Nọmba11
Ikañ A-atooho Abọọñ
1Akem, nditọ Isrel emaedukuunọ ebaña ufen se ammọ ekekịt yak Abọọñ akop, ndin Abọọñ akekop ammọ iyadesịd amọ amaabịmme. Ndin ikañ amaato Abọọñ abịppe ke atu ammọ anyʌñ asobo ubaak itie nnaa.2Ke nditọ Isrel emaekebọñ eseeme ikoot Moses, anye amaabọñ akam anọ Abọọñ ndin ikañ amaanịme.3Ndin, ekekoot itie ado Tabera, sia ikañ Abọọñ amaasak ke atu ammọ.Asasa A-atooho Abọọñ
4Mme ndiọi awo ke atu ammọ emaetọọñọ adiyem utọ ndidia mfen, ndin nditọ Isrel emaetọọñọ ayịd enyʌñ ebo ete, “Akpekapado ñnyịn imikịt unam ita!5Ñnyịn imitoiyo mme iyak a-ñnyịn ikitaaha ke mfọn ke Iyib, ye mme kukumba, mme ikon, mme ayịmeto, mme ayịm, ye mme kalik.6Ado idahami, ndidia i-idooro ñnyịn sia ñnyịn ikịtte ñkpọ se idia ibọhọke mana ami!”7Mana akeba nte ñkpasi korianda anyʌñ aba anyen nte resịn.8Mme awo emaesaña etañ anye, ndin ekọk ke ukọkñkpọ ubọk enyʌñ etetịm ke udʌñ. Ammọ eketem anye ke ako enyʌñ enam anye nte mme eboho uyo. Ndin anye akesiba awo ke inua nte ñkpọ e-ekamake adan ọlif enam.9Ke ini mbara akeduọkkọke ke itie nnaa ke akonayio, mana amaakeene aduọ.10Moses amaakop naña mme awo ke afịd ubon etuaha ke inuausʌñ atayad ammọ. Ndin Abọọñ amaanekke ayat esịd, ndin ami amaafịna Moses.11Moses amaabịp Abọọñ abo, “Nsoo ido nọ afo aben mfịna ami adot awo mfo ke idem? Nsoo ke ami nnam i-imuunemme fiin esịd nọ afo aben mbiomo afịd ibon ami andot miin ke iwuod?12Ado nte ami ñkeyommo afịd ibon ami? Ado nte ami ñkeman afịd ammọ? Afo anam die abo yak ami ñkama ammọ ke ekaubọk, nte adeb akama nsekayịn ñka isọñ a-afo akenwọñọke adinọ mme eteete ammọ?13Ke mmọọ ke ami ndiikan ñkịt unam nnọ afịd ibon ami? Ammọ eka iso etua ennọ miin ebo, ‘Inọ ñnyịn unam nọ ita!’14Ami ñkanna mbiom mbiomo afịd ibon ami ikpọọñ; mbiomo ami adoppo añkan miin.15Akpedo naña afo ayem innam miin ado ami, mbọk, ñwot miin sio akañ keed, adieke ñkịtte mfọn ke iso mfo, kuuyak ami ñkịt nsobo mmi.”16Akema Abọọñ amaabo Moses: “Ben mme ñkpisọñ Isrel ata mme duob a-afo adiọọñọke nte adadusʌñ ye adaaha ke atu nditọ Isrel di. Nam nọ ammọ edʌk edi ke atayad mbono, ndin yak ammọ eda do ye afo.17Ami ñyaasọiyọ ndi nditañ ikọ ye afo do, ami ñyaanyʌñ ndat ubaak adudu Sịbidịd a-abaaha ke idem mfo ndot ammọ. Ammọ eyaewuana ye afo ebiom mbiomo mbon awo mbaak afo udubiom anye ikpọọñ.18“Dọkkọ nditọ Isrel bo, ‘Inịm idem ndufo asana, ibeeñe idem inọ ñkpọñ, a-ndufo ediita unam. Abọọñ amaakop naña ndufo etuaha ebo, “Akpekapado ñnyịn imikịt unam ita! Amaafọn ye ñnyịn ke Iyib akan ami!” Idahami Abọọñ ayainọ ndufo unam, ndufo eyaenyʌñ eta anye.19Idooho usen keed, me usen iba, me usen ition, duob me edịb,20ado eyaeta ke afịd afiọñ tutu anye adiwuọñọ ndufo ke aduiwuo, anyʌñ itek ndufo esịd sia ndufo emesịn Abọọñ, a-abaaha ke atu ndufo, enyʌñ etua ke iso amọ ebo, “Nsoo ikinam nọ ñnyịn iwuọ ikpọñ Iyib?” ’ ”21Ado Moses amaabo, “Se ami mi ke ufọọd ideen tọsịn ikie itiokeed e-esañake ke ukod, ndin afo abo, ‘Ami ñyaanọ ammọ unam nọ eta ke afịd afiọñ keed!’22Akpọkọm ekpewot afịd udịmedọñ ye afịd mme udịmenañ ami me akpaakem se afịd ammọ eta? Ekpemʌm afịd iyak ke mmọọñ akpainyañ akpaakem afịd ammọ?”23Ndin Abọọñ amaabọọrọ Moses abo, “Ado nte ubọk Abọọñ aməho abọhọ? Do ndin afo ayaakịt me se ami ntañ ayaawuọ asu unọ fiin.”24Ndin Moses amaawuọ akedọkkọ afịd awo se Abọọñ aketañ. Anye amaakoono mme ñkpisọñ ata mme duob anyʌñ anam nọ ammọ eda ekanna atayad.25Akema Abọọñ amaasọiyọ adi ke ntọñanyọñ aditañ ikọ ye anye, anyʌñ adat usʌk adudu Sịbidịd a-akebaaha anye ke idem adot mme ñkpisọñ ata mme duob ado. Ke ini Sịbidịd ado amaakedoro ammọ ke idem, ammọ emaetañ brọfesi, ado ammọ ikikaaha iso inam ntoro aba.26Ado, ideen iba, a-anyịñ ammọ akedooho Eldad ye Medad, emaesọñ eba ke nnaaekọñ. Emaewet anyịñ ammọ esịn ke atu mme ñkpisọñ, ado ammọ ikiwuọhọ ikpọñ atayad. Kpayeado, Sịbidịd amaanyʌñ adoro ammọ ke idem, ndin ammọ emaetañ brọfesi ke itie nnaaekọñ.27Akparawa keed amaafeghe akedọkkọ Moses abo, “Eldad ye Medad esʌk etañ brọfesi ke itie nnaa.”28Yọsua, ayịn Nọn, a-akedooho asañautom anọ Moses tọọñọ ke uyịn, amaabo Moses ate, “abọọñ mmi, Moses, kpan ammọ!”29Ado Moses amaabọọrọ ate, “Ado nte afo abọ ufịb mmi afịbe? Ami ñkpekap mmama nọ afịd ikọd Abọọñ edo mme prọfed, ñko yak Abọọñ akpedot Sịbidịd amọ ke idem ammọ!”30Ndin Moses ye mme ñkpisọñ Isrel emaetịmme enyọñ ekaa itie nnaaekọñ.31Ndin Abọọñ amaasio afịm, ndin anye amaafịm asasa asịññe ke akpainyañ. Afịm amaasuan ammọ ke afịd nnaaekọñ a-akenyọọñọ ñkpọ nte kubid iba tọọñọ ke isọñ kaa anyọñ, ndin anyọọñ usʌñ ñkpọ nte isañ usen keed ke afịd mbeñ itie nnaa.32Mbon awo emaewuọñọ ekekoono asasa afịd akonayio ye uweemeayio ye ke udiana usen. Ibaaha awo a-akekoonoke nọ asịp akan homa duob. Ndin ammọ emaesuan ammọ ekanna eyọhọ itie nnaa.33Ado naña unam ado akesʌkkọ atotuuk ammọ eded, mbemiso ammọ ekap etata, ataa ifiobesịd Abọọñ amaabịmme ye ammọ, ndin anye amaasobo ammọ ye ataa idiọọk udọñọ.34Ke ntoro emaeben itie ado ekoot Kibrod Hatafa, sia ke ndo ke ekebuuk mbon se ikidọrọ itọñ iyem ndidia mfen.35Tọọñọ ke Kibrod Hatafa ammọ emaekpọñ ekaa Haserọd enyʌñ ekeba do.Biblica, Inc.