اعمال21
1افسس کٮ۪ن بُزرگن الوِداع کرنہٕ پتہٕ، کٔھتؠ أسؠ جہازس تہٕ ٲبی سفر کران کران وٲتؠ کوسؔ جزیرس پیٚٹھ، یتہِ جہازٕ راتس ٹھہریو۔ بیٚکہ دوٚہہ گٔے أسؠ جہازس منٛز کوسؔ پیٚٹھٕ ردُس جزیرس کُن یتہِ جہازٕ بیٚیہِ ٹھہریو۔ امہ پتہٕ گےَ أسؠ بیٚکہ دوٚہہ پترہؔ شہر یتہِ جہازٕ رُکیاو۔2پترہؔ ہس منٛز تروو اسہِ سُہ جہازٕ تہٕ تتہِ ووٚن اسہِ کٔمؠ تام زِ اکھ جہازٕ چُھ یُس فینیکے علاقس کُن گژھِ۔ تہٕ أسؠ کٔھتؠ تٔتھؠ جہازس تہٕ سُہ دراو۔3اسہِ کوٚر سمندرٕ پیٚٹھی سفر یۅتام زِ أسؠ وُچھہو کُپرس جزیرٕ۔ أسؠ دراے جزیرس جنوبہ کِنؠ جہازٕ سفر کران یۅتام أسؠ صوریہ صوبہٕ کِس فونیشیاؔ شہرٕ کِس علاقس منٛز وٲتؠ۔ تتہِ اوس جہازس واریہن دوٚہُن ٹھہرُن تکیازِ تمہِ کٮ۪ن کارکُنن اوس سامانہٕ والُن۔4کٔمؠ تام ووٚن اسہِ زِ صورؔ صوبٕکؠ ایمانہٕ وٲلؠ کتہِ چھِ روزان لہٰذا گےَ أسؠ تہٕ رودؠ ستن دوٚہُن تِمن سٟتؠ۔ تکیازِ خدایہِ سنٛدؠ روحن اوس تِمن اِشارٕ دیتمُت زِ یروشلمسؔ منٛز واتناون پولُسسؔ لوٗکھ تکلیف، تِمو ووٚن پولُسسؔ زِ تمِس پزِنہٕ تور گژُھن۔5مگر یِتھےٕ جہازس بیٚیہِ نیرنُک وقت ووت تہٕ أسؠ سپدؠ یروشلم نیرنہٕ باپتھ تیار۔ ییٚلہ أسؠ صورؔ پیٚٹھٕ دراے تہٕ سٲری مرٕد تہنٛزٕ خاندارنہِ تہٕ بچہٕ دراے اسہِ سٟتؠ سمندر بٹھِس تام۔ اسہِ ساروےٕ مونٛگ تتہِ سیٚکہ پیٚٹھ کوٚٹھؠ تراوِتھ دُعا۔6اسہِ سارنی الوِداع کٔرِتھ سپٕدؠ پولُسؔ تہٕ أسؠ تمسنٛدؠ سٲتھی جہازس منٛز سوار تہٕ باقی ایمان وٲلؠ گےَ واپس پن پنُن گھرٕ۔7صورؔ منٛزٕ نیرنہٕ پتہٕ گےَ أسؠ تتھ جہازس منٛز پتُلمِیسؔ شہر تام۔ تتہِ ٲسؠ ایمان وٲلؠ تہٕ اسہِ کٔر تِمن سلام تہٕ تتھ راتس رودؠ تِمنےٕ سٟتؠ۔8دوٚیمہ دوٚہہ گےَ أسؠ پتُلمِیسؔ ترٲوِتھ قیصریہؔ شہرس کُن روانہٕ یتہِ أسؠ فلپسؔ سنٛدِ گھرِ رودؠ یمؠ پنپن وقت باقین یہ وننَس منٛز گذُور زِ یسوعؔ سنٛدؠ پٲرو کار کِتھٕ کٔنؠ ہیٚکو بنِتھ۔ سُہ اوس تِمو ستو نفرو منٛزٕ اکھ یمہٕ یروشلمؔ کیٚو ایمان والیٚو مونٛڈٕ زنانن پٲروی کرنہٕ باپتھ ژٲرمٕتؠ ٲسؠ۔9تمِس آسہٕ ژور کورِ یمہٕ وُنہِ انۂرشے آسہٕ۔ تِمو منٛزٕ ٲس پرٛتھ اکھ بےٚ پھرُکؠ پٲٹھؠ سُہ پٲغام بوزٕناوان یُس پاک روحَن تِمن ونمُت اوس۔10ییٚلہ أسؠ فلپس سنٛدِ گھرِ واریہن دوٚہُن رودؠ تہٕ اکھ نبی یَس اگبُسؔ ناو اوس وۅتھ یہُودیہ ضلع پیٚٹھٕ تہٕ ووت قیصریہؔ۔ سُہ اوس اکثر تِم پٲغام بوزٕناوان یمہ پاک روحن تمِس ونمٕتؠ ٲسؠ۔11یتہِ أسؠ ٲسؠ توٚت یتھ مژروو تٔمؠ پولُسسؔ کمربنٛد، پتہٕ گنٛڈؠ تٔمؠ تمہ سٟتؠ پنٕنؠ کھۅر تہٕ اتھٕ تہٕ ونُن، "پاک روح چُھ ونان، "یروشلمسؔ منٛز گنٛڈن یہُودؠ سردار یمہِ دالو کمربنٛد کِس مٲلک سنٛدؠ اتھٕ کھۅر یمہِ آیہ، تہٕ دِنس اکِس قٲدؠ سنٛدِ حثیتہٕ غٲر یہُودؠ لوٗکن ہنٛدین اتھن منٛز"12ییٚلہ اسہ منٛزٕ باقی لوٗکو یہ بوز تہٕ اسہِ تہٕ تتہِ موجود باقی ایمان والیٚو ووٚن پولُسسؔ، "مہربٲنی کٔرِتھ مہٕ گٔژھیٚو یروشلمؔ"13مگر پولُسنؔ دِتُکھ جواب، "مہربٲنی کٔرتھ مہٕ لٲگیٚو ودُن نَہ مہٕ کٔریٚو مےٚ گژھنہٕ نِشہٕ رُکاونٕچ کوشش۔ بہٕ چُھس قٲد گژھنہٕ باپتھ تہٕ یروشلمسؔ منٛز مرنہٕ باپتھ دِلہ سان تیار تکیازِ بہٕ چُھس خداوند یسوع سنٛز خدمت کران۔14ییٚلہ اسہِ باسیاو زِ سُہ گژھِ یروشلم تہٕ اسہِ کٔر نہٕ سُہ رُکاونہٕ باپتھ مذید آمادٕ۔ اسہِ ووٚن، "خداوند سُنٛد یژُھن سپدِن پوٗرٕ!"15قیصریہؔ ہس منٛز کوٚر اسہِ یمو دوٚہو پتہٕ پنُن مال تیار تہٕ گےَ زمینی یروشلمؔ گژھنہٕ باپتھ روانہٕ۔16قیصریہؔ ہٕکؠ کینٛہہ ایمان وٲلؠ تہِ گےَ اسہِ سٟتؠ۔ تِمو نی أسؠ اکِس نفرٕ سُنٛد گھرٕ روزنہٕ خٲطرٕ یمِس مناسونؔ ناو اوس۔ سُہ اوس کپرَس جزیرُک، یمؠ یسوعسؔ پیٚٹھ تمہ وزِ ایمان اوٚنمُت اوس ییٚلہ لوٗکو گۅڈنچہِ لٹہ تمِس متعلق پٲغام بوزُن شروع اوس کوٚرمُت۔17ییٚلہ أسؠ یروشلمؔ وٲتؠ تہٕ ایمان والیٚن ہنٛزِ اکہ جمٲژ کوٚر اسہِ خۅشی سان استقبال۔18بیٚکہ دوٚہہ گےَ پولُسؔ تہٕ اسہِ منٛزٕ باقی لوٗکھ یعقوبؔس سٟتؠ کتھ کرنہِ یُس تتہِ کلیسیُک رہنما اوس۔ یروشلمٕکہِ چرچٕکؠ باقی سٲری رہنما تہٕ زِٹھؠ تہِ ٲسؠ تٔتؠ۔19پولُسنؔ کٔر تِمن سلام تہٕ پتہٕ ونِنکھ تمہٕ سارے کتھٕ یمہ خداین سُہ غٲر یہُودؠ لوٗکن برُونٛہہ کنہِ کرنس لایکھ بنومُت اوس۔