2 تیمُتھیس2
1یوٚت تام چون سوال چُھ، تموتھی، یِمہِ آیہِ یسوع مسیحؔ ژےٚ پٮ۪ٹھ مہربان چُھ سُہ دِینے ژےٚ مظبوطی۔ ژٕ چھُکھ مےٚ أکس نیٚچوؠ سنٛدؠ پٲ ٹھؠ۔2ژےٚ بوزٕتھ میٲنؠ تعلیم پانہٕ واریہن لوٗکن تھی۔ یِم اتھ تصدیق کرنے۔ وۅنؠ پزی ژےٚ یِمن چیزن ہنٛز تعلیم باقین تہِ دِنؠ۔ یِم گژھن بھروسہٕ منٛد آسٕنؠ۔ یِم پانہٕ یہِ تعلیم دِنس قٲبل بنن۔3یسوع مسیحؔ ہس سنٛز فرمانبردٲری کرنس منٛز گژھِ میانٮ۪ن دۅکھن منٛز شریک یتھٕ پٲٹھؠ زن اکھ رُت سِپاہ پننِس سالار سُنٛد حکم ماننس منٛز دۅکھ تُلان چُھ۔4ژےٚ چھے پتاہ یِم لوٗکھ سِپاہ بنان چھِ تِم چھِنہٕ پننِس سالارس خوش کرنہٕ باپتھ شہری مصروفیاتن منٛز ملوس سپدان۔5یِتھۓ پٲٹھؠ چھِنہٕ تِم کھِلٲڈؠ تہِ زینِتھ ہیٚکان یوٚتام نہٕ تِم امکیٚن قانونن ہنٛز پاسدٲری کرن۔ 6سخت محنت کرن وٲلِس کۅملِس گژھِ فصلُک حصہٕ گۅڈٕ واتُن۔7اتھ پٮ۪ٹھ سونچ یہِ مےٚ وُنؠ لیٚوکھُے، تکیازِ یوٚدوے ژٕ یہِ کرکھ، خداوند بنٲیی ژےٚ یہِ کتھ وارٕ سمجھنس لایق۔8ییٚلہِ زن ژٕ یہِ دۅکھ تُلان چھُکھ، یسوع مسیحؔ تھاوُن ژٮ۪تس، یُس خداین مۅردو منٛزٕ زنٛدٕ کوٚر۔ سُہ چُھ بادشاہ داوودُن زُر۔ یہِ چھےٚ رٕژ شیٚچھ یمچ بہٕ پارے دِوان چُھس۔9امہِ رٕژِ شیٚچھِ باپتھ تُلؠ مےٚ واریاہ دۅکھ۔ اتھ منٛز چُھ سِپہَو ذریعہ بہٕ مجرم زٲنِتھ قٲد کرُن تہِ شٲمل۔ وۅنؠ گوو خدایہِ سُنٛد پٲغام ہیٚکہِ نہٕ کانٛہہ تہِ قٲد کٔرِتھ۔10اوے تہِ چُھس بہٕ خدایہِ سٕنٛدؠ دٔسؠ ژارنہٕ آمتیٚن لوٗکن ہنٛدِ باپتھ یہِ سورےٕ دۅکھ پننہِ اِرادٕ ژالان۔ بہٕ چُھس یہِ کران تاکہِ یسوع مسیحؔ بخشہِ تِمن تہِ نجات تہٕ تِم تہِ روزن ہمیشہٕ ہمیشہٕ تس سنٛزِ جلال بٔرژِ حضوری منٛز۔11ژٕ ہیٚککھ اتھ شیٚچھِ پٮ۪ٹھ بھروسہٕ تھٲوِتھ یمِچ أسؠ تعلیم دِوان چھِ:"ییٚلہِ یسوع سانہِ باپتھ مود، یہِ اوس زنتہٕ سون پرُون، گناہ گار شخص یہِ أسؠ ٲسؠ یِم تمسےٕ سٟتؠ مودؠ۔ یوٚدوے اسہِ یہِ کوٚرمُت چُھ، تیٚلہِ روزو أسؠ تہِ تٔسؠ سٟتؠ پوشہٕ وٕنؠ زندگی گُزاران۔