1 Korintiyawa8
1Nakanya kǝɗar ɗǝsǝmǝnɗi fǝrandǝ fee ɗǝhacha, kǝɗ ǝnɗi thlǝ mbuˈtǝ fee, sǝnmǝn wa, “Natmǝnya hurˈinchiyamǝnsi.” Hurˈinda thlǝ ɗǝfchan nefa kǝ maan inda, paɗ mbǝnfata tǝthl tǝnanchi nafcha.2Nat thla thlǝ kaɗechwa kǝdenwa sǝntǝ ǝna, kǝɗu, paˈ kǝ nakanya sǝn wa ǝnɗi kǝmchisi kǝ sǝn wa.3Paɗ nat thla thlǝ yahchǝ Farta, sǝn Farta anchi.4Tǝkǝɗu, kǝɗar sǝm ɗǝsǝmǝnɗi fǝrandǝ fee ɗǝhachǝ paɗ, sǝnmǝnsi ndat wa, “Nat heshiɗiya, ɗǝhata ngga mee i ǝn nakan wa, tǝ ndat paɗ wa, Farta arta, yowunsi wa, mǝthlan ndak.”5Chika nakan wa, fowunsi thlǝ ˈya fee wa farcha ǝ hur heshi tǝ hulafǝrta, kǝthlǝm “farchǝs” terchan tǝ “chincha” terchan.6Nat tǝkǝɗu, kǝmɗiyamǝn, Farta arta, mǝthlan nech kǝ Chinda. Mǝthlan chich ichǝ nat. Thla naa natˈyamǝn ha kǝthlǝm mǝthlan. Chindǝ paɗ arta, Yesu Kǝristi, thla ɓa ichi nat mǝɗiyan. Nggǝmǝn paɗ tǝmɗiyan natmǝn ha.7Paɗ ngga chikawun naa hurˈinɗiyansiya wa. Nakan paˈ kǝ nakanya, fowunsi sǝnchi ha tǝ manandǝ ɗǝhacha, thlǝ tǝrchanda wa ɗǝsǝmǝnɗi thlǝ sǝm ndǝ nda fǝran fee ɗǝhacha. Kǝthlǝm kaɗatyandǝ alkǝtsǝ kwaɗǝnwa, thlǝ tǝrcha nda wa ǝ tǝkǝmndǝ kaɗi.8Ɗǝsǝmnda nen ɓǝtǝmǝnchi nduk tǝ Farta wa. Maa sǝmwamǝn wa, kuɓawamǝn ǝna wa, paɗ maa sǝmmǝn, nen chekamǝnchi ǝna wa.9Paɗ kǝ mbǝrwunsi, kǝthlǝm mbǝs har chǝt ǝnɗi nat yahtǝwun, kǝ ɗǝftǝwunchi kǝ chokwun kǝ ɗakwan chewansarti fee nawaktǝ alkǝt ˈyandǝs wa.10Kǝthlǝm maa nii yowun wechi, chi ɗi sǝncha, chi sǝm ɗǝsǝmnda kǝtǝn ɗǝhacha, awi, nen ɗǝf anchi, mǝthlan tǝɗi nawaktǝ shemetˈyan kwaˈkwa, kǝ sǝm tǝ ɗǝsǝmǝnɗi fǝrandǝ fee ɗǝhacha wa?11Tǝ kǝɗu tǝmɗi sǝn ǝnˈyo, nan choktǝ kǝ hǝmndǝ wanmu ha, thla nawaktǝ shemetˈyan kwaˈkwa. Thla mǝrtǝ Kǝristi kǝthlǝm mǝthlan.12Maa chawun wanmanchuwun ɓǝɓifat tǝ mbanɗiya, thlǝ ɗǝfchowun wanmanchuwun fee nawaktǝ shemetˈyandǝ kwaˈkwa, kǝ chǝndǝ ɓǝɓifata. Tǝ kǝɗu, thlǝ chandǝ wun ɓǝɓifat Kǝristi hacha.13Kǝthlǝm ndaˈan, maa sǝm ɗǝsǝmnda thlǝ ɗǝfchan wanmaana kǝ che wansarta, nii tam kang thliu paɗ wa, kǝthlǝm kǝ ɗǝfi wanmaana kǝ che wansarta wa.
The Seed Company