2 تیمُتھیس3
1وۅنؠ گوو توٚہہِ چھےٚ یہِ ویٚتراونچ ضرورت زِ یسوع سنٛدِ یِنہٕ برونٛٹھ آسہ ٲخرے دور ایمان والیٚن پٮ۪ٹھ سؠٹھاہ خطرناک۔2تکیازِ لوٗکھ آسن اکھ أکؠ سٕنٛدِ کھۅتہٕ زیادٕ پٲنؠ پانس لول بران۔ تِم کرن دیارن محبت۔ تِم روزن پانس متعلق اپزُے تھیٚکان۔ یِمن آسہ گمنڈ۔ تِم کرن باقین بے عزت۔ پننِس مٲلِس ماجہِ ہنٛز فرمانبردٲری تہِ کرن نہٕ۔ تِم کرن نہٕ کانٛسہِ ہُنٛد شُکریا تہِ۔ تِم کرن نہٕ خدایہِ سُنٛد کانٛہہ احترام۔3تِم برن نہٕ لول تہِ کٲنٛسہِ۔ تِم تھاون نہٕ کٲنٛسہِ سٟتؠ صلح تہِ۔ تِم لاگن باقین تُہمت۔ یِمن آسہ نہٕ پانس پٮ۪ٹھ کانٛہہ ضبط۔ باقین پٮ۪ٹھ روزن ژٔپِس تیار۔ پرٮ۪تھ رٕتہِ چیزٕچ آسیٚکھ دےٕ۔4تِم دِین تِمن لوکن دغاہ یہنز تِمن رٲچھ پزِ کرِنؠ۔ تِم کرن کُنہِ سونٛچہ سمجھٕ ورٲے انتہٲیی خطرناک کار۔ یِم آسن تھیٚکؠ نیٚل۔ خدایس لول برنہٕ بدلہٕ روزن پنٕنؠ مزٕ ژھاران۔5ظٲہری طور روزن تِم دیندٲری ہنٛدؠ جامہٕ ؤلِتھ۔ مگر ژکہِ دِن نہٕ خدایس پانس انٛدرؠ پننہِ قوت واجنہِ کامہِ کرنہٕ۔ یِتھیٚن لوٗکن نِشہ روزیٚو دوٗر۔6یِتھؠ کینٛہہ لوٗکھ چھِ تارن گری کٔرِتھ لوٗکن ہنٛدٮ۪ن گرن منٛز اژنُک اجازت لبان تہٕ اتہِ احمق زنانن ہنٛدٮ۪ن سونٛچن قبضس تل انان۔ یِم گییہِ تِم زنانہٕ یِم لٔگؠ تھےٕ گناہ کران روزان چھِ تہٕ یِمہٕ تی کران چھِ یہِ تِم کرُن یژھن۔7یوٚدوے زن یِژھٕ زنانہٕ ہر وِزِ نٔوؠ نٔوؠ چیز ہیٚچھِنؠ یژھان چھےٚ، یِم چُھنہٕ ہرگِز تمیز ہیٚکان کٔرِتھ زِ پوٚز کیا چُھ۔8یتھٕ پٲٹھؠ ینیسؔ تہٕ یمبریسؔ نٲوؠ فرعون سنٛدیو بٲزؠ گرو فرعون پتھ روٚٹ موسیٰؔ سنٛز کتھ بوزنہٕ نِش تِتھے پٲٹھؠ چھِ یِم لوٗکھ تہٕ لوٗکن یسوعس متعلق پٔز شیٚچھ بوزنہٕ نِشہ پتھ رٹان۔ یِتھؠ لوٗکھ چھِ پننہِ دماغہٕ سوٚسریمٕتؠ۔ یِم چھِنہٕ وۅستاد بننس لایق تکیازِ یِم چھِ یسوعس پٮ۪ٹھ ایمان تھاونُک چھرا بہانہٕ کران۔9اوے تہِ یوٚدوے زن یِم رژھا کامیاب سپٕدؠ پنٕنؠ اپٕز تعلیم دِنس منٛز کینٛژن لوٗکن۔ یِم روزن نہٕ ہمیشہٕ یہِ کامیٲبی پراوان۔ بلکہِ اکثر لوٗکھ پرزٕناون ؤلؠ زِ یِم لوٗکھ چھِنہٕ ژکہِ کہین زانان۔ یہِ سپدِ یِتھٮ۪ن لوٗکن سٟتؠ تِتھے پٲٹھؠ یہِ ینیسؔ تہٕ یمبریسؔ ہِوٮ۪ن لوٗکن سٟتؠ سپُد ییٚلہِ لوٗکو زون زِ یِم دۅشوے چھِ ژکہِ احمق۔10وۅنؠ گوکھ ژٕ، ژٕ چھُکھ وارٕ پٲٹھؠ زانان میٲنؠ تعلیم تہٕ یہِ ژٕ برونٛہہ کُن ہٮ۪چھناوان چھُکھ۔ ژٕ چھُکھ زانان زِ میٲنؠ سےٕ طور طریقس پتہٕ پتہٕ روزن تہٕ بہٕ کِتھہٕ پٲٹھؠ چُھس خدایہِ سنٛز خدمت کرنہٕ باپتھ پرٮ۪تھ کینٛہہ چیز کران۔ ژےٚ تہِ اوٚنُتھ خدایس پٮ۪ٹھ میٲنؠ پٲٹھؠ ایمان۔ ژےٚ وچُھتھ پانہٕ زِ بہٕ کِتھہٕ پٲٹھؠ چُھس دوٚکھس منٛز روزِتھ تہِ سکوٗنہٕ سان۔ ژےٚ وچُھتھ زِ بہٕ چُھس خدایس تہٕ باقےٕ ایمان والیٚن لول بران روزان۔ ژےٚ وچُھتھ زِ بہٕ کِتھہٕ چُھس لٔگؠ تھےٕ خدایہِ سنٛز عبادت کران روزان ییٚلہِ زن یہ بعضے میانہِ باپتھ سٮؠٹھاہ کڈُر چُھ آسان۔11ژےٚ وچُھتھ زِ لوٗکھ چھِ مےٚ ستاوان۔ ژےٚ وچُھتھ مےٚ کُس تکلیف تُل ییٚلہِ بہٕ انطاکیہؔ تہٕ اِکُنیُمؔ تہٕ لُسترؔہ نٲوؠ شہرن منٛز اوسُس۔ ژےٚ وچُھتھ مےٚ کِتھہٕ پٲٹھؠ ژول تہِ سورےٕ یہِ مےٚ یِمن شہرن منٛز لوٗکو مےٚ سٟتؠ کوٚر۔ مگر خداوندن بخُش مےٚ نجات یِمن سارنےٕ حالاتن منٛز۔ 12یہِ چُھ پوٚز زِ لوٗکھ دِن سارنےٕ ایمان والیٚن دھوکھ یِم تتھٕ پٲٹھؠ روزُن یژھان چھِ یہِ زن خدایہِ سُنٛد احترام رچھِ یسوع مسیحؔ ہس سٟتؠ تہنٛدِ رِشتہٕ کِنؠ۔13بدکار لوٗکھ یِم ایمان وٲلؠ آسنُک سانٛگ لاگان چھِ، روزن دوٚہہ پتہٕ دوٚہہ زیادٕ بد بنان۔ یِم انن لوٗکن آٹہِ واٹہِ تہٕ ماننس پٮ۪ٹھ یِنہٕ پوٚز آسہ، یتھٕ پٲٹھؠ زن تِم پانہٕ تہِ زیادٕ کھۅتہٕ زیادٕ تتھ پٮ۪ٹھ پژھ کران چھِ یہِ اپُز چُھ۔14مگر ژےٚ پزی اتھ برعکس ایمان تھاون تتھ پٮ۪ٹھ یہِ ژےٚ ہیٚچُھتھ تہٕ یتھ پٮ۪ٹھ ژٕ ہیٚککھ ژٕ ہیٚککھ بھروسہٕ تھٲوِتھ زِ یِمہٕ کتھہٕ چھےٚ پزٕ تکیازِ ژٕ چھُکھ زانان زِ یِمو لوٗکو ژےٚ یِم چیز ہٮ۪چھنووُکھ تِم چھِ بھروسہٕ وٲلؠ۔15ژٕ چھُکھ یِتہِ زانان زِ یِم چیز چھِ پٔزؠ تکیازِ ژےٚ زونُتھ پننہِ شُرؠ لٲزؠ پیٚٹھےٕ زِ مقدس کتابن منٛز کیا چُھ خدا ونان۔ مقدس کتابہٕ چھے ژےٚ یہِ زاننس لایق بناوان زِ خدا کِتھہٕ پٲٹھؠ چُھ اسہِ نجات بخشان ییٚلہِ أسؠ یسوع مسیحؔ ہس پٮ۪ٹھ ایمان تھاوو۔16سٲری صحیفہٕ چھِ خدایہِ سٕنٛدِ روح پٮ۪ٹھٕ یوان۔ یِم چھِ لوٗکن خدایس متعلق پزر باونہٕ باپتھ مددگار۔ یِم چھِ لوٗکن یِتہِ ہاوان زِ تِم کر چھِ غلط۔ تہٕ مدد کران صحیح سمجھنس منٛز۔ یِم چھِ مددگار لوٗکن صحیح وتہِ ہنٛز تربیت کرنہٕ باپتھ تہِ۔17یِموےٕ طریقو، چھِ یِم صحیفہٕ ایمان والیٚن تیار کران یِم خدایہِ سنٛز عبادت چھِ کران، تِم چھِ مکمل پٲٹھؠ تیار روزان تہٕ ہر قسمچ نیک عمل کرنہٕ خاطرٕ پرٮ۪تھ کانٛہہ چیزٕ حأصل کرنس قٲبل بناوان۔
Bridge Connectivity Solutions Pvt. Ltd.