2 پطرس1
1بہٕ، شمعون پطرس، چُھس یسوع مسیحؔ سنٛز خدمت کران، تہٕ تسُنٛد مقرر کرنہٕ آمُت رسول۔ بہٕ چُھس یہِ نامہٕ لیٚکھان توٚہہِ یِم خداین بنٲوؠ مسیحؔ ہس پٮ۪ٹھ ایمان تھاون وٲلؠ یتھٕ پٲٹھؠ تٔمؠ أسؠ رسول ایمان تھاون وٲلؠ بنٲوؠ مسیحؔ ہس پٮ۪ٹھ۔ یسوعنؔ بنوو یہِ ممکن پننہِ پزَ عملہِ کِنؠ۔ یسوع مسیحؔ چُھ سون خدا تہٕ سُے چُھ اسہِ نجات دِنہٕ وول۔2بہٕ چُھس خدایس دعا منٛگان زِ سُہ ہُررٲوِنؠ پنٕنؠ رحمتٕچ عمل توٚہہِ کُن تہٕ تھٲوِنو زیادٕ کھۅتہٕ زیادٕ امنہٕ سان اوٕ کِنؠ زِ توٚہؠ چُھو زانان خدایس تہٕ یسوعس یُس سون خداوند چُھ۔3خداین چُھ اسہِ بخُشمُت تہِ سورےٕ یہِ اسہِ تسنٛدِس عزتس لایق زندگی گزارنہٕ باپتھ ضروری چُھ۔ تٔمؠ کوٚر یہِ بحثیتہِ خدا پننہِ قدرتہٕ سٟتؠ۔ تٔمؠ کوٚر یہِ تمہِ سٟتؠ یہِ أسؠ تمِس متعلق زانان چھِ۔ اسہِ چُھ ژاران خدا پننیٚو لوٗکو کِنؠ پننہِ پرٮ۪زلونہِ تہٕ عظیم قوتہٕ کِنؠ۔4پننہِ پرٮ۪زلونہِ تہٕ عظیم قوتہٕ سٟتؠ، چُھ خداین اسہِ پنُن وعدٕ دیُتمُت زِ سُہ انہِ سانہِ باپتھ مۅلہٕ ونہِ تہٕ عظیم کامہِ بارسس۔ تٔمؠ کوٚر یہِ، تاکہِ تسنٛدِس وعدس پٮ۪ٹھ پژھ تھٲوِتھ کٔرِو توٚہؠ تہِ خدایہِ سٕنٛدؠ پٲٹھؠ عمل۔ تہٕ کُنہِ اخلٲقی وٮ۪کھژارس منٛز یِیو نہٕ ہٮ۪نہٕ۔ یہِ زن یتھ دنیاہس منٛز گناہ کرنچہِ کُنہِ غلط خٲہشہِ کِنؠ وۅپدان چُھ۔5اوٕ کِنؠ زِ خداین کوٚر یہِ سورےٕ، توٕ کِنؠ تھٲیو نہ صرف پوٗرِ پوٗر پژھ مسیحؔ ہس پٮ۪ٹھ بلکہِ کٔرِو رٕژ عمل تہِ۔ تہٕ بنٲیو نہ صرف یہِ کتھ یقینی زِ توٚہؠ کٔرِو رژٕ عملہٕ بلکہِ کٔرِو خدایس متعلق ژوٚر ژوٚر زاننچ کوشش تہِ۔6تہٕ سٟتؠ بنٲیو یہِ کتھ یقینی زِ توٚہؠ کٔرِو نہٕ صرف خدایس متعلق ژوٚر ژوٚر علم پراونُک ژھل بل، بلکہِ رٔٹِو پنٕنؠ عمل تہٕ کتھ تہِ کاپہِ۔ تہٕ سٟتی روزیٚو مشکلاتو باوجود خدایس سنٛدؠ وفادار۔ تہٕ یِتہِ بنٲیو یقینی زِ توٚہؠ رٔٹِو نہٕ صرف پنٕنؠ عمل تہٕ کتھ تہِ کاپہِ بلکہِ روزیٚو خدایس وفادار پننٮ۪ن مشکِلاتن منٛز، تہٕ یِتہِ بنٲیو یقینی زِ توٚہؠ روزیٚو نہٕ خدایس وفادار پننٮ۪ن مشکِلاتن منٛز بلکہِ کٔرِو خدایہِ سُنٛد عزت تہِ۔7تہٕ یقینی بنٲیو زِ توٚہؠ کٔرِو نہ صرف خدایہِ سُنٛد عزت بلکہِ بڑٲیو اکھ أکؠ سُنٛد سریہہ تہِ زنتہِ اکے خاندانٕکؠ فرد ٲسِو۔ تہٕ یقینی بنٲیو اکھ أکؠ سنٛدِ باپتھ نہ صرف پنن سریہہ زنتہٕ اکی ٹبرٕکؠ فرد ٲسِو بلکہِ بٔرِو باقین لول تہِ۔8یہِ سورےٕ کریٚو تکیازِ یوٚدوے توٚہؠ یہِ کینٛژھا ژوٚر ژوٚر کرِیٚو، توٚہؠ بٔنیٚو زیادٕ کھۅتہٕ زیادٕ سٲنِس خداوند یسوع مسیحؔ ہس زاننس منٛز وۅپدایک۔9یہِ سورےٕ کٔرِو تکیازِ یُس نفر یہِ سورےٕ کرِ نہٕ چُھنہٕ خبردار زِ یِم چیز چھِ اہم۔ یُتھ انسان چُھ زنتہٕ اوٚن یُس پنُن اونٛد پوٚک وُچھتھےٕ ہیٚکہِ نہٕ، یا اکھ کمزور نظرِ وول یُس چھرا نکھہٕ چیزے یٲتؠ وُچِھتھ ہیٚکہِ۔ یِتھِس انسانس چُھ یِتہِ مٔشِتھ گوٚمُت آسان زِ خداین کٔرؠ امسنٛدؠ کٲتؠ پتھ کالہِ کٔرؠ مٕتؠ گناہ معاف۔10اوے کِنؠ، میانیو ایماندار سٲتھیو، زیادٕ زیادٕ ژھل بل کٔرِو یہِ یقینی بناونہٕ باپتھ زِ خداین کیا چُھو توٚہؠ ژٲرؠ مٕتؠ پنٕنؠ لوٗکھ۔ یوٚدوے توٚہؠ یہِ سورےٕ کٔرِو یہِ مےٚ توٚہہِ وُنؠ وُنؠ ووٚن، توٚہؠ سپدِیو نہٕ زانہٛہ تہِ پننِس خدایس نِش ژھٮ۪نہٕ۔11یہِ چُھ پوٚز تکیازِ تہنٛدِ یہِ کرنہٕ سٟتؠ دِیو خدا توٚہہِ کھُلہٕ دِلہٕ تتھ جایہِ اژنہٕ یٮ۪تہِ لوٗکن پٮ۪ٹھ پوشوٕنؠ حکومت آسہ نجات دِنہٕ وٲلِس خداوند یسوع مسیحؔ سنٛز۔12اوے کِنؠ، تکیازِ یِم چیز چھِ ضروری، چُھس بہٕ توٚہہِ لگؠ تھےٕ امہِ سارِچ ون ون کران روزان۔ بہٕ روزٕ توٚہہِ ون ون کران روزان یوٚدوے زن توٚہؠ یہِ سورےٕ زانان تہِ ٲسِو تہٕ پزِ تعلیمہ پٮ۪ٹھ پوٗرٕ دٔرِتھ تہِ ٲسِو۔13وۅنؠ گو بہٕ چُھس توٚہہِ یہِ کرنہٕ باپتھ ون ون کرٕنؠ پنُن فرض زانان یِمن چیزن متعلق ییتِس کالس تہِ بہٕ زنٛدٕ چُھس۔