1 تیمُتھیس5
1تمِس نفرس سٟتؠ مہٕ کر تروشرٕ سان کتھ یُس چانہِ کھوٚتہٕ زیادٕ بزرگ آسہ۔ تمہِ بدلہٕ دِیس تتھٕ پٲٹھؠ مشورٕ زنتہِ سُہ ژےٚ پنن مول آسہ۔ جوانن کر تتھٕ پٲٹھؠ نصیحت زن تہِ تِم ژےٚ باے چِھی۔2اکھ زنان یۅسہ چانہِ نِشہ زِٹھ چھےٚ تس کر پنٕنؠ موج زٲنِتھ نصیحت تہٕ پننہِ کھوٚتہٕ کم وٲنسہِ زنانن کر پننہِ بیٚنہِ زٲنِتھ نصیحت۔ یوٚدوے ژٕ یہِ سورےٕ کرکھ ژےٚ پزی پوٗرٕ پٲٹھؠ یہِ اکہِ منٲسب طریقہٕ سٟتؠ کرُن۔3یہِ کتھ بنٲیِو یقینی زِ جماتھ چھا پزؠ پٲٹھؠ تِمن مونڈن ہُنٛد خیال تھاوان یِمن نہٕ پزی کانٛہہ تہِ چُھنہٕ خیال تھاونہٕ باپتھ۔4ہرگاہ کٲنسہِ موٚنڈِ آسن شُرؠ یا زُرؠ، یِمن پزِ گوٚڈٕ پنُن گرٕ سنبالُن ہیٚچھن۔ امی سٟتؠ ہیکن تِم پننِس مٲلس ماجہِ تہٕ نانہِ بٔڈؠ ببس خدمت کٔرِتھ یہِ تِمو تِہنٛدِ خٲطرٕ کوٚرمُت اوس ییٚلہِ تِم جوان ٲسؠ، تکیازِ یِمو کامیو سٟتؠ چُھ خدا خوش سپدان۔5یۅسہ مونٛڈ پزؠ پٲٹھؠ کُنے زٔنؠ چھےٚ تہٕ سۅ چھےٚ لاچار، تس چھےٚ خدایہِ سنٛز امید۔ سۅ چھےٚ لگاتار دُعا منٛگان تہٕ سۅ چھِ روزان خدایس مدتہٕ خٲطرٕ زارٕ پارٕ کران۔ 6مگر یۅسہ اکھ مونٛڈ پانس خوش تھاونہٕ خٲطرٕ زنٛدٕ روزان چھےٚ، سۅ چھےٚ روحٲنی ممٕژ یوٚدوے سۅ جسمٲنی وُنہِ تہِ زندٕ چھےٚ۔7ژےٚ ہیٚچھناوُکھ تِم اصٕل پٲٹھؠ یُتھ زن نہٕ کانٛہہ اکھ ونہِ زِ ایمان تھاون وٲلؠ چھِ خراب عمل کرن۔8ہرگاہ کانٛہہ پننؠن رشتہٕ دارن خاص کٔرِتھ پننِس گرس منٛز روزن والیٚن ہُنٛد خیال تھاوِ نہٕ تٔمؠ چُھ سُہ ایمان رد کوٚرمُت یتھ پٮ۪ٹھ اسہِ یقین چُھ۔ سُہ چُھ تمس أکس نفرٕ سٕنٛدِ کھۅتہٕ بدتر یٔمِس نہٕ مسیحؔ ہس پٮ۪ٹھ ایمان چُھ۔9سۅے مونٛڈ گژھِ فہرستس منٛز شٲمل کرٕنؠ یۅسہ تقریباً شیٹھٕ ؤرِش آسہ۔ سۅ گژھِ پننِس رٲنِس وفادار ٲسمٕژ آسٕنؠ۔10لوٗکھ گژھن گوٲہی دِنؠ زِ تمہِ کرِ رژٕ کامہِ، شُرؠ پٲلِن اصل پٲٹھؠ، مہمانن ٲس خوش آوے کران، ایمان تھاون والیٚن ٲس حلیمی سان خدمت کران، مصیبت زدن ٲس مدد کران تہٕ سارے قسمچہِ نیک کامہِ کرنہٕ خٲطرٕ ٲس بیتاب روزن۔11مگر جوان مونٛڈ گژھِ نہٕ اصلی مونڈن ہنٛدس فہرستس منٛز شٲمل کرنہِ یِنؠ۔ ییٚلہِ تِمن زیادٕ خٲہشات وۅتلن، تِم گژھن مسیحؔ ہس خدمت کرنُک پنُن ارادٕ بدلاوٕنؠ تہٕ تِم چھِ دُبارٕ خٲندر یژھان کرُن۔12ییٚلہِ تِم یہِ کرن تیلہِ چھِ تِم مونٛڈٕ روزنُک قسم پُھٹراوان تہٕ چھِ قصور وار سپدان۔13تمہِ علاوٕ چھِ تِمہٕ بےکار روزنٕکؠ عٲدی بنان۔ تِمہٕ چھِ گرٕ گرٕ کُنہِ کامہِ ورٲے پھران لوٗکن ہنٛزٕ کتھٕ کران تہٕ باقی لوٗکن ہنٛدین مسلن منٛز مداخلت کران۔ تِم چھِ تمہِ کامہِ کران یِمنہٕ تِمن کرنہِ پزن۔14امی خٲطرٕ چُھس بہٕ جوان مونڈن دُبارٕ خاندر کرنُک مشورٕ دِوان تہٕ شُرؠ کرن پٲدٕ۔ یِمن زنانن پزن پنٕنؠ گرٕ اصل پٲٹھؠ سنبالٕنؠ۔ امہِ طریقہٕ دِن نہٕ تِمہٕ دشمن شیطانس اکھ سُہ موقعہ یمہِ سٟتؠ تِمن غلط الزام لگہ۔15یِمہٕ کتھٕ چُھس بہٕ امہِ سببہٕ لیٚکھان تکیازِ کینٛہہ جوان مونٛڈٕ چُھنہٕ وۅنؠ مسیحؔ سنٛز فرمانبردٲری کران، بلکہِ چھےٚ تِم شیطانس پتہٕ درامژٕ۔16ہرگاہ کٲنٛسہِ ایمان واجنہِ زنانہِ رشتہٕ دارن منٛز مونٛڈٕ چھۓ تس پزِ تِمن مدد کرُن۔ یتھٕ پٲٹھؠ پیٚیہِ نہٕ جمٲژ پٮ۪ٹھ زیادٕ مونڈن ہُنٛد خیال تھاونُک بار۔ کلیسہٕ کرِ پتہٕ تِمن مونڈن مدد یِمہٕ پزؠ پٲٹھؠ لاچار چھےٚ۔17ایمان والیٚن پزِ تِمن عزت تہٕ ماوضہٕ دیُن یِم تِمن اصل پٲٹھؠ وتھ ہاوان چھِ خاص پٲٹھؠ تِمن بزرگن یِم تبلیغ تہٕ تعلیم دِنس پٮ۪ٹھ پنُن زُو ژٹان چھِ۔18أسؠ چھِ زانان زِ یہِ چُھ صحیح تکیازِ أسؠ چھِ یِمن صحیفن منٛز پران یِم موسیٰؔ ہن لیٚکھؠ: "ییٚلہِ اکھ داند پھل منٛڈان چُھ، توٚہؠ گژھیٚو نہٕ تمسُنٛد چونٛٹ بند کرٕنؠ یُتھ زن نہٕ پھل ہیٚکہِ کھیٚتھ۔ "یسوعن تہِ چُھ وونمُت، "لوٗکن پزِ تِمن ماوضہٕ ادا کرُن یِم تِمن ہنٛدِ خٲطرٕ کٲم کران چھِ۔" 19یُس دعویٰ أکس بزرگس خلاف آسہ دوٚیو یا ترییٚو شٲہدو ورٲے گژھِ نہٕ بوزُن۔ 20ییٚلہِ توٚہؠ عبادت کرنہٕ باپتھ سمان ٲسِو گناہ کرن والیٚن کٔرِو سارنےٕ برونٛٹھ کنہِ درُستی یُتھ زن باقے لوٗکھ گناہ کرنس کھوٚژن۔21بہٕ چُھس خدا تہٕ یسوع مسیحؔ تہٕ خدایہِ سٕنٛدؠ برگزیدٕ ملٲیکھ گواہ تٲرتھ یہِ باند باند کران زِ ژٕ کر تِمن ہدایتن پٮ۪ٹھ عمل یِم مےٚ ونؠ ژےٚ دِتی۔ پرٮ۪تھ معاملُک فٲصلہٕ کر منصفانہٕ پٲٹھؠ تہٕ کٲنسہِ نفرٕ سنٛز طرفدٲری مہٕ کر۔22ایمان والیٚن ہنٛزِ جمٲژ ہند زیٹھ مقرر کرنس منٛز مہٕ کر جلدی۔ ہرگاہ سُہ گناہ کرِ، سُہ گناہ آسیٚتھ زن ژےٚ کوٚرمُت، لہٰذا مہٕ کر تہِ۔ گناہ کرنہٕ نِشہ روز لوٚب۔23وۅنؠ مہٕ روز ژٕ صرف تریش چٮ۪وان بلکہ چےٚ کم کینژھا شربت تہِ یتھ ژٕ وقتہٕ وقتہٕ میادٕ دٲدِس راحت میلی۔ 24ییٚلہِ کینٛہہ لوٗکھ گناہ کران چھِ پرٮ۪تھ أکس چھےٚ خبر لگان مگر کینژن لوٗکن ہنٛدؠ گناہ چھِ پتے پہن نٔنؠ نیران۔25یتھٕ کِنؠ چُھ لوٗکن ہنٛزٕ رٕژٕ کامہِ پرٮ۪تھ اکھ زانان مگر ییٚلہِ لوٗکھ پوشیدٕ پٲٹھؠ رٕژٕ کامہِ کرین پرٮ۪تھ أکس سپدِ مولوم پتے پہن۔
Bridge Connectivity Solutions Pvt. Ltd.