1 تیمُتھیس6
1سارنےٕ ایمان تھاون والیٚن غلامن پزِ پننؠن مٲلکن پرٮ۪تھ رنگہٕ احترام کرُن۔ پتہٕ ییہِ نہٕ لوٗکن خدایس متعلق یا تِمن کتھن متعلق یِمہٕ أسؠ ہیٚچھِ ناوان چھِ بُرٕ کتھ وننُک کانٛہہ تہِ وار۔2بیٚیہِ، یِمن غلامن ہنٛدین مٲلکن مسیحؔ ہس پٮ۪ٹھ ایمان چُھ تِمن پزِ نہٕ تِمن مٲلکن بے عزتی کرٕنؠ تکیازِ تِم چھِ تِمن ہنٛدؠ ایمان رنگؠ بٲے۔ تمہِ بدلہٕ پزِ تِمن پننؠن مٲلکن ہناہ زیادے پہن خدمت کرٕنؠ تکیازِ تِم چھِ پننہِ کامہِ سٟتؠ مسیحیؔ باین فٲیدٕ واتناوان تہٕ خدا چُھ تِمن لول بران۔ سانؠن لوٗکن دِیو یِمن کتھن ہنٛز تعلیم تہٕ یِمن پٮ۪ٹھ عمل کرنچؠ کٔرِو تِمن گُزارش۔3کینٛہہ لوٗکھ چھِ اپزِ کتھٕ ہیٚچھناون۔ تِم چھِنہٕ سٲنس خداوند یسوع مسیحؔ ہس متعلق قٲبلِ بھروسہٕ پٲغام مانان۔ تِم چھِنہٕ سۅ زندگی بسر کرنٕچؠ تعلیم مانان یمہِ سٟتؠ خدا خوش سپدان چُھ۔4یِمن لوٗکن چُھ گُمنڈ، مگر تِمن چھنہٕ کانٛہہ کتھ فِکرے تران۔ تمہ بجایہ چھِ تِم پھٲترن ہنٛدؠ پٲٹھؠ غٲر ضروٗری معاملن تہٕ کینٛژن لفظن متعلق بحث کران۔ تِہنٛد برتاو چُھ تِمن باقے لوٗکن حسدی بناون۔ تِم چھِ لوٗکن سٟتؠ جھگڑٕ کران، تِم چھِ لوٗکن متعلق بُرٕ کتھٕ ونان، تِمن چھےٚ بد گمٲنی گژھان۔5تِم چھِ لگاتار باقے لوٗکن سٟتؠ ۂر کران۔ تِہنٛدِ سونٛچنہ کیٚو ساروےٕ طریقو چھِ تِم پورٕ پٲٹھؠ غلط بنیمٕت۔ تِمو چھِ اصلی تعلیم پتھ کُن ترٲومٕژ۔ تمیُک نتیجہِ چُھ یہِ زِ تِم چھِ سمجھان زِ خدا پرستی گییہِ دولت جمع کرٕنؠ۔6مگر اسہِ چُھ بوٚڈ فٲیدٕ حٲصل سپدان ییٚلہِ أسؠ خدایہِ سنٛدٮ۪ن طریقن پٮ۪ٹھ پننٕؠ زندگی گزارو تہٕ ییٚلہِ أسؠ تتھ پٮ۪ٹھ چھِ مطمئن یہِ اسہِ نِشہ چُھ۔7یہِ چُھ پوٚز تکیازِ اسہِ اوٚن نہٕ پانس سٟتؠ یتھ دنیاہس منٛز کانٛہہ چیز ییٚلہِ أسؠ پٲدٕ گَے تہٕ أسؠ نِمو نہٕ کانٛہہ چیز امہِ منٛزٕ ییٚلہِ أسؠ دنیا منٛزٕ نیرو۔ 8لہٰذا اگر اسہِ غذا تہٕ پلو آسن، اسہِ پزِ یِمو چیزو سٟتؠ مطمئن روزُن۔