Nọmba12
Miriam ye Erọn Esọñ Iwuod ye Moses
1Akema Miriam ye Erọn emaetọọñọ editañ idiọọk ikọ ndian Moses ke ntak a-anwaan amọ akedooho awo Kuus, sia anye amaadọ awonwaan Kuus.2Ammọ emaetañ ebo, “Ado nte Moses ikpọọñ ke Abọọñ asitañ ikọ anọ? Ado nte Abọọñ isinyʌññọ itañ ikọ inọ ñnyịn?” Ndin Abọọñ amaakop ami.3(Ado Moses akedo ataa awo nsuukidem, amaasuuk idem akan afịd awo ke iso isọñ.)4Inikeed Abọọñ amaadọkkọ Moses, Erọn ye Miriam abo, “Iwuọñọ idi atayad mbono, afịd ndufo awo ita.” Ke ntoro, ammọ awo ita emaewuọñọ ekaa.5Ndin Abọọñ amaasọiyọ adi ke adaaha ntọñanyọñ; anye akeda ke inuausʌñ atayad mbono anyʌñ akoot Erọn ye Miriam. Ke ini ammọ awo iba emaekesaña edida do,6anye amaabo ammọ ate, “Ikpañ utọñ inọ ikọ mmi:“Ke ini prọfed abaaha ke ufọọd ndufo,ami, Abọọñ, ñyaara idem mmi nnọ anye ke ñkukịd,ami ntañ ikọ nnọ anye ke ndab.7Ado idooho ntoro ye awo mmi Moses;anye anam akpanikọ ke afịd ufọk mmi.8Ami ntañ ikọ ye anye iso ye iso,ñnwaña-ñnwaña, idooho ke ñke;anye akịt mbid Abọọñ.Nsoo ido ndin yak ndufo imiikinieghe mbaakeditañ idiọọk ikọ ndian awo mmi Moses?”9Ifiobesịd Abọọñ amaabịppe ye ammọ, ndin Abọọñ amaakpọñ ammọ.10Ntọñanyọñ akedịppe akpọñ anyọñ atayad, ikpọkidem Miriam amaakappa akpamfia, amaakappa asana nte sino. Erọn akekanna iso awọt anye, ndin akịt ke Miriam amaanie idiọọk mfad ke idem,11Erọn amaabo Moses, “Mbọk, abọọñ mmi, ami mmukpe fiin ubọk, kuudot ñnyịn idiọọkñkpọ a-ñnyịn unamma fiin ke unana iwuod.12Kuuyak anye aba nte nsekayịn a-akpaaha asịne ke ntʌñidịb eka nọ ubaak ikpọkidem amọ abʌttọ.”13Moses amaabọñ akam akpeiye Abọọñ abo, “Abasi, mbọk, kọk anye!”14Ndin Abọọñ amaabọọrọ Moses ate, “Akpedo ete ammọ amaafiat anye etab ke iso, nte anye ikpikịtte abuud ke usen itiaba? Kʌk anye sịn ke itie keed ke mben itie nnaa ado ke usen itiaba; ndin ado amaakweeñe ekeme ediben anye ntịmme ndʌk ndi.”15Ndin emaekʌk usʌñ itie nnaa ebaha Miriam usen itiaba, ndin mme awo ikidakkake isañ tutu ekeben anye enyọñ edi.16Ado akeboiyo, nditọ Isrel emaekpọñ Haserọd enyọñ ekeba ke Akpautatan Paran.Biblica, Inc.