Angaramɔ (Genèse)6
Sɔ Wankpoo haa nû mɔ bhondisi hio wi mɔ nzan
1Ha ngimɔ ka hio wi dɔka ha zu nu, nɛ mbwa angara bhɛa hio bebhoko,2hio bewei pɛ Sɔa zɔka nde hio bebhoko pɛ hio wi dungɔ nɛ lɔka, yo nɛ̂ hio bebhoko ndɔng ka mbwa kpaa mɔ si.3Mɛgi, Wankpoo tɔa ha sila wa: «Ɔmi pɔm bhɔn kpoo nɛ kpoo ha tɛ wi na, hazu wɛnɛ nɛ̂ wi ka befefe. Dɔka wi bedung nɛ zutunɔ gbo kanɛ̂ bɛlɛ gɔmmay ndang zubhuzebwa Sɔna.4Yo dungɔ ha ngimɔ pɛ hio kuso wi ha zu nu, hapata ɛngɛ ka hio bewei pɛ Sɔ tɛa tɛ si hio bebhoko pɛ hio wi, nɛ mbwa bhɛa hio bem hinɛ mbwa. Hio kuso wi ndɔng dungɔ nɛ̂ hio wi ka dea hio gasa mɔ Sɔngsi, nɛ ling mbwa pena pentɛ.5Wankpoo zɔka nde gdangamɔ pɛ hio wi dungɔ nɛ gasa pentɛ ha zu nu. Yala ndang ndang, takaramɔ ha sila wi dungɔ nɛ gdanga.6Yo nɛ̂ ɛngi ka Wankpoo takara mɔ hazu wi ka wɛnɛ dea gde ha zu nu. Nɛ ngɔtɛ baa wɛnɛ pentɛ.7Wankpoo tɔa: «Mi bebhondisi hio wi fɛt ka mi dea ha zu nu, gbo ha tɛ sari mɔ le, hio sari ka hay nɛ nu, nɛ hio nɔy ka buy nɛ ngɔn. Mi ha takara mɔ nde, mi de mbwa ha wen ge?8Maa, pɛ Noe, Wankpoo nɛ totɛ ha wal pɛa.Sɔ Wankpoo tɔa ha Noe mɔ de ma kuga
9Ɛngɛ nɛ kasiwen pɛ Noe: Ha soko hio wi ha ngimɔ pɛ Noe, kanɛ wɛnɛ ndang ha dung nɛ̂ dede wi, wen bo ha zu wa na, wɛnɛ nɛ̂ nɔ hinɛ Sɔ.10Noe bhɛa hio bem bewei tar: Sem, Ham hinɛ Yafet.11Nu gdanga ha lî Sɔ. Hio deamɔ nɛ ngaya sungiri may baa bhandi.12Sɔ zɔka nde nu gdanga kari, hazu hio wi gdangsa dungɔ nu pɛ mbwa ha zu nu.13Mɛgi, Sɔ tɔa ha Noe: «Mi ngoy mɔ karsi hio wi mɔ zu nu fɛt, hazu mbwa ha dea ngaya sungiri nɛ may pentɛ ha zu nua. Mi bebhondisi mbwa, nɛ nua fɛt.14Mɛ ku ma nga te, mɛ bhɔngiri nɛ ma dede kuga ha wen zu mɛ. Mɛ gɔn zang kuga, nɛ hio sokoa adung nɛ dɔka nɛtɛ nɛtɛ. Mɛ gdɔki hio tolo ka dung ha zanga, hinɛ hio wi mɔ gdonga nɛ ma tu ndamba ka ɛ sa nde goudron.15Mɛ de kugaa tuka ɛngɛ: bɔya nɛ̂ mɛtɛrɛ gɔmmay ndang zubhukɔa mɔrkɔ, dɔa nɛ̂ mɛtɛrɛ bhuzebwa zanga mɔrkɔ, nɛ kusoa ha ngɔn nɛ̂ mɛtɛrɛ bhukɔ zanga mɔrkɔ.16Mɛ de zutwa ha zua, nɛ mɛ gde ma mɔsoykile bhandi tuka tolotwa ha gɛl twaa, mɛ gde soko zutwa hinɛ pɛtɛ kuga ha kala adung nɛ̂ Santimɛtɛrɛ bhukɔa mɔrkɔ. Mɛ de nûtwa ha ma bhalkɔ pɛtɛa. Mɛ de hio ma twa tar ha zanga ha zu may: ndang ha gdɔk, bwa twaa ha zu mɔ gdɔk, nɛ tar twaa ha zu bwa twaa.17Pɔm, mi ha dea nde kolo a ɔl ade gasa mbeng ha zu nu fɛt, nɛ agbɛ hio wi mɔ ka dung nɛ tunɔ fɛt.18Maa, pɛ mɛ, mi bede mbon hinɛ mɛ. Mɛ bele zang kuga hinɛ hio bem pɛ mɛ, ko pɛ mɛ, nɛ hio ko pɛ hio bem pɛ mɛ.19Mɛ bele fin nɛ hio sari bwa bwa nɛ tilia nɛtɛ nɛtɛ ha zang kuga, bafambua ndang nɛ nanambua ndang kade mbwa abhɔn nɛ zutunɔ mɔsoykisi hinɛ mɛ.20Ha soko hio nɔy, hio sari mɔ le, hio sari ka hay nɛ lîsila, mɛ ku bafambua ndang nɛ nanambua ndang gde ha pɛtɛ may nɛ̂ nɛ̂ ka de mbwa adung nɛ tunɔ.21Pɛ mɛ, mɛ ku hio wi mɔ fɛt ka ɛ ha yɔnga, mɛ pam hio yo ha tɛ mɛ mɔ tɔ nde yo adung nɛ yɔngamɔ pɛ mɛ, hinɛ pɛ hio sari ndɔng.»22Noe dea mɔ tuka ɛngɛ ka Sɔ tɔa ha wɛnɛ.The Seed Company