اعمال7
1پتہٕ پرُوژھ سردار کاہنن ستفنسؔ، "کیاہ تمہٕ کتھٕ چھا پزٕ یہ یمہٕ لوٗکھ توٚہہِ متعلق ونان چھِ؟"2ستفننؔ دِتُس جواب، "ٹاٹھیو یہُودؠ یو تہٕ معزز قٲعِدو، مہربٲنی کرِتھ بوزیٚو میانؠ کتھ۔ سُہ جلالہٕ وول خدا یمسنٛز أسؠ عبادت کران چھِ، یمؠ سانِس جد ابرہامسؔ تمہِ وقتہٕ جلوٕ دیُت ییٚلہ سُہ حاران شہرس منٛز ینہٕ برُونٛٹھ مسوپتامیہؔ کِس علاقس منٛز روزان اوس۔3خداین ووٚن تس زِ یہ ملک تراو یتہِ ژٕ تہٕ چٲنؠ رشتہٕ دار روزان چھِ تہٕ گژھِ تتھ ملکس منٛز یور کُن بہٕ گژھن ونے،4تہٕ ابرہامنؔ ترٲو سۅ سرِ زمین، یتھ کسدیہ تہِ ونان ٲسؠ پتہٕ ووت حارانؔ تہٕ بسیاو تٔتؠ۔ مول مرنہٕ پتہٕ ووٚن تس خداین زِ تراو یہ سرِزمین یتھ منٛز ووٚنؠ ژٕ تہٕ بہٕ وُنہِ روزان چھِ۔5امہِ وقتہٕ دِژ نہٕ خداین ابرہامس کانٛہہ تہِ زمین، حطاکہ تمہِ زمینہِ ہُنٛد اکھ ٹُکرٕ تیٚنہٕ۔ مگر خداین کوٚرُس وعدٕ زِ پتہٕ دمہٕ بہٕ یہ زمین ژےٚ تہٕ چانٮ۪ن اولادن، تہٕ یہ روزِ ہمیشہِ تِہنٛز ملکِیت۔ حطاکہ امہِ وزِ اوس نہٕ ابرہامس کانٛہہ تہِ اولاد یمسنٛز یہ وراثت بنہِ ہے۔6پتہٕ ووٚن خداین ابرہامس، "چٲنؠ اولاد واتن پردیشن منٛز۔ تتہِ روزن تِم ژورن ہتن ورؠ ین، تتھ دوران کرن تتِکؠ سردار چانٮ۪ن اولادن سٟتؠ بدسلوٗکی تہٕ غلام بنٲوِتھ کرن تِمن کٲم کرنہٕ باپتھ مجبوٗر۔7مگر بہٕ دمہٕ تِمن لوٗکن سزا یِم تِمن غلام بنٲوِتھ کٲم کرناون۔ ، خداین ووٚن، "امہِ پتہٕ تراون چٲنؠ اولاد سُہ ملک تہٕ واتن یتھ ملکس منٛز تہٕ کرن میانؠ عبادت"8امہِ پتہٕ دیُت خداین حکم زِ ابرہام سنٛدِس گرِ کِس پرٛتھ مردس تہٕ تِہنٛدین تمام اولادن گژھِ ختنہٕ کٔرِتھ یہ ہاونہٕ یُن زٕ یِم چھِ خدایہ سنٛدؠ۔ پتہٕ زاو ابرہامس نیٚچو اضحاقؔ، تہٕ ییٚلہ اسحاق ٲٹھن دوٚہُن ہُنٛد ووت، ابرہامنؔ کوٚر تس ختنہٕ۔ پتہٕ زاو اضحاقسؔ نیٚچو یعقوبؔ۔ یعقوبؔ بنیاو بہَن شُریٚن ہُنٛد مول یمن أسؠ یہُودؠ پننی بُزرگ تہٕ جدٕ اجداد مانان چھِ۔