12یوٚدوے أسؠ پانس پٮ۪ٹھ منظور تھاوو سُہ دۅکھ یُس یسوعس سنٛزِ فرمانبردٲری کرنس منٛز یتھ زندگی منٛز اسہِ تلُن پیٚو، تیٚلہِ کرو أسؠ تہِ تمسے سٟتؠ دویمہِ زندگی منٛز سارنےٕ چیزن پٮ۪ٹھ راج۔وۅنؠ گوو یوٚدوے أسؠ ونو، أسؠ زانہون نہٕ سُہ، تیٚلہِ ونہِ سُتہ زِ سُہ زاننہِ نہٕ اسہِ۔13یوٚدوے أسؠ یسوعس بے وفا چھِ، سُہ روزِ ہمیشہٕ اسہِ سٟتؠ وفادار،تکیازِ سُہ ہیٚکہِ نہٕ پٲنؠ پانس دوکھہٕ دِتھ۔" 14ایمان والیٚن روز یِمہٕ کتھہٕ ژٮ۪تس پاوان۔ یِمہٕ مےٚ ژےٚ باویے۔ تِم کرُکھ خبردار زِ خدا چُھو بوزوُن۔ تِمن پزِ نہٕ ۂر تُلٕنؠ زِ کُس لفظ چُھ خدایہِ سٕنٛدِ پٲغامکہِ اظہار باپتھ صحیح۔ یُتھ واد واد چُھنہٕ کُنہِ کامہِ ہُنٛد، اکھتُے کرِ یہِ بوزن والیٚن یسوعس نِش دوٗر تہِ۔15خدایہِ سُنٛد منظور بننہٕ باپتھ کٔرِو پوٗرٕ کوٗشش۔ أکِس مُزورٕ سٕنٛدؠ پٲٹھؠ بٔنِو یس خبر چھےٚ زِ سُہ چُھ سۅ رٕژ کٲم کران، یمِچ تعلیم توٚہہِ تس صحیح پٲٹھؠ دِژٕو۔16تِمو فضول کتھو نِشہ روزِ لوٚب یِم خدایس غٲلؠ کھاتس تراویٚن تکیازِ یِژھ کتھ باتھ چھےٚ لوٗکن منٛز خدایہِ سُنٛد احترام زیادٕ کھوٚتہٕ زیادٕ گٹھاوان۔17یتھٕ پٲٹھؠ کتھ کرٕنؠ چھےٚ لاگدار بٮ۪مارِ ہنٛدؠ پٲٹھؠ پھہلان۔ ہمنیسؔ تہٕ فِلیتُس چھےٚ تِمن نفرن ہنٛزٕ زٕ مثالہٕ یِم یِژھٕ کتھہٕ کران چھِ۔18یِتھؠ انسان چھِ تِمن چیزن پٮ۪ٹھ یقین کران تہٕ ہٮ۪چھناوان یِمنہٕ پٔزؠ چھِ۔ یِم چھِ اپزُے ونان زِ خداین چھِ برونٛٹھےٕ پنٕنؠ لوٗکھ مۅردو منٛزٕ زنٛدٕ تُلمٕتؠ تہٕ سُہ کرِنہٕ دُبارٕ یہِ۔ یتھٕ پٲٹھؠ چھِ یِم أکِس بیٚیِس ایمان وٲلِس مسیحؔ ہس پٮ۪ٹھ پننہِ ایمان نِش دوٗر کڈان۔19وۅنؠ گوو خدایس متعلق چُھ پزر قٲیِم۔ یہِ چھےٚ زنتہٕ کُنہِ عمارژ ہنٛز دٔر بُنیاد یتھ پٮ۪ٹھ کٔمؠ تام یِم لفظ لیٚکھمٕتؠ چھِ: "خداوند چُھ تمن زانان یِم تسٕنٛدؠ چھِ" تہٕ "تِمن سارنےٕ پزن کۅکار تراوٕنؠ یِم پانس خداوند سٕنٛدؠ گنٛزران چھِ۔" 