُھ سٮ۪ٹھاہ طاقتہٕ وول، باقیو کھۅتہٕ، نہ چُھ کھوٚژ قبول کرن وول۔ 18سُہ چُھ یہِ کتھِ پٮ۪ٹھ یقینی بناوان زِ یتیمن تہٕ مونڈن سٟتؠ گژھِ رُت سلوک کرنہٕ یُن۔ سُہ چُھ غٲر ملکی ین سٟتؠ تہِ محبت کران یمہٕ اسہِ اسرائیل ین سٟتؠ روازان چھِ، سُہ چُھ تِمن کھیٚن تہٕ پۅشاک سوزان۔19لہٰذا پزِ توٚہہ تہٕ تِمن غٲر ملکی ین سٟتؠ محبت کرُن تکیازِ ییٚلہ توٚہؠ مِصرس منٛز روزان ٲسیٚو توٚہؠ تہِ ٲسیٚو غٲر ملکی۔ 20سٲنس خدا یہُوواہسؔ کٔریٚو تعظیم تہٕ بیٚیہِ کٔریٚو تمؠ سنٛزےٕ یٲژ عبادت۔ تمسنٛدؠ وفادار بنیٚو، تہٕ ؤنیٚو زِ سُہ دِین اسہِ سزا اگر نہٕ سُہ وعدہ اسہِ پوٗرٕ کوٚر یُس اسہِ کوٚرمُت چُھ۔21سُے چُھ یمسنٛدؠ توٚہؠ تعریف کٔریٚو۔ سُہ چُھ سون خدا، اسہِ وُچھ تمہٕ عظیم تہٕ خوفناک کامہِ یمہٕ تٔمؠ سانہِ باپتھ کرِ۔22ییٚلہ سٲنؠ جدٕاجداد یعقوب تہٕ تمسُنٛد خاندان مِصر گےَ تہٕ تِم ٲسؠ صرف ستتھ۔ مگر وۅنؠ بنٲوؠ أسؠ یہُوواہنؔ آسمان کٮ۪ن تارکن ہنٛدؠ پٲٹھؠ بے شمار۔"
Bridge Connectivity Solutions Pvt. Ltd.