Angaramɔ (Genèse)7
Noe lea ha zang kuga hinɛ hio nam pɛa
1Wankpoo tɔa ha Noe: «Le zang kuga hinɛ hio nam pɛ mɛ, hazu mi zɔka nde mɛ nɛ̂ dede wi ha lî mi ha soko hio wi mɔ ngimɔ pɛ mɛ.2Mɛ ku ha soko hio tili sari ka dung nɛ dedea hio nanambua hinɛ bafambua mɔrkɔ zanga bwa, mɔrkɔ zanga bwa nɛtɛ nɛtɛ. Hapata mɛ ku ha soko hio sari ka bo nɛ dedea na, bafambua nɛ nanambua ndang ndang nɛtɛ nɛtɛ.3Pɛ hio nɔy, mɛ ku fin hio bafambua mɔrkɔ zanga bwa, hinɛ hio nanambua mɔrkɔ zanga bwa mɔ hio tilia nɛtɛ nɛtɛ. Bafambua ndang hinɛ nanambua ndang. Mɛgi, ɔ bepam hio kandɔ tili sari ndɔng fɛt ndang ndang.4Hazu bhɔna yala mɔrkɔ zanga bwa kade mi ade kolo a ɔl ha zang yala bhukɔa nar, swe nɛ zɛ. Mi bekarsi hio wi mɔ fɛt ka mi dea ha zu nu.»5Noe dea mɔ fɛt ka Sɔ tɔa ha wɛnɛ mɔ de.Kolo dea mbeng ba zu nu fɛt
6Noe dungɔ nɛ bɛlɛ gɔmmay mɔrkɔ zanga ndang ha ngimɔ ka gasa mbeng kolo hɔa nɛ̂ ha zu nu fɛt.7Noe hinɛ hio bem pɛa, ko pɛa, nɛ hio ko pɛ hio bem pɛa lea ha zang kuga yu nɛ ke mbeng likolo.8Hio dede sari, hio gdanga sari, hio nɔy, hinɛ hio sari ka hay hay nɛ nu,9bafambua hinɛ nanambua tɛa ha pɛtɛ Noe ha zang kuga, tuka ɛngɛ ka Sɔ haa nɛ nû.10Yala mɔrkɔ zanga bwa hapataa, gasa mbeng likolo hɔa ha zu nu.11Ha ngimɔ ka Noe tɛ bo nɛ bɛlɛ gɔmmay mɔrkɔ zanga ndang ha zebwa ze, ha yala bhukɔ zanga mɔrkɔ gbala bwa mɔ zea, hio li mɔ sinu ha gboa nɛ ngaya ha hio ndong nɛtɛ nɛtɛ. Hio nûtwa mɔ ngɔn gbosara nû nɛ gasa.12Kolo ɔla ha zang yala bhukɔa nar, swe nɛ zɛ.13Ha ndangtɛ swe ɛngi, Noe hinɛ ko pɛa, hio bem pɛa Sem, Ham, Yafet, hinɛ hio ko pɛ hio bem lea ha zang kuga,14nɛ hio tili sari ndang ndang fɛt, hio tili sari mɔ le nɛtɛ nɛtɛ, hio tili sari ndang ndang ka hay nɛ nu fɛt, hio tili nɔy nɛtɛ nɛtɛ ka buy nɛ ngɔn.15Hio mɔ fɛt ka dung nɛ zutunɔ, nanambua nɛ bafambua, lea ha zang kuga ha pɛtɛ Noe.16Hio mɔ fɛt ka dung nɛ zutunɔ, bafambua nɛ nanambua, lea ha zang kuga tuka ka Sɔ haa nɛ nû ha Noe. Hapata Wankpoo gdɔka nûtwa kuga ha gdong Noe.17Gasa mbengli ɛngɛ dea yala bhukɔa nar ha zu nu. Li dea mbeng, yo danga ha ngɔn nɛ nu pentɛ, nɛ kuga dungɔ ha zu li.18Mbenglia dungɔ ha guo tɛ pentɛ ha zu nu fɛt, nɛ kuga dungɔ ha foka ha zu li.19Li bhɔna ha dea mbeng pentɛ ha zu nu, nɛ yo gdɔka zu hio kuso ngarî fɛt ka dungɔ ha zu nu.20Li dea mbeng gdɔki zu hio ngarî fɛt, nɛ pen zua mɛtɛrɛ mɔrkɔ zanga bwa.21Mɛgi, hio wi mɔ fɛt ka dungɔ nɛ zutunɔ, nɛ ha nɛa nɔ ha zu nu: hio nɔy, hio sari mɔ le, hio sari kumbɔ, sari bɛlɛ, hio sari ka hay nɛ nu fɛt, hio wi mɔ ka dungɔ ha zu nu, nɛ hio wi fɛt Fea.22Hio mɔ fɛt ka dungɔ ha ɔma, ka dungɔ nɛ zutunɔ, nɛ hio wi mɔ fɛt ka dungɔ ha zu nu, kpaa fio.23Mɛgi, Sɔ bhondasa hio wi mɔ fɛt ka dungɔ nɛ zutunɔ ha zu nu. Hio wi, hio sari mɔ le, hio sari kumbɔ, hio sari bɛl, hio sari ka hay nɛ nu, nɛ hio nɔy fɛt kara. Kanɛ̂ Noe, hinɛ hio wi ka dungɔ hinɛ wɛnɛ ha zang kuga ha bhɔn nɛ zutunɔ.Noe hinɛ hio nam pɛa gboa ha zang kuga
24Mbengli dea ha zu nu fɛt nɛ̂ yala gɔmmay ndang zubhukɔa mɔrkɔ.The Seed Company