14بہٕ چُھس توٚہہِ یِم چیز کِنؠ یاد پاوٕنؠ یژھان تکیازِ بہٕ چُھس زانان زِ مےٚ آسہ ؤلؠ مرُن۔ بہٕ مرٕ یتھٕ کِنؠ زن خداوند یسوع مسیحؔ ہن برونٛہےٕ مےٚ پٮ۪ٹھ ظٲہِر کوٚر۔15امہِ ہُریمانہٕ، روزٕ بہٕ پوٗرٕ کوشش کران پننیٚو یِمو لِکھو سٟتؠ پننہِ مرنہٕ پتہٕ تہِ یِمہٕ کتھہٕ توٚہہِ یاد پاوان۔16بہٕ کرٕ یہِ اوٕ کِنؠ، زِ ییٚلہِ أسؠ رسول توٚہہِ سٲنِس خداوند یسوع مسیحؔ سُنٛد دُبارٕ کُنہِ دوٚہہ اقتدارس منٛز یِنُک ونان ٲسؠ، أسؠ ٲسؠ نہٕ توٚہہِ پٲنؠ پانے وننہٕ آمژن کتھن ہنٛدِس بنیادس پٮ۪ٹھ یہِ ونان۔ بلکہِ ووٚن تہِ یہِ اسہِ وُچھ پننیٚو أچھو دیدمان، خدٲیی عظمت وول یسوع۔17بہٕ ہیٚکہٕ ؤنِتھ أسؠ ٲسؠ گواہ تکیازِ أسؠ ٲسؠ تٔتی ییٚلہِ بب خداین تس عزت تہٕ عظمت بخٕش، ییٚلہِ یسوعنؔ بوز عظیم پُرنوٗر خدایہِ سنٛز آواز۔ تہٕ امہِ آوازِ ووٚن، "یہِ چُھ میون گۅبُر، یمِس بہٕ سٮ۪ٹھا لول بران چُھس۔ بہٕ چُھس أمِس سٮ۪ٹھا خوش۔"18خدایہِ سٕنٛدِ طرفہٕ یہِ آسمانو پٮ۪ٹھٕ یِنہٕ واجِنؠ آواز بوز اسہِ تہِ ییٚلہِ أسؠ یسوعسؔ سٟتؠ تتھ مقدس بالس پٮ۪ٹھ أسؠ۔19تہٕ اسہِ نِش چُھ تتہِ یہِ نبیو اوس لیٚوکھمُت برونٛہےٕ، یہِ زن سورےٕ پوٚز چُھ۔ یہِ تِمو لیٚوکھ تتھ دِیو دھیان، تکیازِ یہِ زٲنتو اکھ ژونگ یُس انہِ گٹہِ زوتان چُھ یُس لوٗکن پنٕنؠ وتھ ہاونس منٛز مدد چُھ کران۔ یہِ ژونٛگ روزِ دزٕوُن تتھ دوٚہس تام یوٚتام مسیحؔ سٕنٛدِ یِنُک گاش پھۅلہِ صبحک تارکھ دییہِ تُہنٛدِس دماغس بہتر سمجھ۔20امہِ سٲرے گٔژھِتھ، پزِ توٚہہِ زانُن زِ کانٛہہ تہِ نبی ہیٚکہِ نہٕ پننہِ خیالہٕ تعبیر کٔرِتھ۔21یہِ چُھ پزر تکیازِ کٲنٛسہِ تہِ ہیٚچھؠ نہٕ زانٛہہ تہِ کانٛہہ پٔز پیش گویی کٔرِتھ انسٲنؠ منٛگہِ مطٲبق۔ اتھ برعکس، تِمو یِمو خدایہِ سنٛدِ طرفہٕ پیش گویی کرِ تِمن رود ہدایت دِنس پانہٕ پاک روح۔
Bridge Connectivity Solutions Pvt. Ltd.