2 کورنتھین3
1أسؠ چھِنہٕ یژھان توٚہہِ پننہِ بھروسہٕ منٛد آسنُک دوٚیمہِ پھرِ ثبوت دیُن۔ توٚہؠ یتھٕ پٲٹھؠ زانان چُھو، توٚہہِ چُھنہٕ سانہٕ بھروسہٕ مندی ہنٛدِ ثبوت باپتھ کینٛہہ لیکھِتھ دِنچ یا کینٛہہ لیکھِتھ اننچ ضرورت، یوٚدوے زن توٚہہِ یہِ کرنچ ضرورت آسہ باقین لوٗکن باپتھ۔2توٚہؠ چُھو پٲنؠ پانے سُہ لیکھُت یُس سانہِ بھروسہٕ مندی ہُنٛد ثبوت چُھ۔ ییٚلہِ أسؠ اکھ أکؠ سُنٛد پرواہ برَو سٲری لوٗکھ زانن پانے زِ أسؠ چھِ بھروسہٕ منٛد۔ زنتہٕ تِم تُہنٛد لیکھُت پرن۔3ہر کانٛہہ چُھ زانان زِ توٚہؠ چُھو سُہ لیٚکھُت یُس مسیحؔ ہن لیٚوکھ تہٕ اسہِ واتنوو۔ مسیحؔ ہن لیوکھ نہٕ یہِ لیکھُت کُنہِ پوترِ کنہِ پٮ۪ٹھ یا کُنہِ رنگہٕ سٟتؠ۔ بلکہِ زٲنتو زِ تٔمؠ لیٚوکھ تُہندس اندرونس منٛز پاک روح سٕنٛدِ وصیلہٕ۔ یُس صرف پزی خدا چُھ۔4بہٕ چُھسو تِمہٕ کتھہٕ ونان زِ اسہِ چُھ پوٗرٕ یقین خدا کیا چُھ اسہِ متعلق سونچان۔ اسہِ چُھ یقین تکیازِ اسہِ چُھ پانہٕ مسیحؔ یہِ یقین دِوان۔5وۅنؠ گو أسؠ ہیٚکو نہٕ یہِ خوش خبر پٲنؠ پانے دِتھ۔ أسؠ ہیٚکو نہٕ یِتہِ سونچِتھ زِ أسؠ کیا ہیٚکو پانہٕ کینٛہہ رُت چیز کٔرِتھ بلکہِ چُھ اسہِ خدا "خوش خبر" واتناونُک توفیق بخشان۔6تٔمی کٔرؠ أسؠ نو عہد نامٕکؠ خٲدم بننس لایق۔ پاک روح چُھ یہِ نو عہد نامہٕ عنایت کران، اوے تہِ چھِنہٕ یِم چھرا لفظ یِم کٲنسہِ لیٚکھؠ۔ یہِ چُھ اہم تکیازِ تِم لوٗکھ یِم دٔرِتھ رودؠ پاک روحس پٮ۪ٹھ پراون زندگی تہٕ تِم یِم زن کٲنسہِ ہندٮ۪ن لیٚکھؠ مٕتٮ۪ن لفظن تھپھ کٔرِتھ رودؠ، سپدن ہلاک۔7مزید، ییٚلہِ موسیٰؔ ہن پرانہِ عہد نامہٕ مطٲبق عمل کٔر یمؠ لوٗکن موتُک سزا دیُت، خداین لیٚکھؠ یِم کلامہٕ پوتٕرؠ کنہِ پٮ۪ٹھ۔ یہِ موسیٰؔ ہن کوٚر تمیُک جلال اوس یُتھ زِ اسرائیلی ہیٚکؠ نہٕ امہِ پتہٕ تمسنٛدِس بُتھِس کُن وُچھنس دٔرؠ تھےٕ تکیازِ یہِ اوس خدایہِ سنٛدِ جلالُک پرتو، یوٚدوے زن یہِ وارٕ وارٕ ہمیوو۔8اوے تہِ ییٚلہِ لوٗکھ نٔوِس عہد نامس متعلق عمل کرن یُس پاک روحن عنایت کوٚر، یُس زن واریاہ جلال وول چُھ۔