VALOMA14
1Muvawanuke vala veneludikilo ludodo na mubihile kwimbinja pe semuvecha pamwi kwa mahocho gyawo.2Vamonga va vanu vakudikila kuva viliya kila kinukwa udikilo vao. Ila vangi kwa wogofi vawo viliya mahamba hela.3Munu yealiya kila kinu abihile kumbeda mweyage sealiya kila kinu. Na yula yealiya mahamba hela abihile kumuhiga yealiya kila kinu, kwakuva Nguluvi amdikiye.4Veve ani umuhige mnjagila va munu yungi? Peigita nongwa awu seigita nongwa mtwa vake nde ichela kuva agitile nongwa, daikwima kwa ukangafu kwakuva Mtwa Yesu iwesa kumukwimicha.5Munu iwesa kuhocha kigono kitunga ndi ngiba kuchumba kigono kingi, munu yungi iwesa kuhocha kuva figono fyonda fiwana. Ndeni kila yumwi na alolele kila kyeakihocha ndi kinofu.6Vala yevahocha kuva kigono kitunga ndi ngiba kuchumba kigono kingi, uyo igita ndeni kwa kwakuva lya kumginya Mtwa, na munu yula yealiya kila kunu igita ndeni kwakuva lya Mtwa Yesu, kwakuva akumuhongecha Nguluvi kwa kyakula kyeamgavile. Yula yeailema kuliya fyakula fingi, igita ndeni kwakuva lya Mtwa Yesu, na mwene akumuhongecha Nguluvi.7Kwakuva kwihela pagati lyetu yeikwikala kwakuva lyake mwene awu yeifuwa kwakuva lyake yumwene.8Kwakuva ngita tukwikala twikwikala kwakuva lya Mtwa na ngita tufuwa twifuwa kwakuva lya Mtwa. Ndeni petuvecha wumi awu kufuwa nefwe nde vanu va Mtwa.9Kwakuva Kilisito akafuwe na kuchulubuka neke aveche Mtwa va vanu vevagehe wumi na vanu vevafuwe.10Ndeni, kwa liki veve ukumuhiga mweyago? Na veve kwa liki ukumbeda mweyago? Nefwe vonda datukwima pautalo lya kigoda kya Nguluvi kya kuhigila nongwa.11Kwakuva ngita masimbo ga Nguluvi pegisimbilwe, Mtwa ilonga, “Ndikwilapa kwa litawa lyangu, ndakyene ngita pendikwikala, kila munu dakundifugamila, na kila munu akundijuma kuva nene ndi Nguluvi.”12Ndeni kila yumwi vetu dahumulila njowo chake yumwene pautalo lya Nguluvi.13Suwe, tuleke kuyihiga nongwa, ila tuyilolele, munu abihile kumgitila mweyage agite sambi.14Nene ndiyiwunge na Mtwa Yesu, ndichela kwa undakyene kwihela kyakula kyokyonda mchilo kuliya, ila munu yeihocha kuva kinu kitunga mchilo kuliya, ndeni iko nde mchilo kuliya kwa mwene.15Ngita peukumpyufisa mlongo vako kwa kyakula kyeuliya, suwe, veve wihela lukelo. Kyakula kyeuliya kibihile kumgita ayage mlongo vako, kwakuva Kilisito akafuwe kwakuva lyake.16Suwe, kila kye mulonga nyenye kuva nde kinofu, kikalongwa na vangi kuva sekinofu.17Kwakuva muung'achale va Nguluvi sekinu kya kuliya na kunyuwa, ila ndi kugita gala gyakumkelesa Nguvi kugita manofu na lutengamaso na lukeduko, fyonda ifi fihuma kwa Muhe va Nguluvi.18Munu yeakumgumbanikila Kilisito ngita ndeni, akumkelesa Nguluvi na daginywa na vanu.19Ndeni, twendelele kugita manofu gegileta lutengamaso na gyegitugita tugangamichwe.20Suwe, bihile kuhananga kasi lya Nguluvi kwakuva lya kyakula. Fyakuliya fyonda finofu, ila seunofu munu kuliya kyakula kyokyonda kyekimgita munu agite sambi.21Ndi ngiba kuleka kuliya uhuchi, awu kunyuwa difwayi awu kugita kyokyonda kyekimgita mweyago agite sambi.22Nondee veve kila kye ukukidikila mu kyanya lya lukani ulo iveche mugati lyako na Nguluvi. Afunyilwe munu yula yeseakuihiga kwakuva ilola kye igita nde ngiba.23Ila munu yula yeakwihochele kwa kuliya kyakula kyealiya, pealiya dahigwa na Nguluvi, kwakuva munu uyo aidikile agitle kinu se kinofu kwa Nguluvi ngita agitile kyokyonda ambakyo idikila ngajila udikilo ilo nalyo nde sambi.
The Word for the World International