1 تیمُتھیس4
1وۅنؠ چُھ خدایہِ سُنٛد روح اسہِ صاف پٲٹھؠ ونان زِ ینہٕ وٲلِس زمانس منٛز ہین کینٛہہ لوٗکھ یسوع سنٛدِس پٔزِس کلامس پؠٹھ ایمان اننہٕ نِشہ پوٚت۔ تِم تھاوین بدروحن ہنٛدِس کن یِم لوکن دۅکھٕ دِوان چھِ بیٚیہِ تِمن اپزین کتھن یمِچ یِم بدروح تعلیم دِین۔2بدروح چھِ یِم چیز تِمن لوٗکن ہنٛدؠ دٔسؠ ہیٚچھِ ناوان یِم اپُز ونان چھِ صرف یہِ کرنُک بہانہٕ کران زِ یہِ چُھ صحیح۔ یِمن لوٗکن چُھنہٕ جرُم باسان ییٚلہِ تِم اپٕزؠ چیز ہیٚچھِ ناوان چھِ۔3تِم چھِ لوٗکن خاندر کرنہٕ نشہٕ رُکاوان۔ تِم چھِ تِمن ونان زِ تِمن پزِ خاص قسمٕکؠ غذا کھؠنہٕ نِشہ پرہیز کرُن مگر خداین کٔرؠ تِم غذا سانہٕ خٲطرٕ پٲدٕ یمہِ خٲطرٕ ٲسؠ تمؠ سنٛز شکُرگُذٲری کرو۔ تٔمؠ کٔرؠ یِم سانہِ خٲطرٕ پٲدٕ یِم تمِس پٮ۪ٹھ ایمان تھاون وٲلؠ تہٕ پوٚز زانن وٲلؠ چھِ۔ 4خداین چُھ پرٮ۪تھ کانٛہہ چیز رُت بنوومُت۔ کانٛہہ تہِ غذا چُھ قبول کرنس لایق ہرگاہ ٲسؠ کھیٚنہٕ وِزِ خدایہِ سنٛز شکُر گُذٲری کرو۔5ییٚلہِ ٲسؠ خدایس دعا مونٛگو تہٕ تمسٕنٛدِس کلامس پٮ۪ٹھ یقین کرو، زِ سُہ پریتھ کانٛہہ چیز چُھ رُت یُس تٔمؠ پٲدٕ کوٚر، پتہٕ چُھ سُہ غذا یُس أسؠ کھیوان چھِ تمس قٲبلِ قبول۔6ہرگاہ ژےٚ پننؠن ایمان والیٚن باین روزکھ تعلیم دِوان، ژٕ آسکھ اصٕل پٲٹھؠ یسوع مسیحؔ سنٛز خدمت کران۔ چون روحٲنی طاقت سپدِ مضبوط یوٗت ژےٕ تتھ پٔزِس کلامس پٮ۪ٹھ عمل کرکھ یتھ پٮ۪ٹھ اسہِ سارنےٕ ایمان چُھ۔ سُہ پوٚز کلام چُھ سۅ رٕژ تعلیم یتھ پٮ۪ٹھ ژٕ عمل کران چُھکھ رودمُت۔7مگر ژےٚ چھے نہٕ بیکار تہٕ بے ہوٗدٕ دلیلن سٟتؠ کانٛہہ کٲم۔ تمہِ بدلہٕ بناو پنُن پان تِم کامہِ کرنس لایق یِمو سٟتؠ خدا خوش سپدِ۔8یاد تھاو "پننِس جسمس تربیت دِنہٕ سٟتؠ چُھے ژےٚ اکھ رٔژھا مدد میلان، مگر تِمہٕ کامہِ ہیٚچھنہٕ سٟتؠ میلی ژےٚ پرٮ۪تھ اندٕ مدد یِم خدایس خوش کرن۔ یہِ چُھ تُہنٛدِ خٲطرٕ جان، ییٚلہِ توٚہؠ زمینس پٮ۪ٹھ تہِ زنٛدٕ ٲسِو تہٕ ییٚلہِ یِنہٕ کالس منٛز خدایس سٟتؠ تہِ زنٛدٕ روزیٚو"9پرٮ۪تھ أکس پزِ یتھ کتھِ پٮ۪ٹھ بھروسہٕ کرُن بیٚیہِ مکمل پٲٹھؠ مانُن۔10اوے چھِ أسؠ تیژھا محنت کرن ییژاہ أسؠ ہیٚکو، تکیازِ اسہِ چھےٚ پوٗرٕ پٲٹھؠ امید زِ زندٕ خدا کرِ تِم کامہِ یِمن ہُنٛد تٔمؠ وعدٕ چُھ دِیتمُت۔ سُہ چُھ سارنےٕ انسانن نجات دِنہٕ وول، مگر خاص پٲٹھؠ تِمن نجات دِنہٕ وول یِمن تمِس پٮ۪ٹھ ایمان چُھ۔11ایمان تھاون والیٚن دِ یِمن چیزن متعلق تعلیم تہٕ یِم کامہِ کرنُک کرکھ تٲکید۔12کٲنسہِ مٕہ دِ یہِ وننُک موقعہ زِ ژٕ چھُکھ نہٕ مُجراہ سےٕ تکیازِ ژٕ چھُکھ جوان۔ تمہِ بدلہٕ ہاو باقے سٲتھین زِ زندگی کِتھٕ پٲٹھؠ چھےٚ گزارٕنؠ۔ تِمن ہاو یہِ پننہِ کلامہٕ سٟتؠ، برتاوٕ سٟتؠ، لولہٕ سٟتؠ، خدایس پٮ۪ٹھ پننہِ بھروسہٕ سٟتؠ تہٕ پننہِ جنسی پٲکیزگی سٟتؠ۔13یوٚت تام بہٕ ژےٚ نِشہ واپس واتہٕ ژٕ تھاو ایمان تھٲون والیٚن برونٛہہ کنہِ، ییٚلہِ توٚہؠ سمان ٲسِو، صحیفہٕ پرٕنؠ جٲری، صحیفن ہنٛز تعلیم دِنؠ تہٕ تِمن پٮ۪ٹھ عمل کرناونٕچ گُزٲرش کرٕنؠ جٲری۔14سۅ نعمت کر یقینہٕ سان استعمال یوسہٕ ژےٚ حٲصل چُھے، یس ژےٚ خداین تمہِ ساعتہٕ بخشی ییٚلہ کلیسیا کیٚو زٹھیو ژےٚ پننٕؠ اتھٕ ڈٲلی تہٕ ونہے ژےٚ زِ خداین کیاہ چُھ چانہِ باپت تِمن پؠٹھ ظٲہر کوٚرمُت۔15یِمن سارنےٕ کتھن پٮ۪ٹھ کر عمل، یِمہٕ مےٚ ژےٚ کرنہٕ باپتھ وونمُت چُھۓ! یِمن چیزن پٮ۪ٹھ روز دٔرِتھ یُتھ زن چٲنؠ ترقی سارنےٕ پٮ۪ٹھ ظٲہر سپدِ۔16پنٕنؠ تہٕ پننہِ تعلیمہ ۂنٛز تھاو خبر اتر۔ یِمہٕ کامہِ روز کران، تکیازِ یہِ کرنہٕ سٟتؠ چُھ خدا ژےٚ یوت نہٕ کینٛہہ بلکہِ تِمن تہِ نجات دِوان یِم لوٗکھ چون بوزان چھِ۔
Bridge Connectivity Solutions Pvt. Ltd.