20یہ بوزِتھ کوٚر یعقوبنؔ تہٕ باقی بزرگو خدایہ سُنٛد شکریہ۔ پتہٕ ووٚن تِمو منٛزٕ أکؠ پولُسسؔ، "بایا، توٚہؠ چُھو زانان زِ یتہِ چھِ اسہ منٛز ساسہٕ واد یہُودؠ یِمو خداوند یسوعسؔ پیٚٹھ ایمان چُھ اوٚنمُت۔ امہِ علاوٕ چُھو توٚہؠ زانان زِ أسؠ سٲری چھِ سیٚٹھاہ احتیاط سان تِمن قانونن ہنٛز تعمیل کران یمہ موسیٰؔ ہن اسہِ دِتمٕتؠ چھِ۔21مگر سانیٚن سٲتھی یہُودؠ ایمان والیٚن آو وننہٕ زِ ییٚلہ توٚہؠ غٲر یہُودینؔ منٛز آسان چُھو تہٕ توٚہؠ چُھو تتہِ روزن والیٚن یہُودؠ ایمان والیٚن ونان زِ تِم تراون موسیٰؔ سنٛدین قانونن پیٚٹھ عمل کرِنؠ۔ لوٗکھ چھِ ونان زِ توٚہہ وُنو تِمن یہُودؠ ایمان والیٚن زِ پننٮ۪ن شُریٚن مہٕ کٔریٚو خُتنہٕ تہٕ سانؠ باقی رسٕم تہٕ مہٕ پٲلیٚو۔ اسہِ چھنہٕ پژھ بِہان زِ تِم کیاہ چھِ توٚہہِ متعلق یہ پوٚز ونان۔22اگر سٲنؠ سٲتھی ایمان وٲلؠ بوزن یہ زِ توٚہؠ چُھو آمٕتؠ تہٕ تِم آسن توٚہہ ناراض۔ لہٰذا چُھ توٚہہِ کینٛہہ تیٚوتھ کرنٕچ ضرورت تاکہ تہِ ہیٚکو تِمن ہٲوِتھ زِ یہ کینٛژھا تِمو توٚہہ متعلق بوزمُت چُھ تہِ چُھنہٕ پزر۔23تہٕ مہربٲنی کرِتھ کٔریٚو تی یہ أسؠ توٚہہ ونان چھِ۔ اسہِ منٛز چھِ ژور نفر تِتھؠ یِمو خدایس سٟتؠ منت گنٛڈمٕژ چھےٚ۔24تِمن نفرن سٟتؠ گٔژھیٚو ہیکل تہٕ تتہِ نبٲیو رسٕم یۅسہ توٚہہ تہٕ تِہنٛدِ باپتھ ضروری چھےٚ تاکہ تِم ہیٚکن ہیکلس منٛز عبادت کٔرِتھ۔ پتہٕ ییٚلہ تہنٛدِ باپتھ قربٲنی کرنُک موقہٕ واتہِ تہٕ تمیُک قٟمت دِن۔ تمہ پتہٕ کاسن امیُک اظہار کرنہٕ باپتھ مَس زِ تِمو کوٚر تی یہ تِمو ووٚن زِ أسؠ کرو۔ ییٚلہ لوٗکھ توٚہہ تِمن نفرن سٟتؠ ہیکل کِس صحنس منٛز وچُھن تہٕ تِم زانن زِ یہ کینٛژھا تِمن توٚہہ متعلق وننہٕ آمُت چُھ تہِ چُھنہٕ پزر۔ امہِ بجایہ گژھِ تِمن سارنی یہ معلوم زِ توٚہؠ چُھو سٲنؠ سٲری یہُودؠ قانون مانان۔25یۅتام زن غٲر یہُودؠ ایمان والیٚن ہُنٛد تعلق چُھ، اسہِ یروشلم کیٚو بزرگو کٔر اتھ متعلق کتھ زِ سٲنؠ کمہٕ قانون پزن تِمن مانٕنؠ، تہٕ اسہِ ووٚن تِمن اکِس خطس منٛز لیٚکھِتھ زِ اسہِ کیاہ فٲصلہٕ نیٚو۔ اسہِ اوس لیٚوکھمُت زِ تِم کھیٚن نہٕ سُہ ماز یُس لوٗکو کانٛسہِ بُت سنٛزِ قربٲنی باپتھ پیش کوٚرمُت آسہ۔ تِم کھیٚن نہٕ جانورن ہُنٛد خوٗن، تہٕ تِمن جانورن ہُنٛد ماز کھیٚن نہٕ یمہٕ لوٗکو جھٹھٕکؠ آسن کٔرؠ مٕتؠ۔ اسہِ ووٚن تِمن یتہِ زِ تِم شونٛگن نہٕ کانٛسہ تِتھس شخصس نِش یمِس سٟتؠ نہٕ تِہُنٛد خاندر گمُت آسہ۔26تہٕ پولُسنؔ کوٚر تِہنٛدِس وننس پیٚٹھ رضامنٛدی ہُنٛد اظہار تہٕ دویمہِ دوٚہہ تُلؠ تٔمؠ یمہ ژور نفر سٟتؠ تہٕ کوٚرُن پنُن پان پاک۔ امہ پتہٕ گو پولُسؔ ہیکل کِس دربارس منٛز تہٕ ووٚنُن کاہنس زِ تِم کمہِ دوٚہہ مۅکلاوِ پنُن پان پاک کرِتھ تہٕ تِم کر کرن تِمو منٛزٕ پرٛتھ أکؠ سنٛدِ باپتھ جانور قربٲنی رنٛگؠ پیش کرِ۔27ییٚلہ پنُن پان پاک کرنہٕ پتہٕ قریبن ستھ دوٚہہ انٛد وٲتؠ تہٕ پولُسؔ ووت ہیکل کِس آنٛگنس منٛز واپس۔ آسیہؔ کیٚو کینٛژو یہُودیٚو وُچھ سُہ تتہِ تہٕ تِم سپدؠ تس ناراض۔ تِمو أنؠ بیٚیہِ تہِ واریاہ یہُودؠ ناد دِتھ یمہٕ ہیکل کِس آنٛگنس منٛز ٲسؠ تاکہِ پولُسؔ رٹنس منٛز کرٕہن مدد۔28تمہ ٲسؠ کرٮ۪کہٕ دِتھ ونان، "بایو، ؤلیٚو یمِس نفرس سزا دِنس منٛز کٔریٚو اسہِ مدد! یہ چُھ سُہ اکھ یُس یوٚت تہِ گژھان چُھ تتہِ چُھ لوٗکن تعلیم دِوان زِ یہُودی لوٗکھ زٲنؠ ووکھ حقیر۔ یہ چُھ لوٗکن ہیٚچھٕ ناوان زِ تِم مہٕ کٔرنؠ ووٚنؠ موسیٰؔ سنٛدین قانونن ہنٛز تعمیل تہٕ نُمہٕ کرِنؠ یمہ مقدس ہیکلُک احترام۔ اکھتُے أنِن غٲر یہُودؠ سانِس مقدس ہیکل کِس صحنس منٛز یمہِ کِنؠ یہ جاے ناپاک سپٕز۔29تِمو ووٚن یہ اوموٚکھٕ تکیازِ تِمو وُچھ پولُسؔ یروشلمس منٛز تُرفمسسؔ سٟتؠ یُس اِفسُک اکھ غٲر یہُودؠ اوس اورٕیور پھیران تِہنٛدؠ قانون ٲسؠ نہٕ غٲر یہُودینؔ ہیکلس منٛز اژنُک اِجازت دِوان، تہٕ تِہُنٛد خیال اوس زِ پولُسنؔ اوٚن تمہ دوٚہہ ترُفِمسؔ ہیکل کِس صحنس منٛز۔30شہرٕ کیٚو ساروےٕ لوٗکو بوز زِ ہیکل کِس صحنس منٛز چُھ مصیبت تہٕ وٲتؠ دوان دوان تور۔ تِمو اوٚن پولُسؔ ہیکلہٕ منٛزٕ کھکھرِ نیٚبر کڈِتھ۔ ہیکل صحنٕکؠ دروازٕ آے بنٛد کرنہٕ، تاکہ لوٗکھ کرن نہٕ ہیکلس منٛز بوال۔