9یقیناً، ییٚلہِ موسیٰؔ ہن پرٲنِس عہدنامس پٮ۪ٹھ عمل کٔر یم خداین لوٗکن سزا دیاونوو، لوٗکن مزمت کران، یہِ اوس پُر جلال۔ اوے تہ، ییٚلہ لوٗکھ نٔوِس عہدنامس پٮ۪ٹھ عمل کرن، یُس لوٗکن راستبٲزی کُن نِوان چُھ، یہِ چُھ سٮ۪ٹھا زیادٕ جلال وول!10بوزوے تہٕ پرُون عہد نامہٕ چُھنہٕ نٔوِس عہد نامس برونٛہہ کنہِ کہین جلال وول۔11یقیناً پرُون عہد نامہٕ یُس لوسنہِ لوٚگمُت چُھ اوس پُرجلال۔ تہٕ نوو عہدنامہٕ یُس ہمیشہٕ ہمیشہٕ پوشہٕ وُن روزِ چُھ زیادٕ جلال وول۔12اوے تہِ، چونکہِ أسؠ چھِ پوٗرٕ اعتمادٕ سان پُر امید یِم پُر جلال چیز حٲصل سپدنس متعلق، أسؠ چھِ واریاہ دلیری سان کتھ کران۔13أسؠ چھِنہٕ موسیٰؔ سٕنٛدؠ پٲٹھؠ یُس پننس بُتھِس نقابس تل رٹان اوس ژورِ۔ یتھٕ پٲٹھؠ ژیون نہٕ اسرائیلی لوٗکو بالکل زِ تمندِس بُتھِس کِتھہٕ روو جلال یُس خدایہِ سنٛدِ جلالُک پرتو اوس۔14پزر گو یہِ زِ اسرائیل یو زونُے نہٕ خدایہِ سُنٛد پٲغام۔ یِتہِ چُھنہٕ پزرےٕ ییٚلہِ کانٛہہ تِم صحیفہٕ پران چُھ یتھ منٛز پرُون عہد نامہٕ چُھ۔ باسان چُھ زنتہٕ سُہ نقاب یُس موسیٰؔ لاگان اوس، چُھ لوٗکن اتھ زاننس منٛز ٹھوٚر بنان۔ یہِ چُھ اوٕ کِنؠ زِ کانٛہہ تہِ ہیٚکہِ نہٕ یِم صحیفہٕ زٲنِتھ یوٚتام نہٕ خدا تِمن مسیحؔ ہس سٟتؠ جورِ۔15بے شک وُنکٮ۪س تہِ ییٚلہِ کانٛہہ موسیٰؔ سنٛز شریعت پران چُھ، زنتہٕ چُھ موسیٰؔ سُنٛد نقاب تمن اتھ زاننس منٛز ٹھوٚر بنان۔16ییٚلہِ لوٗکھ خداوندس خدایس پٮ۪ٹھ پژھ ہیٚن کرٕنؠ، خدا بناوِ تِمن موسیٰؔ سنٛز شریعت سمجھنس لایق۔ زنتہٕ خداین سُہ موسیٰؔ سُنٛد نقاب تھوٚد تُلہِ۔17ییٚلہِ بہٕ خداوند خدا سنٛز کتھ چُھس کران میون مطلب چُھ پاک روح۔ یہِ چُھ پاک روح یُس لوٗکن یِم صحیفہ زاننس لایق بناوان چُھ۔18اوے تہِ چھِ أسؠ سٲری یِمن یٮقین تھاون وٲلؠ یہِ ہٲوِتھ دِوان زِ خداوند خدا کوتاہ پُرجلال چُھ۔ تہٕ أسؠ چھِ یہِ بُتھؠ کنہِ نقابس تل رٹنہٕ ورٲے کران۔ خدا چُھ اسہِ لگاتار تھٕران روزان تاکہِ أسؠ بنو مسیحؔ ہس ہیٚوؠ۔ یتھٕ پٲٹھؠ چُھ پُرجلال خداوند یُس پاک روح چُھ اسہِ تہِ جلال بخشان۔
Bridge Connectivity Solutions Pvt. Ltd.