20أکِس ڈیٚگجل گرس منٛز چھِنہٕ صرف سۅنہٕ سٕنٛدؠ، رۅپہٕ سنٛدے یٲتؠ بانہٕ آسان بلکہِ ہچو تہٕ میٚژِ ہنٛدؠ تہِ۔ یہُنٛد مٲلک چُھ سۅنہٕ تہٕ رۅپہٕ سٕنٛدؠ بانہٕ بڈٮ۪ن دوٚہُن تہٕ موقعن پٮ۪ٹھ ورتاوان تہٕ ہچو تہٕ میٚژِ ہنٛدؠ بانہٕ لۅکہ چن تہٕ معمولہ کامٮ۪ن ہنٛدِ باپتھ۔21اوے تہِ یمؠ کٲنٛسہِ تہِ پننہِ زندگی منٛز بدی نش نجات پُروو سُہ چُھ زٲنؠ تو اکھ سر بانہٕ یُس کٲنٛسہِ مٲنجِتھ پاک کوٚرمُت چُھ تاکہِ امیُک مٲلک ہیٚکہِ اتھ کُنہِ تہِ موقعہ باپتھ استعمال کرِتھ، خاص موقعن پٮ۪ٹھ تہِ۔ یِتھے پٲٹھؠ ییٚلہِ کانٛہہ شخص تمہِ نِشہ نجات لبہِ یہِ تس سنٛزِ زندگی منٛز بدی آسہ۔ خدا چُھ أمِس لایق زانان تہٕ ہیٚکہِ أمِس کُنہِ رٕژِ کامہِ باپتھ استعمال کٔرِتھ۔22اوے تہ ترٲیو کۅکار کرٕنؠ یہِ کرنچ زن جوان لوٗکھ خٲہِش تھاوان چھِ۔ بلکہِ کٔرِو کوشش تِمن لوٗکن سٟتؠ رٔلِتھ رٕتؠ کار کرنچ یِم خداوندس خلوصہٕ سان عبادت کران چھِ رٕتؠ کار کرنٕچ۔ خدایس پٮ۪ٹھ تھٲیو ایمان تہٕ أمِس تہٕ باقین بریو لول۔ تہٕ روزیٚو باقےٕ لوٗکن سٟتؠ امنہٕ سان۔23کٲنٛسہِ مہٕ دِیو پانس سٟتؠ واد واد تُلنہٕ تِمن چیزن پٮ۪ٹھ یِمن متعلق چھرا انپڑ تہٕ جٲہِل لوٗکھ کتھ کران چھِ۔ توٚہہِ چھےٚ خبر زِ ییٚلہِ لوٗکھ یِتھٮ۪ن چیزن پٮ۪ٹھ کتھ کران چھِ، تِم چھِ واتان ۂر پٮ۪ٹھ۔24وۅنؠ گوو سُہ اکھ یُس خداوندس عبادت چُھ کران، تمِس پزِ نہٕ ۂر تُلٕنؠ۔ بلکہِ پزِ تمِس سارنےٕ لوٗکن سٟتؠ مہربان روزُن۔ تمِس پزِ خدٲیی پزرٕچ تعلیم دِنس لایق بنُن۔ تمِس پزِ لوٗکن کُن صبرٕ سان روزُن۔25تمِس پزِ واد کرن والیٚن صبرٕ سان تعلیم دِنؠ۔ ممکن چُھ خدا ما پچھتا ناوِ تِمن پننٮ۪ن بدکٲری ین پٮ۪ٹھ تہٕ انِکھ پزرس کُن۔26یتھٕ پٲٹھؠ ما ہٮ۪ن تِم بیٚیہِ صحی پٲٹھؠ سونٛچُن۔ تِم ژٮ۪تراون زِ یہِ چُھ شیطان تِمن دھوکھہٕ دِوان رودمُت تہٕ پننِس قبضس تل رٔٹِتھ اوسمُت تاکہِ تِم کرن تی یہِ سُہ یژھان چُھ۔
Bridge Connectivity Solutions Pvt. Ltd.