31ییٚلہ تِم پولُسسؔ مارنٕچ کوشش کران ٲسؠ تہٕ کُس تام شخص ژول ہیکلس نزدیک قلعہٕ کہ طرفہ تہٕ ونُن رومی کمانڈرس زِ یروشلمس منٛز چھِ واریاہ لوٗکھ ہیکلس اندر بوال کران۔32کمانڈر آو جلدےٕ کینٛہہ افسر تہٕ سِپہن ہنٛز اکھ بٔڑ جماتھ ہیٚتھ ہیکل کُن یتہِ بھیڑ ٲس۔ یتُھےٕ لُکہ ہجومن یمہ پولُسسؔ لایان تہٕ شور کران ٲسؠ کمانڈر تہِ سِپاہ وُچھ تِمو کوٚر تس مار دیٚون بنٛد۔33کمانڈر ووت تتھ جایہ یتِتھ پولُسؔ اوس تہٕ تمؠ رۅٹ سُہ۔ تمؠ دیُت سِپہن حکم ز، تِم گنٛڈن پولُسسؔ نریٚن زنجیر۔ پتہٕ پرِژُھن ہجومس منٛز موجود لوٗکن، "یہ نفر کُس چُھ تہٕ أمؠ کیاہ چُھ کوٚرمُت؟34تتہِ موجود واریہن لُکہ ہجومس منٛز ٲسؠ کینٛہہ نفر اکھ نعرٕ دِوان تہٕ بیاکھ۔ تکیازِ تِم ٲسؠ تیوٗت شور کران، کمانڈر اوس نہٕ سمجِھتھےٕ ہیٚکان زِ تِم کیاہ چھِ ونان۔ چناچہ تٔمؠ دیُت حکم زِ پولُسؔ نی وون قلعسؔ منٛز تاکہ سُہ کرِ تتہِ تمِس پرژھٕ گٲر۔35سِپہو نیٚو پولُسؔ قلعہٕ چن ہیرن تام مگر واریاہ لوٗکھ ٲسؠ پولُسسؔ پتہٕ دورِتھ مارنٕچ کوشش کران۔ چناچہ کمانڈرن ووٚن سِپہَن زِ پولُسؔ کھٲلؠ وون قلعہٕ چن ہیرن۔36پٔتؠ کِنؠ ٲس لوٗکن ہنحز بھیڑ شور تُلان زِ یہ مٲرؠ وون! یہ مٲرؠ وون!"37ییٚلہ پولُسؔ قلعس منٛز اژن وول اوس تہٕ تمؠ ووٚن کمانڈرس یونٲنؠ زبٲنؠ منٛز، کیاہ بہٕ ہیٚکا توٚہہ سٟتؠ کتھ کٔرِتھ؟ کمانڈرن ووٚنُس مےٚ چھےٚ حٲرانی زِ ہیٚککھ یونٲنؠ بولِتھ!38بہٕ اوسُس سونچان زِ ژٕ چُھکھ مِصرُک سُہ نفر یُس کینٛہہ کال برُونٛہہ حکومتس خلاف بغاوت کرٕنؠ یژھان اوس تہٕ یُس پانس سٟتؠ ژور ساس خوٗن خوار نفر ہیٚتھ صحراہس منٛز گو تاکہ أسؠ ہیٚکوون نہٕ سُہ رٹِتھ۔39پولُسنؔ دِتُس جواب، "نہ، بہٕ چُھس نہٕ سُہ! بہٕ چُھس اکھ یہُودؠ۔ بہٕ چُھس ترسسؔ شہرس منٛز زامُت یُس کلکیہ صوبُک اکھ مشہور شہر چُھ۔ میٚون درخواست چُھ زِ توٚہؠ دِیو مےٚ لوٗکن سٟتؠ کتھ کرنہٕ۔40پتہٕ دیُت کمانڈرن پولُسسؔ کتھ کرنُک اجازت۔ چناچہ پولُسؔ گو ہیرِ پیٚٹھ کھڑا تہٕ اتھٕ سٟتؠ کوٚرُن لوٗکن ژھۅپہ کرنُک اشارٕ۔ تہٕ ییٚلہ لُکہ ہجومن خاموشی کٔر تہٕ پولُسنؔ کٔر تِمن سٟتؠ پننہِ عبرٲنؠ زبٲنؠ منٛز کتھ۔
Bridge Connectivity Solutions Pvt. Ltd.