Jems5
Eduri Mbon Inyene Utọñ
1Ndien ke emi, mbufo mbon inyene, ekpañ utọñ, etuaña enyuñ efiori eyet kabaña nsobo emi edisimde mbufo.2Mme inyene mbufo ata ñkarafañ, ndien mfem ata mme ọfọñ mbufo.3Gold ye silfa mbufo ata ñkarafañ, ndien ñkarafañ emi editie ntiense itip mbufo ikpe, onyuñ ata ikpọkidem mbufo nte ikañ. Mbufo emekọ inyene ebon ke mme akpatre usen emi.4Mbufo ikpehe kaña mme mmọ emi enamde utom ke mme iñwañ mbufo okuk utom mmọ. Ekpañ utọñ ekop uyo eseme mmọ. Eyet mme mmọ emi edọkde idọk ke iñwañ mbufo esim utọñ Abasi, ye Ọbọñ andikpon ñkan.5Uwem mbufo mi ke isọñ ọyọhọ ye nsọñurua ñkpọ ye mbiara inemesit. Mbufo emekuk idem mbufo ñkuhọ enyuñ ekponi, enim idem mbufo enọ usen nsobo.6Mbufo emetip ikpe enyuñ ewot enyemi miduehe ñkpọ, edi enye inyañake idem Esie ke ubọk mbufo.7Enyene ime ndien, nditọ ete mi, tutu Ọbọñ edi. Se nte ọtọ iñwañ enyenede ime onyuñ ebet tutu iñwañ esie oñwum ndiye mfri. Enye ebet ndaeyo ye edim ukwọ ke ime.8Mbufo ñko, enyene ndinyene ime. Emenede idorenyin mbufo ke enyọñ, koro usen edidi Ọbọñ ekpere.9Nditọ ete, ekusuk kiet eken uyo, man Abasi edikpe mbufo ikpe. Ekpe ikpe ada ekpere, odu ke mbeñeidem ndiduk ndi.10Nditọ ete mi, eti mme asiak uduak Abasi emi eketiñde ikọ ke enyiñ Ọbọñ. Da mmọ nte uwutñkpọ ime ke ndiyọ ukut.11Ñnyin idọhọ ite ke ọfọn ye mmọ koro mmọ ekeyọde ukut. Mbufo ema ekop ebaña ime Job, ndien emediọñọ se Ọbọñ akanamde ọnọ enye ke utit. Koro Ọbọñ ọyọhọde ye mbọm ye ima.12Ke ntak baba kiet, ekuda uñwọñọ ke ini emi mbufo enamde eñwọñọ. Ekuñwọñọ ke enyiñ Obio Ubọñ Abasi, mme ikpa isọñ, mme ke ñkpọ kiet ekededi. Ñkukure ñkpọ edọhọ “Ih” ke ini ediọñọde ete ke edi, ih, enyuñ edọhọ “Ih Ih” ke ini ediọñọde ete ke edi, Ih Ih, man mbufo ediduọ eduk ke utib ikpe Abasi.Edikọk Udọñọ Ye Edinọ Uñwam
13Nte owo ndomokiet odu ke otu mbufo emi odude ke afanikọñ? Yak enye ọbọñ akam. Nte owo ndomokiet okop inemesit? Yak enye ọkwọ itoro.14Nte owo ndomokiet odu ke otu mbufo emi ọdọñọde? Enye enyene ndikot mme adaidaha ufọk Abasi, edibọñ akam enọ enye enyuñ eda aran eyet enye ke enyiñ Ọbọñ.15Akam emi ebọñde ke mbuọtidem, eyekọk ọdọñọ udọñọ, Ọbọñ eyetọñọ ntak emenede enye esin ke nsọñidem, ndien eyefen enye kabaña kpukpru mme idiọkñkpọ emi enye akanamde.16Ke ntre, eyarade idiọkñkpọ mbufo enọ kiet eken, enyuñ ebọñ akam enọ kiet eken, man ekọk udọñọ mbufo. Akam edinen owo enyene odudu eti eti.17Elaiya ekedi ukem nte ñnyin, ndien enye ama Ọbọñ akam ke ofuri esit ete edim okudep, ndien edim ikedepke ke isọñ ke isua ita ye ubak.18Ini kiet efen, enye ama ọtọñọ ntak ọbọñ akam ndien ikpaenyọñ ama añwaña edim esie ndien isọñ ama osioño mme mfri esie.19Nditọ ete mi, edieke owo mbufo kiet oyode ọkpọñ akpanikọ, ndien owo kiet efen ada enye afiak edi,20eti emi ete: Owo ekededi emi ọwọñọrede anam idiọk ọkpọñ mme ukwañ usuñ esie, eyenyaña ukpọñ anam idiọk oro osio ke ñkpa, onyuñ anam edahado enọ enye ke mme ediwak ndudue esie.Biblica, Inc.