اعمال12
1یہ اوس سُہ وقت ییٚلہ بادشاہ ہیرودیس اگرپاہؔن یروشلمس منٛز ایمان وٲلؠ جمٲژ ہنٛدؠ کینٛہہ زِٹھؠ گِرفتار کرنہٕ باپتھ پنٕنؠ سِپاہ سوزؠ۔ فوجیو بٔرؠ تِم جیل۔ یہ کوٚر بادشاہن تکیازِ سُہ اوس ایمان والیٚن تکلیف دیُن یژھان۔2تٔمؠ کوٚر أکِس سِپہس حکم زِ سُہ انہِ یوحناؔ رسول سنٛدِس بٔڈس بٲیس یعقوبؔ رسول سُنٛد کلہٕ ژٔٹِتھ۔ تہٕ سِپہن کوٚر تہِ۔3ییٚلہ ہیرودیسس پےَ لوٚگ زِ تٔمؠ کٔرؠ یہُودٮ۪ن ہنٛدؠ قٲید خۅش تہٕ تٔمؠ دیُت سِپہن حکم زِ پطرس تہِ أنوون گرفتار کٔرتھ۔ یہ سپُد تتھ بٔڈِس دوٚہس دوران ییٚلہ یہُودؠ خمیرِ روٚس ژۅٹ ٲسؠ کھیٚوان۔4پطرس گرفتار کٔرتھ بوٚر سُہ تِمو قٲد۔ تِمو تھٲو سِپہن ہنٛزن ژۅن جمٲژن پطرسس رٲچھ روزنٕچ ذمہ دٲری۔ پرٛتھ کُنہ جمٲژ منٛزٕ ٲسؠ ژور ژور سِپاہ۔ ہیرودیسؔ اوس پطرسس جیلہٕ منٛزٕ نٮ۪بر کڈُن یژھان تہٕ فسح بڈِ دوٚہہ انٛد وٲتِتھ تمِس یہُودؠ لوٗکن برُونٛہہ کنہِ انصاف دیاوُن یژھان۔ امہِ پتہٕ بنوو تٔمؠ پطرسؔس قتٕل کرنُک منصوبہ۔5یتھٕ کنؠ رود پطرس واریہن دوٚہُن قٲد۔ مگر یروشلمس منٛز ٲسؠ تمؠ سنٛزِ جمٲژ ہنٛدؠ ایمان وٲلؠ دِل پھُٹِتھ خدایس دُعا منٛگان زِ سُہ کٔرِن پطرسس مدد۔6یمہِ رٲژ ہیرودیسؔن پطرس جیلہٕ منٛزٕ نٮ۪بر کٔڈِتھ تس سرِعام پھٲسؠ دِنُک منصوبہ بنوو، پطرس اوس قٲدخانس منٛز دوٚن سِپہن منٛزباگ شونٛگِتھ تہٕ زٕ زنجیرٕ آسس گنٛڈِتھ۔ تہٕ بیٚیہِ زٕ سِپاہ ٲسؠ جیلہٕ کِس دروازس پیٚٹھ پہرٕ دِتھ۔7اچانک گو خداوند خدا سُنٛد اکھ فرشتہٕ پطرسس برُونٛہہ کنہِ کھڑا تہٕ تمؠ سنٛزِ پہرِ منٛز گو اکھ چمکدار گاش ظٲہِر۔ فرشتن دِژ پطرسس ۂلِس ژنٛڈ تہٕ کوٚرُن ہُشار تہٕ وُننَس، "وۅتھ جلد تھوٚد!" ییٚلہ پطرسن تھوٚد وۅتھُن ہیٚوت تہٕ تمؠ سنٛزو ہژیٚو منٛزٕ آیہ ہانٛکلہٕ وسِتھ۔ حلانکہِ سِپہن لوٚگ نہٕ امہِ کتھِ ہُنٛد پےَ زِ سپدان کیاہ چُھ۔8پتہٕ ووٚن فرشتن تس، "وۅتھ گنٛڈ پنُن ہوٚل تہٕ لاگ نالان۔ تہٕ پطرسن کوٚر تی۔ پتہٕ ووٚن فرشتن تس، "پنٕنؠ ژادر وَل پانس انٛدؠ انٛدؠ تہٕ پکھ مےٚ پتہٕ پتہٕ!"9یتھ کنؠ دراو پطرس پنٕنؠ ژادر ؤلِتھ تہٕ کھۅربانہٕ لٲگِتھ قٲد خانہٕ منٛزٕ فرشتس پتہٕ پتہٕ نیٚبر، مگر تمِس ٲس نہٕ پژھےٕ بہان زِ یہ سورےٕ چھا پٔزؠ پٲٹھؠ سپدان۔ تمِس اوس باسان زِ بہٕ چُھس خاب وُچھان۔10پطرس تہٕ فرشتہٕ دراے تِمو سِپہو برُونٛہہ کِنؠ یمہٕ دروازن دوٚن پیٚٹھ پہرٕ دِوان ٲسؠ مگر سپہَن آے نہٕ تِمہ اتھِ۔ پتہٕ وٲتؠ تِم شستٕرو دروازس نِش یپٲرؠ شہرس منٛز اژان ٲسؠ۔ برَن گییہِ پانے یلہٕ، پطرس تہٕ فرشتہٕ دراے قٲد خانہٕ منٛزٕ نیٚبر۔ ییٚلہ تِم اکہِ کوچہٕ کِنؠ دوٗر پہن وٲتؠ تہٕ سُہ فرشتہٕ گو اچانک غٲب۔11ٲخٕرکار زون پطرسن زِ یہ کینٛژھا تس سٟتؠ سپُد تہِ اوس نہٕ خاب بلکہِ اکھ حقیقت۔ لہٰذا سونٛچ تٔمؠ، ووٚنؠ سپُد مےٚ پٔزؠ کِنؠ معلوم زِ خداوند خداین سوز میانہِ مددتہٕ باپتھ اکھ فرشتہٕ۔ تٔمؠ چووُس بہٕ تمہِ نِشہٕ یہ کینٛژھا ہیرودیس مےٚ سٟتؠ ورتاونُک منصوبہ بناوان اوس تہٕ تِمو ساروےٕ چیزو نِشہٕ تہِ یمیُک توقع یہُودی زِٹھؠ کران ٲسؠ۔12ییٚلہ پطرسس معلوم سپُد زِ خداین بچووُس بہٕ تہٕ سُہ گو مریمؔ سُنٛد گرٕ۔ سۅ ٲس یوحناؔ سنٛز موج یمسُنٛد بیاکھ ناو مرقُسؔ اوس۔ واریاہ ایمان وٲلؠ ٲسؠ تتہِ جمع گٲمٕتؠ، تہٕ تِم ٲسؠ دُعا منٛگان زِ خدا کٔرِنؠ کُنہِ پٲٹھؠ پطرسس مدد۔13ییٚلہ پطرسن نیٚبرمِس دروازس ٹُھک ٹُھک کوٚر تہٕ رُدی ناوٕچ اکھ نوکرٲنؠ آیہ یہ وُچھنہِ زِ دروازس نیٚبرٕ کنہِ کُس چُھ۔14ییٚلہِ پطرسن تس جواب دیُت تہٕ تٔمہ پرزٕنٲو آواز، مگر سۅ گییہِ تیژ خۅش تہٕ وُتاول زِ تمہِ مُژروو نہٕ دروازے۔ تمہِ بجایہ دورییہِ سۅ گرٕ کُن واپس۔ تٔمؠ کوٚر باقی ایمان والیٚن نِش اعلان زِ پطرس چُھ دروازس نیٚبرٕ کنہِ۔15مگر تِمو منٛزٕ ووٚن تس أکؠ، "ژٕ چھیٚکھ دیوانہٕ گٔمٕژ! مگر سۅ روز ونان زِ یہ چُھ پوٚز۔ تِم رودؠ ونان، "نہ، پطرس ہیٚکہ نہٕ ٲسِتھےٕ۔ یہ چُھ شاید تمسُنٛد فرشتہٕ"16مگر پطرس رود دروازس ٹُھک ٹُھک کران۔ ٲخر کار ییٚلہ کٔمؠ تام دروازٕ یلہٕ ترُوو تہٕ تِمو وُچھ یہ اوس پطرس، تِم سپٕدؠ حٲران!17پطرسن ہوو تِمن اتھٕ سٟتؠ ژۅپہٕ کرنہٕ باپتھ اتھٕ سٟتؠ اشارٕ۔ پتہٕ ووٚن تٔمؠ تِمن اصل پٲٹھؠ زِ خداوند خداین کِتھٕ کنؠ کوٚڈُس بہٕ قٲد خانہٕ منٛزٕ۔ تٔمؠ ووٚن یتہِ، "یعقوبؔ، سانہِ جمٲژ ہنٛدِین زِٹھٮ۪ن تہٕ سانٮ۪ن باقی ایمان والیٚن سٲتھین ون زِ کیاہ سپُد" پتہٕ دراو پطرس تہٕ گو بدل کتھ تام جایہ۔