اعمال20
1ییٚلہ لوٗکو افسس منٛز بوال کرٕنؠ بنٛد کٔرؠ تہٕ پولُسنؔ أنؠ پنٕنؠ ایمان وٲلؠ سومبرٲوِتھ۔ تٔمؠ کٔر تِمن نصیحت زِ تِم تھاون خداوند یسوعسؔ پیٚٹھ پوٗرٕ پژھ۔ تہٕ امہِ پتے کوٚر تمؠ تِمن الوِداع، تہٕ لوٚگ مکدُنیہ علاقس کُن گژھنہٕ باپتھ نیرنہ۔2توٚت واتنہٕ پتہٕ کوٚرُن تِمن تٲکید زِ تِم تھاون خداوند یسوعسؔ پیٚٹھ بھروسہٕ تہٕ دِن ایمان والیٚن حوصلہٕ۔ تہٕ پتہٕ گو یونانؔ روانہٕ۔3یونانس منٛز رود سُہ تریٚن ریٚتن۔ پتہٕ کوٚر تٔمؠ سمندری جہازس منٛز واپس صوریہ گژھنُک اِرادٕ، مگر تٔمؠ بوز زِ تتہِ چھِ کینٛہہ یہُودؠ تمِس سفرس دوران قتٕل کرنُک منصوبہ بناوان۔ لہٰذا کوٚر تٔمؠ پتھٕرؠ وتہِ گژھنُک فٲصلہٕ، تہٕ سُہ دراو دوبارٕ مکدُنیہ کنی۔4یِم نفر تمِس سٟتؠ یروشلم گژھن وٲلؠ ٲسؠ، تِمن منٛز اوس بیریہؔ شہر کِس پیرہسؔ سُنٛد نیٚچو سوپترُسؔ۔ تھِسلُنِیکے شہرٕکؠ ارسترسخُسؔ تہٕ سِکندُسؔ۔ دربےؔ شہرُک گیُسؔ تہٕ گلتیہؔ علاقہٕ پیٚٹھٕ تیمُتھیس۔ تہٕ تُخِکسؔ تہٕ تُرفمس یمہ آسیہؔ صوبٕکؠ ٲسؠ۔5تمہٕ ستتھ نفر یمہٕ پولُسؔ تہٕ مےٚ لوقاہس برونہٛہ برونہٛہ سمندری جہازس منٛز مکدُنیہ کِنؠ گےَ وٲتؠ اسہِ برُونٛہہ ترواسؔ شہر تہٕ تتہِ پراریاے اسہِ دوٚن۔6مگر بہٕ تہٕ پولُسؔ وٲتؠ زمینی سفر کٔرِتھ فلپی شہر۔ یہُودینؔ ہنٛدِ ژۅچہ تہوارٕ پتہٕ یۅسہ خمیرِ بغٲرے بنان چھےٚ، سپدؠ أسؠ اکِس جہازس پیٚٹھ سوار یُس ترواسؔ شہر گژھان اوس۔ پانٛژھ، دوٚہؠ پتہٕ وٲتؠ أسؠ تروآسؔ تہٕ سمکھیاے باقی نفرن یمہ اسہِ برُونٛہہ سفرس درامٕتؠ ٲسؠ۔ پتہٕ بیٹھؠ أسؠ سٲری ستن دوٚہُن تروآسسؔ منٛز۔7ہفتٕکہِ گۅڈنِکہ دوٚہہ ٲسؠ أسؠ یِکوٹہٕ سمکھان تہٕ بیٚین ایماندارن سٟتؠ کھیٚن بٲگرِتھ یِکوٹہٕ کھیٚوان۔ پولُسؔ اوس نیصف رٲژ تام ایمان والیٚن سٟتؠ کتھٕ کران۔ تس اوس بیٚکہ دوٚہہ تروآسؔ تراونُک اِرادٕ، اوٕ کِنؠ تھٲو تٔمؠ کتھ جٲری۔8پیٚٹھٕ کنہِ کِس کمرس منٛز یتہِ أسؠ جمع گمٕتؠ ٲسؠ ٲسؠ واریاہ تلہٕ ژٲنگؠ دزان۔9تتہِ اوس کمرس منٛز یوتخُسؔ ناوُک اکھ نوجوان۔ سُہ اوس گھرِ یلہٕ دارِ پیٚٹھ بہِتھ۔ ییٚلہ پولُسؔ واریہس وقتس کتھ کران رود، یوتخُسؔ کٔھژ وار وارٕ نینٛدر۔ ٲخر تہٕ پییہِ تس گوٚب نینٛدر۔ سُہ آو دارِ پیٚٹھٕ وسِتھ تہٕ پیٚو بوٚن۔ کینٛہہ ایمانہٕ وٲلؠ ؤتھؠ جلدےٕ بوٚن تہٕ تُلکھ سُہ تھوٚد۔ مگر سُہ اوس گُذریومُت۔10پولُسؔ تہِ وُتھ بوٚن۔ سُہ شونٛگ أمِس نوجوانس پیٚٹھ پان دراز ترٲوِتھ تہٕ وجنَس پننہِ نرِ۔ پتہٕ ووٚن تٔمؠ تِمن لوٗکن یمہٕ تس انٛدؠ پٔکؠ جمع ٲسؠ، "فِکر مہٕ بٔریٚو۔ یہ گوو بیٚیہِ زندٕ!"11پولُسؔ کھوٚت بیٚیہِ ہیٚور کھیٚن بنووُن تہٕ کھیوٗن۔ امہِ پتہٕ کوٚر تمؠ ایمان والیٚن سٟتؠ بیٚیہِ گفتگو یۅتام زن آفتاب کھۅت۔ پتہٕ دراو سُہ۔12باقیو لوٗکو نیٚو نوجوان لڑکہٕ گھرٕ تہٕ تِمن میول سیٚٹھا حوصلہٕ تکیازِ سُہ گو مرِتھ زنٛدٕ۔13پتہٕ کٔھتؠ أسؠ جہازس۔ مگر پولُسؔ کھۅت نہٕ اسہِ سٟتؠ تروآسسؔ منٛز جہازس تکیازِ سُہ اوس خوشک وتہِ اَسوسؔ قصبس منٛز جلدےٕ واتُن یژھان۔ اسہِ منٛزٕ کٔھتؠ باقی لوٗکھ جہازس تہٕ گے۔ اَسوسؔ کُن روانہٕ۔14پولُسسؔ سمکھیاے أسؠ اَسوسسؔ منٛز۔ سُہ کھۅت اسہِ سٟتؠ جہازس تہٕ أسؠ سپدؠ میتلینؔ شہرس کُن روانہٕ۔15یمہِ دوٚہہ أسؠ میتلینؔ وٲتؠ، أسؠ گےَ تتہِ پیٚٹھٕ جہازس منٛز سوار سپدِتھ خِیُس جزیرس نکھٕ اکِس جایہ۔ امہِ پتہٕ دویمہِ دوٚہہ گےَ أسؠ ساموسؔ کِس جزیرس پیٚٹھ۔ بیٚیہِ دوٚہہ گےَ أسؠ ساموسؔ پیٚٹھٕ نیرتھ میلیتسؔ شہرس کُن روانہٕ۔16میلیتسؔ شہر اوس افسس شہرس بلکل جنوب پاسہٕ۔ پولُسؔ اوس نہٕ افسسؔ منٛز ٹھہرُن یژھان تکیازِ سُہ اوس نہٕ آسیہؔ ہس منٛز وقت گُذارن یژھان۔ اگر ممکن آسہ ہے سُہ اوس پِنتیکست تہوار کِس موقس پیٚٹھ یروشلم واتُن یژھان، تہٕ تمہِ تہوارُک وقت اوس نزدیک۔17ییٚلہ جہازٕ میلیتسؔ ووت تہٕ پولُسنؔ سوز افسس منٛز اکھ قٲصد تتہِ کیٚن ایمان والیٚن ہنٛدین بُزرگن یہ وننہٕ باپتھ زِ تِم کرن تمِس سٟتؠ کتھ۔18ییٚلہ بُزرگ تس نِش آے تہٕ پولُسنؔ ووٚن تِمن، "گۅڈنکہِ دوٚہہ پیٚٹھٕ ییٚلہ بہٕ آسیہؔ صوبس منٛز ووتُس تہٕ تتھ دوٚہس تام ییٚلہ بہٕ تتہِ دراس، توٚہؠ چُھو زانان زِ مےٚ کیٚوتھ سلوک کوٚر یتہِ روزِتھ توٚہہِ سٟتؠ۔19توٚہؠ چُھو زانان زِ بہٕ کِتھٕ کنؠ رودُس خداوند یسوع سنٛز سیٚٹھاہ عٲجزی سان خدمت کران تہٕ کُنہ ساعتہٕ کتھٕ کنؠ اوسُس بہٕ رِوان۔ توٚہؠ چُھو یتہ، زانان زِ مےٚ کِتھؠ مصیبت تُلؠ تکیازِ یہُودؠ یمو نہٕ ایمان اوٚنمُت اوس ٲسؠ مےٚ اکثر نۅقصان واتناونٕچ کوشش کران۔