اعمال6
1اتھ دوران اون بیٚیہِ تہِ واریہو لوٗکو ایمان تہٕ بنیاے شٲگرد۔ غٲر مقٲمی یہُودؠ لوٗکو لٲج مقٲمی طور زامتیٚن اسرائیل ین متعلق شکایت شروع کرٕنؠ تکیازِ تِمن منٛز موجود مونٛڈن اوس نہٕ دوٚہہ دُش منٲسب کھیٚن چیٚنُک حصہٕ میلان۔2یُتھےٕ بہَو رسولو بوز زِ تِم کیاہ چھِ ونان تہٕ تِمو بُلٲوؠ باقی تمام ایمان وٲلؠ یروشلمس منٛز جمع سپدنہٕ باپتھ۔ پتہٕ ووٚن رسولو تِمن، أسؠ چھنہٕ یہ جان کران زِ لوٗکن منٛز کھیٚن بٲگراونہٕ وزِ چھنہٕ أسؠ خدایہِ سُنٛد پٲغام، تعلیم تہٕ تبلیغ نظرِ تل تھاوان۔3اے ٹاٹھیٚو ایمان والیٚو، پننیٚو منٛزٕ کٔڈؠ ووکھ ژٲرِتھ ستتھ نفر یمن متعلق توٚہؠ زانان ٲسیٚو زِ یِمن چُھ پاک روحن ہِدایت بخشمُت تہٕ پتہٕ دِمو أسؠ تِمن ہِدایت یہ کٲم کرنہٕ باپتھ۔4یۅتام سون تعلق چُھ أسؠ کرو پنُن وقت دُعا کرنس منٛز تہٕ یسوعسؔ متعلق تبلیغ کرنس تہٕ تعلیم دنَس منٛز صرف۔5یہ کینٛژھا رسولو تجویز کوٚر تہِ آو باقی تمام ایمان والیٚن پسنٛد۔ لہٰذا ژور تِمو ستفنؔ، خدایس پیٚٹھ مکمل یقین تھاون وول سُہ اکھ شخص یس پیٚٹھ روح القدس پورٕ پٲٹھؠ کاپہِ رٔٹِتھ چُھ۔ تِمو ژٲرؠ بیٚیہِ فلپس، پرخُرس، نِیکانور، تِیمونؔ، پرمناسؔ تہٕ نیکلاوسؔ یمہ انطاکیہ شہرٕکؠ ٲسؠ۔ نیکلاوسنؔ اوس یسوعسؔ پیٚٹھ ایمان اننہٕ برُونٛہہ یہُودؠ مذہب قبول کوٚرمُت۔6ایمان والیٚو أنؠ یم ستتھ نفر نبین نِش۔ پتہٕ کوٚر نبیو یِمن نفرن باپتھ دُعا تہٕ تِمو منٛزٕ پرٛتھ کانٛسہِ ہنٛدِس کلس پیٚٹھ اتھٕ تھٲوِتھ کٔرِکھ تِم امہِ کامہِ باپتھ آمادٕ۔7یتھٕ کنؠ رودؠ ایمان وٲلؠ واریہن شٲگرد لوٗکن خدایہ سُنٛد پٲغام بوزٕ ناوان۔ یروشلمس منٛز ٲس پژھ انن والیٚن ہنٛز تعداد واریاہ ہُران۔ اتھ منٛز ٲسؠ واریاہ یہُودؠ کاہن تہِ یمہٕ اتھ پٲغامس پیٚٹھ عمل کران ٲسؠ زِ یسوعسؔ پیٚٹھ کِتھ پٲٹھؠ پزِ بھروسہٕ کرُن۔8خداین کوٚر ستفنسؔ لوٗکن منٛز واریاہ حٲرتناک معجزٕ کرنُک طاقت عطا یمہ سٟتؠ پتاہ اوس لگان زِ یسوعسؔ متعلق پٲغام چھِ پٔزؠ۔9مگر کینٛژو لوٗکو کٔر ستفنسؔ مخالفت۔ تِم ٲسؠ اکہ جمٲژ ہنٛدؠ یہُودؠ یمہ پرٛتھ دوٚہہ اکِس عبادت گاہس منٛز جمع ٲسؠ سپدان یتھ فریڈمین سنٛز سیناگوگ ونان ٲسؠ، تہٕ بیٚیہِ ٲسؠ کرینی تہٕ سکندریہ کٮ۪ن شہرن ہنٛدؠ تہٕ کلکیہ تہٕ آسیہؔ صوبٕکؠ لوٗکھ تہِ۔ تِمو ساروےٕ لوگ ستفنسؔ سٟتؠ بحث کرُن۔10مگر تِمو ہیٚوک نہٕ ثٲبتھےٕ کرِتھ زِ تمؠ سنٛز کتھ چھےٚ غلط، تکیازِ خدایہ سنٛدؠ پاک روحن کوٚر تس سمجدٲری سان کتھ کرنُک سلیقہٕ عطا11امہِ کِنؠ کٔرؠ تِمو ژھۅپہ کٔرِتھ کینٛہہ نفر ستفنسؔ اپٕزؠ الزام دِنس پیٚٹھ آمادٕ۔ یمو لوٗکو ووٚن، "اسہِ وُچھ سُہ موسیٰؔ ہس تہٕ خدایس متعلق بُرٕ بلہٕ ونان"12یتھٕ کنؠ کھول تِمو بیین یہُودؠ لوٗکن ستفنسؔ خلاف شرارتھ یمن منٛز کینٛہہ بزرگ تہٕ یہُودؠ شریعتٕکؠ اُستاد تہِ شٲمل ٲسؠ۔ پتہٕ نیٚو تِمو ساروےٕ ستفنؔ رٔٹِتھ تہٕ واتنووُکھ یہُودؠ دربارس منٛز۔13تِمو أنؠ کینٛہہ نفر تہِ پانس سٟتؠ تہٕ تِمن دتِکھ پونٛسہٕ تاکہ تِم دِن اپُز گواہی۔ تِمو ووٚن، "یہ نفر اوس مقدس عبادت گاہس تہٕ موسیٰؔ ہس خدایہ سنٛدِ طرفہٕ میلؠ مٕتٮ۪ن قانونن متعلق بُرٕ بلہٕ ونان۔14سون مطلب چُھ زِ اسہِ بوز یہ اوس ونان ناصرت شہرُک یہ یسوع کرِ یتھ عبادت گاہس تباہ تہ اسہِ ونہِ اسہِ تِمن رسم و ریواجن خلاف کرنہٕ باپتھ یم موسیٰؔ ہن سانٮ۪ن جدٕ اجدادن ؤنؠ۔15دربٲرؠ کمرس منٛز موجود سٲری لوٗکھ ٲسؠ ستفنسؔ کُن تھلہِ تھلہِ وُچھان تہٕ ژیونُکھ زِ تمسُنٛد بُتھ اوس فرشتہٕ سُنٛد ہیٚو۔
Bridge Connectivity Solutions Pvt. Ltd.