2 تیمُتھیس1
1پولُسؔ سٕنٛدِ طرفہٕ، یُس یسوعؔ مسیحؔ سُنٛد نمایندٕ چُھ تکیازِ یی چُھ خدا مےٚ نِش یژھان تہِ بہٕ کرٕ یی۔ بہٕ چُھس باقین ونان زِ خداین چُھ اسہِ وعدٕ دِیتمُت زِ أسؠ روزو ہمیشہِ یسوعؔ مسیحؔ ہس سٟتؠ زنٛدٕ۔2تیمُتھیس کِژ لیکھنہٕ آمژٕ چٹھؠ۔ بہٕ چُھسے ژےٚ لول بران زنتہٕ ژٕ میٚونےٕ نیٚچو چھُکھ۔ سون بب خدا تہٕ سون خداوند یسوعؔ مسیحؔ روزِن ژےٚ پٮ۪ٹھ مہربان تہٕ رحیم، تہٕ تھٲوؠ نےَ امنس منٛز۔3بہٕ چُھس خدایہِ سنٛز عبادت کران یتھٕ پٲٹھؠ میانیٚو اجداد کٔر، تکیازِ بہٕ چُھس پزنہٕ پٲٹھؠ تی کرُن یژھان یہِ سُہ یژھان چُھ۔ بہٕ چُھس خدایس کُن شکُر کران ییٚلہِ بہٕ چانہِ باپتھ دعا منٛگان چُھس۔ بہٕ چُھس پرٮ۪تھ ساعتہٕ پننٮ۪ن دُعاہن منٛز چٲنؠ ذکِر کران روزان۔4مےٚ چُھ ونہِ تہِ أچھنےٕ تل ژےٚ نِش جُدا گژھنہٕ وِزِ چون اوٚش ہارُن، بہٕ چُھس پزی ژےٚ بیٚیہِ سمکھُن یژھان۔ ادے یِمہٕ بہٕ پوٗرٕ وۅلسنس۔5مےٚ چُھ یسوعسؔ پٮ۪ٹھ چون پوٚز ایمان تہِ ژٮ۪تسےٕ۔ گۅڈٕ اوٚن ایمان چانہِ نانہِ یسُنٛد ناو اوس لُویسؔ، تہٕ پتہٕ چانہِ ماجہِ یونیکےؔ تہِ۔ بہٕ چُھس زانان زِ ژےٚ چھی تہنٛدؠ پٲٹھؠ پوٚز ایمان۔6اوٕ کِنؠ زِ ژےٚ چھُے یسوعسؔ پٮ۪ٹھ دوٚر ایمان، بہٕ چُھسے ژےٚ ژینہٕ وٕنؠ دِوان سۅ روحٲنی نعمت بیٚیہِ ورتاونچ یۅسہ ژےٚ خداین عنایت کرے۔ ژےٚ رٔٹٕتھ یہِ نعمت یمؠ ژٕ سۅ کٲم کرنس قٲبل بنووُکھ یمہِ باپتھ ژٕ خداین ژورُکھ۔ ییٚلہِ مےٚ پنٕنؠ اتھہٕ ژےٚ پٮ۪ٹھ تھٲوؠ تہٕ کوٚرمے دعا۔ 7یہِ نعمت ورتاو اعتمادٕ سان، تکیازِ خداین کوٚر نہٕ اسہِ عنایت پنُن روح کُنہِ کھۅژنہٕ باپتھ۔ بلکہِ چُھ تسُنٛد روح اسہِ قوت بخشان ییٚلہِ زن أسؠ کٲم کران چھِ چھرا خدایہِ سٕنٛدِ باپتھ، تس تہٕ باقین لول برنہٕ باپتھ، تہٕ پانس پٮ۪ٹھ ضبط لبنہٕ باپتھ۔8اوے مہٕ مندچھ لوٗکن پننِس خداوندس متعلق وننس۔ اوے مہٕ مندچھ مےٚ تہِ، یوٚدوے زن بہٕ قٟدؠ چُھس تکیازِ بہٕ چُھس تمس متعلق تبلیغ کران۔ بلکہِ روز تیار مےٚ سٟتؠ رٕژ شیٚچھ باونہٕ باپتھ دۅکھ تُلنہٕ خٲطرٕ۔ تکیازِ خدا دِیی ژےٚ یِم دۅکھ ویٚتراونٕچ قوت۔9سُہ کرِ یہِ تکیازِ تٔمؠ بخُش اسہِ نجات تہٕ گنٛزرنؠ أسؠ تِم لوٗکھ یِم تٔمؠ خداین الگ ژٲرؠ پننہِ باپتھ۔ خداین بچٲوؠ نہٕ أسؠ کُنہِ رٕژِ کامہِ کِنؠ، یوسہٕ اسہِ کٔر۔ اتھ بجایہ بخُش تٔمؠ اسہِ نجات تکیازِ اسہِ پٮ۪ٹھ رحیم روزُن اوس تسنٛد منصوبہ ہرگاہ نہٕ أسؠ امِکؠ مستحق تہِ ٲسؠ۔ سانہِ باپتھ بنوو تٔمؠ یہِ منصوبہ دنیا تخلیق کرنہٕ برونٛہہ تٔمہِ ذریعہ یہِ یسوع مسیحؔ سانہِ باپتھ کرن وول اوس۔10وۅنؠ چُھ اسہِ نجات دِنہٕ وول یسوع مسیحؔ آمُت۔ اوٕ کِنؠ ہیٚکن سٲری زٲنِتھ سانہِ باپتھ خدایہِ سُنٛد شاندار منصوبہ۔ خاص پٲٹھؠ ییٚلہِ زن یسوعن یمہِ رٕژِ شیٚچھِ ہُنٛد اعلان کور زِ أسؠ روزو نہٕ مرنہٕ پتہٕ تہِ مودؠ مٕتؠ۔ بلکہِ روزو تِمن جسمن منٛز زنٛدٕ یِمنہٕ دۅدرن۔11خداین دِژ مےٚ یہِ کٲم زِ بہٕ گژھٕ تسُنٛد نمایندٕ بٔنِتھ لوٗکن منٛز امہِ رٕژِ شیٚچھِ ہنٛد تبلیغ کرنہٕ تہٕ تعلیم دِنہٕ باپتھ۔12اوے کِنؠ چُھس بہٕ ییٚتہِ قٲد خانس منٛز دۅکھ تُلان، وۅنؠ گوو بہٕ چُھس نہٕ یتہِ روزنہٕ باپتھ شرمنٛدٕ تکیازِ بہٕ چُھسن یسوع مسیحؔ زانان تہٕ تس پٮ۪ٹھ چھم پوٗرٕ پژھ۔ بہٕ چُھ یقین زِ سُہ ہیٚکہِ مےٚ تتھ دوٚہس تام پنُن وفادار تھٲوِتھ ییٚلہِ سُہ دُبارٕ یور ییہِ۔13یقین تھٲوزِ ژٕ وننکھ بیین یہےَ واضیح پٲغام یُس ژےٚ مےٚ نش ہیٚچُھتھ۔ اتھ وننس دوران روز مسیحؔ ہس پٮ۪ٹھ بھروسہٕ تھٲوِتھ تہٕ باقین لول بران، یہِ کرنس لایق ژٕ یسوع مسیحؔ ہن بنووُکھ۔14اتھ رٕژِ شیٚچھِ کر پوٗرٕ حفاظت یۅسہ خداین ژےٚ لوٗکن ہنٛدِ باپتھ امانت زٲنِتھ دژےٕ۔ اسہِ منٛز موجود پاک روح کٔری ژےٚ یہ کرنہٕ باپتھ مدد۔15ژٕ چھُکھ زانان زِ آسیہؔ صغیرٕکؠ الہٕ پلہٕ سٲری لوٗکھ چھِ مےٚ ترٲویتھ ژلمٕتؠ، یِمن منٛز فوگلُس تہٕ ہرمگنیُسؔ تہِ چھِ۔16وۅنؠ گوو بہٕ چُھس دعا کران زِ خداوند روزِن مہربان اُنیسِفرُؔس تہٕ تسنٛدِس گرس پٮ۪ٹھ تکیازِ تٔمؠ کوٚر وِزِ وِزِ مےٚ مدد تہٕ یتھ کتھہِ مندُچھ نہٕ زِ بہٕ چُھس قٲدخانس منز۔17بلکہِ ییٚلہِ سُہ یور رومؔ شہرس منز آو، سُہ رود مےٚ ژھاران یوٚت تام بہٕ لوٚبنس۔18ژٕ تہِ چھُے جان پٲٹھؠ یاد زِ ییٚلہِ بہٕ افسس شہرس منٛز اوسُس، تٔمؠ کوتاہ مدد کوٚر مےٚ۔ اوے چُھس بہٕ دعا کران زِ خداوند روزِن مہربان اُنیسِفرُؔس تمہِ ٲخر دوٚہہ ییٚلہِ خداوند سارنےٕ عدالت لاگہِ۔
Bridge Connectivity Solutions Pvt. Ltd.