1 تیمُتھیس3
1پرٮ۪تھ کٲنسہِ پزِ یتھ کتھِ پٮ۪ٹھ بھروسہٕ کرُن: "ہرگاہ کانٛہہ اکھاہ ایمان والیٚن ہُنٛد سردار بننُک آرِزو کران چُھ، سُہ چُھ اکھ رٕژ کٲم کرنچؠ خٲہِش کران۔"2تمی وجہ کِنؠ گژھِ سُہ ایمان والیٚن ہُنٛد اکھ سردار تیُتھ آسن یمِس نہٕ پزؠ پٲٹھؠ کانٛہہ اکھ تہِ ہیٚکہِ خراب کٲم کرنُک الزام کھٲلتھ۔ سُہ گژھِ پننہِ آشنہِ وفادار آسُن۔ تٔمس پزِ نہٕ ضرورت کھوٚتہٕ زیادٕ کینٛہہ کرُن۔ تٔمس پزِ عقلمندی ہنٛدیو طریقو سٟتؠ سونٛچُن۔ تٔمس پزِ اصل پٲٹھؠ برتاو کرُن۔ تٔمس پزِ مہمانن پننِس گرس منٛز خوش آوے کرٕنؠ۔ سُہ گژھِ لوٗکن تعلیم دِنس لایق آسُن۔3سُہ گژھِ نہٕ شرٲبؠ آسُن تہٕ نَہ گژھِ لڑایہِ گوٚر آسُن۔ بلکہِ گژھِ سُہ شریف آسُن نَہ کہِ لڑٲے مٔلؠ ہیٚنہٕ وول۔ تٔمس گژھِ نہٕ پونٛسس سٟتؠ لول آسُن۔4سُہ گژھِ اصل پٲٹھؠ پننِس عیالس واتُن۔ تمسنٛدین شُرؠن پزِ تس وفادار روزُن تہٕ تس اصل پٲٹھؠ عزت کرُن۔5امہِ باوجود، ییٚلہِ نہٕ کٲنٛسہِ أکس مولوم چُھ زِ پنُن گرٕ پننہِ عیالٕکؠ بٲژ کِتھہٕ پٲٹھؠ گژھن سنبالٕنؠ، سُہ ہیٚکہِ نہٕ یقیناً خدایہِ سنٛدین لوٗکن ہُنٛد خیال تھٲوِتھ!6اکھ نوو ایمان انن وول مہٕ بنٲؠ وُن ایمان والیٚن ہُنٛد سردار، تکیازِ تس ما گژھِ تکبُر۔ پتہٕ دِیہ تس خدا سُے سزا یُس تٔمؠ شیطانس دِیُت۔7ایمان والیٚن ہنٛدس رہنماہس پزِ پانہٕ تہِ تیُتھ برتاو کرُن زِ بے دین کرن أمِس متعلق اصل کتھہٕ۔ پتہٕ کرن نہٕ لوٗکھ أمِس بدنٲمی تہٕ جانور سٕنٛدؠ پٲٹھؠ پھسہِ نہٕ شیطان سنٛدِس کُنہِ تہِ زالس منٛز۔8یتھۓ پٲٹھؠ پزِ رہنماہن ہنٛدین خٲدمن سنٛجیدٕ تہٕ بالغ آسُن، نہ زِ دُ دلٲلؠ۔ تِم گژھن کتھ کرنہٕ وِزِ مخلص آسٕنؠ۔ تِمن پزِ نہٕ زیادٕ شراب چیٚون تہٕ تِم گژھن نہٕ پونٛسن ہنٛز زیادٕ کل آسٕنؠ۔ 9تِمن گژھِ ہمیشہِ تتھ پٲغامس پٮ۪ٹھ ایمان آسُن یُس خداین وۅنؠ اسہِ نِشہ ظٲہر کوٚرمُت چُھ، ییٚلہِ تِم پانس سام ہیٚن زِ خدا چُھ تمیُک تٲیید کران یہِ تِم کران چھِ۔10مگر گۅڈٕ گژھِ تِمن مددگارن ہُنٛد برتاو رہنماہن ہنٛدؠ پٲٹھؠ آزماونہٕ یُن۔ ہرگاہ تِم کُنہِ قصور ورٲے ٲسؠ، توٚہؠ دِیو تِمن خدمت کرنہٕ۔11یتھۓ پٲٹھؠ گژھن تِہنٛزٕ آشنہِ تہِ سنٛجیدٕ تہٕ بالغ آسنہِ، تِم گژھن نہٕ لوٗکن ہنٛز بدنٲمی کرنؠ تہٕ تِمن پزِ اعتدال خٲطرٕ پرٛتھ کانٛہہ کٲم کرٕنؠ۔ تمن پزِ پرٮ۪تھ تتھ کامہِ پٮ۪ٹھ بھروسہٕ منٛد آسُن یۅسہ تِم کران چھِ۔12کلیسُک اکھ مددگار گژھِ پننہِ زنانہِ ہُنٛد وفادار آسُن تہٕ سُہ گژھِ پننِس گرس منٛز پننؠن شُرین تہٕ باقی نفرن ہُنٛد اصل پٲٹھؠ تھاون تہٕ تِمن راہنمٲییٔ کرُن۔13یِم خٲدِم لگاتار امی طریقہٕ خدمت کرن لوٗکھ کرن تِمن عزت تہٕ تِم ہیٚچھن یسوع مسیحؔ ہس متعلق ہٮ۪متہٕ سان کتھ کرٕنؠ یتھ پؠٹھ تِمن ایمان آسہ۔14مےٚ چھےٚ امید زِ بہٕ واتہٕ توٚہہِ نِشہ جلد۔ مگر وۅنؠ چُھس بہٕ توٚہہِ یِم کتھہٕ لیٚکھان15زِ ہرگاہ مےٚ ژیر لوٚگ۔ بہٕ چُھس یژھان زِ توٚہؠ زانِو زِ ایمان والیٚن کِتھہٕ پٲٹھؠ پزِ کلیسس منٛز برتاو کرُن، یہِ چھےٚ سۅ جماتھ یِمن یسوع ہس تہٕ زندٕ خدایس پٮ۪ٹھ ایمان چُھ۔ اتھ جمٲژ سٟتؠ وابستہٕ لوٗکن چُھ ایمان تہٕ پزِ شیٚچھِ ہنٛز تعلیم چھِ دِوان۔16تہٕ پرٮ۪تھ أکس پزِ مانُن زِ خداین یُس پوٚز کلام اسہِ نِشہ ظٲہر کوٚرمُت چُھ سُہ چُھ حٲرت انگیز: "مسیحؔ اوس خدایہ یُس انسان سنٛدِس جسمس اندر دنیاہس آو۔ پاک روحن کوٚر ثٲبت زِ سُہ اوس پننِس دعواہس منز صیحی۔ خدایہِ سٕنٛدیو شیٚچھِ والیٚو وُچھ سُہ۔ ایمان تھٲون والیو کوٚر تمسٕنٛدِس قومن منٛز تمؠ سُنٛد اعلان۔ دنیاہ کیٚو واریہو جایو پٮ۪ٹھٕ اوٚن تس پٮ۪ٹھ لوٗکو ایمان۔ خداین نیٚو سُہ پننہِ طاقتہٕ سٟتؠ آسمانس منٛز پانس نِش۔"
Bridge Connectivity Solutions Pvt. Ltd.