20توٚہؠ چُھو یتہ زانان زِ ییٚلہ مےٚ توٚہؠ خدایہ سُنٛد پٲغام بوزنٲیو مےٚ تروو نہٕ زانٛہہ تہِ سُہ کانٛہہ چیز یُس توٚہہ مدد کرِہو۔ توٚہؠ چُھو زانان زِ مےٚ ہیٚچھنٲوؠ مو توٚہؠ خدایہ سُنٛد پٲغام تمہِ ساعتہٕ ییٚلہ واریاہ لوٗکھ جمع ٲسؠ، تہٕ بہٕ گوس تُہنٛد گھرٕ تہٕ تتہِ تہِ ہیٚچھنٲوؠ مو۔21مےٚ دِژ دوٚنونؠ یہُودینؔ تہِ تہٕ غٲر یہُودینؔ تہِ ژینہٕ ون تہٕ تِمن سارنی ووٚنُم زِ تِم کٔرِن خدایس کُن رجوع تہٕ پننیٚو گُنہو نِش روزِن پتھ تہٕ سٲنِس خداوند یسوعسؔ پیٚٹھ تھٲوِن پژھ۔22"تہٕ ووٚنؠ چُھ مےٚ یروشلم گژُھن، تکیازِ پاک روحن کوٚر صاف پٲٹھؠ مےٚ اظہار زِ مےٚ پزِ تور گژُھن، تہٕ مےٚ پزِ تمؠ سنٛز اطاعت کرٕنؠ۔ مےٚ چھنہٕ پےَ زِ تتہِ کیاہ سپدِ مےٚ سٟتؠ۔23مگر بہٕ چُھس یہ زانان زِ پرٛتھ شہرس یُس مےٚ دورِ کوٚر، پاک روحن ووٚن مےٚ زِ یروشلمس منٛز کرن مےٚ لوٗکھ قٲد تہٕ مےٚ واتناون تکلیف۔24مگر مےٚ چُھنہٕ کانٛہہ پرواے اگر مےٚ لوٗکھ مارن تہِ مگر گۅڈٕ کرٕ بہٕ سۅ کٲم مکمل یۅسہ مےٚ خداوند یسوعنؔ مٹہِ چھےٚ تھٲومٕژ۔ تٔمؠ اوٚنُس بہٕ لوٗکن بہتر پٲغام دِنہٕ باپتھ، یُس خدا اسہِ تہِ کٔرتھ تہِ زندگی بخشان چھُ تہٕ بچاوان چُھ یمِکؠ نہٕ أسؠ مستحق چھِ۔25مےٚ بوزٕنٲوؠ مو توٚہؠ یہ پٲغام زِ خدا کِتھٕ پٲٹھؠ کرِ پننہِ بادشٲہی ہُنٛد اظہار۔ مگر ووٚن چُھس بہٕ زانان زِ یہ چھےٚ ٲخری وِز ییٚلہ توٚہؠ میانؠ سٲتھی ایمانہٕ وٲلؠ مےٚ وُچھِو۔26لہٰذا چُھس بہٕ یژھان زِ توٚہؠ سٲری زٲنیٚو زِ اگر کانٛہہ یمؠ بہٕ وعظ پران وُچھس تہٕ سُہ یسوعسؔ پیٚٹھ ایمان اننہٕ بغٲر مرِ تہٕ یہ چُھنہٕ میٚون قصور،27تکیازِ مےٚ وُنمو توٚہہ تہِ سورےٕ یہ خداین سانہِ باپتھ یوٚژھمُت چُھ۔28توٚہہ زِٹھٮ۪ن پزِ خدایہ سنٛدِس پٲغامس پیٚٹھ ہیٚتھے یقین تھاوُن تہٕ تمؠ سنٛز فرمانبردٲری کرٕنؠ۔ توٚہہ پزیٚو باقی تمام ایمان والیٚن تہِ مدد کرُن یہنٛز رٲچھ راوٕٹ کرنہٕ باپتھ توٚہہ پاک روحن دیُتمُت چُھ۔ پنٕنؠ تہٕ خداوند سنٛزن ایمان واجنیٚن جمٲژن ہنٛز نگرٲنی کرٕنؠ یتھٕ کنؠ پوٚہل پننٮ۪ن تیٖرن ہنٛدِس کھیٚلِس نگرٲنی کران چُھ۔ خداین چھِ تِم تتھ خوٗنس مٔلؠ ہیٚتؠ مٕتؠ یُس تمسنٛدِس گوبرٕ سنٛدِس جسمس صلیبس پیٚٹھ وسان اوس۔