2 تھِس2
1ووٚنؠ چُھس بہٕ توٚہہِ تتھ وقتس متعلق یژھن لیکھن ییٚلہِ سون خداوند یسوع مسیحؔ دنیاہس پیٚٹھ واپس واتہِ تہِ سمکھنہٕ باپتھ کرِ اسہِ جمع۔ میانیو ایماندار سٲتھیو، بہٕ چُھس توٚہہِ عرض کرن2زِ توٚہؠ سونچِو کٲنسہِ ہنٛدِس کلامس متعلق خاموشی سان، یوس توٚہہِ نِشہٕ ووتمُت آسہِ زِ خداوند یسوع چُھ برونٛٹھے دنیاہس پیٚٹھ واپس آمُت۔ أمہِ کلام سٟتؠ لگہِ نہٕ پریشان سپدن۔ یہِ چُھنہٕ کانٛہہ مسلہٕ ہرگاہ سُہ کلام واتہِ توٚہہِ نِشہٕ أکس روح سٕنٛدِ دسؠ یا أکس شخصہٕ سٕنٛدِ دسؠ یا چِٹھِ سٟتؠ یودوے سانہِ طرفہٕ چھِ۔3کٲنسہِ ہنٛدِس کُنہِ تہِ فریبس منٛز مَہ یِیو۔ یہِ چُھنہٕ پوٚز، لٲزم چُھ زِ گوٚڈٕ سپدن واریاہ لوٗکھ خدایس خلاف، تمؠ سنٛدین حکمن کرِن انکار تمہِ پتہٕ کمےٕ کٲلؠ کرِ خدا تِمن برباد ادٕ سپدِ خداوند ظٲہر۔ 4یُس مُخالفت کرِ تہٕ پانس پرٛتھ تس ہیٚور مانہِ یس خدا یا معبود وننہٕ یوان چُھ یا یمسٕنٛز عبادت کرنہٕ یوان چھےٚ یوٚت تام سُہ خدایہِ سنٛزِ ہیکلہٕ منٛز بہتھ پنہٕ نس پانس بطورِ خدا ظٲہر کرِ۔ 5مےٚ چُھ یقین زِ توٚہہِ آسہِ یاد زِ یمہٕ سارے کتھٕ ونہِ مےٚ توٚہہِ ییٚلہِ بہٕ تھسلونی منٛز توٚہہِ سٟتؠ اوسس۔6تہٕ توٚہؠ چھُو زانان زِ مقرر وقتہٕ برونٛٹھ ظٲہر سپدن کُس چیز چُھ تمس رُکاون۔7بے دینی ہُنٛد طاقت چُھ پوشیدٕ پٲٹھؠ پنُن اثر تراوان ییٚلہِ زن اکھ رُکاون وول چُھ ونہِ تہٕ موجود تہٕ یوٚت تام سُہ وتہِ پیٚٹھ ہٹاونہٕ ییہِ سُہ روزِ تس رُکاوان۔8پتہٕ تراوِ خدا تمس انسانس ہر کٲنسہِ پنُن پان ہاونہٕ خٲطرٕ ییٚلہِ یُس مکمل پٲٹھؠ خدایہِ سنٛدین حکمن انکار ووٚل چُھ۔ ٲخرس پیٚٹھ سپدِ خداوند یسوع ظٲہر۔ تمس انسانس سپدِ سُہ وُچھِتھ مکمل پٲٹھؠ طاقت ختم۔ پتہٕ سپدِ سُہ انسان خداوند یسوع سنٛدِ اکہِ پھۅکہٕ سٟتؠ ہلاک۔ 9أمہِ برونٛہہ کرِ شیطان أمِس انسان سٕنٛدؠ دسؠ سؠٹھاہ طاقتہٕ سان کٲم۔ شیطان بخشہِ تس خدایہِ سٕنٛدؠ پٲٹھؠ معجزٕ ہاونٕکؠ ہربہٕ۔10یہِ انسان آسہِ بوٚڈ بدبخت تہٕ دِیہِ واریاہن لوٗکن دوٚکھٕ۔ یِم لوٗکھ سپدن ہلاک تکیازِ تِمو کٔر نہٕ یسوعسؔ متعلق پزِ شیٚچھِ ہنٛز قدر اوے بچاونہٕ تِمن خداۓ۔11یِمن لوٗکن تراوِ خدا گمرٲہی ہُنٛد اثر اوے کرن تِم پزرٕ بدلہٕ اپزس پیٚٹھ یقین۔12خداۓ دِیہِ تِمن لوٗکن سزا یِم یسوع سنٛزِ پزِ شیٚچھِ انکار کرِتھ بدکٲری کرن۔13سانیو بایو تہٕ بینیو، اسہِ پزِ تُہنٛدِ باپتھ خدایہِ سنٛز شکُر گُذٲری کرنؠ زِ توٚہؠ چھُو سون خداوند یسوع لول بران بییٚہِ ژٲرؠ نو توٚہؠ خداین پننؠن لوٗکن منٛز یِمو گۅڈٕنیٚھ یسوعسؔ متعلق پزِ شیٚچھِ پیٚٹھ ایمان اوٚن۔ خداین ژٲرؠ نو توٚہؠ پننہِ پاک روح سٕنٛدِ دسؠ یِمن نجات میلہِ۔ 14خداین دِژوٕ توٚہہِ پانس کُن ینٕچ تتھ یسوع سنٛزِ رٕژِ شیٚچھِ پیٚٹھ دعوت یمیُک اعلان اسہِ توٚہہِ نِشہٕ کوٚر یتھ زن توٚہؠ خداوند یسوع مسیحؔ سُنٛد جلال حٲصٕل کرِو۔15لہٰذا سانیو بایو، مسیحؔ سنٛدِس ایمانس پیٚٹھ روزِو درِتھ۔ تتھ پزِ تعلیمہِ پیٚٹھ روزِو ایمان دررٲیِتھ یوٚسہٕ اسہِ زبٲنؠ تہٕ اکہِ چِٹھِ ہنٛدِ ذریعہٕ توٚہہِ دِژ۔16سون بب خداۓ چھُو توٚہہِ لول بران تکیازِ سُہ چُھ اسہِ پیٚٹھ سؠٹھاہ مہربان، سُہ روزِ اسہِ ہمت بخشان تہٕ أسؠ ہیکو امید تھٲوِتھ زِ اسہِ سپدِ رُتےٕ حٲصٕل۔ أسؠ چھِ دعا منٛگان زِ سُہ تہٕ سون خداوند مسیحؔ کرِن توٚہہِ رٕژٕ کامہِ کرنس منٛز ہمیشہِ توٚہہِ حوصلہٕ افزٲئی۔
Bridge Connectivity Solutions Pvt. Ltd.