1 Korintiyawa7
1Nakanya kǝ ɓǝra chihamichiɗi yaritǝwunsi. Ndiˈchan si hishnefa kǝ mǝntǝ nunefa wa.2Paɗ kǝthlǝm rakandǝ fǝlaukǝt har, kǝmsi chika wun hishnefa kǝn tǝ nuwan, chika wun nunef paɗ tǝ chimaɗan.3Hishnefa kǝ ndiiɗan tǝ ter ˈyan ha yi reta kǝmɗi nuwan, kǝɗu paɗ nunafan kǝmɗi chimaɗan.4Nunafan alkǝtˈyansi kǝ ɓǝra fatˈyan wa, chimaɗan naa alkǝtˈyansi kǝ ɓǝrataˈan. Kǝɗu paɗ hǝsnafan alkǝtˈyansi kǝ ɓǝra fatˈyan wa, nuwan naa alkǝtˈyansi kǝ ɓǝrataˈan.5Kǝthlǝm ndaˈan kǝ ˈyatawun raˈan fat ˈyowun wa, maa ngga tǝ nggǝmawun kǝ wan shengngǝn chaˈan ngguɗyeh kǝthlǝm kǝ shiwun wa, kǝnowun nggǝr kǝmnda. Kǝthlǝm kǝ lǝm Hwerǝ wunchǝ kǝ chǝwun ɓǝɓifata wa, tǝmɗi kumi kǝrǝs yowun wa.6Mbuˈchi thleya kǝ sakawun ha, ngga kusiˈ wa.7Yahtinchi kǝn chika wuni kǝɗ nggǝta, kǝn wakchǝ reta. Paɗ nakan chikawuni tǝ weˈtǝ mbǝrˈǝniɗi fǝrandǝ Farta. Yowun weˈtǝ mbǝrˈǝniɗa, yowun paɗ weˈtǝ thleyu.8Kǝ ɗar fee kǝn wakchǝ reta, tǝ fee mǝrtǝ hǝssǝ yanda, thlǝ ɗǝbanchi nan nat ndiˈchan kǝ chok ndǝ ha kǝn wa ndǝ reta wa, kǝɗ nggǝta.9Paɗ maa ngga ndǝ mbahǝn kǝrǝs wa, tǝr kandǝ nunefa. Ai kwech chan kǝ tǝr ndǝ nunefa, mǝni kǝ san yah mǝndǝ tǝ raˈan, hur inchiyanda.10Nakanya kusiˈ nati fǝrandǝ fee tapech kǝ kǝndǝ reta. Kusiˈ tǝɗa ngga yina wa, yi Chinda Yesu tǝ indiyan. Ndat wa, nunefa kǝ chakndǝ ha tǝ chǝmaɗan wa.11Paɗ maa chek ha tǝ chǝmaɗan, kǝ chok ha, kǝ kǝntǝ reta wa. Maa yahtǝ reta, kǝ nggǝranchiˈin kǝmɗi chimaɗan kǝ tahsandǝ kaɗi. Hishnef paɗ kǝ chak ha tǝ nuwan wa.12Kǝ ɗar takichaˈan paɗ, nggǝt mbuˈcha, ngga Chinda Yesu wa. Maa yowun wan mandǝsi thla naa nuwan si fǝr wakchǝ kit, nggǝman kǝ nuɗi kǝ choknda, kǝɗu, kǝ chakha tǝ ndǝ wa.13Maa yowun nunǝfsi thla naa chimaɗan si, thla naa wak tǝ kit ˈyansi, nggǝm kanfa kǝ chokndǝ rǝmma, kǝɗu, nunafan kǝ chakha tǝ ndǝ wa.14Kǝthlǝm hǝsnafɗi thlǝ fǝr wak chǝ kit, nechan chǝɗchǝɗ tǝmɗi chok tiyan arta tǝ nuwan. Kǝɗu paɗ, nuɗi nawaktǝ fǝr kit ˈyansi, nechan chǝɗchǝɗ tǝmɗi chok tiyan arta tǝ chǝmaɗan. Maa ngga kǝɗu wa, wan chanda nechandǝ choktǝ kǝ tǝkǝmǝnchaˈan, paɗ kittaˈan, tandǝ fǝ chǝɗchǝɗ cha.15Ndu hǝs nafan, ndu nunafan thla thlǝ fǝr wakchǝ kit yehsi kǝ chakndǝ ha, kǝɗu, chak kandǝ ha. Ə minni wan mana kǝ hishnefa ndu nunefa hur fǝr kit, chok wa kǝ nwaat ɗar nanda wa, kǝthlǝm ˈyech Farta nggamǝn kǝ chok has has kǝta.16Chǝ nunǝfa, sǝnwen wa, ndu tǝmɗiyo naa chimatwu mbǝs hǝraˈta wa? Chǝ hishnefa, sǝnwen wa, ndu tǝmɗiyo naa nuwu mbǝs hǝraˈta wa?17Chika wuni kǝn natˈyan ha kǝɗ thla tahsandǝ Chindǝ si. Naɗi ha ˈya Farta ndi kǝthlǝm ndaˈan. Kusiˈ tǝɗi nati fǝrandǝ nat nafcha fǝ fǝr kit chǝ hacha.18Nat thla ˈya Farta ndi, thla naa hechet ˈyansi choh, kǝ ka choktǝ ha yi kumi hechata wa. Nat thla ˈya Farta ndi, thla nawaktǝ hechetˈyansi choh, kǝ ndawa nwaat kǝ hechan fee wa.19Hecheta ndu kumi hecheta, ngga ǝnawa, paɗ fǝr maanda kǝ kusiˈ chi Farta, ndaˈan yahtǝ Farta.20Chika wuni kǝ chok kǝɗ ǝnɗi natǝn fartǝɗi ˈya Farta anchi.21Maa mafat nako fartǝ ɗi ˈya fee wechi, kǝ ɓillen wa. Maa ǝnsi natu mbahǝn chǝt kǝ chenkesh hur maafakitˈyo, chiko.22Nat thla nech kǝ mafata fartǝɗi ˈya Farta anchi kǝ chok kǝ thlǝ para Kǝristi, ngga mafat nakan paɗ wa. Kǝthlǝm wumamtǝ indǝ tǝ Yesu Kǝristi. Kǝɗu paɗ, thla nawakchǝ kǝ mafata, fartǝɗi ˈya Farta ndi, chok kǝ mafati Kǝristi.23Hichǝ Farta wunchi tǝ ǝn ndiˈchan, kǝ nggǝmwunfa kǝ chokwun kǝ mafeechi nafcha wa.24Wan manchina, nat ǝnɗi naa nef huran, fartǝɗi ˈya fee anchi, chokkan huran kǝɗu tǝ Farta.25Kǝ ɓǝra nǝssiɗi nawaktǝ ret ˈyandǝsi kwaɗǝn, fǝri wu Chinda kusiˈ kǝ ɓǝra tǝ nanda wa. Paɗ nggǝt mbuˈ ǝnɗi nech wanɗǝkaɗatinchi ndat wa, nggǝt thlǝ fǝr kit, tǝmɗi kafati Farta.26Ninchi ha ndiˈchan, kǝmsi kǝ chok nef kǝɗ ǝnɗi natin, kǝthlǝm ɓahtǝɗi ha natmǝn huran nakanya.27Maa nuwusi, kǝ kelǝn nuwu ha wa. Maa tapawa kehwen nunefa wa, mǝ ndenwa no kah nunefa wa.28Paɗ maa kehǝn nunefa, chiwen ɓǝɓifata wa. Nuɗi nawaktǝ retˈyansi kwaɗǝn, maa kahan fee, chǝwa ɓǝɓifata wa. Yahchisi kǝ sǝnwun, fee kahchi kaana nandǝ sa ɓahta hur nat ˈyandǝ ha. Ndaˈan chich, yahtisi kǝ yipowunchi ǝ ɓahtǝɗi haya.29Wanmanchina, ǝnɗi nati mbuˈta