1 تھِس5
1سانیو مسیحیؔ بایو، ووٚنؠ چُھس بہٕ یژھان زِ بہٕ دِمہو توٚہؠ تتھ وقتس متعلق زان یمہِ ساعتہٕ سون خداوند دنیاہس پیٚٹھ واپس ییہِ، اسہِ چِھنہٕ سٲنس خداوند سنٛزِ وٲپسی ہنٛدس خاص وقتس متعلق لیٚکھنٕچ ضروٗرت۔2توٚہؠ چھُو پانے برونٛٹھۓ اصل پٲٹھؠ تتھ وقتس متعلق زانان ییٚلہِ خداوند یسوع واپس ییہِ۔ توٚہؠ چھُو یہِ تہِ زانن زِ سُہ ییہِ بےخبری منٛز، یتھٕ پٲٹھؠ اکھ ژوٗر رٲژ منٛز یوان چُھ۔3خداوند یسوع ییہِ تمہِ وِزِ یکدم ییٚلہِ لوٗکھ آسن ونان، "أسؠ چھِ سہی سلامت" پتہٕ أنہِ تِمن خدا اچانک گیرس منٛز تہٕ کریکھ برباد! یہِ آسہِ تِتھے پٲٹھؠ یتھٕ پٲٹھؠ اکھ گۅبہِ کھوٚرِ زنانہِ خلٲسی ہنٛزِ دگہِ نِشہٕ ژٲلِتھ ہیکہِ نہٕ۔ یتھۓ پٲٹھؠ ہیکؠن نہٕ تِم لوٗکھ زانٛہہ ژٲلِتھ ییٚلہِ خدا تِمن برباد کرِ! 4بہرحال، سانیو مسیحیؔ بایو، توٚہؠ چھُو نہٕ تِمو لوٗکو منٛزٕ یِمن نہٕ مولوم چُھ کیاہ سپدِ، ییٚلہِ لوٗکھ انہِ گٔٹِس منٛز چھِ۔ اوے ییٚلہِ خداوند یسوع دنیاہس پیٚٹھ تِمن لوٗکن سزا دِنہِ واپس ییہِ، سُہ تراوِ نہٕ توٚہہِ حٲرتس منٛز أکس ژوٗرِ سٕنٛدؠ پٲٹھؠ۔5ییٚلہِ زن توٚہؠ سٲری خدایہِ سٕنٛدؠ شُرؠ چھُو، توٚہہِ پزِ یسوع سٕنٛدِ دنیاہس پیٚٹھ واپس ینہٕ بٲپتھ تیار روٗزُن، تِمن لوٗکن ہنٛدؠ پٲٹھؠ یِم گاشش منٛز چھِ یا دوٚہس یہِ زانتھ بیدار آسن زِ کیاہ چُھ سپدان۔ أسؠ چھِنہٕ شیطان سٕنٛدؠ شُرؠ یِمن نہٕ رٲژ منٛز یا أنہِ گٔٹِس منٛز روٗزن والیٚن لوٗکن ہنٛدؠ پٲٹھؠ مولوم آسہِ زِ کیاہ سپدِ۔ تِم ہیکن نہٕ ٹھیک پٲٹھؠ اندازٕ کٔرِتھ۔6لہٰذا، اسہِ خدایہِ سنٛدین شُریٚن پزِ تمہِ خٲطرٕ تیار روٗزنُ یہِ سپدن ووٚل آسہِ۔ اسہِ پزِ نہٕ باقی انسانن ہنٛدؠ پٲٹھؠ غٲفل سپدن، یِم زنہٕ شونٛگِتھ آسن چھِ۔ اسہِ پزِ ہوشیار روٗزُن زِ یسوع ییہِ دنیاہس پیٚٹھ واپس۔7سٲری چھِ زانان زِ ییٚلہِ راتس لوٗکھ شوٚنگان چھِ تِم چھِ بےخبر آسن تہٕ ییٚلہِ لوٗکھ چیٚتھ چھِ آسان تِمن چھِ بےخبر آسن۔ تِم چھِ اکثر رٲژ منٛز چیٚوان یمہِ سٟتؠ تِم مست سپدن چھِ۔8پوٚز أسؠ چھِ خداوند یسوع سُنٛد دنیاہس پیٚٹھ واپس یینہٕ خٲطرٕ تیار، أسؠ چھِنہٕ تِمن لوٗکن ہنٛدؠ پٲٹھؠ زندٕ یِم بےخبر چھِ۔ اسہِ پزِ خیال تھوٚن۔ اسہِ پزِ سپہن ہنٛدؠ پٲٹھؠ سامان گنڈ دِتھ روزُن، خدایہِ سُنٛد محبت گژھِ سینس پیٚٹھ سپرِ ہنٛدؠ پٲٹھؠ روزُن۔ شِستٕر ٹوپؠ دِتھ روزُن۔ 