اعمال16
1پولُسؔ تہٕ سیلاس گےَ دربی تہٕ لُسترہؔ شہرن منٛز تہٕ کوٚرکھ تتہِ ایمان والیٚن سٟتؠ ملاقات۔ تہٕ نیوکھ یتھ جٲئزٕ۔ تیمُتھیس ناوک اکھ ایمان وول اوس لُسترہؔ شہرس منٛز روزان۔ تمؠ سنٛز موج ٲس اکھ یہُودؠ ایمان واجِنؠ، مگر مول اوسُس یونٲنؠ۔2لُسترہنؔ تہٕ اِکُنیُمؔ کیٚو ایمان والیٚو کرِ تیمُتھیس متعلق جان کتھٕ،3تہٕ پولُسؔ اوس یژھان تیمُتھیس باقی جاین گژھنہٕ وزِ سٟتؠ تلُن امہِ باپتھ کوٚر تٔمؠ تیمُتھیس ختنہٕ۔ تٔمؠ کوٚر یہ اوٕ موٚکھٕ تاکہِ تِمن جاین ہنٛدؠ روزن وٲلؠ یہُودؠ کرن تتہِ یہُودؠ تیمُتھیس قبول، تکیازِ تِم ٲسؠ زانان زِ تمسنٛدؠ غٲر یہُودؠ مٲلؠ اوس نہٕ تس ختنہٕ کوٚرمُت۔4یتھ کنؠ گو تیمُتھیس پولُسؔ تہٕ سیلاسسؔ سٟتؠ تہٕ تِم گےَ واریہن دویمیٚن شہرن منٛز۔ پرٛتھ شہرس منٛز ؤنؠ تِمو ایمان والیٚن تِم اصول یمہٕ یروشلمس منٛز رسولو تہٕ بزرگو وضع کٔرمٕتؠ ٲسؠ۔5تِمو کوٚر تمہِ شہرٕ کٮ۪ن ایمان والیٚن مدد زِ تِم کٔرِنؠ خداوند یسوعسؔ پیٚٹھ مکمل پٲٹھؠ پژھ، تہٕ پرٛتھ دوٚہہ بنیاے واریاہ لوٗکھ ایماندار۔6پولُسؔ تہٕ تمسنٛدؠ سٲتھی رکٲوؠ پاک روحن آسیہؔ ہس منٛز کلام کرنہٕ نِشہٕ تہٕ تِم دراے فرُوگیہؔ تہٕ گلتیہ کٮ۪ن علاقن کُن۔7تِم وٲتؠ موسیہ صوبہٕ کٮ۪ن سرحدن نِش تہٕ تِم ٲسؠ بتُھنیہؔ کٮ۪ن صوبن کُن گژُھن یژھان مگر یسوع سنٛدؠ روحن رکٲوؠ تِم بیٚیہِ تور گژھنہٕ نِشہٕ۔8چناچہ تِم دراے موسیہ صوبہٕ کِنؠ سمندر بٔٹھؠ بٔٹھؠ ترواسؔ شہرس منٛز۔9تمہِ رٲژ ہوو خداین پولُسسؔ خابس منٛز مکدُنیہ ہُک اکھ نفر۔ یُس پولُسسؔ ناد اوس لایان "مکدُنیہ یتھ کر اسہِ مدد"10سُہ خاب وُچِھتھ دراے أسؠ مکدُنیہ کُن۔ تکیازِ اسہِ اوس یقین زِ خداین بُلٲوؠ أسؠ تتہِ کٮ۪ن لوٗکن خۅش خبر بوزناونہٕ باپتھ۔11أسؠ گےَ ناوِ منٛز سوار سپدِتھ ترواسؔ پیٚٹھٕ سمتُرا کُن تہٕ دویمہِ دوٚہہ گےَ نیاپُلس شہرس منٛز۔12نیاپُلس شہرٕ منٛزٕ نیرتھ گےَ پتہٕ أسؠ فلپی۔ یہ اوس مکدُنیہُک سیٚٹھاہ اہم شہر یتہِ واریاہ رومی شہری روزان ٲسؠ۔ أسؠ رودؠ فلپی منٛز واریہس کالس۔13سبت کہِ دوٚہہ دراے أسؠ شہرچہِ پھاٹکہِ نٮ۪بر دریاوس کُن۔ اسہِ بوز کُستام یہ ونان زِ یہُودؠ چھِ عبادت باپتھ ہُتیٚتھ جمع سپدان۔ ییٚلہ أسؠ توٚت وٲتؠ تہٕ اسہِ وُچھٕ کینٛہہ زنہِ یمہٕ دُعا باپتھ جمع آسہٕ سپٕزمژٕ، أسؠ بیٹھؠ پتھر تہٕ لگؠ یسوعسؔ متعلق تِمن وننہِ۔14تِمن منٛز ٲس لُدیاہ ناوٕچ اکھ زٔنؠ تہِ یۅسہ پولُسؔ سنٛزٕ کتھٕ بوزان ٲس۔ سۅ ٲس تھواتیرہؔ شہرٕچ۔ قرمِزؠ کپُر کٕنان تہٕ خدایہِ سنٛز عبادت کران۔ خداوند خداین پھیٚور تمسُنٛد توجو تِمن کتھن کُن یمہٕ پولُسن ونہِ، تہٕ تمہِ کوٚر تِمن پیٚٹھ یقین اوس15ییٚلہ پولُسنؔ تہٕ سیلاسن لُدیہؔ تہٕ تمسنٛدس گرس منٛز روزن والیٚن باقی لوٗکن بپتسمہ دیُت تہٕ تٔمؠ ووٚن تِمن، "اگر توٚہہِ یقین چُھ زِ بہٕ چُھس خداوند خدایہِ سُنٛد وفادار رودمُت تیٚلہ یی تو میٚون گھرٕ تہٕ روزؠ تو تٔتؠ۔ تمسنٛدِ وننہٕ پتہٕ رودؠ أسؠ تہنٛدے گھرِ۔16ببیہِ اکہِ دوٚہہ ییٚلہ أسؠ تتھ جایہ وٲتؠ یتہٕ لوٗکھ عبادت کرنہٕ باپتھ جمع ٲسؠ، گو اسہِ أکِس نوجوان خوتونہِ سٟتؠ ملاقات یۅسہ اکھ غلام ٲس۔ اکھ بد روح اوس تمِس لوٗکن ہُنٛد مستقبل بیان کرنُک طاقت دِوان۔ تمسنٛدؠ مٲلک ٲسؠ لوٗکن نِش پونٛسہٕ رٹان تہٕ تتھ ماوض تِمن ونناوان زِ توٚہہِ سٟتؠ کیاہ گُزرِ۔17یہ نوجوان خوتون لٔج پولُسؔ تہٕ اسہِ باقین لوٗکن پتہٕ پتہٕ پٔکِتھ کریکہٕ دِنہِ، "یِم لوٗکھ چھِ خدایہ سنٛز عبادت کران یُس ساروےٕ کھۅتہٕ بوٚڈ خدا چُھ۔ یِم چھِ توٚہہ ونان زِ خدا کِتھٕ کنؠ بچاوِ توٚہہِ"18سۅ روز واریہن دوٚہُن یی کران، ٲخرس کھوٚت پولُسسؔ شرارتھ، یمہِ کِنؠ سُہ أمِس نوجوان خوتونہِ کُن متوجہ سپُد تہٕ کٔرن تس بد روحس سٟتؠ کتھ یُس تمِس منٛز اوس۔ تٔمؠ ووٚن، "یسوع مسیحؔ سُنٛد سوال چھی، أمِس منٛزٕ نیر نیٚبر!" یکدم ژھنؠ سۅ بد روحن یلہٕ۔19تہٕ پتہٕ لوٚگ تمسنٛدین مٲلکن پےَ زِ ووٚنؠ ہیٚکہِ نہٕ سۅ سانہِ باپتھ پونٛسہٕ کمٲوِتھ تکیازِ ووٚنؠ ہیٚکہِ نہٕ سۅ پیشن گویی کرتھ زِ کس سٟتؠ کیاہ سپدِ۔ امہِ کِنؠ گےَ تِم ناراض تمو رۅٹ پولُسؔ تہٕ سیلاس تہٕ نیٖکھ أکِس عوٲمی چوکس منٛز یتہِ شہرٕکؠ حٲکم ٲسؠ۔