9مگر کینژن لوٗکن چُھ امیٖر بننُک زبردس تمناہ آسان۔ توے چھِ تِم دولت حٲصل کرنہٕ بٲپتھ غلط کامہِ کران۔ پتہٕ چھِ تِمن خراب واقہٕ پیش یوان یِمن منٛز تِم پٔھسِتھ روزان چھِ۔ تِم چھِ نادٲنی سٟتؠ واریہن چیزن ہُنٛد تمناہ کران یِمو سٟتؠ دوکھہٕ لگان چُھ، تہٕ ٲخرس پٮ۪ٹھ، چھِ یمَے چیز تِمن برباد کران۔ 10ژٕ چُھکھ وُچھان، لوٗکھ چھِ تمام قسمٕچہ بُرٲییہِ کران ییٚلہِ تِمن پونٛسہٕ حٲصل کرنُک زبردس تمناہ آسان چُھ۔ کینٛژو لوٗکو کوٚر دولت حٲصل کرنُک آرِزو شروع تہٕ یسوعس پتہٕ پتہٕ پکُن ترووُکھ۔ یہِ کرنہٕ سٟتؠ کوٚر تِمو پنُن پان واریہو اندو پریشان۔11مگر، ژےٚ أکس خدایہِ سنٛز خدمت کرن وٲلِس ہوِس نفرس پزِ یِمو بُرٕ کامیٚو نشہٕ لوٚب روزُن۔ بلکہِ پانہٕ فٲصلہٕ کرُن زِ کۅس جان کٲم ییہِ کرنہٕ تہٕ ژٕ کرکھ پنٕنؠ زندگی خدایس خوش کرنہٕ باپتھ بسر۔ خدایس پٮ۪ٹھ کر بھروسہٕ تہٕ باقین بر لول۔ یِم تکلیف ژےٚ واتان چھی تِمن پٮ۪ٹھ کر صبر۔ لوٗکن سٟتؠ یہِ شرافتہٕ سان پیش۔12یتھ پٮ۪ٹھ ژےٚ ایمان چھُے تٔمی مطٲبق کر پنٕنؠ زندگی سنٛجیدگی سان بسر، یہِ زٲنتھ زِ یہِ کٲم چھےٚ کرنہٕ باپتھ رٕژ۔ بھروسہٕ دِ زِ ژےٚ چُھو ابدی زندگی ہُنٛد انعام، خداین ژورُکھ ژٕ اوے امہِ خٲطرٕ ییٚلہِ ژٕ واریہن گواہ ہن برونٛہہ کنہِ کھُلہٕ پٲٹھؠ دعوا کرکھ زِ ژےٚ چھی مسیحؔ ہس پٮ۪ٹھ ایمان۔13أسؠ چھِ خدایہِ سنٛزن نظرن تل یُس سارنےٕ چیزن زندگی بخشن وول چُھ۔ أسؠ چھِ یسوع مسیحؔ سنٛزن نظرن تل یمؠ پنطیس، پیلاطسؔ برونٛہہ کنہِ عدالتس منٛز دلیری سان اعلان کوٚر یہِ پزر اوس۔ تہنٛزِ موجودگی منٛز چُھسے بہٕ ژےٚ یہِ حکم دِوان:14تِمن حکمن ہنٛز کر فرمانبردٲری یِم مسیحؔ ہن اسہِ دِتمٕتؠ چھِ۔ کانٛہہ غلط کٲم مہٕ کر۔ امہِ سٟتؠ روزِ نہٕ ژےٚ تنقید کرنُک کٲنسہِ أکس تہِ طاقت۔ توٚت تام کٔرِو فرمانبردٲری یوٚت تام خداوند یسوع مسیحؔ سُنٛد ظہور دُبارٕ سپدِ۔15خدا انہِ یسوعس منٲسب وقتس پٮ۪ٹھ واپس۔ أسؠ چھِ خدایہِ سٕنٛدؠ تعریف کران یُس کُنے حکمران چُھ! سُہ چُھ سارنےٕ بادشاہن ہُنٛد بادشاہ تہٕ سارنےٕ خداوندن ہُنٛد خداوند!16خدا چُھ کُنے یُس نہٕ زانٛہہ مَرِ۔ سُہ چُھ آسمانس منٛز گاشش منٛز روزان زِ تیوٚت چمکہٕ ووٚن زِ تس تام واتہِ نہٕ کانٛہہ اکھ تہِ! سُہ چُھ سُہ ذاتھ یِس نہٕ زانہہ کٲلؠ کٲنسہِ وُچھمُت چُھ یمِس نہٕ کانٛہہ وچھتھ ہیٚکہِ! میٲنؠ خٲہِش چھےٚ زِ سٲری لوٗکھ کرن تس احترام تہٕ تمؠ سنٛز بادشٲہی روزِن تا ابد قٲیم! آمین! 17یمہِ دنیاہ کؠن أزؠ کیٚن ایمان والیٚن دولت مندن ؤنِو زِ تِمن پزِ نہٕ مغرور سپدُن۔ تِمن پزِ نہٕ پننِس دولتس پٮ۪ٹھ بھروسہٕ کرُن تکیازِ تِم ہیٚکن نہٕ یقین کٔرِتھ زِ یہِ کوٚت تام پوشہِ تِمن۔ تِمن ون تمہِ بدلہٕ کٔرِیو خدایس پٮ۪ٹھ بھروسہٕ۔ سُہ چُھ سُہ کُنےٕ یُس اسہِ بےحساب پرٮ۪تھ کانٛہہ چیز دِوان چُھ تہٕ سُہ چُھ یژھان اسہِ امیُک لُطف تلُن۔ 18یِمن ایمان والیٚن دولت مندن ؤنِو رٕژٕ کامہِ کٔرِو۔ واریاہ دولت جمع کرنہٕ بدلہٕ پزن تِمن واریاہ رٕژٕ کامہِ کرنہِ۔ تِم گژھن فراغ دل آسٕنؠ تہٕ سخاوت کرنہٕ باپتھ گژھن رٲزی آسن۔19تِم ہرگاہ تہِ کرن، یہِ آسہ زنتہِ آسمانس پٮ۪ٹھ پننہِ یِنہٕ واجنہِ زندگی خٲطرٕ واریاہ رٕتؠ چیز ذخیرٕ کرن۔ یِمہٕ سارے رٕژٕ کامہِ کرنہٕ پتہٕ سپدن تِم تٔمہِ زندگی ہنٛدِ خٲطرٕ تیار یۅسہ خدا اسہِ یژھان چُھ گزارٕنؠ یۅسہ اصلی زندگی چھےٚ20تیمُتھیس، خداین یُس پوٚز پٲغام ژےٚ عطا کوٚرمُت چھُے تتھ کر حفاطت۔ تِمو لوٗکو نشہٕ روز لوٚب یِم ژےٚ سٟتؠ تِمہٕ کتھہٕ کرنہِ یژھان چھِ یِمہٕ خدایس نِشہ غٲر ضروری چھےٚ۔ بیٚیہِ روز اپٕزؠ یارٮ۪ن نِشہ دوٗر یِم پوٚز علم تھاونُک دعوا کران چھِ مگر تِم چھِ تِمہٕ کتھہٕ کران یِمہٕ سانہِ پزِ تعلیمہ خلاف چھےٚ۔21یِمن کتھن پٮ۪ٹھ کوٚر کینٛژو لوٗکو یقین تہٕ خدایس متلق پزرس پٮ۪ٹھ ایمان تھاونس منٛز ڈٔلؠ۔ خدا روزِن توٚہہِ سارنےٕ مہربان۔
Bridge Connectivity Solutions Pvt. Ltd.