9توٚہؠ چُھو زانان زِ یعقوبؔ سنٛدؠ زیٚٹھؠ نیٚچوؠ لٔگؠ حسد کرنہِ تکیازِ تِہُنٛد مول اوس تِہنٛدس لۅکٹِس بٲیس یوسفسؔ زیادٕ رچھان۔ چناچہ تِمو کُن سُہ مِصرٕ کٮ۪ن سودا گرن یِمو سُہ مِصر واتنوو، یتہِ سُہ غلام بنیاو۔ مگر خداین کوٚر یوسفس مدد۔10ییٚلہ تہِ لوٗکو تس تکلیف واتنوو خداین کٔر تس حفاظت۔ تٔمؠ کوٚر یوسفس گاٹہٕ جار عطا، تہٕ تٔمؠ کوٚر مِصرُک بادشاہ فرعونؔ یوسفس متعلق بہتر سونچنس پیٚٹھ مجبور۔ لہٰذا کوٚر سُہ فرعوننؔ مِصرس پیٚٹھ حکومت کرنہٕ تہٕ فرعون سنٛدِ مالہٕ جادادٕچ رٲچھ راوٕٹ کرنہٕ باپتھ مقرر۔11ییٚلہ یوسف یہ کٲم کران اوس تہٕ اکھ وقت آو زِ مِصرس تہٕ کنعانس منٛز ووٚتھ دراگ۔ لوٗکھ آے تکلیفس منٛز ہیٚنہٕ۔ امہ وقتہٕ اوس نہٕ کنعانس منٛز یعقوبس تہٕ شُریٚن تہِ کھیٚن خوردنی برابر۔12ییٚلہ یعقوبن لوٗکن نِش بوز زِ مِصرس منٛز چُھ خۅراک میلان یُس لوٗکھ مٔلؠ ہیٚکن ہیٚتھ۔ تہٕ تٔمؠ سوزؠ یوسفٕنؠ بٔڈؠ بٲے تور اناج موٚلؠ ہیٚنہٕ باپتھ۔ تِم گےَ تہٕ ہیٚوتُکھ یوسفس نِش اناج موٚلؠ۔ مگر تِمو پرزٕنو نہٕ سُہ۔ پتہٕ آے تِم گرٕ واپس۔13ییٚلہ یوسفن بٲے دویمہ لٹہِ مِصر گےَ تہٕ ہیٚوتُکھ یوسفس بیٚیہِ اناج موٚلؠ۔ مگر یمہ لٹہِ وُننکھ تٔمؠ بہٕکُس چُھس۔ تہٕ فرعونس تہِ لوٚگ پےَ زِ یوسف چُھ عبرٲنؠ قومُک تہٕ یِم نفر کنعان پیٚٹھٕ آمٕتؠ ٲسؠ تِم چھِ أمِس بٲے۔14پتہٕ ییٚلہ یوسفن پنٕنؠ بٲے گرٕ واپس سوزؠ تہٕ تِمو ووٚن پننِس مٲلِس یعقوبس زِ یوسف چُھ یژھان توٚہؠ تہٕ تمسُنٛد سورےٕ خاندان گژھِ مِصر یُن۔ تمہِ ساعتہٕ اوس یعقوبن خاندان پنٛژستتھن بٲژن ہُنٛد۔15یُتھےٕ یعقوبن یہ بوز سُہ تہٕ تٔمؠ سُنٛد سورےٕ خاندان ووت مِصر بسنہِ۔ پتہٕ گُذریو یعقوب تٔتی، تہٕ سٲنؠ باقی جدٕ اجداد تہٕ تہنٛدؠ شُرؠ تہِ۔16تہنٛزٕ لاشہٕ انہِ اسہِ پننِس ملکس منٛز واپس تہٕ کرِ تتھ قبرِ منٛز دفن یۅسہ ابرہامنؔ سِکم شہرس منٛز ہمورؔ سنٛدِس نیٚچوِس موٚلؠ ٲس ہیٚژمٕژ۔