1 تیمُتھیس1
1پولُسؔ سٕنٛدِ طرفہٕ یُس مسیحؔ یسوع سنٛز نمایندگی چُھ کران۔ یہِ چُھ تی یہِ کرنس دِیُت مےٚ اسہِ نجات دِنہٕ وٲلؠ خداین تہٕ سٲنؠ خداوند یسوع مسیحؔ ہن حکم یمسنٛز اسہِ امید چھےٚ۔2ژٕ تیمُتھیس چُھکھ ایمانکہ لحاظٕ پزِؠ پٲٹھؠ میون زنتہٕ اکھ نیٚچو۔ بب خدا تہٕ سون خداوند یسوع مسیحؔ روزِن ژےٚ پٮ۪ٹھ مہربان تہٕ کٔرِن ژےٚ پٮ۪ٹھ رحم تہٕ تھٲونَے امنہٕ سان۔3وۅنؠ چُھسے بہٕ تلقین کران، یتھٕ پٲٹھؠ مےٚ مکدُنیہ صوبس کُن گژھنہٕ وِزِ ژےٚ افسس شہرس اندر روزنُک تلقین کوٚرمُت اوس۔ تتہِ روز تاکہِ ژٕ ہیٚککھ تتہِ کینٛژن نفرن تِمن چیزن ہنٛزِ تعلیم دِنہٕ نِشہ روٚٹ کٔرِتھ یِم تٔمہِ نِشہ بیوٚن چھِ یہِ پوٚز چُھ۔ 4تِمن دِیو ہدایت زِ تِم بناون نہٕ پرانہِ دلیلہٕ تہٕ لاانتہا نسب نامہٕ استعمال کٔرِتھ مرکزی نقطٕ۔ یِمن چیزن پٮ۪ٹھ پتہٕ لوٗکھ أکس بیٚس سٟتؠ بحث کران چھِ۔ تِم چُھنہٕ خدایہِ سنٛز کتھ برونٛہہ کُن پکناونس منٛز مدد کرن۔ تہِ چُھ تیلے سپدان ییٚلہِ اسہِ خدایس پٮ۪ٹھ ایمان آسہ۔5أسؠ چھِ یِمن کامٮ۪ن پٮ۪ٹھ زور دِوان زِ خدایہِ سٕنٛدؠ لوٗکھ برن اکھ أکس لول۔ تِم کرن یہِ تیٚلہِ ییٚلہِ تِم صرف رُت کانٛچھن، ییٚلہِ تِمن اعتمادٕ سان مولوم آسہ زِ تِم چھِ رٕژٕ کامہِ کران بیٚیہِ آسیٚکھ خدایس پٮ۪ٹھ پزؠ پٲٹھؠ ایمان۔6کینٛژو لوٗکو چھِ یِمن رٕتٮ۪ن چیزن انکار کۅرمُت۔ اتھ بجایہ چھِ تِم بےکار چیزن ہنٛز تعلیم دِنس ترجیح دِوان۔7تِم چھِ یژھان شریعتٕکؠ وۅستاد بنٕنؠ، یہِ خداین موسیٰؔ ہس عطا کوٚر، مگر تِمن چُھنہٕ تِم چیز فکرِ تران یِمن متعلق تِم کتھہٕ چھِ کران، نہ چُھ تِمن یِمن چیزن متعلق علم یِمن پٮ۪ٹھ تِم پوٚز آسنس پٮ۪ٹھ زور دِوان چھِ۔8مگر أسؠ چھِ زانان زِ یُس شریعت خداین موسیٰؔ ہس عطا کوٚر سُہ کرِ لوٗکن مدد ہرگاہ تِم تتھ اصل پٲٹھؠ عملہِ منٛز انن۔9أسؠ چھِ زانان زِ خدا چُھنہٕ راستباز لوٗکن ہنٛدِ خٲطرٕ شریعت بناون، مگر تِمن لوٗکن ہنٛدِ باپتھ یِم کٲم چھِ کران زنتہٕ کانٛہہ شریعت چھنہٕ تہٕ یم کٲنسہِ ہنٛز اطاعت کرنس تہِ چھِ انکار کران۔ خدایہِ چُھ یہِ شریعت تِمن لوٗکن ہنٛدِ خٲطرٕ سوزان یِم خدایس انکار کران چھِ، تہٕ تِمن خٲطرٕ یِم گناہ گار چھِ، تِمن خٲطرٕ یِمنہٕ خدایس احترام کران چھِ تہٕ تس کُن چُھنہٕ پھیران، تٔمؠ بنوو یہِ شریعت تِمن ہنٛدِ خٲطرٕ یِم پننِس مٲلس ماجہِ قتل چھِ کران، تہٕ بیٚیہِ تِمن خٲطرٕ یِم باقےٕ لوٗکن قتل چھِ کرن۔10خداین دِیُت شریعت تِمن لوٗکن ہنٛدِ خٲطرٕ یِم زنا کران چھِ، مونٛڈٕ باز چھِ، یِم لوٗکن غلامی خٲطرٕ کننہٕ باپتھ ژوٗرِ نِوان چھِ، یِم لوٗکھ اپُز ونن وٲلؠ چھِ، یِم لوٗکھ عدالتن منٛز اپٕز گوٲہی دِنہٕ وٲلؠ چھِ، تہٕ بیٚیہِ تٔمس پرٮ۪تھ أکؠ سٕنٛدِ خٲطرٕ یُس سانہِ پزِ تعلیمہ برعکس عمل کرِ۔