20نوجوان خوتونہِ ہنٛدؠ مٲلکو أنؠ تِم شہرٕ کٮ۪ن حکمرانن نِش تہٕ ونُکھ تِمن، "یِم چھِ یہُودؠ لوٗکھ یِم چھِ سانہِ شہرٕ کٮ۪ن لوٗکن پریشان کران۔21یِم چھِ تِمن ہیٚچھٕ ناوان زِ اسہِ پزِ تِمن اصولن پیٚٹھ عمل کرٕنؠ یِمن سون شریعت اسہِ رومین ماننُک اجازت چُھنہٕ دِوان۔22ہجومس منٛز ؤتھؠ تِمن سٟتؠ واریاہ یِم پولُسسؔ تہٕ سیلاسسؔ الزام لاگان ٲسؠ تہٕ ہیٚتِکھ تِمن چوب دِنؠ۔ پتہٕ ؤتھؠ رومی حکمران سِپہن کُن زِ تِم ژٹن پولُسؔ تہٕ سیلاسسؔ پلو تہٕ دِنکھ لکٕریو ڈنڈو سٟتؠ مار۔23چناچہِ سِپہو لوُے پولُسسؔ تہٕ سلاسسؔ ڈنڈو سٟتؠ کۅپٲٹھؠ تہِ بیٚپٲٹھؠ۔ تمہِ پتہٕ تُلِکھ تہٕ بٔرِکھ قٲد۔ تَمو ووٚن جیلرس زِ یِم گژھن نہٕ کُنہِ تہِ حالس منٛز جیلہٕ منٛزٕ نیرٕنؠ۔24ییٚلہ افسرن جیلرس یہ ووٚن، اوٕ کِنؠ تھٲوؠ جیلرن پولُسؔ تہٕ سیلاس تتھ کمرس منز یُس جیل خانس منٛز ساروےٕ کھۅتہٕ انٛدر کُن اوس، تتہِ بہنٲوؠ تٔمؠ تِم پتھرِس پیٚٹھ تہٕ تھاوِنکھ زنٛگہٕ وہرِتھ۔ تہٕ پتہٕ أنِنؠ زٕ تھمبہٕ ٹُکرٕ تِمن کٔرنؠ بڈؠ گٔدؠ تہٕ تھٲوِن تِہنٛدؠ گۅڈ تِمن منٛز بنٛد یُتھ نہٕ پولُسؔ تہٕ سیلاس پننٮ۪ن زنٛگن حرکت کٔرِتھ ہیٚکن۔25قریبن نیصف رٲژ ٲسؠ پولُسؔ تہٕ سیلاسؔ گیوان گیوان خدایس کُن دعا پران۔ باقی قٲدؠ ٲسؠ تِہُنٛد یہ کلام بوزان۔26اچانک گو اکھ خطرناک بنیٚل یمؠ سٲری جیلٕکؠ کٕن الرٲوؠ۔ بنلہِ سٟتؠ گے سٲری دروازٕ یلہٕ تہٕ قٲدین پییٚہِ تمام گنجمژٕ زنجیرٕ وسِتھ۔27جیلر وۅتھ تھوٚد تہٕ اتہِ وُچِھن قٲد خانن ہنٛدؠ سٲری دروازٕ بنلہِ سٟتؠ یلہٕ گٲمتؠ تمِس باسیاو زِ قٲدی چھِ ژلمٕتؠ اوٕ مۅکھٕ کٔڈ تٔمؠ تلوار پنُن پان مارنہٕ باپتھ، تکیازِ تمِس اوس معلوم زِ اگر قٲدیو آزٲدی پرٲو تہٕ شہرٕکؠ حٲکم کرن تس قتل۔28پولُسنؔ وُچھ جیلر تہٕ دِتُن تس ناد، "پنُن پان مہِ مار! أسؠ سٲری قٲدؠ چھِ یتؠ!29جیلرن دیُت کستام مشٲلؠ زالنہٕ باپتھ ناد تاکہِ سُہ وُچھِ ہے زِ قٲدخانس منٛز کُس کُس چُھ موجود، سُہ لرزیو تہٕ ژاو کھوژؠ کھوژؠ انٛدر تہٕ پیٚو پولُسسؔ تہٕ سیلاسسؔ پادن۔30پتہٕ کٔڈؠ تمؠ پولُسؔ تہٕ سیلاس جیلہٕ منٛزٕ نیٚبر تہٕ پرُژھنکھ، "میانیٚو آقاوو، نجات لبنہٕ خٲطرٕ کیاہ چُھ مےٚ کرُن؟"