Zozue3
1Mɔsa nɛ sutele sut, Zozue nɛ hio wi mɔ Israel fɛt gutɛ ha Sitim nɛ mbwa zilo ha ngɛngɛ nu li Zurdain. Mbwa hɔa nu ha ki Sɔngsi nde mbwa ha ku li.2Hazang yala tar, hio gasa wi mɔ zu mbwa nɛa mbara zang guru fɛt3nɛ mbwa haa nu ha hio wi mɔ Israel: «Ka ɛnɛ zɔka hio wan-hasadaka mɔ kandɔ pɛ Levi ha kuo kubha mɔ mbon pɛ Wankpoo Sɔ pɛ ɛnɛ, ɛnɛ gutɛ ha bhandi ɛngɛ ɛnɛ nak mbwa.4Mɛgi, ɛnɛ nɛ̂ sanga nɛ kubha na, soko ɛnɛ ha dung kilomɛtɛr ndang nɛ yo, mɛgi, ɛnɛ being liwal ka ɛnɛ bebaa, hawen zu ɛnɛ tɛ pen ha kɛ ma swe na.»5Zozue tɔa a hio wi mɔ Israel: «Ɛnɛ gde tɛ ɛnɛ nɛ tɛ hazu mɔsa Wankpoo betɛ a dea gɔngɛnɛmɔ ha soko ɛnɛ.»6Yala ndang hapata, a hanu ha hio wan-hasadaka mɔ twe kubha mɔ mbon pen nɛ ha li hio wi mɔ Israel.» Mɛgi, mbwa dea yo.7Wankpoo tɔa a Zozue: «Angiri ha yala mɔ mɛsɛ, mi be osi gasa pɛ mɛ ha li hio wimɔ Israel! Mɛgi mbwa be ing nde mi hinɛ mɛ tuka ɛngɛ mi badung nɛ hinɛ Moize.8Mɔ pɛ mɛ, hanu ha hio wan-hasadaka ka twe kubha mɔ mbon: “Ha ngimɔ ka ɛnɛ ha hɔa hazang li Zurdain, ɛnɛ yol.”»9Mɛgi Zozue tɔa a hio wi mɔ Israel fɛt: «Ɛnɛ tɛ, ɛnɛ ze wen ka Wankpoo Sɔ pɛ ɛnɛ tɔa.10Ɛnɛ began zu mɔ, mɔ ing nde Sɔ ha soko ɛnɛ nɛ a beyin ha li ɛnɛ hio wi mɔ Kanaan, hio wi mɔ Het, hio wi mɔ Hivi, hio wi mɔ Perizi, hio wi hio wi mɔ Girbasi, hi wi mɔ Amori nɛ hio wi mɔ Yebus.11Yo mɛgi, kubha mɔ mbon pɛ Wankpoo mɔ zu nu fɛt beku li Zurdain ha Sɔngsi ɛnɛ.12Ɛnɛ sangili wei bhuko gbala bwa hazang kandɔ mɔ Israel, wi ndang hazang kandɔ ndang.13Hapata ka hio wan-hasadaka ka gu kubha mɔ mbon pɛ Wankpoo, wɛnɛ ka dung wan ha zu mɔ fɛt, begde nanga mbwa ha li Zurdain, sokoa be kɛtini a wal kala tuka ɛ kpea kpe.»14Mbwa gbinɔ guru mɔ nɛ ha kuo Zurdain. Hio wan-hasadaka ka guo kubha mɔ mbon pena ha Sɔngsi mbwa.15Yo dungɔ nɛ ngimɔ bhio kpalmɔ ha ngimɔ ka li Zurdain dea mbeng. Ka hio wan-hasadaka hɔa ha nu li gde nanga mbwa hazang li,16li ka gutɛ ha wal kala ka fok ha wal gdɔk fok fin na, mɛ zɔk tuka ɛngɛ ka ɛ kpea kpe. Lia yola haki nɛ nyɛa ha le Adam, ka yo dung sanga nɛ Sartan. Li ka fok nɛ wal Fea nana li tɔng ɔsa ndɛl ndɛl. Hio wi mɔ kandɔa kuo li Zurdain tan nɛ le Zeriko.17Hio wan-hasadaka ka guo kubha mɔ mbon pɛ Wankpoo yola hazu kota lembe ha ngimɔ ka hio wi mɔ Israel fɛt a kuo li Zurdain nɛ nanga gboa kuli li.
The Seed Company