1 Korintiyawa6
1Maa yowunsi naa ɓilla ˈyansi kǝ ɓǝra sheɗan pǝthlǝr wun, kǝthlǝm mǝ natǝn ɗǝt tǝ ɓilla ˈyan kǝmɗi fee thlǝ parawak chǝ Farta? Michicha nawak tǝn ɗǝt taˈanchi kǝmɗi nafchi Farta?2Awi, sǝnwowun wa nafchi Farta nech chakan mee heshiɗiya wa? Maa nowun ɗǝt chakan mee heshiɗiya, nowun mbahǝn chak mee kǝ ɓǝra wan wan ɓilla cha kǝɗ thleya wa?3Sǝnwowun wa namǝn chakan mee fǝ thlǝn cha wa? Maa nan chok tǝ kǝɗu, chak mee kǝ ɓǝra ichiɗi heshiɗiya nech wulamǝn ndǝ hacha wa?4Kǝthlǝm ndaˈan, maa ɓilla ˈyowunsi kǝ ɓǝra weˈtǝ ichiɗi kǝ ɗaya, michicha thlǝ nat wun kata fee naa natˈyandǝ ha kǝmwa su wa pangngǝn fǝ para Farta, kǝ chakowun chǝ ndǝ mee?5Mbuˈ chi kǝɗu kǝthlǝm kǝ harowunchǝ fata. Awi, ka nggǝ yowun nefsǝ thlǝ mbǝr ǝna arta ǝ hurwun, thla nech mbahǝn chak mee pǝthlǝr fǝ fǝr kit chǝ chap wa?6Kǝm waasi thla nech hur Kǝristi kǝ ɗǝ mǝk wan har sheɗan ǝ pangngǝn fee thlǝ fǝr wakchi kit, kǝthlǝm chak mee wa?7Nakan nggun mǝk wanhar raˈan, pinchan su wa tǝ wulowun chi fata yi kit. Ngga mǝ kwechan kǝ kǝrǝswun kǝ ɗathlowunchi ndǝ fa wa? Paɗ kǝ kǝrǝswun kǝ ˈyatowun chindǝ ǝnɗi nǝch kǝ yuwun wa?8Nat tǝ kǝɗu, nakowun ɗathla, nggun chǝt ǝnɗi kǝmwak chǝsi kǝmɗi fowun nafcha. Thlǝ chichowun ichiɗa maa kǝmɗi fee nech kǝ wanmanchǝwun hur Kǝristi.9Awi, ǝ sǝnwowun wa, fǝ kumi kakicha nandǝ chok kǝrsǝ mǝrti kutǝrak tǝ Farta wa? Mǝ lǝm fee wunchǝ wa. Nggǝ fǝlauchǝs wa, ndu fǝ chit tar ɗǝhacha, ndu fǝ kaa nǝssi fowuna, ndu hǝssa fǝ hunnat tǝ hǝssa.10Ndu yarcha, ndu fǝ yahˈicha, ndu fǝ saaˈicha, ndu fǝ sǝɓandǝ thlǝm nafchi kaɗi, ndu fǝ thlǝm nafcha kǝ thlǝnandǝ ichiyanda, nech yimndǝ kǝ kuturakti Farta wa.11Fowun hurwun nechandǝ kǝɗu choh. Nakanya, chapowun chi fee kaɗi. Hǝlengngowun chi Farta kaɗi, chokowun kan kǝ fee nawak tǝ ɓǝɓifech ˈyandǝs pangngǝn nan, hur thlǝm Chinda Yesu Kǝristi tǝ Shemetˈyan.12Naa yowun mbahǝn ndata wa, “Mbandǝn chǝs kǝ chi ǝnɗi yahti.” Aa, paɗ ngga chika mǝ nech chǝt ter kǝmɗiyo wa. Nii mbahǝn ndata wa, “Alkǝtǝn chǝs kǝ chi chika mǝ nat ǝnɗi yahti.” Paɗ nii nggǝmachi kǝ chi ǝn kuturakta tǝ nenchi wa.13Naa yowun nef mbahǝn ndata wa, “Chich fee ɗǝsǝmnda kǝthlǝm hwira, hwira kǝthlǝm ɗǝsǝmnda.” Thleya kit, paɗ Farta nan ɓǝlandat kat nat chap. Ngga kǝthlǝm fǝlaukǝt chǝt fee fata wa, chich fee kǝthlǝm manandǝ Chinmǝn Yesu, Chinmǝn Yesu paɗ kǝ fǝrtǝ shishingnda kǝ faɗan.14Farta thlaˈanchi Chinda ǝ mǝmatecha, nggǝmǝn paɗ nechan thlaˈamǝnda hur mǝmatecha tǝmɗi alkǝtˈyan.15Awi, sinwowunwa tanggathla fechyowun yi Kǝristi wa wa? Ni tǝr tanggathla fati Kǝristi kǝ wumaniha tǝ fati nunefa thla nech kǝ fǝlau wa? Nech tam cha wa.16Awi, sinwowunwawa, nat thla wumanchi fat tǝ fǝlau, chok ndǝ kǝ fat arta tǝ mǝthlan wa? Kǝthlǝm ndaˈan nechan kǝ yaraɗan hur Laulawati Farta, ndat wa, “nat ndǝ chap nandǝ choktǝ kǝ fat arta.”17Paɗ nat thla wumanchǝ inda tǝ Chinda, chok chan wa nechandǝ arta tǝ mǝthlan hur Shemeta.18Mbǝham langnga tǝ fǝlaukǝta. Nat takǝɗ ɓǝɓifaɗi naa nef chita ngga fat ˈyan natǝn cha nda wa, paɗ ɓǝɓifa fǝlaukǝta kǝ fat ˈyan natǝn chǝt ɓǝɓifata.19Awi, sǝnwowun wa fat ˈyowun Wiri Shemeti Farta wa, thla nech ɗas hurwun, thla fǝrowun ndǝ Farta wa? Ngga kun nech tǝ alkǝt indǝyowun wa.20Tǝ hǝyowun chǝ Farta tǝ feri Yesu Kǝristi. Kǝthlǝm ndaˈan manaman Farta tǝ fechˈyowun.
The Seed Company