17سانٮ۪ن جدٕ اجدادن ہنٛز تعداد ٲس واریاہ بڈیمٕژ ییٚلہ خدایس مِصرٕ منٛزٕ تِم کڈنُک وقت قریب باسیاو یتھٕ کنؠ زن تٔمؠ ابرہامس وعدٕ اوس کوٚرمُت زِ بہٕ کرٕ یہ۔18مِصرس منٛز اوس بیاکھ اکھ بادشاہ حکومت کرنہٕ لوٚگمُت۔ سُہ اوس نہٕ زانان زِ یوسفن چُھ مےٚ برُونٛہہ واریاہ کال مِصرٕ کٮ۪ن لوٗکن سیٚٹھاہ مدد کوٚرمُت۔19تٔمؠ بادشاہن ہیٚتؠ سختی سان سٲنؠ جدٕ اجداد اتہِ کڈنٕچ کوشِش کرٕنؠ۔ تٔمؠ کوٚر تِمن پیٚٹھ واریاہ ظلم تہٕ واتنٲوؠ نکھ کٲفی تکلیف۔ اتھ حدس تام زِ تٔمؠ دیُت تِمن پنٕنؠ نوزادٕ بچہٕ پننیٚو گرو منٛزٕ نیٚبر کڈنُک حکم یتھ تِم مرہن۔20أتھؠ وقتس منٛز لوٚب موسیٰؔ ہن تہِ زایُن، خداین وُچھ سُہ اکھ سیٹھہےٕ خوبصورت بچہٕ۔ تہٕ تمؠ سنٛدؠ مٲلؠ موج روٚچھ سُہ پننِس گرس منٛز تریٚن ریتن ژوٗرِ ژوٗرِ۔21پتہٕ پیٚو تِمن سُہ گرٕ نیٚبر ژھنُن، مگر فرعونؔ نہِ کورِ تُل سُہ تہٕ روٚچُھن پننِس اولاد سنٛزِ گرنٛز۔22موسیٰؔ ہس آے تِم سٲری علِم ہیٚچھِ ناونہ یمہٕ مِصرٕکؠ لوٗکھ زانان ٲسؠ، ییٚلہ سُہ بالیغ سپُد سُہ اوس کتھن تہٕ کامہِ منٛز سرس۔23اکہ دوٚہہ ییٚلہ موسیٰؔ ژتجی وُوہر ووت تٔمؠ کوٚر فٲصلہٕ زِ بہٕ گژھٕ تہٕ سمکھٕ پننٮ۪ن بنی اسرائیل کٮ۪ن رشتہٕ دارن۔24تٔمؠ وُچھ اکھ مِصری أکِس اسرائیلی نفرس سٟتؠ بدسلوکی کران، سُہ گو اسرائیلی نفرس مدد کرنہِ تہٕ مِصری نفر قتٕل کرِتھ ہیٚوتُن تس اسرائیلی نفرٕ سُنٛد بدلہٕ۔25موسیٰؔ ہن سونٛچ زِ تمسنٛدؠ سٲتھی بنی اسرائیلی زانن زِ خداین سوز یہ اسہِ غلامی نِشہٕ آزاد کرنہٕ باپتھ، مگر تِمو سمُجھ نہٕ تہِ۔26بیٚکہِ دوٚہہ وُچھ موسیٰؔ ہن اسرائیلی زٕ نفر پانہٕ وٲنؠ ژُوان۔ تٔمؠ کٔرؠ لڑایہ نِش تِم یہ ؤنِتھ رُکاونٕچ کوشش، ہے جوانو! توٚہؠ دوٚنوے سٲتھی چُھو اسرائیلی! توٚہہ پزیٚو اکھ اکِس سٟتؠ سلامتی سان روزُن تہٕ تکلیف دیُن بنٛد کرُن!"27مگر یُس نفر بیٚکِس نفرس غلط یعنی زخمی کران اوس تٔمؠ دیُت موسیٰؔ ہس دکہٕ تہٕ وُننس، "ژٕ چُھکھ نہٕ کانٛسہِ سون حٲکم یا قٲضؠ مقرر کوٚرمُت!28ژٕ چُھکھ زہریا میٚتہِ مارُن یژھان یتھٕ کنؠ ژےٚ راتھ سُہ مِصری مورتھن!29ییٚلہ موسیٰؔ ہن یہ بوز سُہ ژوٚل مِصرٕ منٛزٕ تہٕ ووت مِدیان چہِ زمینہِ منٛز۔ تتہِ رود سُہ کینٛژن ورؠ ین۔ تٔمؠ کوٚر خاندر، تہٕ تمِس زاے أمِس زنانہٕ نِش زٕ لٔڑکہٕ۔30ژتجؠ ؤہرؠ پتہٕ گو اکہِ وزِ خداوند خدا موسیٰؔ ہس برُونٛہہ کنہِ فرشتہٕ بٔنِتھ حٲضر۔ سُہ سپُد أکِس زنٛڈس تل نارٕ ریہہ چہِ صورٕژ منٛز نمودار یۅسہ سیناؔ بالس نکھٕ صحراوس منٛز دزان ٲس۔31موسیٰؔ گو سۅ وُچِھتھ حٲران تکیازِ زنٛڈ اوس نہٕ دزٲنی۔ ییٚلہِ سُہ وُچھنہٕ باپتھ ہنا نزدیک گو تہٕ تٔمؠ بوز خداوند خدا تس کُن ونان،32"بہٕ چُھس خدا یمسنٛز عبادت چٲنؠ جدٕ اجداد کران ٲسؠ۔ بہٕ چُھس سُہ خدا یمسنٛز ابرہام، اضحاق، تہٕ یعقوب عبادت کران چھِ" موسیٰؔ کھۅژ تیوٗت زِ تمِس ژایہ تھرٕ تھرٕ۔ سُہ اوس ووٚنؠ زنٛڈس کُن وُچھنہٕ تہِ کھۅژان۔33پتہٕ ووٚن خداوند خداین تمِس زِ پنٕنؠ کھۅربانہٕ کڑ میانِس احترامس منٛز نٮ۪بر۔ تکیازِ بہٕ چُھس یتہِ، زمینس پٮ۪ٹھ یتھ جایہ ژٕ کھڑا چُھکھ یہ چھےٚ میانؠ خاص جاے۔34مےٚ وُچھ زِ مِصرٕکؠ لوٗکھ کِتھٕ پٲٹھؠ چھِ میانٮ۪ن لوٗکن ہیٚتھےٕ تکلیف دِوان۔ مےٚ بوز پننٮ۪ن لوٗکن ہنٛز امہِ سٟتؠ وۅتلن واجِنؠ آہو و زٲری۔ امہِ کِنؠ وتھُس بہٕ تِمہ مِصرٕ منٛزٕ بچاونہٕ باپتھ بۅن۔ ووٚن گژھِ ژٕ تیار تکیازِ بہٕ چُھستھ ژٕ واپس مِصر سوزن وول۔35یہ اوس صرف اکھ موسیٰؔ یمؠ سانٮ۪ن اسرائیلی لوٗکن مدد کرنٕچ کوشش کٔر، مگر تِمو کوٚر سُہ یہ ؤنِتھ رد زِ 'ژٕ چُھکھ نہٕ کانٛسہِ حٲکم یا جج مقرر کوٚرمُت!' موسیٰؔ چُھ سُہ یُس خداین پانہٕ تِمن پیٚٹھ حکومت کرنہِ تہٕ تِم غلامی نِشہٕ آزاد کرنہٕ خٲطرٕ سوز۔ سُہ چُھ سُے یمِس زنٛڈٕ منٛزکؠ فرشتن یہ کرنُک حکم دِژاو۔36موسیٰؔ ہےٕ چُھ سُہ یمؠ سٲنؠ جدٕاجداد مِصرچہِ زمینہِ منٛزٕ کٔڑؠ۔ تٔمؠ کٔرؠ مِصرس منٛز رنٛگہٕ رنٛگہٕ معجزٕ تاکہِ یہ سپدِ عیان زِ خدا اوس تس سٟتؠ، بحرِ قُلزمسؔ منٛز تہٕ تِمن ژتجہَن ورؠ ین دوران ییٚلہ اسرائیلی لوٗکھ بیابنن منٛز روزان ٲسؠ۔