11یہِ تعلیم چھےٚ سٲنس جلالہٕ وٲلِس خدایہِ سنٛزِ رٕژِ شیٚچھِ سٟتؠ واتان، یمِس أسؠ تعریف کران چھِ۔ یہِ چھےٚ سۅ رٕژ شیٚچھ یۅسہ تٔمؠ مےٚ بخشؠ باقین نِشہ اعلان کرنہٕ خٲطرٕ۔12بہٕ چُھس سٲنس خداوند یسوع مسیحؔ سُنٛد شکُر گُزار یمؠ بہٕ یہِ کٲم کرنس لایق بنووُس، تکیازِ تٔمؠ زون زِ سُہ ہیٚکہِ مےٚ پٮ۪ٹھ بھروسہٕ کٔرِتھ۔ اوے کۅرُس بہٕ تٔمؠ پنُن خدمت گار مقرر۔13برونٛہہ کالہِ ونہِ مےٚ أمِس متعلق اپزِ کتھہٕ، مےٚ واتنوو تٔمؠ سنٛدین لوٗکن تکلیف، تہٕ مےٚ کوٚر تِمن پٮ۪ٹھ سؠٹھاہ تشدد۔ مگر مسیحؔ رود مےٚ پٮ۪ٹھ مہربان ییٚلہِ مےٚ مولوم اوسنہٕ زِ بہٕ یہِ کران اوسُس تہِ اوس غلط تکیازِ مےٚ اوسنہٕ تٔمس پٮ۪ٹھ ایمان۔14سٲنؠ خداوندن کوٚر مےٚ پٮ۪ٹھ فضل یمیُک نہٕ بہٕ حقدار اوسس، زِ تٔمؠ کوٚر مےٚ مسیحؔ یسوعس پٮ۪ٹھ ایمان عطا تہٕ یُس تہِ کانٛہہ تٔمس سٟتؠ پکان چُھ تٔمس لول برُن۔15پرٮ۪تھ أکس پزِ یتھ کتھہِ پٮ۪ٹھ بھروسہٕ کرُن تہٕ اصٕل پٲٹھؠ یہِ مانُن: "یسوع مسیحؔ آو دنیاہس منٛز گناہ گارن نجات دِنہٕ خٲطرٕ یُتھ زن خدا تِمن تِہنٛدین گنہن ہُنٛد سزا دِیہ نہٕ۔ "یوٚت تام زن میون تعلُق چُھ، مےٚ چھِ باقین ہنٛدِ کھوٚتہٕ بدتر گناہ کٔرؠ مٕتؠ۔16مگر یسوع مسیحؔ ہن کوٚر مےٚ پٮ۪ٹھ رحم۔ ییٚلہِ زن مےٚ باقین ہنٛدِ کھوٚتہٕ بدتر گناہ کٔرؠ متٕؠ چھِ، تٔمؠ کٔر لوٗکن ہاونہٕ خٲطرٕ میٲنؠ اکھ مثال قٲیم زِ سُہ کوتاہ صٲبِر چُھ۔ تمؠ یوٚژھ یہِ لوٗکن ہاوُن زِ یُس پتہٕ تہِ ایمان انہِ تہٕ یتھٕ پٲٹھؠ روزِ سُہ ہمیشہِ خٲطرٕ زنٛدٕ۔17لہٰذا ؤلِو أسؠ کرو تٔمس ابدی بادشاہس احترام تہٕ تعریف، یس نہٕ کانٛہہ اکھ تہِ وُچِھتھ ہیٚکہِ تہٕ یُس نہٕ زانٛہہ تہِ مٔرِتھ ہیٚکہ! سُہ چُھ کُن خدا۔ ؤلِو أسؠ کرو تمسنٛدؠ ہمیشہِ ہمیشہِ تعریف۔ آمین!18تیمُتھیس، ژٕ چُھکھ مےٚ أکس نیٚچوؠ سٕنٛدؠ پٲٹھؠ۔ بہٕ چُھسے ژےٚ ونان تِمہٕ کامہِ کرنہِ برابر یِمن ہنٛز پیشن گویی ژےٚ متعلق برونٛٹھے کرنہٕ آمٕژ چھےٚ۔ بہٕ چُھس یژھان زِ تِم کلام کرن ژےٚ خدایہِ سنٛز خدمت کرنس منٛز محنتہٕ سان مدد یتھٕ پٲٹھؠ اکھ سِپاہ أکس حکم دِنہٕ وٲلِس افسرس تٲبین روزِ۔19خداوند یسوعس پٮ۪ٹھ تھاو ایمان قٲیم تہٕ تی کٔرِو یہِ توٚہؠ صحیح زانِکھ! کینٛژو لوٗکو چُھ یہِ کرُن بند کوٚرمُت تہٕ اوے کوٚر تِمو خدایس سٟتؠ پنُن رشتہٕ خراب۔20یِمن منٛز چھِ ہمنیسؔ تہٕ سکندرؔ شٲمل۔ مےٚ ترٲوؠ تِم شیطان سنٛدین اتھن منٛز یُتھ تِمن شیطان سٕنٛدؠ دٔسؠ تکلیف واتہِ یمہِ سٟتؠ تِم ہیٚچھن زِ تِمن پزِ نہٕ خدایس توہین کرُن۔
Bridge Connectivity Solutions Pvt. Ltd.