31تِمو دِتُس جواب، "خداوند یسوعس پیٚٹھ تھاو بھروسہٕ ژٕ تہٕ چون گھرٕ لبہِ نجات۔32پتہٕ کرِ پولُسنؔ تہٕ سیلاسنؔ تمِس تمسنٛدین گرِ کیٚن سٟتؠ خداوند یسوعسؔ متعلق کتھٕ33پتہٕ چھٔلؠ نیصف رٲژ جیلرن تہنٛدؠ زخم۔ امہِ پتہٕ دیُت پولُسنؔ تہٕ سیلاسن تمِس تہٕ تمسنٛدین تمام گھرِ بٲژن بپتسمہ۔34پتہٕ نی جیلرن پولُسؔ تہٕ سیلاس پنُن گھرٕ تہٕ تتہِ کھیاوٕنؠ چیاونؠ۔ سُہ تہٕ تمسنٛدؠ گھرٕکؠ سٲری بٲژ ٲسؠ سیٚٹھاہ خۅش تکیازِ تِم ٲسؠ خدایس پیٚٹھ پژھ تھاوان۔35بیکہِ دوٚہہ صبحٲے ووٚن شہرٕ کیٚو حٲکمو کینٛژن سِپہن زِ تِم گٔژھِن قٲد خانہٕ تہٕ تتہِ ؤنِن جیلرس، "تِم دوٚنوے قٲدؠ تراوُکھ یلہٕ۔36ییٚلہ جیلرن یہ بوز تہٕ سُہ گو تہٕ ونُن پولُسسؔ، "شہرٕ کیٚو حٲکمو ووٚن مےٚ توٚہؠ رہا کرنہٕ باپتھ۔ لہٰذا گٔژھیٚو توٚہؠ دوٚنوے ووٚنؠ سکوٗنہٕ سان قٲد ترٲوِتھ!37مگر پولُسنؔ ووٚن جیلرس، "شہرٕ کیٚو حکمرانو ووٚن لوٗکن زِ أسؠ رومی شہری آسنہٕ باوجود گژھو لُکہٕ ہجومس برُونٛہہ کنہِ چوبو سٟتؠ دگٕنؠ تہٕ پتہٕ قٲد برٕنؠ۔ تہٕ ووٚنؠ چھا کٲنٛسہِ کینٛہہ وننہٕ بغٲر اسہِ رخصت کرُن یژھان! أسؠ کرو نہٕ یہ قبول! تِم شہرٕکؠ حٲکم ین پانےَ تہٕ کرن اسہِ جیلہٕ منٛزٕ رہا۔38چناچہ سِپاہ گےَ تہٕ ونُکھ شہرٕ کٮ۪ن حٲکمن تہِ یہ پولُسنؔ ووٚن۔ ییٚلہ شہرٕ کیٚو حٲکمو بوز زِ پولُسؔ تہٕ سیلاس چھِ رومی شہری تہٕ تِم کھوژؠ تکیازِ تِمو ٲس غلط کٲم کرمٕژ۔39چناچہ شہرٕکؠ حٲکم آے پولُسسؔ تہٕ سیلاسسؔ نِش تہٕ ونُکھ تِمن زِ اسہِ یہ کینٛژھا توٚہہِ سٟتؠ کوٚر أسؠ چھِ تتھ پیٚٹھ شرمنٛدٕ۔ شہرٕ کیٚو حٲکمو کٔڈؠ تِم قٲدٕ خانہٕ منٛزٕ نٮ۪بر تہٕ ووٚنہکھ شہرٕ نٮ۪بر نیرنہٕ باپتھ۔40پولُسؔ تہٕ سیلاس سنٛدِ قٲد خانہٕ منٛزٕ نیرنہٕ پتہٕ گےَ تِم لُدیاہؔ سُنٛد گھرٕ۔ تتہِ سمٕکھؠ تِم تس تہٕ باقی ایمان والیٚن۔ تِمو کٔر ایمان والیٚن حوصلہٕ افزائی زِ تِم چھِ خداوند یسوعسؔ پیٚٹھ ہیٚتھےٕ یقین تھاوان، پتہٕ دراے دوٚنوے رسول فلپس شہرٕ منٛزٕ۔
Bridge Connectivity Solutions Pvt. Ltd.