1 پطرس5
1وۅنؠ چُھس بہٕ پطرس توٚہہِ منٛز موجود زِٹھٮ۪ن تلقین کران یِم ایمان والیٚن ہنٛدٮ۪ن اجلاسن تہٕ مجلسن رہنمٲیی چھِ کران۔ بہٕ تہِ چُھس اکھ زیُٹھ۔ مےٚ وُچھ دیدمان مسیحؔ عذاب تُلان۔ تہٕ بہٕ کرٕ شرکت تس سنٛز عظیم فطرژ منٛز یتھ خدا ؤلی ظٲہر کرِ۔2توٚہہِ زِٹھٮ۪ن پزِ پرواہ کرُن پانس سٟتؠ ایمان والیٚن یتھٕ پٲٹھؠ اکھ پُہل پننہِ تیر کھیٚلیُک خیال تھاوان چُھ یِمن ہُنٛد تھٲیو خیال اوٕ کِنؠ نہٕ زِ توٚہہِ پزِ یہِ کرُن بلکہِ توٚہؠ چُھو پزنہٕ پٲٹھؠ یی یژھان یہِ خدا یژھان چُھ۔ یہِ مہٕ کٔرِو کُنہِ لالچہِ کِنؠ پونٛسہٕ حٲصل کرنہٕ باپتھ بلکہِ کٔرِو یہِ جوشہٕ سان۔3یہِ مہٕ کٔرِو حٲکم بٔنِتھ لوٗکن پٮ۪ٹھ یِم خداین تہنٛدِس تحویلس منٛز دِتؠ بلکہِ بٔنِو اکھ رٕژ مثال باقےٕ ایمان والیٚن ہنٛدِ باپتھ یہِ ہٲوِتھ زِ توٚہؠ کِتھہٕ پٲٹھؠ چُھو پنٕنؠ زندگی پکناوان۔4یوٚدوے توٚہؠ یِم چیز کٔرِو تیٚلہ ییٚلہِ یسوع، یُس تہنٛدِ باپتھ اکھ پُہل ہیٚو چُھ، ظٲہر سپدِ، سُہ دِیہ توٚہہِ پرٮ۪تھ کٲنٛسہِ زِٹھِس انعام۔ سُہ انعام آسہ جلالہٕ وول تہٕ ہمیشہٕ پوشہٕ وُن۔5امہِ آیہِ پزِ توٚہہِ جوانن تہِ پننٮ۪ن تِمن زِٹھٮ۪ن ہنٛز تابعدٲری کرٕنؠ یِم مجلسن رہنمٲیی کران چھِ۔ توٚہہِ سارنےٕ ایمان والیٚن پزِ اکھ أکِس سٟتؠ بڈٕ انکسٲری سان پیش یُن تکیازِ یہِ سلیمانن لیٚوکھ پننٮ۪ن صحیفن منٛز چُھ پوٚز: "خدا چُھ گمنٛڈ کرن والیٚن بُتھؠ ژٔنٛڈ دِوان تہٕ انکسٲری ورتاون والیٚن سٟتؠ رحم کران۔"6چونکہِ یہِ چُھ پوٚز۔ خدایس برونٛہہ کنہِ روزیٚو عٲجزی سان یمس لوٗکن بچاونُک تہٕ سزا دِنُک طاقت چُھ۔ تاکہِ سُہ بخشہِ توٚہہِ منٲسب وقتس پٮ۪ٹھ عزت۔7خدایس پٮ۪ٹھ تھٲیو پژھ زِ سُہ سمبالہِ تتھ پرٮ۪تھ چیزس یُس توٚہہِ پریشان کروُن چُھ تکیازِ تس چُھ تُہنٛد پرواہ۔8سونٛچو صاف صاف تہٕ ہوشہٕ سان تکیازِ شیطان چُھ تُہنٛد دُشمن تہٕ سُہ چُھ انٛدٕ ونٛدٕ پھیران، لوٗکن گمراہ کرنہٕ باپتھ ژھاران روزان۔ سُہ چُھ زٲنؠ تو اکھ سٕہہ ہیٚو یُس گرٮ۪زان روزان چُھ لوٗکھ ژھارنہٕ باپتھ تہٕ تِمن مارنہٕ تہٕ کھٮ۪نہٕ باپتھ۔9أمِس شیطانس لگو مقابلس مسیحؔ تہٕ تسٕنٛدِس پٲغامس پٮ۪ٹھ پۅختہٕ پژھ قٲیِم تھٲوِتھ یی کٔرِو تکیازِ توٚہؠ چُھو زانان زِ تہنٛدؠ ایماندار سٲتھی چھِ سٲرؠ سےٕ زگتس منٛز یِتھے پٲٹھؠ دۅکھ تُلان۔10مگر ییٚلہِ توٚہؠ کُنہِ قلیل وقتس دۅکھ تُلِو، سُہ خدا یُس توٚہہِ سٟتؠ پرٮ۪تھ رنگہٕ رحم دلی ہُنٛد سلوٗک کران چُھ، کرِ پانہٕ سُہ سورےٕ کینٛہہ بحال یہِ توٚہہِ روومُت چُھو تہٕ بیٚیہِ کریوٕ توٚہہِ پرٮ۪تھ رنگہٕ مکمل پٲٹھؠ مضبوط۔ خدا چُھ سُہ یمؠ توٚہؠ ژٲرِو پنٕنؠ تابنٲکی ژٮ۪تراونہٕ باپتھ جنتس منٛز ہمیشہٕ ہمیشہٕ باپتھ۔ ییٚلہِ توٚہؠ مسیحؔ ہس سٟتؠ جُرِو۔11بہٕ چُھس دعا منٛگان زِ سُہ کٔرِن پنٕنہِ قوت سان ہمیشہٕ ہمیشہٕ حکمرٲنی۔ آمین!12یہِ نامہٕ لیٚوکھ سلوانس میانہِ باپتھ یمِس مےٚ یہِ پننہِ زیٚوِ ووٚن بہٕ چُھسن سُہ اکھ تابعدار ایمان وول زانان۔ مےٚ لیٚوکھ توٚہہِ یہِ مختصر نامہٕ تاکہِ توٚہہِ میلہِ ہمت تہٕ بیٚیہِ توٚہہِ یہِ ونننہٕ باپتھ زِ یِتہِ مےٚ توٚہہِ لیٚوکھ سُہ چُھ پزرس تہٕ خدایہ سٕنٛدِس عظیم پٲغامس متعلق۔ اتھ پٲغامس پٮ۪ٹھ تھٲیِو لٔگؠ تھےٕ پژھ۔13یمہِ شہرٕ پٮ۪ٹھٕ یتھ أسؠ بابل ونان چھِ چُھو توٚہؠ ایمان وٲلؠ۔ یِم خداین تہنٛدؠ پٲٹھؠ ژٲرؠ پننہِ باپتھ چھِ توٚہہِ سلام سوزان۔ مرقُس یُس مےٚ پنُن نیٚچو ہیٚو چُھ تہِ چُھو توٚہہِ سلام سوزان۔14اکھ أکِس کٔرِو مایہِ سان اکھ میوٗٹھ یہِ ہاونہٕ باپتھ زِ توٚہہِ چُھو اکھ أکؠ سُنٛد لول۔ بہٕ چُھس منٛگان زِ خدا تھٲوِنؠ توٚہہِ یِم مسیحؔ ہس سٟتؠ جُرِتھ چھِ امنہٕ سان۔
Bridge Connectivity Solutions Pvt. Ltd.