طِطُس1
1بہٕ، پولُسؔ چُھسے یہِ چِٹھؠ ژےٚ طیطسؔ لیٚکھان۔ بہٕ چُھس خداۓ سُنٛد اکھ خدمت گار بییٚہِ یسوع مسیحؔ سُنٛد اکھ رسول۔ خداین سوٗزس بہٕ تِمن لوٗکن تعلیم دِنہٕ خٲطرٕ یِم تمؠ زن پننٕؠ ژٲرؠ مٕتؠ چھِ تاکہ تِم کرن تس پیٚٹھ زیادے پہن بھروسہٕ۔ بہٕ چُھس تمؠ سٕندٮ۪ن لوٗکن یہِ زانس منٛز مدد کرنہٕ خٲطرٕ کٲم کرن زِ پوٚز کیاہ چُھ، یُتھ زن تِم ہیکن أمہِ اندازٕ زندگی بسر کرِتھ یوسہٕ خدایس خوش یوان چھِ۔2تمؠ سنٛدؠ لوٗکھ ہیکن ہیٚچھِتھ زِ یژھؠ ہشؠ زندگی کٔتھٕ پٲٹھؠ چھِ گُزاران تکیازِ تِمن چُھ اعتماد زِ خداے کرِ تِمن ابدی زندگی عطا۔ خداے چُھنہٕ اپُز ونان۔ ییٚلہِ زنہٕ دنیا شروع گژھنہٕ برونٛہہ تہِ چُھ تمؠ وعدٕ کوٚرمُت زِ سُہ کرِ اسہِ ابدی زندگی عطا۔3پتہٕ کوٚر تمؠ صحیح وقتس پیٚٹھ پنُن منصوبہ یمہِ پٲغامہٕ ذریعہٕ ظٲہر زِ تمؠ کوٚر أمیٛک تبلیغ کرنس منٛز مےٚ پیٚٹھ بھروسہٕ۔ بہٕ چُھس یہِ خدایہِ سنٛدِ حکمٕچ اطاعت کرنہٕ خٲطرٕ کران، یُس اسہِ بچاوان چُھ۔4طِطُسؔ، بہٕ چُھسے ژٕ لیٚکھان؛ ژٕ چُھکھ مےٚ أکس اصلی نیٚچِوؠ سنٛدؠ پٲٹھؠ بنیامُت تکیازِ وونؠ چُھ اسہِ دوشونے یسوع مسیحسؔ پیٚٹھ ایمان۔ بب خداے تہٕ یسوع مسیحؔ یُس اسہِ بچاوان چُھ تہٕ ژےٚ روزِنے ہمیشہٕ مہربان تہٕ ژےٚ دی نَےاکھ پُر سکون روح۔5مےٚ تراوُکھ ژٕ کریتےؔ کِس جزیرس پیٚٹھ یمہِ سببہٕ: زِ ژٕ کرکھ سۅ کٲم یۅسہٕ ونہِ تہِ اڑلیٚچؠ چھےٚ تہٕ بیٚیہِ کرکھ پریتھ شہرس منٛز ایمان والیٚن جمٲژن خٲطرٕ سردار مقرر، یتھٕ پٲٹھؠ مےٚ ژٕ کرُن وونے۔6پریتھ کانٛہہ سردار گژھِ سُہ اکھ نفر آسُن یِس نہٕ کانٛہہ تہِ ہیکہِ کتھ کرِتھ۔ تمس گژھِ صرف اکھ آشِنؠ آسٕنؠ، تمؠ سنٛدؠ شُرؠ گژھِ خدایس پیٚٹھ بھروسہٕ تھاون وٲلؠ آسٕنؠ، تہٕ لوٗکھ گژھن نہٕ تمؠ سٕندٮ۪ن شُریٚن بے گنڈ یا نافرمان تصور کرنؠ ۔7یُس اکھ خداۓ سٕندٮ۪ن لوٗکن ہنٛز رہنمٲییٔ کرِ سُہ چُھ تمس شخصس ہیو یُس بییٚہِ کٲنسہِ ہندین خدمت گارن بییٚہِ کٲنسہِ ہنٛدس جایدادُک انتظام کرِ، پوٚز سُہ چُھ یہِ خداے سنٛدِ خٲطرٕ کران۔ لہٰذا یہِ چُھ تمس شخصہٕ سنٛدِ خٲطرٕ ضروری زِ تس گژھِ نیک نٲمی آسٕنؠ۔ تس گژھِ نہٕ گمنڈ آسُن تہٕ تس گژھِنہٕ جلدے شرارت کھسُن۔ سُہ گژھِ نہٕ شرٲبؠ آسُن، نہٕ کانٛہہ سُہ یُس لڑٲے کرنؠ تہٕ بحثہٕ بحث کرنؠ پسند کرِ، بییٚہِ نہٕ اکھ لالچی نفر آسُن۔8امہِ بجایہ، پزِ تس وۅپرن خوش آوے کرنؠ تہٕ رٕتٮ۪ن چیزن لول برُن۔ تس پزِ ہوشہِ سان ہمیشہِ عمل کرنؠ بییٚہِ باقی لوٗکن سٟتؠ ایماندٲری سان سلوک کرُن۔ تمس پزِ ہمیشہٕ تتھٕ پٲٹھؠ کٲم کرنؠ یُس کٲنٛسہ شخصہٕ سنٛدِ خٲطرٕ صحیح آسہِ یُس خداے سنٛدِ خٲطرٕ وقف آسہِ تہٕ تمس پزِ ہمیشہٕ پننؠن جذباتن پیٚٹھ قوبو آسُن۔9تمس پزِ تِمن پزن چیزن پیٚٹھ ایمان آسُن یِم اسہِ سُہ ہیٚچھنوو، تہٕ تس پزِ تِمو مطٲبق زندگی گُزارنؠ۔ تس پزِ یہِ کرُن یتھ زن سُہ لوٗکن ہیکہِ امی اندازٕ زندگی گُزارنس پیٚٹھ قٲیل کٔرِتھ، بییٚہِ یتھ زن سُہ ہیکہِ لوکن درست کرِتھ ہرگاہ تِم چھِنہٕ یتھٕ پٲٹھؠ زندٕگی گُزارنؠ یژھان۔10بہٕ چھسے ژےٚ یِم چیز ونان تکیازِ واریاہ لوٗکھ چھِ تِم یِم تِمن لوٗکن فرمانبردٲری کرنہٕ نِش انکار کران چھِ یِم تِہنٛدؠ حٲکم چھِ۔ یہِ تِم لوٗکھ ونان چھِ، تہِ چھُ بےٚ مۅل۔ تِم چھِ لوٗکن غلط چیزن پیٚٹھ ایمان تھونہٕ خٲطرٕ قٲیل کران۔ تِم لوٗکھ چھِ زیادٕ تِم یِم مسیحسؔ پتہٕ سارنے پکن والیٚن ونان چھِ ختنہٕ کریو ۔11ژٕ تہٕ تِم سردار یِم ژٕ مقرر کرکھ پزِ یتھین لوٗکن ایماندارن تعلیم دِنہٕ نِش منع کرُن۔ تِم چھِ تِم چیز ہیٚچھناوان یِم نہٕ تِمن ہیٚچھناوٕنؠ پزن، یمہِ سٟتؠ پوٚرٕ خاندانن غلط چیزن پیٚٹھ یقین چُھ گژھان۔ تِم چھِ یہِ صرف امہِ وجہ کران یتھ زن تِمن لوٗکھ رۅپیہ دِن۔ یہِ چُھ واریاہ شرمناک!12کریتُک اکھ نفر، سُہ شخص یُس تمؠ سٕندٮ۪ن لوٗکن ہندِ خیالہٕ اکھ نبی اوس، تمؠ وون، "کریٹٕکؠ لوٗکھ چھِ اکثر اکھ أکس اپُز ونان! تِم چھِ خطرناک وحشی جانورن ہیوؠ! تِم چھِ کٲہل تہٕ یڈل"13یہِ تمؠ وون تہِ چُھ پوٚز، لہٰذا کریو تِمن پوٚرٕ زورٕ سان درستی۔ یُتھ تِم ایمان أنن تہٕ خدایس متعلق ہیٚچھناون صحیح چیز۔14تِمن پزِ یہودیو ہنٛزو گرِمٕژو دلیلو مطٲبق زندگی گزارنہٕ نِش لوٚب روزُن بییٚہِ حکمو نِش یِم نہٕ خدایہِ سنٛدِ طرفہٕ آیہِ۔ یِم حکم آیہِ تِمو لوٗکو نِش یِم تتھ فرمانبردٲری کرنہٕ نِش لوٚب رودؠ یہِ چُھ پوٚز۔15ہرگاہ کینٛہہ لوٗکھ رٕتؠ چیز کرنس متعلق صرف سونٛچن یا کرُن یژھان چھِ، تیٚلہِ چُھ سُہ پریتھ کانٛہہ چیز رُت آسان یُس تِم کران چھِ۔ پوٚز ہرگاہ لوٗکھ چھِ بدبخت تہٕ یسوع مسیحسؔ پیٚٹھ چھُکھ نہٕ بھروسہٕ، تُہنٛد پریتھ کانٛہہ چیز چُھ خراب آسان یُس تِم کران چھِ۔ تِتھیٚن لوٗکن ہندِ سونٛچنُک انداز چُھ برباد آمُت کرنہٕ۔ ییٚلہِ تِم بُرٕ کٲم چھِ کران تیلہِ تہِ چھِنہٕ تِم غلطی محسوس کران۔16ہرگاہ تِم خدا زاننُک دعوا تہِ چھِ کران، تِہُنٛد کرُن کراوُن چُھ ہاوان زِ تِم چھِنہٕ تمس زانان۔ تِم چھِ نفرت انگیز۔ تِم چھِ خدایس نافرمٲنی کران تہٕ تمؠ سنٛدِ خٲطرٕ ہیٚکن نہٕ کینٛہہ تہِ رُت کرِتھ۔
Bridge Connectivity Solutions Pvt. Ltd.