2 تیمُتھیس4
1ہے تِموتھی، بہٕ چُھسے ژےٚ وۅنؠ بڈٕ سنٛجیدگی سان تٲکید کرن وول کینٛہہ خاص کامہِ کرنہٕ باپتھ خدا تہٕ یسوع سنٛزِ موجودگی منٛز تِم گواہ بنٲوِتھ۔ تِم تہِ چھِ یِمو کامیٚو باپتھ ژےٚ نِش امید تھاوان۔ یہِ تھاو ژٮ۪تس زِ یسوع مسیحؔ چُھ سارنےٕ لوٗکن یِم زانہٛہ تہِ زنٛدٕ ٲسؠ، عدالت لاگنہٕ یِنہٕ وول۔ بہٕ چُھسے تٲکید کران تٔمہِ جوشہٕ سان یُس ژےٚ یسوع سنٛدِ وُچھنُک تہٕ تسنٛدٕ بادشٲہی ہنٛد حصہٕ بننُک چھےٚ ییٚلہِ سُہ ییہِ2مسیحؔ ہس متعلق شیٚچھِ ہُنٛد اعلان کرنہٕ باپتھ۔ تیار گژھِ یہِ کرنہٕ باپتھ۔ یمہِ وِزِ یہِ کرُن سہَل آسہ یا کڈُر آسہ۔ لوٗکھ انُکھ صحیح وتہِ کُن ییٚلہِ تِم ڈٔلؠ مٕتؠ آسن۔ خبردار کرُکھ گناہ نہ کرنہٕ باپتھ۔ حوصلہٕ دِکھ رُت کرنہٕ باپتھ۔ ژٕ چھُکھ یِمے چیز کران۔ بڈٕ صبرٕ سان روز یہےَ تعلیم دِوان۔3بہٕ چُھسے یِم چیز ونان اوٕ کِنؠ زِ یِنہٕ وٲلِس وقتس منٛز یژھن نہٕ لوٗکھ پٔز تعلیم بوزُن۔ اتھ برعکس سمبراون تِم زیادٕ کھۅتہٕ زیادٕ تِتھؠ وۅستاد یِم وننکھ زِ تِم ہیٚکن تہِ سورےٕ کٔرِتھ یہِ تِم یژھان آسن۔ یی بوزنہٕ باپتھ آسن تِم بیتاب۔ 4اوے کرن تِم بند نہ صرف پوٚز بوزُن، بلکہِ دِن یِمن وۅستادن پانس دھوکھہٕ دِنہٕ تہٕ احمقانہٕ دلیلو سٟتؠ۔5مگر ژٕ تموتھی تھاوکھ پانس پٮ۪ٹھ ضبط۔ چاہے کینٛہہ تہِ سپدِ۔ روز تیار کڈُرؠ چیزن پٮ۪ٹھ صبرٕ باپتھ۔ رٕژ شیٚچھ باونٕچ کٲم تھاو جٲری۔ خداوند سنٛز خدمت کرنہٕ باپتھ تھاو پنٕنؠ کٲم جٲری۔6بہٕ چُھسے یِمہٕ کتھہٕ ونان تکیازِ میٲنؠ زندگی چھےٚ زنتہٕ خدایس پیش کرنہٕ یِنہٕ وول سُہ شراب یس کاہن پھرِتھ مۅکلاونس تیار چُھ۔ میانہِ زندگی ہُنٛد ژونگ چُھ ژھٮ۪تہٕ گژھن وول۔ 7بہٕ چُھس زنتہٕ سُہ کھِلٲڈؠ یُس مقابلس منٛز پنٕنؠ بہترین کارکردگی کٔرِتھ مۅکلیوو۔ بہٕ چُھس تمِس دورن وٲلِس ہیٚو یمؠ پنٕنؠ دور اند واتنٲو۔ امہِ مقابلہٕ سٟتؠ چُھس بہٕ یہِ باوان زِ بہٕ رودُس لگاتار خدایس فرمانبردٲری کران۔ 8تہٕ أکِس دورن وٲلؠ سٕنٛدؠ پٲٹھؠ یمؠ پنٕنؠ دور زینؠ چُھس بہٕ وونؠ پراروُن تتھ انعامس یُس مےٚ زیون خدایس خوش کروٕنؠ زندگی گُزٲرِتھ۔ خداوندن یُس عدلس بہِتھ چُھ تھوو یہِ انعام میانہِ باپتھ تہٕ سُہ دِیہ یہِ مےٚ ییٚلہِ سُہ دُبارٕ ییہِ۔ نہ صرف دییہِ سُہ یہِ مےٚ بلکہِ تِمن سارنےٕ تہِ یِم تسٕنٛدس یِنس شوقہٕ سان پراران چھِ۔9تموتھی، مےٚ نِش واتنس منٛز کر وُژھ10تکیازِ دیماسنؔ ترووُس بہٕ تہٕ گوو تھِسلُنِیکِس شہرس منٛز۔ سُہ چُھ یمہِ دنیاہ چہِ زندگی حدٕ روٚس لول بران۔ کریسینسؔ گوو گلتیہ کِس صوبس کُن تہٕ طِطُس گوو دلمتیہؔ کِس ضلعس کُن۔11مےٚ سٟتؠ چُھ چھرا لوقا۔ مرقُس انن ژھٲرِتھ مےٚ نِش پانس سٟتؠ۔ یہِ کر تکیازِ سُہ کرِ مےٚ پنٕنؠ چیز حٲصِل کرنس منٛز اتھہٕ روٚٹ۔12باقےٕ رود تُخِکسؔ۔ سُہ سوز مےٚ افسس شہرس منٛز۔13ییٚلہِ ژٕ یِکھ پانس سٟتؠ أنؠ زِ سُہ چۅغہٕ تہِ یُس مےٚ ترواسؔ شہرس منٛز کرپسسؔ نِش تروو۔ بیٚیہِ أنؠ زِ تِم لکوٹہٕ یعنی گول گول ؤلِتھ کتابہٕ راد تہِ خاص پٲٹھؠ چمبرٕ واجنہِ۔14سکندر نٲوؠ ٹانٹھرؠ کوٚر مےٚ سٟتؠ بدسلوک۔ خدا وند دِیہ تمس سزا تٔمہِ باپتھ یہِ تٔمؠ مےٚ سٟتؠ کوٚر۔ 15ژےٚ تہِ پٔزی تس نِش خبردار روزُن تکیازِ تٔمؠ کوٚر تہِ سورےٕ یہِ تس توٚگ أسؠ تعلیم دِنہٕ نِشہ رُکاونہٕ باپتھ۔16ییٚلہِ مےٚ گۅڈنکہِ پھرِ عدالتس منٛز پنُن بچاو کوٚر کانٛہہ ایماندار تہِ آو نہٕ مےٚ مدتس۔ سٲری رودؠ دوٗر دوٗر۔ خدا مہٕ گنٛزرنؠ تِمن امہِ باپتھ ذِمہٕ دار۔17وۅنؠ گوو خداوند اوس مےٚ سٟتؠ۔ تٔمؠ دِژ مےٚ ہٮ۪متھ۔ تاکہِ مےٚ ہیٚکؠ تسٕنٛدؠ لفظ پوٗرٕ ادا کٔرِتھ تاکہِ سٲری غٲر یہُودؠ بوزن۔ خداین بچووُس بہٕ سؠٹھاہ خطرناک حالاتن منٛز زنتہٕ تٔمؠ بہٕ سٕہہ سنٛدِ ٲسہٕ منٛزٕ بچووُس۔ 18خداوند بچاوِ مےٚ پرٮ۪تھ بُرٕ چیزٕ نِشہ یہ تِم روا تھاون۔ سُہ واتناوِ مےٚ حفاظتہٕ سان آسمانس پٮ۪ٹھ ییٚتہِ سُہ بادشٲہی کران چُھ۔ تس سنٛز تعریف روزِن انٛدٕ ونٛدٕ پوشہٕ وٕنؠ۔ آمین۔19پرسکہِؔ تہٕ اکولؔہ ؤنؠ زِ سلام۔ اُنیسِفرُؔس سنٛدِس گرس منٛز سارنےٕ لوٗکن ؤنؠ زِ سلام۔20اراستُسؔ رود کورنتھین شہرس منٛزےٕ۔ پتھ گوو تُرفمسؔ، سُہ اوس بٮ۪مار تہٕ اوے ترووُم میلیتسؔ شہرس منٛز۔21ونٛدٕ برونٛٹھۓ کٔرؠ زِ کوٗشش مےٚ نِش واتنٕچ۔ یُوبُولُسؔ، پُودینسؔ، لِینُسؔ تہٕ کلودِیہؔ تہٕ باقےٕ واریاہ ایمان وٲلؠ چھی سلام ونان۔22خداوند روزِن چٲنِس روحس سٟتؠ تموتھی۔ سُہ روزِن اتہِ توٚہہِ سارنےٕ ایمان والیٚن پٮ۪ٹھ مہربان۔
Bridge Connectivity Solutions Pvt. Ltd.