Zozue2
1Ha guru pɛ Sitim, Zozue bem pɛ Nun, tomsa nɛ uso hio wi bwa mɔ ki hio goto wen hazu lea, nɛ ngba le mɔ Zeriko. Hɔa ha Zeriko, hio wan mbarimɔ nɛa nɛ ɔnu ha pɛ ma bhoko ka tom pɛa nɛ dea wanza ka ling wa nɛ Rahab.2Ma wi tɔa ha kongapora mɔ Zeriko «Zɔk hio wi mɔ Israel lea hazang le kɛ nɛ zɛkɛ, mbwa tɛa a mbaramɔ.»3Ha ngimɔ ɛngi kongapora mɔ Zeriko tɔa ha Rahab: «Hio wei ka tɛa ha pɛ mɛ, mbwa tɛ ha wenzu gbindiɔ mɔ. Haa mbwa ha ɔ.»4Rahab kuo mbwa nɛ usi, hapata a tɔa: «Kanɛ yo kɔ mbwa tɛa ha pɔm, ma mi ing bhandi ka mbwa gutɛ tɛnɛ na.5Mbwa kiforo nɛ mbolo zɛ ha ngimɔ ka ɛ a gdɔka nu twa ngba le. Mi ing bhandi ka mbwa nɛa angna. Ka ɛnɛ ngayatɛ, ɛnɛ lɛma kpa mbwa.»6Tangere, wɛnɛ kuo mbwa gde hazang twa ha ngɔn, wɛnɛ uso mbwa ha soko hio te lɛn ka wɛnɛ bhɔngara.7Hio wan-nɛ-tom pɛ kongapora mɔ Zeriko naka pata mbwa, ha ngimɔ ka mbwa a gboa hazang lea, ɛ gdɔka nu twa ngbale. Mbwa kio hio wan mbarimɔ ha liwal ka ɛ ku li Zurdain nɛ nanga.8Ha ngimɔ ɛngi, Rahab danga hazu twa ha pɛtɛ hio wan mbarimɔ Sɔngsi nde mbwa a ɔnu.9Rahab tɔa ha mbwa: «Mi ingɔ nde Wankpoo haa le kɛ ha ɛnɛ. Ke pɛ ɛnɛ pena tɛ ɔ gdang wi fɛt bonɛ da na ha wenzu tɛa pɛ ɛnɛ.10Hazu ɔ zea nde Wankpoo ɔsasa nana li tɔng mɔ hio Sisongo ha li ɛnɛ ha ngimɔ gutɛ mɔ gboa pɛ ɛnɛ ha Ezipte. Ɔ zea fin wen pɛ hio kongapora bwa mɔ kandɔ pɛ hio Amori, Sihon nɛ mɔ Og, ka ɛnɛ gbɛa mbwa ha wal gutɛ swe mɔ Zurdain, nɛ ɛnɛ gdangsa hio wi mɔ pɛ mbwa fɛt.11Mɔ ka ɔ zea, sila ɔ bona fɛt, ma wi ndang bo nɛ da mɔ yol a li ɛnɛ na. Yo mɛgi, Wankpoo, Sɔ pɛ ɛnɛ, nɛ Sɔ ka dung hazang ngɔn, ha li swe, ha gdɔk nɛ ha zunu.12Sising, ɛnɛ kan-nu ha mi nɛ ling Wankpoo mɔ de dedea nɛ mi nɛ hio nam pɔm, tuka ɛngɛ ka mi dea nɛ ɛnɛ, ɛnɛ de mamɔ mɔ osi a mi tɛwen.13Ɛnɛ gɔn-nu ha mi mɔ kpasisi bafa mi, nɛ nana mi, nɛ yami mɔ wei nɛ mɔ bhoko, ɛnɛ beosi ha ɔ nde ɛnɛ lɛm mɔ gbɛ ɔ na.»14Hio wan mbarimɔ kiforo wen ha wɛnɛ: «Ɔ kana tɛ ɔ, ka mɛ gbasisi wen tɛa pɛ ɔ ha wi na. Ɔ bede dede sila ha tɛ mɛ, ɔ bede dede mɔ nɛ mɛ, ha ngimɔ ka Wankpoo behaa ha ɔ le kɛ.»15Rahab bɛa twa pɛa a ngeng mɔ sɛnga le. Mɛgi, wɛnɛ zilso mbwa ha tolo twa nɛ pɛl.16«Ɛnɛ nɛ̂ nɛ usi tɛ ha zu bebe ngari mɔ tɔnde hio wi ka ki ɛnɛ mbwa a kpa ɛnɛ na. Ɛnɛ dung yala tar, gboa ngimɔ ka mbwa nduko. Hapata, ing ɛnɛ sio.»17Mbwa tɔa a wɛnɛ: «Mɛ ana ha ɔ mɔ gɔn nu, ɔ bede tuka ɛngɛ mɛ ana.18Zɔk mɔ ka mɛ bede nɛ ɛngɛ: Swe ka ɔ be lea zang le pɛ mɛ, mɛbe hɛl gbɛ nu la ha tolo twa ka mɛ ba zilso ɔ a yo. Hapata, mɛ bewesiri nana mɛ hinɛ bafa mɛ, yamɛ mɔ bhoko, mɔ wei hinɛ hio nam pɛmɛ fɛt hazang twa pɛmɛ.19Ka ma wi gboa hazang twa pɛ mɛ, wen fio pɛa besi hazu wa wan tɛ, bo hazu ɔ na. Ma, ka yo nɛ ɔ a de mɔ ngaya ha tɛ ma wi mɔ twa pɛ mɛ, wen fio pɛa yo bedung ha zu ɔ.20Ma, ka mɛ gbasa wen nanga nɔ pɛ ɔ ha ma wi, ɔ lɛm mɔ demɔ ka ɔ gɔna nu ang na.»21Rahab kiforo wen «Nɛ dedea!» Hapata, wɛnɛ gdea mbwa pen. Tikiring, wɛnɛ hɛla gbɛnu la ha tolo twa pɛa.22Hio wan mbarimɔ nɛa hazu ngari, mbwa uso tɛ yala tar gboa ngimɔ ka hio wan ki mbwa nduko ha Zeriko, tangere mbwa kio mbwa gan.23Mɛgi, mbwa bwa fɛt gboa ha bhandi uso, nɛ mbwa zilo ha bebe ngari ku li Zurdain nɛ kpa Zozue bem pɛ Nun. Mbwa bulso mɔ fɛt ka hɔa ha mbwa.24Mbwa tɔa ha wɛnɛ «Mbete wen, Wankpoo gdea lea fɛt ha kɔ ɔ kari. Hio wi ka ɔnu hazang lea, da pɛ mbwa kara fɛt ha liɔ.»
The Seed Company