Zozue4
1Ha ngimɔ ka kandɔ fɛt mɔ Israel kuo li Zurdain kari, Wankpoo tɔa ha Zozue:2«Ɛnɛ sangili kandɔ hio wei bhuko gbala bwa, ha soko kandɔ wi ndang,3nɛ hanu ha mbwa a nɛ nɛ̂ ku hazang li Zurdain ta bhukɔ gbala bwa, ha bhandi ka hio wan-hasadaka yola ang. Mbwa a gde yo ha bhandi ka ɛnɛ be ɔnu ayo nɛ zɛkɛ.»4Zozue saa hio wi mɔ Israel bhuko gbala bwa ka wɛnɛ sala.5A tɔa mbwa: «Ɛnɛ pen ha Sɔngsi kubha pɛ Wankpoo Sɔ pɛ ɛnɛ ha binsila Zurdain. Wi ndang aku ta ha zu gdaka wa ha lɛm nɛ kandɔ ndang ndang mɔ Israel.6Hio ta ndɔng be gbaa tazu ɛnɛ nɛ mɔ ka ba hɔ akɛ. Ma swe, ha ma yala, hio bem pɛ ɛnɛ be ani nde: ‹‹Hio ta ndɔng osi nɛ ge ha ɛnɛ e?››7Ɛnɛ bekifiri wen ha mbwa: “Li Zurdain gɔna soko ha ngimɔ ka kubha mɔ mbon pɛ Wankpoo ha kuo li. Ɛy, ha ngimɔ ka kubha ha kuo li Zurdain, lia kɛtana soko bwa hio ta ɛngɛ bedung mɔ gbaa tazu hio wi mɔ Israel kpoo nɛ kpoo nɛ mɔ kose ɛngɛ.’’››8Hio wei ka Zozue sala, mbwa dea lɛm nɛ hanu ka wɛnɛ haa. Mbwa kaya ta bhuko gbala bwa ha binsila Zurdain, lɛm nɛ kandɔ ndang ndang mɔ Israel, tuka ɛngɛ ka Wankpoo nɛ tɛ wa tɔa ha Zozue. Mbwa kaya hio ta nɛ gdea bhandi ka mbwa ɔanu ang nɛ zɛa.9Zozue bɛa hio ta bhukɔ gbala bwa ha binsila li Zurdain, ha bhandi ka hio wan-hasadaka, ka gu kubha mɔ mbon gdea nanga mbwa ha yo. Hio taa ndɔng bhɔna gbo mɛsɛ.10Hio wan-hasadaka ka guo kubha mɔ mbon yola hazang li Zurdain gboa ngimɔ ka hio wi mɔ Israel dea hio wi mɔ fɛt ka Wankpoo tɔa nɛ liwal pɛ Zozue. Mɛgi, Zozue dea tuka ɛngɛ ka Moize haa nɛ nu ha wɛnɛ. Hio wia kuo li nɛ hasa.11Ka hio wi mɔ lea fɛt kuo li kari, hio wan-hasadaka kiforo ha Sɔngsi nzɔng nɛ olo kubha.12Hio wei mɔ kandɔ pɛ Ruben nɛ pɛ Gad hinɛ titi-kandɔ pɛ Manase, nɛ hio wi mɔ bi nɛ bulo pɛ mbwa fɛt kuo li ha Sɔngsi hio wi mɔ kandɔ Israel, tuka ɛngɛ ka Moize ba tɔ ha mbwa.13Hio wei sanga nɛ saki bhukɔa nar bhɔngara tɛ mbwa mɔ pen ha Sɔngsi Wankpoo ha nɛa bio bulo, mbwa kuo Zurdain mɔ nɛ ha mɔsoykisi mɔ Zeriko.14Ha ngimɔ ɛngɛ, Wankpoo dea nde Zozue hatɛ nɛ gasa ha li hio wi mɔ kandɔ mɔ Israel fɛt, nɛ ha ngimɔ ka a bhɔna nɛ zu tunɔ, mbwa haa ziotɛ ha wɛnɛ tuka ka mbwa bahaa Sɔngsi ha Moize.15Hapata, Wankpoo tɔa ha Zozue:16«Hanu ha hio wan-hasadaka ka gu kubha mɔ mbon ka takarata dung hazanga mɔ gbo hazang Zurdain.»17Zozue haanu ha hio wan-hasadaka wɛnɛ tɔa: «Ɛnɛ gbo hazang li Zurdain».18Hio wan-hasadaka zea nu Zozue. Ha ngimɔ ka mbwa agdea nanga mbwa ha nu ngengenu, lia dea mbeng kifiri ha bhandi pɛa nɛ yo angara foka tuka mɔ Sɔngsi.19Yo nɛ yala bhukɔ mɔ bosi ze ka hio kandɔ mɔ Israel kuo li Zurdain. Mbwa bhɔngara guru pɛ mbwa ha Gilgal, ha gutɛ swe mɔ Zeriko.20Zozue yolsa ha Gilgal hio ta bhukɔ gbala bwa ka mbwa kaya hazang li Zurdain.21Hapata a tɔa ha hio wi mɔ Israel: «Ma swe bin, ka hio bem pɛnɛ beani ɛnɛ nde: “Hio ta ndɔng osi nɛ ge?”22Ɛnɛ beosi gotoa ha mbwa nde hio wi mɔ Israel ba ku Zurdain li tɛ ndɔ nanga mbwa na.23Hazu, Wankpoo Sɔ pɛ ɛnɛ ɔsasa Zurdain mɔ haa liwal ha ɛnɛ mɔ ku li, tuka ɛngɛ ka wɛnɛ baɔsisi ha ɔ nana li tɔng mɔ hio Sisongo.24Wɛnɛ dea mɔ mɛgi mɔ osi nde hio wi fɛt mɔ nzan a ing zege ngaya pɛ Wankpoo nɛ gasaa, nɛ nde ɛnɛ wi mɔ Israel ade ke pɛ Wankpoo Sɔ pɛ ɛnɛ swe fɛt.»
The Seed Company