18بیکہِ دوٚہہ صبحٲے سپٕدؠ تِم سِپاہ سیٚٹھاہ پریشان یمہٕ پطرس سنٛز پہرٕدٲری کران ٲسؠ تکیازِ تِمن اوس نہٕ فِکرے تران زِ تمِس کیاہ سپُد۔19تانؠ بوز ہیرودیسن تہِ اتھ متعلق۔ تہٕ تٔمؠ دیُت سِپہن حکم پطرس ژھانڈنُک، مگر تِمو ہیٚوک نہٕ سُہ لٔبِتھ۔ پتہٕ کوٚر تٔمؠ تِمن سِپہن سوال یمہٕ پطرسس رٲچھ ٲسؠ تہٕ دِتُن حکم تمہٕ قتٕل کرنہٕ باپتھ نِنؠ۔ امہ پتہٕ گو ہیردیسؔ یہُودیہ صوبہٕ پیٚٹھٕ قیصریہ شہر کُن یتہِ سُہ کینٛژس کالس رود۔20بادشاہ ہیرودیسس کھوٚت صورؔ تہٕ صیدا کیٚن شہرن منٛز روزن والیٚن لوٗکن پیٚٹھ واریاہ خشٕم۔ اکہِ دوٚہہ سپٕدؠ کینٛہہ نفر یمہٕ تمؠ سنٛز نمایندٕ کران ٲسؠ ہیرودیسس سمکھنہٕ باپتھ قیصریہ شہرس منٛز جمع اکِس کمرس منٛز۔ تِمو کوٚر بلستسؔ، یُس ہیرودیس سُنٛد اہم منصب دار اوس ہیرودیسس یہ ننہٕ خٲطرٕ آمادٕ زِ تمسنٛدِ شہرٕکؠ لوٗکھ چھِ تمِس سٟتؠ صلح کرُن یژھان۔ تِم چھِ تِمن لوٗکن سٟتؠ تجارت کرنَس لایکھ سپدٕنؠ یژھان یمن پیٚٹھ ہیرودیس حکومت کران چُھ۔ تکیازِ تِمن ٲس تِمو علاقو نِشہٕ خۅراک ہیٚنٕچ ضرورت۔21یمہِ دوٚہہ ہیرودیسن تِمن سمکھنُک اِرادٕ کوٚر تمہِ دوٚہہ لٲگؠ تٔمؠ قٟمتی پلو یمو سٟتؠ باسان اوس زِ سُہ چُھ بادشاہ۔ پتہٕ بیوٗٹھ سُہ پننِس تختس پیٚٹھ تہٕ کوٚرُن تتہِ جمع سپدیمتین تمام لوٗکن رسمی طور خطاب۔22یمہٕ لوٗکھ تمؠ سنٛزٕ کتھٕ بوزان ٲسؠ تمہٕ ٲسؠ بار بار شور تُلان، "یہ نفر یُس یہ بولان چھُ، چُھ خدا نکہِ اکھ انسان!"23لوٗکھ لٔگؠ خدایہ سنٛدؠ تعریف کرنہٕ بجایہ تمسنٛدؠ تعریف کرنہٕ۔ لہٰذا پوو خداوند خدا سنٛدؠ اکؠ فرشتن یکدم ہیرودیس شدید بٮ۪مار۔ واریہو کیٚمیٚو کھیی تمسنٛدؠ انٛدرم۔ تہٕ پتہٕ مود جلدےٕ سیٚٹھاہ دردناک عزابہٕ سٟتؠ۔24ایمان وٲلؠ ٲسؠ لگاتار واریہن جاین خدایہ سُنٛد پٲغام بوزٕناوان۔ تہٕ یسوع سنٛدین مانن والیٚن ہنٛدِس تعدادس منٛز اوس ہیٚتھےٕ ہُریر سپدان۔25ییٚلہ برنباسؔ تہٕ ساوُل یہُودیہ صوبس منٛز یہُودؠ ایمان والیٚن مددتہٕ باپتھ پونٛسہٕ واتناوان ٲسؠ تہٕ تمہٕ دراے یروشلم منٛزٕ تہٕ وٲتؠ واپس ملکِ شام کِس صوبہ انطاکیہؔ ہس منٛز۔ تِمو نیٚو یوحناؔ، یمسُنٛد بیاکھ ناو مرقُسؔ اوس پانس سٟتؠ۔
Bridge Connectivity Solutions Pvt. Ltd.