9یودوے أسؠ تمسنٛدؠ لوٗکھ چھِ، خداین چھِنہٕ أسؠ غضبہٕ خٲطرٕ بلکہِ امہِ باپتھ گنزٲرؠ مٕتؠ زِ أسؠ کرو پننِس خداوند یسوع مسیحؔ سٕنٛدِ وسیلہٕ نجات حٲصل۔10یسوع دِیت زُو سانہِ بدلہٕ یتھ زن أسؠ چاہے شونٛگِتھ یا بیدار آسو تسؠ سٟتؠ زُوو۔11اوے دِیو توٚہؠ أکس بیٚس تسلی تہٕ أکس بیٚیہِ سنٛدِ فٲیدُک بنِو بٲعث ییٚلہِ زن توٚہؠ یہِ چھُو کران۔12سانیو مسیحیؔ بایو ٲخرس پیٚٹھ چھِ أسؠ توٚہہِ عرض کران زِ پننؠن روحٲنی پیشواہن کریو قدر یِم توٚہہِ منٛز زُو ژٹان چھِ یتھٕ پٲٹھؠ توٚہؠ خداوند یسوعسؔ قدر کران چھُو۔ توٚہہِ پزِ تِمن قدر کرنؠ تکیازِ تِم چھِ ہمیشہ توٚہہِ خبردار کرن بییٚہِ نصیحت کران۔13تکیازِ تِہنٛزِ کامہِ ہنٛدِ سببہٕ کریو تِمن لولہٕ سان عزت پانہٕ وٲنؠ روزِو امنہٕ سان۔14سانیو مسیحیؔ بایو، أسؠ چھِ توٚہہِ ہدایت دِوان زِ ہجہِ وتہِ پکن والیٚن کرِو تلقین، کم ہمتن دِیو دِلاسہٕ، کمزورن پیٚٹھ تھٲوو اتھِ تہٕ سارنےٕ سٟتؠ یِیو صبرٕ سان پیش۔15ہوش تھٲوو یُتھ نہٕ کانٛہہ بدی بدلہٕ بدی کرِ بلؠ کہ روزِو توٚہؠ پانہٕ وٲنؠ تہٕ سارنےٕ سٟتؠ پریتھ وزِ رُت کرنس پتہٕ۔ 16ہمیشہِ روزِو خوش!17لگاتار کرِو دُعا!18پرٛتھ حالتس منٛز روزِو خدایہِ سٕنٛز شکُرگُزٲری کران! بےشک، توٚہہِ سارنےٕ مسیحسؔ پیٚٹھ ایمان تھٲون والیٚن چھےٚ یمہٕ سارے کامہِ کرنہِ۔19پاک روحس مہَ دِیو ژھتہٕ گژھنہٕ۔20نبووَتن مَہ کٔرِو حقارت!21سارے کتھٕ آزمٲیو یۅسہٕ رٕژ آسہِ سۅ تھٲوون لونچہِ منٛز۔22پرٛتھ بدی ہنٛزِ صوٗرژ نشہٕ ہییٚو لوٚب۔ 23مخصر، أسؠ چھِ دُعا منٛگان زِ خدا بناوٕ توٚہہِ پننؠن پاک لوٗکن ہیوؠ۔ خدا چُھ سلامتی بخشان۔ أسؠ چھِ بییٚہِ دُعا منٛگان زِ خدا کرِ تُہنز معصوم آسنس خداوند یسوع مسیحؔ سنٛدِس دُبارٕ دنیاہس پیٚٹھ یِنس تام حفاطت۔24توٚہہِ ہمیشہِ ناد دِنہٕ وول خدا چُھ بھروسہٕ مند۔ سُہ کرِ یتھۓ ہیو۔25سانیو مسیحیؔ بایو، أسؠ چھِ توٚہہِ عرض کران زِ توٚہؠ روزِو میانہِ، سیلاسؔ تہٕ تِیمُتِھیؔ سٕنٛدِ خٲطرٕ دُعا منٛگان!26عبادت خٲطرٕ جمع سپدنہٕ وِزِ کٔرِو مایہِ سان پننؠن باین سلام۔27بہٕ چھِسو توٚہہِ خداوند یسوع سُنٛد قسم تھاون زِ یہِ چِٹھؠ گژھِ ینؠ سارنےٕ مسیحیؔ باین برونٛہہ کنہِ پرنہٕ!28سٲنس خداوند یسوع مسیحؔ سُنٛد فضل روٗزِن توٚہہِ سارنےٕ ہمیشہِ سٟتؠ!
Bridge Connectivity Solutions Pvt. Ltd.