29بہٕ چُھس اصٕل پٲٹھؠ زانان زِ میانہِ نیرنہٕ پتہٕ ین اپُز تعلیم دنہٕ وٲلؠ لوٗکھ توٚہہ نِش تہٕ واتناون ایمان والیٚن واریاہ نۅقصان۔ یمہٕ تیٖرن مارن والیٚن خونخوار رامہٕ ہوٗنٮ۪ن ہنٛدؠ پٲٹھؠ آسن۔30حالانکہ تُہنٛدین قٲیِدن ہنٛزن جمٲژن منٛز تہِ آسن تِتھؠ کینٛہہ یمہ باقی ایمان والیٚن غلط کتھٕ ہیٚچھناوِتھ اپُز ونن۔ تِم ہیٚچھناون تِتھؠ پٲغام یُتھ زن لوٗکھ تِمن پیٚٹھ یقین کرن تہٕ تِہنٛدؠ پٲروکار بنن۔31لہٰذا روزیٚو خبردار زِ توٚہہ منٛزٕ گژھِ نہٕ کانٛہہ تہِ سٲنِس خداوند یسوع سنٛدِس پزِس پٲغامس پیٚٹھ پژھ تھاونہٕ نِشہٕ باز یُن! یاد تھایو تریٚن ورین ہنٛزٕ تِم دوٚہہ تہٕ رٲژ یِمن منٛز مےٚ توٚہؠ سُہ پٲغام ہیٚچھنٲیو تہٕ اوش ہاران ہاران خبردار کٔریٚو زِ خداوند سنٛدؠ وفادار بٔنؠ زیٚو۔32"ووٚنؠ ییٚلہ بہٕ توٚہؠ تراوان چُھسو تہٕ بہٕ چُھس خدایس تُہنٛدِ حفاظتہٕ باپتھ تہٕ توٚہہ اتھ پٲغامس پیٚٹھ یقین دنہٕ باپتھ ونان زِ سُہ چُھ سانہِ باپتھ تہِ کٔرتھ اسہِ بچاوان یمِکؠ نہٕ أسؠ مستحق چھِ۔ اگر توٚہؠ تِمن پٲغامن پیٚٹھ پژھ کران روزیٚو یمہ مےٚ توٚہہِ ونمٕتؠ چھِ، توٚہؠ بنیٚو مضبوط، تہٕ خدا دییہِ توٚہہ ہمیشہٕ باپتھ تِم اصٕل چیز یمہٕ تٔمؠ پننٮ۪ن تمام لوٗکن دنُک وعدٕ کوٚرمُت چُھ۔33یۅتام زن میٚون تعلق چُھ، مےٚ منٛگؠ نہٕ زانٛہہ تہِ کانٛسہِ سۅن، پونٛسہٕ یا اصٕل پلو۔34توٚہؠ چُھو پانہٕ زانان زِ مےٚ زینؠ پننیٚو اتھو کٲم کٔرِتھ تمہ پونٛسہٕ یمن ہنٛز مےٚ تہٕ میانیٚن دوستن ضرورت ٲس۔35مےٚ یہ کینٛژھا تہِ کوٚر تتھ منٛز ہوو مےٚ توٚہہ زِ اسہِ پزِ تِژےٕ محنت کرٕنؠ یُتھ أسؠ ضرورت منٛدن کینٛہہ دِتھ ہیٚکو۔ اسہِ پزِ یاد تھاوُن زِ سٲنؠ خداوند یسوعؔ ہن چُھ ونمُت، "اکھ شخص چُھ دویمیٚن کینٛہہ دِتھ زیادٕ خۅش سپدان تِمہ کھۅتہٕ ییٚلہ سُہ تورٕ رٹان چُھ"36ییٚلہ پولُسنؔ پنٕنؠ کتھ کرِتھ مۅکلاو تہٕ سارنی بزرگن سٟتؠ مونٛگُن دُزانو بِہتھ دُعا۔37تِمو ساروےٕ ووٚد واریاہ تہٕ پولُسؔ نالہٕ متہِ رٔٹِتھ کٔرؠ ہس میٹھؠ۔38تِم ٲسؠ سیٚٹھاہ غمگین تکیازِ تٔمؠ اوس ونمُت زِ تِم وچُھن نہٕ دُبارٕ تمِس زانٛہہ۔ پتہٕ گےَ تِم تس سٲری جہازس نِش سٟتؠ۔
Bridge Connectivity Solutions Pvt. Ltd.