37یہ چُھ سُے موسیٰؔ یمؠ اسرائیلی لوٗکن ووٚن، "خدا سوزِ تُہنٛدِ قومہٕ منٛزٕ بییِس اکِس شخصس تُہنٛدِ باپتھ میٚی ہیٚو اکھ نبی بنٲوِتھ۔38یوٚہے چُھ سُہ موسیٰؔ یُس بنی اسرائیل یو منٛزٕ اوس یمہٕ بیابنن منٛز یکہٕ وٹہٕ ٲسؠ۔ سُہ اوس تس فرشتس سٟتؠ یمؠ سینا بالس پیٚٹھ تمِس سٟتؠ کتھٕ کرِ۔ یوٚہے چُھ سُہ موسیٰؔ یمِس کوہہِ سیناؔ ہس پیٚٹھ خداین فرشتہٕ سوز زِ تس ون سٲنؠ قانون، تہٕ سُے اوس سُہ یمؠ سانٮ۪ن جدٕ اجدادن ووٚن زِ فرشتن کیاہ ووٚن۔ سُے اوس سُہ یمؠ یمؠ خدایہ سنٛدِ طرفہٕ تمہٕ کتھٕ حٲصل کرِ یمہٕ اسہِ ونان چھےٚ زِ ابدی زندگی کِتھ کٔنؠ چھےٚ گذارٕنؠ، تہٕ تہِ واتنووُن اسہِ تام۔39مگر سٲنؠ جدٕ اجداد ٲسؠ نہٕ موسیٰؔ سنٛز کتھ مانٕنؠ یژھان۔ حالانکہ تِمو کوٚر سُہ پنُن زیُٹھ ماننہٕ نِشہٕ تہِ انکار تہٕ ٲسؠ مِصر واپس گژھُن یژھان۔40پتہٕ ووٚن تِمو تسنٛدِس بٔڈس بٲیس ہارونسؔ، "سانہِ باپتھ بناون بُت یُس سون وتہٕ ہاوُک دیوتا بنہِ۔ یۅتام سٲنس سٲتھی موسیٰؔ سُنٛد تعلق چُھ یمؠ أسؠ مِصرٕ منٛزٕ کٔڈتھ أنؠ اسہِ چُھنہٕ فِکرے تران زِ تمس سٟتؠ کیاہ سپُد!"41چناچہِ تِمو بنوو ؤژھؠ سنٛزِ شکلہ اکھ بُت۔ پتہٕ کرِ تِمو تس بُت سنٛدِس تعظیمس منٛز قربٲنیہ پیش، تہٕ تِمو نوٚژ تہٕ گیٚو تمہِ باپتھ یُس چیز تِمو پانے بنوو۔42لہٰذا تروو خداین تِمن ہِدایت کرُن۔ تٔمؠ ترٲوؠ تمہٕ یلہٕ یُتھ زن تِم آسمانس اندر آفتابس، زوٗنہِ تہٕ تارکن ہنٛز عبادت کرن۔ یہِ چُھ تِمن کتھن ہُنٛد تصدیق یمہٕ رسولو منٛزٕ أکؠ لیچھمژٕ چھےٚ: خداین ووٚن، "اے اسرائیلی لوٗکو، ییٚلہ توٚہہِ بار بار جانور مٲرتھ تہٕ تِمن ژتجہَن ورؠ ین قربان رنٛگؠ پیش کران رودیٚو تمن دوٚہُن توٚہؠ بیابانن منٛز ٲسیو، توٚہؠ ٲسیٚو نہٕ یقیناً سۅ دِلہ تِم مےٚ نذر کران!43بلکہِ ٲسیٚو توٚہؠ تِمن خٟمن منٛز موجود مورتی ین ہنٛز پوٗزا کران یمہٕ توٚہؠ پانس سٟتؠ اکہ جایہ پیٚٹھٕ بیِس جایہ نِوان ٲسیٚو، یمن منٛز رِفان ناوکِس سِتار دیوتا سنٛز تصویر تہِ ٲس۔ یِم ٲسؠ تِم بُت یمہٕ توٚہہِ پانہٕ بنٲومٕتؠ ٲسیٚو، تہٕ توٚہہِ ٲسیٚو میانہٕ بجایہ تِہنٛز عبادت کران۔ امہِ کِنؠ کرو بہٕ توٚہؠ پننیٚو گرو نِشہٕ دوٗر تہٕ بابل ملکہٕ کیٚو علاقو نِشہٕ تہِ دوٗر"44ییٚلہ سٲنؠ جدٕاجداد بیابانن منٛز ٲسؠ، تِمو کٔر مقدس خٟمس منٛز خدایہ سنٛز عبادت یمہ سٟتؠ یہ ننان اوس زِ سُہ چُھ تتہِ تِمن سٟتؠ۔ تِمو اوس خٟمہ تِتھُے بنومُت یُتھ خداین موسیٰؔ ہس بناونُک حکم کوٚرمُت اوس۔ یہ اوس بالکل تِتھُے یُتھ موسیٰؔ ہن پہاڑس پیٚٹھ کھسنہٕ وزِ وُچھمُت اوس۔45پتہٕ نیٚو سانیٚو باقی جدٕاجدادو یہ خٟمہ پانس سٟتؠ ییٚلہ یشُوعن تِم یتھ ملکس منٛز أنؠ۔ یہ اوس سُہ وق ییٚلہ تِمو یہ زمین پانس خٲطرٕ تھٲو، ییٚلہ خداین تِم لوٗکھ یمہِ یتہِ گۅڈٕ روزان ٲسؠ یہ تراونس پیٚٹھ مجبور کٔرؠ۔ تہٕ اسرائیلی لوٗکھ گےَ اتھ ملکس پیٚٹھ قبضہ کرنس لایکھ۔ خٟمہ رودؠ أتھؠ ملکس منٛز تہٕ تِمہ ٲسؠ بادشاہ داوود سنٛدِس دورِ حکومتس تام تہِ أتؠ۔46داوودنؔ کوٚر خدا خۅش تہٕ تٔمؠ کٔر خدایس عرضی زِ سُہ دییہ تمِس اکھ گرٕ بناونہٕ یتہِ سُہ تہٕ سٲنؠ سٲری اسرائیلی لوٗکھ یعقوب سنٛدِس خدایہ سنٛز عبادت کٔرِتھ ہیٚکن۔47مگر امہِ بجایہ ووٚن خداین داوود سنٛدِس نیٚچوِس سلیمانسؔ زِ سُہ بناوِ اکھ گرٕ یتہِ لوٗکھ تمؠ سنٛز عبادت کرن۔48مگر أسؠ چھِ زانان زِ خدا چُھ ساروےٕ چیزو کھۅتہٕ بوٚڈ تہٕ سُہ چُھنہٕ تِمن گرن منٛز روزان یمہٕ لوٗکو آسن بنٲومٕتؠ۔ یہ چُھ تِتھُے یتھٕ پٲٹھؠ یسعیاہؔ نبین لیٚوکھمُت چُھ:49خداین فرموو، "آسمان چُھ میٚون تخت تہٕ زمین چھےٚ میانٮ۪ن کھۅرن ہنٛز چوکؠ۔ میٚی چُھ آسمانن تہٕ زمینہِ ہُنٛد پرٛتھ کانٛہہ چیز بنومُت۔ تہٕ توٚہؠ انسان ہکیٚو نہٕ میانہِ روزنہٕ باپتھ تِژھ اصل جاے بنٲوِتھ!"51توٚہؠ لوٗکھ چُھو تمِس باپتھ سیٚٹھاہ ضدی!