Nọmba10
Mme Adukpoñ Silfa
1Abọọñ amaabo Moses ate:2“Nam adukpoñ silfa iba ndin kama ammọ koot esob bok nyʌñ kama nam ammọ edakka isañ.3Emaefịt ammọ naña iba, afịd abio ana ewuọñọ edisoobo ke iso mfo ke inuausʌñ atayad mbono.4Ekpefịt adukpoñ keed, mme adadusʌñ, e-edooho mme adaiwuod ke mme aduuk Isrel, enie adiwuọñọ ndisoobo ke iso mfo.5Emaeduat adukpoñ ke akpọsọñ uyio, mme esiin Isrel e-ebaaha ke usakkautịn ana etọọñọ ewuọñọ.6Emaeduat adukpoñ ayọhọ akañ iba ana mbon se ibañña ke usuuk edakka isañ. Uyio adukpoñ adiido idiọọñọ adidakka isañ.7Emaeyem mme awo ewuọ eboho itie keed, yak efịt mme adukpoñ, ado ke efịt ye idiọọñọ adidakka isañ.8“Nditọ Erọn, mme aku, enie edifịt mme adukpoñ. Yak ami ado ewʌhọ ke nsi-nsi inọ ndufo ye mme emana ke iso.9Ndufo emaekaa ekọñ ke isọñ abio ndufo ye asua i-ifiighe ndufo, iduat mme adukpoñ. Ndin Abọọñ Abasi ayaitoiyo ndufo anyʌñ ifak asio ke ubọk mme asua.10Ñko ke ini idaara ndufo ye asaña-asaña ini usọrọ ndia ye usọrọ Ufa Afiọñ, ana ndufo efịt mme adukpoñ enọ mme ufọfọb uwa ye mme uwa ewuana, ndin ammọ eyaedo mme ñkpọ aditoiyo inọ ndufo ke iso Abasi. Ami ndo Abọọñ Abasi ndufo.”Nditọ Isrel Ekpọñ Sainai
11Ke ayọhọ usen duob mme iba ke ayọhọ afiọñ iba ke ayọhọ isua iba, ntọñanyọñ amaadịppe idem akpọñ anyọñ tabanakịd akebe edioomo.12Ndin nditọ Isrel emaetọọñọ isañ eto Akpautatan Sainai ekewuọ mme itie mme itie tutu ntọñanyọñ aketuak ada ke Akpautatan Paran.13Ammọ emaedakka isañ, ke akpa ini ami, ato uyio A-Abọọñ akenọọhọ Moses.14Mme ikpeghe nnaaekọñ ake Yuda eketo edakka isañ, ke idak ñkpọ idiọọñọ ammọ. Nasọn ayịn Aminadab akedat ammọ usʌñ.15Natandiel ayịn Suaa akedat ikpeghe esiin Isaka usʌñ,16ndin Eliab ayịn Helọn akekara ikpeghe esiin Sebulọn.17Ndin emaedooro tabanakịd enịm, ndin mbon Kesọn ye mbon Merari, e-ekebiommo anye emaetọọñọ isañ.18Mme ikpeghe nnaaekọñ ake Rubịn ekediana, ke idak ñkpọ idiọọñọ ammọ. Elisọ ayịn Sedọọ akedat ammọ usʌñ.19Selumiel ayịn Surisadai akekara ikpeghe esiin Simiọn,20Eliasaf ayịn Dewel akekara ikpeghe esiin Kad.21Ndin mbon Kohad emaedakka isañ, ekama mme ndisana ñkpọ. Akena esio tabanakịd ewuuk mbemiso ammọ ediwuọ.22Ndin mme ikpeghe nnaaekọñ Ifrem ekesaña ediana, ke idak ñkpọ idiọọñọ ammọ. Elisama ayịn Amihud akeda iwuod.23Kamaliel ayịn Pedasọ akeda iwuod ke ikpeghe esiin Manase,24Abidan ayịn Kidiọni akeda iwuod ke ikpeghe esiin Benyamin.25Ke akpatre, mme ikpeghe nnaaekọñ Daan emaedakka, nte mme andikpeme edem afịd ikpeghe mbon ñko, ke idak ñkpọ idiọọñọ ammọ. Ahiesa ayịn Amisadai akeda iwuod.26Pakiel ayịn Okran akeda iwuod ke ikpeghe esiin Asaa,27ndin Ahira ayịn Enan akeda iwuod ke ikpeghe esiin Naftali.28Usʌñ naña mme ikpeghe nditọ Isrel ekesaña ke udịm ewuọñọ akedo ado.29Akema Moses amaabo Hobab ayịn Rewel awo Midian, ete anwaan Moses ate, “Ñnyịn ibiiwuọ ikaa itie A-Abọọñ aketañña abaña ibo ñnyịn, ‘Ami ñyaaben anye inọ ndufo.’ Di yak ñnyịn isaña keed ika ndin ñnyịn iyainam nọ afọn ye afo, sia Abọọñ amaanwọñọ adinọ Isrel nti ñkpọ.”30Anye amaabọọrọ Moses abo, “Iyoo, ndiikaaha; mbo ntịmme ñnyọñ abio mmi mbịne ubon mmi.”31Ado Moses amaabo anye, “Mbọk kuukpọñ ñnyịn. Afo amediọọñọ itie nte ñnyịn ikeme adiba ke anaan, ndin afo ayaado anyen inọ ñnyịn.32Adieke afo ikeeneke ñnyịn akaa, ñnyịn iyaideeme ye afo se utọ nti ñkpọ Abọọñ inọọhọ ñnyịn.”33Do ndin ammọ emaedakka eto ekamba abod Abọọñ enyʌñ esaña ke usen ita. Akebe edioomo Abọọñ akebem ammọ iso ke usen ita ado nọ ayem itie nduọkadudu anọ ammọ.34Ntọñanyọñ Abọọñ amaaba ke anyọñ ammọ ke uweemeayio ke ini ammọ ekekpọññọ nnaaekọñ.35Ke ini akeedodo a-akebe edioomo akedakkake isañ, Moses amaabo ate,“Abọọñ, Dakka da!Yak mme asua mfo esuana;yak mbon usua mfo efeeñe ke iso mfo.”36Ke ini akeedodo a-anye akesọññọ ada, Moses amaabo,“Abọọñ, Tịmme di keene,ananaibad tọsịn nditọ Isrel.”Biblica, Inc.