ndaˈan nech kǝ, wanmǝnchiɗi tahsandǝ Farta ha ɗuk tǝɓata. Thlaˈtǝ nakanya, fee naa nǝssa ndǝsi kǝ chok nda kǝɗ nǝssa ndǝs wa.30Fee nech tǝta, kǝ chokndǝ kǝɗ ngga tǝnandǝ tǝtawa. Fee nech hur sǝk mbǝnchifa, kǝ chok nda kǝɗ nafchiɗi nawakchi hur sǝk mbǝndǝ fa. Fǝ hiˈicha paɗ, kǝ chok ndǝ kǝɗ ǝn ˈyandǝs wa.31Fee nech chit ter tǝ ǝna heshiɗiya, kǝ malandǝ ǝna heshiɗiya, kǝ tǝrantǝ hur indiyanda wa. Kǝthlǝm heshiɗiya kǝɗ ǝnɗi natǝn nakanya, mǝthlan mbǝrtǝ ha.32Yah wisi kǝ nowun hur ɓilla wa. Thla kahwakchi nunefa thlǝ ɓillechan tǝ tarchi Chinda kaˈan, kǝɗ thla natǝn tǝrandǝ hwiri Chindǝ ha.33Thla kahchi nunefa, thlǝ ɓillechan tǝ ina heshi, kǝɗ thla natǝn tǝrandǝ hwiri nuwan ha.34Chak hur indiyan ha chap hacha. Nuɗi nawaktǝ chimaɗan si, ndu wannuwaa, thlǝ ɓillechan tǝ tarchi Chinda kaˈan, natǝn chok tǝ chǝɗchǝɗ hur fata tǝ shemeta. Nuɗi naa chimaɗan sǝ paɗ, thlǝ ɓillechan tǝ ichi heshi, kǝɗ thla natǝn tǝrandǝ hwiri chimaɗan ha.35Mbuˈchi kǝɗu kǝthlǝm kǝ kǝsowun chisi, ngga kǝ ɗǝfiwunchis nwaat tǝ yowun kusiˈ wa. Yahchi kǝ chǝfee chikami hur mbanɗi kǝmchisi. Yahchi kǝ ɗǝfiwunchǝs, kǝ ɗǝfwun wanɗikaɗatˈyowun nat kǝ Chinda Yesu ngga tǝ chakandǝ hur inchiyowun ha wa.36Paɗ kǝ ndǝ fee wa nefa ɗǝf tǝ mee tǝ yowun nunefa thla chaˈchǝs kǝ kahan fee, maa sǝn wa saktiyan kǝmɗi wannuwanɗi natǝn kahta keˈke wa. Maa thlǝ kǝsanchǝ yah hunandǝ kaˈan, chikan ǝnɗi yahtǝ wanɗǝkaɗatˈyan, kǝ kahanchi. Kahanan, ngga ɓǝɓifata wa.37Paɗ nafɗi thlarchiha kǝ ɓǝra ǝnɗi yahtǝ wanɗǝkaɗatˈyan kaˈan, ǝnaɗan ngga nwaat kǝmɗiyan wa, thlǝ mbahǝnchan kǝrista, kǝ tǝr ǝ wanɗǝkaɗatˈyan wa nen kahanchi wannuwananˈyan wa. Mǝthlan paɗ, chǝ keˈke.38Kǝthlǝm ndaˈan thla kahanchi wannuwanɗi ɗǝftǝn miyan, chit ǝnɗi kǝmchisi. Mǝthlan tǝɗi kahawakchǝ paɗ pǝɗanchi ha.39Nunefa nen chak ha tǝ chimaɗan wa maa peˈha tǝ shishingnda, paɗ maa ǝ mǝri, nan mbahǝn kah thla yahtǝ wanɗǝkaɗatˈyan, paɗ kǝn kǝ thlǝ para Chinda.40Paɗ ǝ saktinchi, nan sǝk mbǝndǝfa maa nggǝrwa kahtǝ kan wa. Fǝrinchi kit si nggǝt maa Shemeti Fartinchisi.
The Seed Company