بلکُل پننٮ۪ن جدٕاجدادن ہنٛدؠ پٲٹھؠ! توٚہؠ چُھو ہمیشہٕ روح القدس سنٛز مخالفت کران، یتھٕ کنؠ تِمو کٔر!52تُہنٛدیٚو جدٕاجدادو واتنوو پرٛتھ کانٛسہِ نبیس تکلیف۔ یتھ حدس تام تہِ زِ تِمو مٲرؠ تِم لوٗکھ تہِ یمو واریاہ برُونٛہہ اعلان اوس کوٚرمُت زِ مسیح ییہِ، یُس ہمیشہ تی کران اوس یہ خدایس پسنٛد اوس۔ تہٕ مسیح آو! سُہ چُھ سُے یُس حال حالےٕ توٚہہِ تمسنٛدین دشمنن حوالہٕ کوٚروون تہٕ ووٚنووکھ زِ سُہ کٔرؠ وون قتٕل!53توٚہی لوٗکھ چُھو تِم یمو خدایہ سنٛدؠ احکام حٲصِل کٔرؠ۔ یِم ٲسؠ تِم قانون یِم خداین فرشتو ذرؠ یہ سانیٚن جدٕاجدادن باپتھ بنٲومٕتؠ ٲسؠ۔ مگر توٚہہِ کٔرو نہٕ تہنٛز عبادت"54ییٚلہ یہُودی کونسل کیٚو ممبرو تہٕ تتہِ موجود باقی لوٗکو ستفنؔ سنٛزٕ یمہٕ سارے کتھٕ بوزٕ تہٕ تِمن کھۅت سیٚٹھاہ شرارتھ، تِم ٲسؠ دنٛد ژاپان تکیازِ تِم ٲسؠ تس پیٚٹھ سیٚٹھاہ ناراض!55مگر روح القدسن تھوو ستفن پوٗرٕ پٲٹھؠ قوبوس منٛز۔ تٔمؠ وُچھ آسمانس کُن تہٕ خدایہ سنٛدِ طرفہٕ گوس اکھ پرٮ۪زلوُن گاش نظرِ تہٕ وچُھن یسوع خدایس دٔچھنہِ انٛدٕ کھڑا۔56تٔمؠ ووٚن! وُچھو، بہٕ چُھسن کُھلہٕ آسمان وُچھان تہٕ بہٕ چُھسن آدمؔ سُنٛد گۅبُر انسٲنی شکلہِ منٛز کھڑا وُچھان یتہِ خدا حکومت چلاوان چُھ۔57یہُودی کونسل کیٚو ممبرو تہٕ باقی لوٗکو ییٚلہ یہ بوز تِمو تُل بڈِ شور۔ تِمو دتؠ کنن اتھٕ سٟتؠ تھۅپؠ یُتھ نہٕ تِم تمسُنٛد بوزٕ ہن، تہٕ دوریاے سٲری جلدےٕ تٔسؠ کُن۔58تِمو نیٚو سُہ کھکھرِ یروشلم شہرٕ نیٚبر تہٕ لاجہس کنہِ لایِنہِ۔ یِم لوٗکھ تمِس الزام دِوان ٲسؠ تِمو کٔڈؠ پنٕنؠ پلو یُتھ زن ٹھیک پٲٹھؠ کنہِ لٲیِتھ ہیٚکہٕ ہن تہٕ تِمو تھٲوؠ پنٕنؠ پلو ساوُلؔ ناوٕ کِس اکِس نوجوانس نِش پتھر یُتھ سُہ تِمن رٲچھ کرِ۔59ییٚلہ تمہ ستفنسؔ کنہِ لایان ٲسؠ، ستفننؔ مونٛگ دُعا، "اے خدا وند یسوعؔ، میٚون روح کرُن قبول"60پتہٕ پیٚو ستفنؔ پتھر تہٕ کوٚٹھؠ کھوکھشہِ دِتُن آلو، "خداوند، یِمن دی زینہٕ امہِ گنہُک سزا" یہ ؤنِتھ گُذریاو سُہ۔
Bridge Connectivity Solutions Pvt. Ltd.