Angaramɔ (Genèse)8
Kpogio mbeng li
1Tazu Sɔ gbaa nɛ Noe, hinɛ hio sari bɛlɛ nɛ hio namdalɛ fɛt ka dungɔ hinɛ wɛnɛ ha zang kuga. Sɔ dea nde ma gbabok ayu ha zu nu, nɛ mbengli zilo ha zu nu.2Hio kolo mɔ sinu fok fin na hinɛ hio nutwa ngɔn fin gdɔka. Kolo ɔl fin na.3Likolo tɛ ha zu nu nɛ hɔn nɛ hɔn, nɛ li ɔsa ha zang hio yala gɔmmay ndang nɛ bhukɔa mɔrkɔ.4Yo dungɔ ha yala bhukɔ zanga mɔrkɔ gbala bwa mɔ mɔrkɔ zanga bwa zea ka kugaa yola nɛ̂ ha zu hio ngarî mɔ Ararat.5Likolo bhɔna ha ɔsa teee gbo ha bhukɔ ze. Ha bosi yala mɔ ze bhukɔa, hio zu ngarî angara gboa ha dɛl.6Hapata yala bhukɔa nar, Noe gbosasa tolo twa mɔ kuga ka wɛnɛ dea.7A guo kɔ̂ ha ma naduagɔ ka gboa ha zang kuga nɛ̂ ha dɛl, nɛ buy pen, nɛ pea hapata may gbo ha ngimɔ ka li ɔsa, nɛ nu tɛ bo nɛ kota.8A guo kɔ̂ fin ha ma gbakuli nde wɛnɛ azɔk mɔ mana li ɔsa, nɛ nu kota.9Maa, gbakulia tɛ kpa ma bhandi mɔ dung nu ang na, nɛ a nduko nɛ pata si ha zang kuga, hazu li bhɔna ha zu nu. Noe yɛfafa kɔ̂ ku nɛ wɛnɛ gde ha zang kuga hapɛtɛ wa.10A kera fin ma yala mɔrkɔ zanga bwa, nɛ a guo kɔ̂ fin ha gbakuli gbo ha zang kuga.11Gbakulia nduko ha pɛa nɛ mbolo, nɛ a bhama ma wate ka ɛ sa nde olivier ha kokonû wa. Mɛgi, Noe ingɔ nde li zilo.12Wɛnɛ baa sila fin ha zang yala mɔrkɔ zang bwa, nɛ wɛnɛ guo kɔ̂ ha ma gbakuli ka wɛnɛ buyo pen popopo.13Ha ngimɔ ɛngi Noe kpa bɛlɛ gɔmmay mɔrkɔ zanga ndang gbala ndang, ha bosi yala mɔ bosi ze, li ɔsa ha zu nu. Noe guo mɔ gdɔki nɛ zu kuga yunɛ. A zɔka nde nu tɛ bonɛ kota.14Ha yala bhuze bwa zanga mɔrkɔ gbala bwa mɔ bwa ze, nu tɛ bonɛ kota.15Mɛgi, Sɔ wolamɔ ha Noe nde:16«Gbo ha zang kuga, mɛ, ko mɛ, hio bem pɛ mɛ, hinɛ hio ko pɛ hio bem pɛ mɛ.17Gbosisi hio tili sari fɛt ka dungɔ hinɛ mɛ ha zang kuga. Hio nɔy banɛ hio sari ka hay hay nɛ nu kade mbwa ayɛbhi ha zu nu, mbwa a bhɛ don nu.»18Noe gboa hinɛ hio bewei pɛa, ko pɛa hinɛ hio ko pɛ hio bewei pɛa.19Hio tili hio sari fɛt, hio sari ka hay nɛ nu fɛt, hio nɔy fɛt, nɛ tilia nɛtɛ nɛtɛ fɛt gboa ha zang kuga.20Noe dea ma go nɛ ling Wankpoo. A kuo hio tili sari ka dung nɛ dedea, nɛ hio tili sari ka dung nɛ dedea na, nɛ a dɔa yo nɛ sadaka ha Sɔ ha zu go ɛngi.21Wankpoo zea dede pɛl kulo sari, nɛ a tɔa ha sila wa nde: «Hapata ɛngɛ mi lɛm fom fin nu ha wen zu wi na, hazu sila wi dungɔ nɛ gdanga ha ngimɔ ka wɛnɛ bhɔna nɛ pɔlɔmbɔ; nɛ mi lɛm mɛl fin hio wi mɔ ka dung nɛ zu tunɔ na, tuka mi dea.22Ha ngimɔ ka nu bebhɔn, hio yɔng ka ɛ gun, nɛ hio yɔng ka ɛ zuri, gangmɔ hinɛ gbɛngamɔ, ngimɔ kolo, kakala, swe hinɛ zɛ lɛm mɔ kari na.»The Seed Company